بە گوێرەی راپرسیی دامەزراوەیەك، ئەگەری بەرپابوونی شەڕ لە نێوان توركیا و یۆناندا ئەگەرێكی بەهێزە. دامەزراوەی “Public Issue”  بۆ راپرسی لە یۆنان ، لە شەقامی گشتی ئەو وڵاتەدا راپرسییەكی لەسەر كێشە و قەیران و ناكۆكییەكانی نێوان توركیا و یۆنان ئەنجامداوە. بە گوێرەی ئەنجامی راپرسییەكە 44%ی بەشداربووان باوەڕیان وایە كە ئەگەری بەرپابوونی شەڕ لە نێوان یۆنان و توركیا ئەگەرێكی بەرزە و رێژەیەكی زۆری یۆنانییەكان دەڵێن قەیرانەی نێوان ئەنكەرە و ئەسینا خۆی لە یەكێتی و سەروەری خاكی یۆناندا دەبینێتەوە و 16%شیان دەڵێن كێشەكە خودی توركیایە. 81%ی بەشداربووانی راپرسییەكە بڕوایان وایە كە پەیوەندییەكانی  یۆنان و توركیا بەراورد بە ساڵی رابردوو ئاڵۆزتر بووە و 2% یشیان دەڵێن پەیوەندییەكانیان بەرەوپێشدەچێت و 16% شیان دەڵێن پەیوەندییەكان ناگۆڕێن و وەك پێشووتر دەمێنێتەوە. هەروەها 37%ی بەشداربووانی راپرسییەكە بە شێوازی حكومەتی ئەسینا لە مامەڵەكردن لەگەڵ ئەنكەرە بە باش دادەنێن و 54% یشیان رووونیانكردوەتەوە كە لە ئەدای حكومەتی یۆنان رازی نین و 67%ی بەشداربوون  بە پێویستی دادەنێن توركیا نەبێتە ئەندامی یەكێتی ئەوروپا بەهۆی مامەڵەی خراپی لەگەڵ دراوسێكانیدا. لەماوەی رابردوودا توركیا لەسەر سنوری نێوان هەردوو وڵات دوو سەربازی یۆنانی دەستگیركرد بە تۆمەتی ئەوەی سنوریان تێپەڕاندوووە و چوونەتە ناوچەیەكی سەربازی قەدەغەكرا بۆ سیخوڕی، ئەوەش پەیوەندییەكانی نێوان ئەسینا و ئەنكەرەی ئاڵۆزكرد و سەرەڕای داواكاری حكومەتی یۆنان تا ئێستا توركیا ئازادی نەكردوون، جگە لەوەش ماوەیەكە ناكۆكی لەسەر دوورگەكانی دەریای ئیجە لە نێوان ئەو دوو وڵاتەدا سەریهەڵداوە و قەیرانی قوبرسیش كێشەیەكی دێرینی نێوان ئەو دوو وڵاتەیە و توركیا رەتیدەكاتەوە یۆنان لە ئاوە ئیقلیمییەكانی قوبرس گازی سروشتی دەربهێنێت. سەرچاوە: ماڵپەری زەمان  

رۆژنامەی هاوڵاتی لە ژمارە ( 1752 ) 2/5/2018 لە بابەتێكێكی نوسیویەتی 180 هەزار كەس لە كەمپەكانی هەرێم دەنگدەدەن  کۆمیسیۆنى باڵاى سه‌ربه‌خۆى هه‌ڵبژاردنه‌کانى عێراق 51 بنکه‌ى کردۆته‌وه‌ بۆ سه‌رجه‌م ئه‌و ئاوارانه‌ى که‌ له‌ که‌مپه‌کاندا ده‌ژین، که‌ 28  که‌مپیان ده‌که‌ونه‌ هه‌رێمی کوردستانه‌وه‌و  180 هه‌زار ده‌نگده‌ریان تێدایه‌. مازن عەبدولقادر، سەرۆکی دەستەی هەڵبژاردنەکانی هەرێمی کوردستان لە کۆمیسیۆنی باڵای هەڵبژاردنەکانی عێراق به‌ هاولاتى  راگه‌یاند «180هه‌زار ئاواره‌ که‌ مافی ده‌نگدانیان هه‌یه‌و له‌ که‌مپیه‌کانى هه‌رێمى کورستان نیشته‌جێن، ده‌نگده‌دن، جگه‌ له‌وانه‌ى له‌و ئاوارانه‌ى له‌ ده‌ره‌وه‌ى که‌مپه‌کانن و له‌ناو شاره‌کان نیشته‌جێن». ئه‌گه‌رچی حه‌یده‌ر عه‌بادی سه‌رۆکوه‌زیرانى عێراق شه‌ش مانگ له‌مه‌وبه‌ر کۆتایی هاتنى شه‌ڕی داعشی له‌ عێراق راگه‌یاند، به‌ڵام هێشتا به‌شێک له‌ئاواره‌کان نه‌گه‌ڕاونه‌ته‌وه‌ شوێنى خۆیان، ئه‌مه‌ش به‌هۆى وێرانبونى شاره‌کانیان و جێگیرنه‌بوونى دۆخى ئه‌منى به‌ ته‌واوه‌تى. ئه‌مه‌ جگه‌ له‌وه‌ى له‌دواى روداوه‌کانى 16ى ئۆکتۆبه‌ره‌وه‌، دانیشتوانى خورماتوو ئاواره‌ى هه‌رێمى کوردستان بوون. مازن عه‌بدولقار وتى «له‌ ماوه‌ى دوو سێ ساڵى ڕبردوودا هه‌وڵمانداوه‌ ناوى ئاواره‌کانى نێو کامپه‌کانى سنورى هه‌رێمى کوردستان تۆمار بکه‌ین، هه‌موو ئه‌وانه‌ى تۆمار کراون له‌ نێو که‌مپه‌کان بنکه‌ى ده‌نگدادنیان بۆ ده‌که‌ینه‌وه‌«. هه‌روه‌ها وتى «ژماره‌ى ئه‌و ئاوارانه‌ى له‌ نێو که‌مپه‌کان ده‌نگ ده‌ده‌ن و لامان تۆمار کراون (180هه‌زار) ده‌نگده‌رن، به‌ڵام ئه‌و ئاوارانه‌ى که‌ له‌ نێو شاره‌کان دابه‌ش بوونه‌ که‌ جووڵه‌ى دانیشتوانى پێده‌ڵێن ژماره‌یان نازانین به‌ڵام بنکه‌ى ده‌نگدادنیان بۆ ده‌که‌ینه‌وه‌«. جگه‌ له‌ که‌مپه‌کانى هه‌رێمى کوردستان، هه‌ندێکى تر له‌و که‌مپانه‌ ده‌که‌ونه‌ سنووری پارێزگان (موسڵ، که‌رکوک، سه‌ڵاحه‌دین، دیاله‌). ژماره‌ى بنکه‌کانى نێو هه‌رێمى کوردستان، 51 بنکه‌ى ده‌نگدانن، له‌ نێواندا که‌مپیى ئاواره‌کانى خورماتوو هه‌ن. مازن عه‌بدولقادر وتى «ئاواره‌کانى دووزخورماتووش ئه‌گه‌ر له‌ناو که‌مپدابن، له‌ناو هه‌ریه‌ک له‌و پارێزگایانه‌ى باسمان کرد گه‌ر له‌و بنکانه‌ ده‌نگده‌ده‌ن». ژماره‌ى ئه‌و بنکه‌ى ده‌نگدانانه‌شى که‌ له‌ نێو که‌مپى ئاواره‌کانى سنورى پارێزگاکانى (هه‌ولێر و سلێمانى و دهۆک) ده‌کرێنه‌وه‌ 28 بنکه‌ى ده‌نگدان ده‌بێت، که‌ تایبه‌تن به‌ ده‌نگدانى ئاواره‌کانى نێو که‌مپه‌کان، مازن عه‌بدولقادر بۆ هاوڵاتى له‌ باره‌ى ئامارى ده‌نگده‌ره‌ ئاواره‌کانى سنورى هه‌رێمى کوردستان

هەفتەی رابردوو ئیمانوێل ماكرۆن سەرۆكی فەرەنسا لە سەردانێكی رەسیمدا بۆ ئەمریكا درەختێكی بەخشییەوە دۆناڵد ترەمپ سەرۆكی ئەمریكا و لە كۆشكی سپیدا نێژرا، بەڵام ئێستا ئەو درەختە  دوار چوار رۆژ لە ناشتنی دیارنەماوە. درەختەكە ماكرۆن لە جۆری " بەڕووی ئەوروپی  بوون لە شوێنێكەوە هێنابووی لە باكوری خۆرهەڵاتی فەرەنسا كە گۆڕەپانی جەنگێك بووە لە شەڕی یەكەمی جیهانیدا و ماكرۆن لە مەراسیمی ناشتنیدا وتی " ئەم درەختە هەمیشە ئەو رایەڵانەمان بە بیردێنێتەوە مكە كۆماندەكاتەوە". وێنەگرێكی ئاژانسی هەواڵی رۆیتەرز رۆژی شەممە توانی وێنەیەكی جێگەی ناشتنی درەختەكە بگرێت و لە وێنەكەدا دەركەوتووە كە هەندێك لە گژوگیای زەرد دانراوە. ماكرۆن ئەو درەختەی لە شوێنی جەنگی " پیلۆ وود" ەوە هێنابووە ئەمریكا كە هاوینی 1918 روویدا و نزیكەی دوو هەزار سەرباز تێیدا كوژران. تا ئێستا بە رەسمی باس لە هۆكاری دیارنەمانی ئەو درەختە نەكراوە، بەڵام لە تۆڕی ئینتەرنێت چەند دەنگۆیەك لەسەری بڵاوكراوەتەوە. سایتی " فرانس ئینفۆ" دەڵێت ئەم جۆرە لە درەختی  بەڕوو باشترە لە وەرزی پاییزدا بنێژرێت، بۆئەوەی رەگەكەی  بچێتە قوڵایی و بەرگەی گەرمای هاوینی داهاتوو بگرێت و پێشبیدەكات درەختەكە جارێكی تر و لە تشرینی یەكەمی داهاتوو بهێنرێتەوە. سایتی " هاڤینگتۆن پۆست" یش لە سەر زاری بەرپرسێكی مكۆشك ئەلیزێەوە رایگەیاند درەختەكە ئێستا پشكنینی بۆ دەكرێت. هەروەها سایتی دەستەی دیوان و پاراستنی ئەمریكا رایگەیاند" رووك و درەختە بیانییەكان كە پێویستە بڕوێنرێن پێویستە بڕوانامەی تەندروستی رووەكییان لەگەڵدا بێت پێش ئەوەی  بێنە وڵاتەوە." دیارییەكەی سەرۆكی فەرەنسا لە میدیاكان و تۆڕی ئینتەرنێت بایەخت زۆری پێدرا و هەر زوو وێنەی ترەمپ و ماکرۆن ، هاوسەرەکانیان بڵاوبووەوە كە درەختەكە لە كۆشكی سپی دەنێژن. سەرچاوە: تۆڕی بی بی سی

توێژەرانی زانكۆی داندی بەریتانیا رێگایەكی نوێیان بۆ دەستنیشانكردن و چارەسەركردنی شێرپەنجەی پرۆستات دۆزییەوە. زانكۆكە رایگەیاند شێوازی شەپۆلەكانی سەروو دەنگ (  Ultrasound ) " زۆر وردتر و متمانەیەكی بەهێزتری " هەیە لە گەیشتن بە ئەنجام لە رێگاكانی تر و هەروەها خەرجیشی زۆر كەمترە. شێرپەنجەی پرۆستات یەكێكە لە بەربڵاوترین ئەو شێرپەنجانەی كە تووشی پیاوان دەبن لە بەریتانیا. ستیڤن فرای راگری پێشووی زانكۆكە كە نەشتەرگەرییەكی بۆ لابردنی گرێیەكی شێرپەنجەی پرۆستات بۆ كراوە ئەو دۆزینەوەی بە " زۆر باش" وەسفكرد. ساڵانە 47 هەزار حاڵەتی نوێی تووشبون بە شێرپەنجەی پرۆستات لە بەریتانیا دەستنیشاندەكرێت و یەكێك لەو شێوازە باوانەی كە بۆ دەستنیشانكردنی دەگیرێتەبەر بریتیە لە پشكنینی خوێن،  تیشكی موگناتیسی و پشكنین بە پەنجە. زانكۆی داندی دەڵێت هەموو شێوازێك لەو شێوازانە چەند كێشەیەكی لێدەكەەوێتە و ئەم شێوازە نوێیەش كە بریتیە لە بەكارهێنانی " شەپۆلی سەروو دەنگ" لەسەر 200 نەخۆش تاقیكراوەتەوە. شێوازە نوێکە زۆر وردترەو لە شێوازەکانی تر و خەرجیشی کەمترە خانە شێرپەنجەییەكان ئەوانەن كە زۆر چڕترن لە خانەی ئاسایی، بەڵام هێواشی شەپۆلی سەروو دەنگ دەتوانێت تێكیان بشكێنێت و ئەم تەكنۆلۆژیایە توانیوێتی 98%ی ئەو حاڵەتانە دەستنیشان بكات كە تووشی شێرپەنجەی پرۆستات بوون و هەروەها چەند جۆرێكی تری شێرپەنجەی زۆر مەترسیدارتری دەستنیشانكردووە، بە تایبەتی ئەو جۆرە شێرپەنجانەی كە لە دەرەوەی پرۆستات بڵاودەبنەوە. پرۆفیسۆر غوڵام نەبی مامۆستای نەشتەگەری لە زانكۆكە دەڵێت:" شێرپەنجەی پرۆستات، یەكێك لە و جۆرانەی كە زۆر قورس دەستنیشاندەكرێت، ئێمە ئێستا زۆر بە وردی دەستنیشانی ناكەین و ئەوەش دەبێتە هۆی ئەوەی كە چارەسەری ناپێویست بۆ زۆربەی نەخۆشەكان دابنێین". پرۆفیسۆر نەبی بەم جۆرە ئەم شێوازە نوێیە وەسفدەكات "وەك ئەوەی ژوورێكی تاریك رووناك بكەیتەوە" و دەشڵێت:" چەند حاڵەتێكمان بۆهات كە لە رێگەی شەپۆلی سەروو دەنگەوە دەستنیشانكرابوون و ئەشیعەی موگناتیسی نیشانی نەدابوو، ئێستا دەتوانین زۆر بە وردی خانە شێرپەنجەییەكان ببینین، و شوێنەكەی دیاریبكەین و چارەسەری گونجاوی بۆ بكەین." سەرچاوە: BBC    

پاسەوانی تایبەتی ئوسامە بن لادن سەركردەی پێشووی رێكخراوی قاعیدە لە ساڵی 1997 ەوە لە ئەڵمانیا دەژی، مانگانەش 1168 یۆرۆ وەك موچەی سۆسیال وەردەگرێت. حكومەتی هەرێمی باکوری راین و ستڤالیا كە پاسەوانەكەی بن لادنی لێ دەژی لەسەر داوای پارتی " ئەڵتەرناتیڤی ئەڵمانیا" كە پارتێكی راستڕەوی توندەڕوە، مووچەی ئەو پاسەوانەی ئاشكراكرد و زانیاری لەسەر ئەو پاسەوانە ئاشكراكرد كە بە " سامی أ" ناودەبرێت و بە رەگەو تونسییە و میدیاكانی ئەڵمانیاش ناوی تەواوەتی ئەو پاسەوانەی بن لادنیان بە نهێنی هێشتوەتەوە. پاسەوانەكەی بن لادن رەتیدەكاتەوە هیچ پەیوەندییەكی بە كردەوە جیهادییەكانەوە هەبێت و لەبەر مەترسی رووبەڕووبوونەوەی ئەشكەنجەش بۆ تونس دیپۆرت نەكراوەتەوە. ئوسامە بن لادن سەرۆكی پێشووی رێكخراوی قاعیدە تیشكی سەوزی بۆ هێرشەكانی ییی سێپتەمبەر هەڵكربووە كە ساڵی 2001 ئەمریكایان كردە ئامانج و دواتر هێزێكی تایبەتی ئەمریكا ساڵی 2011 لە پاكستان توانیان بن لادن بكوژن، سێ‌ كەس لەو فڕۆكەوانانەی كە هێرشەكەی 11 سێپتەمبەریان جێبەجێكردن ئەندامەی شانەیەكی سەر بە رێكخراوی قاعیدە بوون كە بنكەی سەرەكیان لە شاری هامبۆرگی باكوری ئەڵمانیا بوو. شایەدحاڵێك دەڵێت سامی ساڵی 2000 وەك یەكێك لە پاسەوانە تایبەتەكانی بن لادن لە ئەفغانستان كاریكردووە و ئەو خۆی رەتیدەكاتەوە پەیوەندی پێوە هەبێت، بەڵام دادوەرانی دادگایەتی شاری دوسڵدۆرف بڕوایان بە قسەی شایەدحاڵەكەیە و بە راستی دادەنێن. سامی ئێستا لەگەڵ هاوسەرە ئەڵمانییەكەی و چوار منداڵی لە شاری بوخۆمی خۆرئاوای ئەڵمانیا دەژی و چەند خولێكی لە بواری تەكنۆلۆژیا بینیەوە و دوای ئەوەی ساڵی 1999 مانەوەی كاتی لە ئەڵمانیا پێبەخشراوە و پاشان ساڵی 2005 چووەتە شاری بوخۆم. دەسەڵاتدارانی ئەڵمانیا ساڵی 2007 رەتیانكردەوە مافی پەنابەرێتی بە سامی ببەخشن، لەبەرئەوەی ناوی لە لیستی ئەو كەسانەدا بوو كە مەترسی ئەمنییان هەیە، لەبەرئەوە پێویشتە رۆژانە لە پەیوەندیدا بێت لەگەڵ بەشی پۆلیسدا. حكومەتی ئەڵمانیا دەڵێت جیهادییە گومانلێكراوەكانی خەڵكی وڵاتانی باكوری ئەفریقا مەترسی ئەوەیان لەسەرە رووبەڕووی ئەشكەنجەدان ببنەوە، لەبەرئەوە تونس و وڵاتانی عەرەبی دراوسێی لە لیستی ئەو وڵاتانەدا نیە كە پەنابەرانی بۆ دیپۆرت بكرێتەوە. وەرگێڕانی: نامیق رەسوڵ  سەرچاوە: تۆڕی بی بی سی  

ئامادەكردن و وەرگێڕانی/ ئاسۆ جەبار - واشنتۆن  مانگی ئۆکتۆبەری ساڵی پێشوو لەسەروەختی قەیرانە سیاسییە هەر گەورەکانی هەرێمی کوردستاندا نامەیەک لەلایەن بەڕێوبەری باڵای کاروباری نەوت رۆزنەفت ئایگۆر سێشین لە کرملینەوە دەگاتە دەستی  وەزارەتی نەوتی عێراق لە بەغدا   بەر لە پێشکەشکردنی وتاری ساڵانەی خۆی سەبارەت بە رەوشی وڵات لەبەردەم کۆمەڵەی فیدڕاڵی لە مۆسکۆ لە یەکی مانگی سێی 2018 دا سەرۆکی روسیادا ڤیلادیمیر پوتین، سەرپەرشتیاری جێبەجێکاری رۆزنەفت ئیگۆر سێشنی بینیوە.  سێشن لە نامەیەکدا کە کۆپییەکی لەلای رۆیتەرز پارێزراوە دەنوسێت "حکومەتی ناوەندی بەغدا سەبارەت بە پێشنیازەکەی رۆزنەفت هەڵوێستێکی بونیادنەرانەو بایەخدەرانەی نەبوو بۆ پەرەپێدانی کێڵگە نەوتییەکانی باکوری عێراق".  کوردستان هەرێمێکە کە دانیشتوانەکەی نزیکەی 6 ملیۆن کەسە کەوتۆتە باکوری عێراقەوە، کە لەو دواییانەدا هەوڵیاندا و شکستیان هێنا لە جیابوونەوە لە تەواوی وڵاتەکە. بەغداد بە ریفراندۆمەکەی 25 ی سێپتەمبەری کوردەکان کە بۆ سەربەخۆیی بوو رازینەبوو؛ هاوکات هێزەکانی نارد بۆ کۆنترۆڵکردنی کێڵگە نەوتییەکانی کوردستان کە سەرچاوەگەلێکی دارایی سەرەکی بوو بۆیان.  ئێستاکە سێشن نزیکترین هاوپەیمانەکانی ڤلادیمێر پوتینی سەرۆکە، وتبووی بە رەچاوکردنی راڕایی بەغدا سەبارەت بە کارکردن لەگەڵ کۆمپانیای رۆزنەفتدا، لەبری ئەوە کۆمپانیاکە هەڵدەستێت بە سازکردنی کاروباری بازرگانی لەگەڵ حکومەتی هەرێمی کوردستاندا، کە وادیارە بایەخدانێکی زۆر هەیە بۆ بەرفراوانکردنی هەماهەنگییە ستراتیژییەکان.    زلهێزەکانی جیهان کە ولایەتە یەکگرتووەکان و یەکێتی ئەوروپاش پێشتر هاوسۆزی خۆیان لەبارەی هەڵمەتی سەربەخۆیی کوردستانەوە دەربڕیبوو، بەڵام لەکۆتاییدا عێراق دڵنیادەکەنەوە کە دان بە قەڵەمڕەویەکەیدا بنێن بەسەر تەواوی عێراقدا؛ کە کوردستانیش دەگرێتەوە. بەڵام لەنامەکەی سێشین دا هیچ ئاماژە نەدراوە بەو رێككەوتنە. لەکاتێکدا رۆزنەفت بەڵێنیداوە لەبەرامبەر توڕەیی بەغدادا ملیارەها دۆلار لە کوردستان وەبەربهێنێت؛  ئێستاش لەبری پەشیمان بونەوە، وەبەرهەمهێنانەکە بووە بە دەبڵ. بەپێی حەوت سەرچاوە کە ئاشنای ئەو کێشەیەن، سێشن دەستێکی باڵاو بەهێزی هەبووە بەبەراورد بە درککردنی زۆرێک لە کاربەدەستانی عێراق. بەرلە چەند رۆژێک؛ کۆمپانیای رۆزنەفت بەرامبەر 1.8 ملیار دۆلار دەسەڵاتی خاوەندارێتی بۆرییە نەوتەکانی هەناردەکردنی نەوتی کوردستانی گرتەدەست، کە لە هەرێمەوە بەرەو تورکیا دەڕوات.  بەپێی سەرچاوەکانی وەک رۆزنەفت و پیشەسازی نەوت و کوردەکان و حکومەتی عێراقیش؛ مەبەستی رێکكەوتنەکە بۆ رۆزنەفت تەنها کارێکی بازرگانی نەبوو، بەڵکو بۆ پەرەپێدانی کاریگەری دەستڕۆیشتوویی سیاسەتی روسیا بوو لە عێراق و رۆژهەڵاتی ناوەڕاستدا. کۆنتڕۆڵکردنی شابۆرییە نەوتەکان وا لە رۆزنەفت دەکات کە رۆڵێکی سەنتەری هەبێت لەو وتوێژانەی نێوان هەرێمی کوردستان و بەغدادا بە مەبەستی هەناردەکردنی تەواوەتی نەوت؛ ئەوەی کە بە هۆی ریفرندۆمەکەوە کۆنترۆڵکردنی کێڵگە نەوتییەکانەوە لەلایەن عێراقەوە لەکارکەوتبوو یان هەڵوەشابوەوە. کوردستان خاوەنی نەوتێکی یەدەکی زۆرە، کە دەکاتە سێ بەشی تەواوی نەوتی یەدەکی عێراق؛ لەبەرئەوە هەناردەکانی تێکڕا ئابوری هەرێمی و نیشتیمانی پێکەوە دەبوژێنێتەوە. هاوکات وەزارەتی نەوتی عێراق هیچ سەرنجێکی لەبارەی لایەنە سیاسییەکانی رێکكەوتنەکەی رۆزنەفتەوە نەخستوەتەڕوو. لەکارەکاسەوە بۆ نیودلهی سەرچاوەکان دەڵێن رەفتارەکانی رۆزنەفت لە کوردستان؛ ئەو هەرێمەی کە دەمێکە هاوپەیمانی ولایەتە یەکگرتووەکانی ئەمریکایە، وەستاوە لەسەر ئەوەی کە کرملین چۆن بە چاوێکی تیژەوە رۆزنەفت و بەڕێوبەرە جێبەجێکارەکەی بەکاردەهێنێت وەک ئامرازێك بۆ سیاسەتی دەرەوەی روسیا لەتەواوی جیهاندا؛ واتە لەهەولێرەوە تا کاراکاس و نیودلهی. کۆبوونەوەکەی مۆسکۆ کوردەکان دەمێکە ئەوە دەڵێن کە هەرێمە ئۆتۆنۆمییەکەی کە لە عێراقدا هەیانە دەسەڵاتی ئەوەشیان هەیە کە رێکكەوتن لەگەڵ کۆمپانیا بیانییەکاندا بکەن لەبارەی دەرهێنانی نەوت لەناوچەکانی ژێر دەسەڵاتیاندا. لەساڵی 2014 دا دەستیانکرد بە هەناردەکردنی سەربەخۆییانەی نەوت بۆ تورکیا.  بەڵام حکومەتی ناوەندی عێراق دەڵێت هەرچۆنێک بێت هەر رێکكەوتنێکی کوردەکان و هەر هەناردەکردنێکی نەوتی کوردستان بەبێ رەزامەندی بەغدا نایاساییە.   روسیا تاکە وڵاتی زلهێز بوو کە دژی ریفراندۆم نەبوو و وتیان کە ئەوان لە خواستی سەربەخۆیی کوردەکان تێدەگەن. بەڵام ویلایەتە یەکگرتووەکانی ئەمریکا و یەکێتی ئەوروپا و تورکیا و ئێران تێکڕا چەند هەفتەیەک بەر لە ریفراندۆمەکە داوایان لە هەولێر کرد کە راپرسییەکە نەکەن یان دوای بخەن.     لەکاتێکدا وەزیری دەرەوەی ئەمریکا رێکس تێلیرسن ناسەرکەوتوانە لەهەوڵی ئەوەی دابوو کە راپرسیی کوردەکان بۆ سەربەخۆی دوابخات، بەڵام سێشین سەرقاڵی رێکكەوتنامەی بۆرییە نەوتەکان بوو. بەپێی سەرچاوەکان هەر دوابەدوای ریفراندۆمەکە، کاربەدەستانی کورد بە ئاشتی هەورامی وەزیری سامانە سروشتییەکانیشەوە فڕین بەرەو مۆسکۆ بۆ بینینی بەڕێوبەری جێبەجێکاری رۆزنەفت و کاربەدەستانی وەزارەتی دەرەوەی روسیا. لە ٢٠ ئۆکتۆبەردا هەر دوابەدوای ئەو فەوزایەی پاش ریفراندۆم؛ دەمودەست میلیشیا شیعە عێراقییەکان کە لەلایەن هێزەکانی ئێرانەوە پشتیوانی دەکرێن هەستان بە داخستن و بێبەشکردنی هێزەکانی پێشمەرگە لە کێڵگە نەوتییەکانی کەرکوک و سیشینیش هەستا بە داخستنی گرێبەستەکە. رۆزنەفت دوایەمین بڕە پارەی رێکكەوتنەکەی داوە بە هەولێر کە دەکاتە 1.8 ملیار دۆلار، رۆزنەفت و سێشن هەردوکیان ئەوەیان ئاشکرا نەکردووە لەکاتێکدا هەردووکیان دەچنە خانەی ملکەچبوونەوە بۆ سزاکانی رۆژئاوا بەرامبەر روسیا پەیوەست بە کریماوە، بەڵام کۆمپانیاکە بە هیچ شێوەیەک ئەوەی ئاشکرانەکردووە کە پارەی بۆرییە نەوتییەکانی داوە.

رۆژنامەی حەیات بەغدای پایتەختی عێراق زنجیرەیەك كۆبوونەوەی نێوان هێزە سیاسییە جیاوازەكانی بەخۆیەوە بینیوە بۆ رەخساندنی كەشێكی گونجاو بۆ دیاریكردنی حكومەتی داهاتوو، بە پشت بەستن بە بڕیارێكی  ساڵی 2010ی دادگای فیدراڵی عێراق كە جەختدەكاتەوە " گەوەرترین كوتلە" ئەو كوتلەیە كە دوای هەڵبژاردن پێكدەهێنرێت، نەك ئەو كوتلەیەی زۆرینەی كورسییەكانی لە هەڵبژاردندا بە دەستهێناوە. چەند سیاسەتمەدارێكی كوتلە جیاوازەكانی عێراق ئاشكرایان كرد دانوستان و گفتوگۆی جدی بۆ پێكهێنانی حكومەتی داهاتوو و دابەشكردنی پۆستە سیادییەكان و دواخستنی ناكۆكییەكان لەسەر چەند پۆستێك دەستیپێكردووە. هێزە سونییە جیاوازەكان بە بانگهێشتنی سەلیم جبوری سەرۆكی پەرلەمان بۆ یەكخستنی هەڵوێستیان كۆبوونەوە بەوتەی ئەوانەی لە كۆبوونەكەوە نزیك بوون، لەناو كوتلە سونییەكاندا ناكۆكی هەیە لەسەر وەرگرتنی پۆستی سەرۆك كۆمار یان سەرۆكی پەرلەمان و زۆرینەی كوتلە سونییەكان بەباشی دەزانن پارێزگای لە پۆستی سەرۆكی پەرلەمان بكەن و ئەو پۆستە بەدەستبهێننەوە. هەر سەبارەت بە هەمان پرس چەند سەرچاوەیەك ئاشكرایانكرد كە هاوكات لەگەڵ نزیكبوونەوەی هەڵبژاردن، ناكۆكی نێوان هێزە شیعەكانیش فراوان دەبێت، بەڵام لە چەند رۆژی رابردوودا چەند كۆبوونەوەیەك لە نێوان سەركردەی كوتلە سەرەكییەكانی شیعەدا بەڕێوەچووە و گەیشتونەتە رێككەوتنێك لەسەر پێكهێنانی " هاوپەیمانی نیشتمانی" یان هەڵبژاردنی ناوێكی تر  بۆ دیاریكردنی سەرۆك وەزیرانی حكومەتی داهاتوو و دەستكردن بە دانوستان لەگەڵ كوتلە سوننەكان و كورددا لەسەر ئەو پرسە، ئەوەش لە كاتێكدایە هەندێك كوتلەی تر باوەڕیان وایە كە لە هەڵبژاردنی 2018دا گەورەترین كوتلە لە چوارچێوەی " زۆرینەی سیاسیی" دا پێكدەهێنرێت و هەندێك ركابەر بەرەو ئۆپۆزسیۆن بوون دووردەخرێنەوە. وەرگێڕانی : نامیق رەسوڵ  

ژیلوان حەمەد یاریزانی كوردی یانەی هامەربی سوید  وەك یاریزانێكی هەڵبژاردەی تۆپی پێی سوید بەشداری مۆندیالی روسیا دەكات كە حوەزیرانی ئەمساڵ بەڕێوەدەچێت. ژیلوان ئەمساڵ ئاستێكی بەرزی لەگەڵ یانەكەی " هامەربی" نیشاندا و ئێستا ئەو یانەیە بە كۆكردرنەوەی نۆ خاڵ پێشەنگی ریزبەندی خولی نایابی سویدی گرتووە و ژیلوانیش بە تۆماركردنی پێنج گۆڵ تا ئێستا گۆڵكاری خولەكەیە. ژیلوان لە بارەی بانگهێشتكردنی بۆ هەڵبژاردەی سوید و بەشداریكردنی لە مۆندیالی روسیا وتی: " ئەوە خەونێكی گەورەیە، دەزانم چی پێویستە بیكەم، دەزانم تەنها لە پێكهاتەكەدا نابم، بەڵكو بە شێوازی تایبەتی خۆم بەشداری دەكەم و بڕوام وایە ئەوان تایبەتمەندییەكانم دەزانن،  هەستدەكەم لەو جۆرەم كە پێویستە لە ریزی هەڵبژاردنی سویددا بم، بەڵام بڕیار تەنها لەدەستی مندا نییە ، من تەنها دەبێت بەردەوام بم لەسەر ئاستم." ژیوان وتیشی: " بەردەوان دەبم لەو كارانەی ئەنجامیدەدەم، هەوڵەكانم لەسەر یاریەكانم هامەربی چڕدەكەنەوە و هەتا ئەوەی  بتوانم بەردەوام دەبم،  كارێكی خۆشە كە دەتوانم ئەوەی پلانی راهێنەر بە پێویستی دەزانێت جێبەجێی دەكەن، هەروەك چۆن لەم یاریانەی دواییدا كردم." لایخۆشیەوە راهێنەری هەڵبژاردنی سوید جینی ئەندرسۆن وتی: " لە بەهاردا چاودێری ژیلوانم كرد كارێكی باشی كرد و بە رەهای ركابەری دەكات." ئەندرسۆن وتیشی:" سەبارەت بە لیستی یاریزانەكانمان، ژیلوان و چەند یاریزانێكی تری تێدایە، ئەو كارێكە باشی كرد و پاڵێوراوێكی بەهێزە بۆ ئەوەی لەگەڵ هەڵبژاردەكەدا بێت، ئەوە دەبینین." ژیلوان حەمەد ساڵی 1990 لە باكۆی پایتەختی ئازەربایجان لە دایكبووە و باوك و دایكی خەڵكی شاری رانیەی هەرێمی كوردستانن و  تا ئێستا بۆ چەند یانەیەكی بەناوبانگی سوید و بەلجیكا و ئەڵمانیا یاری كردووە و رەگەزنامەی عێراق و سویدی هەیە. سەرچاوە: سایتی دیجلە    

ئۆزتورك یەڵماز، جێگری سەرۆكی پارتی گەلی كۆماری توركیا " جەهەپە" و كونسوڵی پێشووی توركیا لە شاری موسڵی عێراق بەنیازە خۆی بۆ هەڵبژاردنی سەرۆكایەتی توركیا كاندید بكات، ئەگەر كەمال كلیچدار ئۆغڵۆ سەرۆكی حزبەكە خۆی كاندید نەكات. بە گوێرەی هەواڵێكی سایتی" تورك پرێس" یەڵماز رۆژی هەینی لە كۆنفرانسێكی رۆژنامەوانیدا لە پەرلەمانی توركیا لە ئەنكەرە رایگەیاندووە پشتگیری لە كەمال كلیچدار ئۆغڵۆ سەرۆكی جەهەپە دەكات ئەگەر خۆی بۆ هەڵبژاردنی سەرۆكایەتی 24ی حوەزیرانەی داهاتوو كاندید بكات، و ئەگەر وا نەبێت ئەوا، خۆی بۆ ئەو هەڵبژاردنە كاندید دەكات دوای وەرگرتنی رەزامەندی سەرۆكی حزبە و ئەندامانی تری حزبەكە.      

برۆكسل( رۆیتەرز) – نوسینگەی ئاماری یەكێتی ئەوروپا " یۆرۆستات" ئەمڕۆ پێنجشەممە رایگەیاند یەكێتیەكە لە ساڵی 2017دا مافی پەنابەرێتی بە نیو ملیۆن پەنابەر بەخشیوە و پشكی ئەڵمانیاش لەو ژمارەیە 60% زیاتر بووە. ئەم ژمارەیەی ساڵی 2017 چارەكێك كەمترە لەوانەی كە لە ساڵی 2016دا مافی پەنابەرێتییان پێبەخشراوە، ئەوەش دوای ئەوەی ساڵی 2015 شەپۆلێكی كۆچ بەرەو ئەوروپا دەستیپێكرد و كاریگەری خستە سەر سیستمی پەنابەرێتی و چۆنێتی مامەڵەكردن لەگەڵ ئەو قەیراندا ناكۆكی سیاسیی لێكەوتەوە. بە گوێرەی یۆرۆستات پەنابەرانی سوریا لە پێشینەی ئەوانەن كە لە 2017دا مافی پەنابەرێتیان وەرگرتووە و دوای ئەوانیش پەنابەرانی ئەفغانستان و پاشان عێراق دێن. لەسەر ئاستی تاكیش زۆرترین ژمارەی پێدانی مافەی پەنابەرێتی لە ئەڵمانیا بووە و دوای ئەویش نەمسا و سوید دێن و سلۆڤاكیا و چیك و پۆڵەنداش لە خوارەوەی ریزبەندییەكەدان لە وەرگرتنی پەنابەراندا و هاوڵاتیانی سوریا و ئەریتریا زیاتر چانسی وەرگرتنی مافی پەنابەرێتیان هەبووە و لە هەر دە كەسێك نۆ كەسیان مافی پەنابەرێتیان وەرگرتووە، بەڵام كۆچبەرانی ئەلبانیا و كۆسۆڤۆ كەمترین چانسی وەرگرتنی مافی پەنابەرێتیان هەبووە.  

ئەڵمانیا رەزامەندی دەربڕی لەسەر وەرگرتنی 10 هەزار پەنابەر لە خۆرهەڵاتی ناوەڕاست و ئەفریقا. دیمتریس ئەفرامۆپۆڵۆس كۆمسیاری ئەوروپا بۆ كاروپاری پەنابەران راگەیاند حكومەتی ئەڵمانیا رەزامەندی دەبڕیوە لە چوارچێوەی پرۆگرامی " دووبارە نیشەجێكردن" یەكێتی ئەوروپا پێشوازی لە 10 هەزار پەنابەری باكوری ئەفریقا و خۆرهەڵاتی ناوەڕاست بكات. كۆمسیاری یەكێتی ئەوروپای تایبەت بە كاروباری پەنابەران ستایشی هەڵوێستی حكومەت ئەڵمانیاشی كرد كە هاوكاری كۆمەڵگەی نێودەوڵەتی دەكات لە كاتی پێویستدا و راشیگەیاند وڵاتانی تری ئەوروپاش رەزامەندیان لەسەر وەرگرتنی 40 هەزار پەنابەر دەربڕیوە لە چوارچێوەی ئەو پرۆگرامەدا. پرۆگرامی كۆمسیۆنی یەكێتی ئەوروپا بۆ كاروباری پەنابەران پلاندادەنێت بۆ پێشوازیكردن لە 50 هەزار پەنابەری باكوری ئەوروپا و خۆرهەڵاتی ناوەڕاست و نیشتەجێكردنیان لە یەكێتی ئەوروپا بە شێوازێكی سەلامەت و یاسایی لەبری ئەوەی پەنابەران رێگای مەترسیدار و كۆچی نهێنی بگرنەبەر. سەرچاوە : DW بەشی عەرەبی      

كۆمسیارێكی یەكێتی ئەوروپا رایگەیاند توركیا بە شێوەیەكی خێرا لە رێچكەی بوون بە ئەندام لە یەكێتی ئەوروپا دووردەكەوێتەوە و لە راپۆرتێكدا داوا لە حكومەتی ئەنكەرە دەكات باری نائاسایی كۆتایی پێبهێنێت. یۆهانس هان كۆمسیاری یەكێتی ئەوروپا و بەرپرس لە دانوستانەكانی كەیسی توركیا لە كۆنفرانسێكی رۆژنامەوانیدا وتی" توركیا بەردەوام بە هەنگاوی گەورە لە یەكێتی ئەوروپا دووردەكەوێتەوە بە تایبەتی لە بواری سەروەری یاسا و مافە بنەڕەتییەكاندا". ئەو بەرپرسەی یەكێتی ئەوروپا وتیشی " كۆمسیۆنی یەكێتی ئەوروپا چەندینجار داوای لە توركیا كردووە لەو ئاراتە نەرێنییە بكشێتەوە و بەو پێیەی ئەوە كارە لە پێشینەیە." ماڵپەڕی رۆژنامەی زەمان وەرگێڕانی: نامیق رەسوڵ  

رۆژنامەی وۆڵ ستریت جۆرناڵی ئەمریكی رایگەیاند ولایەتە یەكگرتووەكانی ئەمریكا هەوڵدەدات هێزێكی عەرەبی لە جێگەی هێزەكانی لە سوریا جێگیربكات. رۆژنامەكە راپۆرتێكی رۆژنامەنووس مایكڵ گۆردۆنی بڵاوكردەوەتەوە و تێیدا ئاشكراكراوە كە دۆناڵد ترەمپ سەرۆكی ئەمریكا هەوڵدەدات بۆ مانەوەی هێزەكانی لە سوریا دوای كۆتاییهاتنی داعش خەرجی ئەو هێزانە لە وڵاتانی عەرەبی دابیبكات. راپۆرتەكە ئاماژەبەوەشدەدات كە ئیدارەی ترەمپ لە هەوڵی ئەوەدایە لە كاتی كشانەوەی هێزەكانی لە سوریا و رۆژئاوای كوردستان  كە نزیكەی دوو هەزار سەربازن، هێزێكی عەرەبیی لە شوێنیان جێگیربكات. رۆژنامەكە ئاشكراشیكردووە راوێژكاری نوێی ئاسایی نەتەوەیی ئەمریكا جۆن بۆڵتۆن ماوەیەك لەمەوبەر پەیوەندی بە بەڕێوەبەری هەواڵگری گشتی میسریی عەباس كامیلەوە كردووە و بۆئەوەی بزانرێت كە ئایا قاهیرە ئامادەیە بەشداری لەو پرۆسەیەدا بكات. وۆڵ ستریت جۆرناڵ ئاماژەیبەوەشداوە كە واشنتۆن داواشی لە ئیمارات و قەتەر و سعودیە كردووە بە چەند ملیار دۆلارێك بەشداری بكەن لە دووبارە بونیادنانەوەی باكوری سوریا و دەیەوێت ئەو وڵاتانی هێز ئەوانەی باكوری سوریا بكەن. ئەم هەوڵەی ئەمریكا لە كاتێكدایە كە لە ماوەی رابردوودا دۆناڵد ترەمپ سەرۆكی ئەمریكا رایگەیاند بەمزوانە هێزەكانی لە باكوری سوریا دەكشێنێتەوە و سوریا بۆ لایەنەكانی تر بەجێدەهێڵێت.    

بەشار ئەسەد سەرۆكی سوریا ئاشكرایكرد كە ساڵی رابردوو منداڵەكانی پشووی خۆیان لە " ئەرتیك" بەسەربردووە كە كەمپێكی بەناوبانگی گەنجانە لە كەناری دەریای رەش. ئەسەد دوو كوڕ و  یەك كچەی هەیە، حافز ( 16 ساڵ ) و كەریم ( 13 ساڵ ) و كچەكەشی ناوی زین ( 14 ) ساڵە. ئەرتیك لە سەردەمی یەكێتی سۆڤیەتدا فێرگەی بەهاكانی شیوعیەت بوووەو ئێستا هاوینەهەوارێكە و مایەی سەرنجی چەندین كەسە و كەمپەكە دەكەوێت نیمچە ددوورگەی كریمیا كە روسیا ساڵی 2014 لە ئۆكرانیای داگیركرد. بەوتەی پەرلەمانتاری روسیا دیمیتری ساپلین كە رۆژی یەكشەممە لەگەڵ ئەسەددا كۆبووەوتەوە ئەسەد وتویەتی:" منداڵەكانم ساڵی رابردوو لە ئەرتیك بوون، دوای گەشتێكیان بۆ باشتر تێگەیشتن لە روسیا." بەڕێوەبەری كەمپی ئەرتیك ئەلێكسای كاسپارزاك بە " بی بی سی " راگەیاتد ئاگاداری هاتنی منداڵەكانی ئەسەد نەبوون بۆ كەمپەكە، وتی :" ئەو منداڵانەی دێنە لای ئێمە هەندێكجار ناوی دایك و باوكیان ئاشكراناكەن". بەڵام وتیشی ناوی " ئەسەد" مشتومڕی لەناو كەمپەكەدا دروستكردووە و بۆمان روونبوەتەوە كە ئەوانە منداڵی بەشار ئەسەدن. هاوكات ریاز حەداد باڵیۆزی سوریا لە مۆسكۆ ساڵێك لەمەوبەر رایگەیاند منداڵەكانی ئەسەد خۆیان فێری زمانی روسی دەكەن و زمانی روسیاش، یەكێكە لەو زمانە بیانییە سەرەكیانەی كە لە خوێندنگەكانی سوریادا دەخوێندرێت و چەندین هاوڵاتی سوریاش لە خۆشەویستیان بۆ ڤلادیمێر پۆتن سەرۆكی روسیا منداڵەكانیان ناوناوە پۆتن. وەرگێڕانی: نامیق رەسوڵ سەرچاوە: بی بی سی    

بەشداری نەكردنی ئەڵمانیا لە هێرشە سێ‌ قۆڵییەكەی ئەمریكا و بەریتانیا و فەرەنسا بۆسەر سوریا لەلایەن سیاسەتمەدارانی ئەڵمانیاوە پێشوازی لێكرا  بەڵام بەشێكیان بە پێویستی دەزانن بەرلین وەك نێوەندگیرێكی بێ‌ لایەن رۆڵ بگێڕێت لە چارەسەركردنی قەیرانەكەدا، و رۆژنامەكانی ئەڵمانیاش تیشكیان خستوەتەسەر ئەو مشتومڕەی سەبارەت بەو پرسە هاتوەتە ئاراوە. لەو چوارچێوەیەدا رۆژنامەی " هاندلسپلات" رەخنەی لە بەشدارینەكردنی ئەڵمانیا لە هێرشەكەی سەر سوریا گرتووە و ئاماژەیبەوەداوە كە ئەوە لەگەڵ قەبارەی وڵاتێكی وەك ئەڵمانیادا ناگونجێت  و نوسیویەتی " لە كاتێكدا كە هێزی ئاسمانی ئەمریكا بە پشتیوانی بەریتانییەكان و فەرەنسییەكان لە تۆڵەی هێرشی چەكی كیمیایی دژی هاوڵاتیانی مەدەنی گورزێكیان لە دامەزراوە سەربازییەكانی سوریا وەشاند مێركڵ لێدوانێكی رۆژنامەوانی بڵاوكردەوە ، لێدوانەكە دەكرێت بەمشێوەیەك كورتبكرێتەوە: سزادان پێویستە رووبدات، بەڵام بەبێ‌ بەشداری ئێمەن ئەوە ئامادەكاریی ئەڵمانیایە بۆ بەرپرسیارێتی لە رووی پراكتیكییەوە، دانپێدانێكی زارەكیی.. ئەڵمانیا رێز لە بەها نێدەوڵەتییەكان دەنێت، بەڵام كاتێك دۆخەكە جدی دەبێت كەمتەرخەم دەبێت، ئەو وڵاتەی كە لە رووی ئابوورییەوە زۆر بەهێزە لە ئەوروپا لە بواری سیاسەتی دەرەوەدا وەك بەلجیكای گەورە رەفتاردەكات... جارێكی تر رووندەبێتەوە : هیچ شوێنێكی تر نیە چاوەڕوانی ئەوە لە بەرلین بكرێت و ئامادەكاری ئەڵمانیا بكرێت بۆ مامەڵەكردن لە گەڵیدا، هەروەك ئەوەی لە سیاسەتی دەرەوەیدا روویدا." رۆژنامەی " بێڵد" یش كە یەكێكە لە رۆژنامە بەناوبانگەكانی ئەڵمانیا رەخنە لە هەڵوێستی بەرلین دەگرێت و دەڵێت شەرم لە هەڵوێستی خۆپارێزی ئەڵمانیا دەكات و نوسیویەتی " ئایا ترسمان لە بۆردومانكردنی هەیە؟ بەڵێ‌! بەڵام بەهێزتر لە تسر ئەوەیە كە شەرم لە وڵاتەكەن ئەڵمانیا دەكەن كە سەركەوتوو نەبوو لە راگەیاندنی هەڵوێستێكی روون دژی ئەسەد و پۆتن، ماوەی حەوت ساڵە كوشتوبڕ بەردەوامە، درێژتر لە جەنگی دووەمی جیهانی، ئایا ئێوە ئاگاتان لە خۆپیشاندانەكانی دژ بە ئەسەد هەیە لە شارەكەتان؟ یان ئەوانەی دژی پۆتین كە پشتگیری لە ئەسەد دەكات؟ یان وتارە ئاگرینەكانی ناو پەرلەمان كە دەڵێن پێویستە لەسەرمان هاوكاری سورییەكان بكەین؟ من نەخێر." بە پێچەوانەی ئەو دوو رۆژنامەیەی سەرەوە رۆژنامەی " لۆدڤیگسپۆرگەر كرایزەرتسایتۆنگ" دۆخەكە لە گۆشەیەكی جیاوازەوە دەبینێت و دەڵێت:" ئێستا هیچ بكەرێك لەسەر گۆڕەپانی نێودەوڵەتی نییە كە متمانەی ئەوەی پێ بكرێت كە دەتوانێت دەستپێشخەری بكات بۆ دەستپێكردنی دیالۆگێكی نوێ‌ لەلایەن خۆرهەڵات و خۆرئاوا لە دۆسیەی سوریا و لێكەوتەكانی، ئەنگێلا مێركڵ رزگاری بووە لە هەموو شەهوەتێكی بۆ ئەنجامدانی گەمەی نیشاندانی هێز، ئەو شێوازە لوتبەرزییەی كە ترەمپ و پۆتن وەك بژاردەیەك لە سیاسەتەكانیاندا بەكاریدەهێنن سەرنجی مێركڵ راناكێشن، ئەو لە واشنتۆن و مۆسكۆش بەڕێزەوە پێشوازی لێدەكرێت". رۆژنامەی " ئۆگسبۆرگەر ئەلگماینە" كۆمێنی خۆی بەرامبەر بە هەڵوێستی ئەڵمانیا سەبارەت بە قەیرانی سوریا بەمشێوەیە نوسیوە:" حكومەتی ئەڵمانیا لە نێوان هەموو كورسییەكاندا دادەنیشێت و بەلای هەموو هێزەكاندا دەچێت و  راستیە تاڵەكەش ئەوە دەگەیەنێت كە ئەو لەگەڵ دۆناڵد ترەمپ و ڤلادیمێر پۆتن و رەجەب تەیب ئەردۆغان نمونەی پیاوی ستەمكار و خۆپەرست و بەهێزی گۆڕەپانی نێودەوڵەتی دایە كە بەبێ‌ رەچاوكردنی هیچ شتێك بەرگری لە بەرژوەندییەكانی دەكات، ئەڵمانیا كە دەیەوێت وەك كۆترێك بێت و هاوسەنگی بپارێزێت، هیچ شتێكی دژ بەمە نییە و بەمەش لەبەردەم هەڕەشەی ئەوەدایە كە ببێتە تۆپێك كە هیچ كەسێك بە هەند وەری نەگرێت."  وەرگێڕانی: نامیق رەسوڵ سەرچاوە : DW   عەرەبی