( درەو میدیا): سبەی یارییەكانی پاڵەوانێتی جامی جیهانی تۆپی پێی 2018 " مۆندیال" لە روسیا دەستپێدەكات  ئێستا مۆندیال تەنها بریتیتە لە كێبركێی ئەستێرە بەناوبانگەكانی جیهان و هەڵبژاردە بەهێزەكانی جیهان، بەڵكو بوەتە بۆنەیەكیش بۆ دەركەوتنی ئەستێرەی تر، ئەویش ئەو گیاندارانەیە كە پێشبینی بۆ ئەنجامی یارییەكان دەكەن. لە ماوەی رابردوودا بۆ هەر مۆندیالێك گیاندارێكی تایبەت هەبووە كە بە پێشبینییەكانی بۆ ئەنجامی یارییەكان سەرنجی عاشقانی و جەماوەریی تۆپی پێی لەسەرتاسەری جیهاندا بۆلای خۆی راكێشاوە.  لیژنەی ئامادەكاریی مۆندیالی 2018ی روسیا پشیلەیەكی نابیستی بەناوی " ئەخیل" بۆ پێشبینیكردنی ئەنجامی یارییەكانی دیاریكردووە. بەوتەی ئانا كۆندراتیڤای پزیشكی، ئەخیل لە گیاندارەكانی تر پێشبینی بۆ ئەنجامی یارییەكان دەبێت، چونكە نابیستە و بە تەواوەتی لایەنگری هیچ تیپێك نییە و گوێبیستی كۆمێنت و هاندانی هاندەران نابێت و بە دڵی و هەستی پێشبینیدەكات. كۆندراتیڤا ئاماژەیبەوەشدا ئەخیلی پشیلە بەیانیان پێشبینی دەستپێدەكات، كاتێك دوو قاپ خۆراكی بۆ دادەنرێت و لەسەریان ئاڵای ئەو دوو هەڵبژاردەیە دادەنرێت كە یاریی دەكەن و ئەویش چووە لای هەر قاپێكەوە ئەوە ئەو تیپە بە پێشبینی ئەو براوەی یارییەكە دەبێت. ئەخیلی پشیلە لە چەند رۆژی رابردوودا سەرقاڵی تاوتوێكردنی تیپە بەشداربووەكانی مۆندیالی ئەمساڵ بووە و لەسەر وێنەی هێڵكاری تیپە بەشداربووەكان و خشتەی یارییەكان راهێنانی پێكراوە. لیژنەی بەڕێوەبردنی مۆندیالی روسیا بە شێوەی هەڕەمەكی ئەم پشیلەیەی بۆ پێشبینیكردنی ئەنجامی یارییەكان دەستنیشان نەكردووە، بەڵكو پێشتریش تاقیكراوەتەوە و ساڵی رابردوو پێشبینی بۆ یارییەكانی جامی جیهانی كیشوەرەكان كردووە و پێشبینییەكانی بەڕێژەیەكی زۆر راستە دەرچوون و لە یەكێك لە یارییەكاندا لە هەدوو قاپەكە خواردنی خوارد و بەوەش دوو تیپەكە لە یارییەكەیاندا یەكسان بوون.  پۆڵی هەشت پێ پۆڵ یەكێكە لە بەناوبانگترین ئەو گیاندارانەی كە  پێشبینی بۆ ئەنجامی یارییەكان دەكرد و لە جامی نەتەوەكانی ئەوروپای ساڵی 2008 و مۆندیالی 2008 جەماوەریی لەسەرتاسەری جیهاندا تووشی شۆك كرد كاتێك لەكۆی 13 یاریی پێشبینی دروستی بۆ ئەنجامی 11 یاریی كرد.  پۆڵ كە ساڵی 2008 لە بەریتانیا لە دایكبووە و دواتر چووتە ئەڵمانیا، لە مۆندیالی 2010دا پێشبینی بۆ هەموو یاریەكانی هەڵبژاردەی ئەڵمانیا كرد  و هەمووشی راست دەرچوو، كاتێك پۆڵ پێشبینی دۆڕانی هەڵبژاردەی ئەڵمانیای بەرامبەر بە ئیسپانیا كرد و راست دەرچوو، چەند هاندەرێكی ئەڵمانیی توڕە داوایانكرد لەگەڵ ئاوی لیمۆ و زەیتی زەیتون ببرژێنرێت بۆئەوەی ژمە خۆراكێكی بەچێژی پێ ئامادەبكرێت. دوای كۆتاییهاتنی جامی جیهانی 2010 خاوەنەكانی پۆڵ رایانگەیاند دەگەڕێتەوە سەر كاری پێشووی كە ئەویش خستەپێكەنینی منداڵانە، ئەوەش بە وتەی گروپی پاراستنی گیاندارە ئاوییەكانی ئەڵمانیا، و پاشان فەرمانبەرانی ئەو گروپە خەڵاتێكیان پێشكەشی پۆڵ كرد كە بریتی بوو لە كۆپییەكی مەدالیای جامی جیهانی و ژەمە خۆراكێكی چێژبەخش. پۆڵ لە 26ی ئازاری 2010 لەناوچوو، دوای ئەوەی بووە خاوەنی جەماوەرێكی بەرفراوان لە سەرتاسەری جیهاندا، بە تایبەتی لای جەماوەری ئیسپانیی، بەهۆی ئەوەی پێشبینیكردبوو كە هەڵبژاردەی ئیسپانیا بۆ یەكەمجار لە مێژوویدا جامی جیهانی دەباتەوە. " بیگ هێد" لە مۆندیالی 2014ی بەرازیلدا كیسەڵێك بەناوی " بیگ هێد" بۆ پێشبینیكردنی ئەنجامی یارییەكان دیاریكرا، بەڵام وەك پۆڵی هەشت پێ‌ سەركەوتوو نەبوو لە پێشبینییەكانی، لە یاری دەستپێكی مۆندیالدا پێشبینی ئەوەی كرد كە هەڵبژاردەی بەرازیل لە هەڵبژاردەی كرواتیا بەرێتەوە ، ئەو پێشبینییەی دروست بوو، لە یاری بەرازیل بەرامبەر بە مەكسیك  بیگ هێد بەرەو رووی ئاڵای هەردوو وڵاتەكە جوڵا و پێشبینییەكەی راست دەرچوو ، هەردوو هەڵبژاردەكە یەكسانبوون، بەڵام دواتر پێشبنییەكانی وەك پێشبنییەكانی پۆڵ لە مۆندیالی 2010دا راستە نەبوون. سەرچاوە: بی بی سی    

(درەو میدیا): سەرۆك دۆناڵد جەی ترەمپ سەرۆكی ویلایەتە یەكگرتووەكانی ئەمریكا و سەرۆك كیم جۆن ئون سەرۆكی لیژنەی كاروباری دەوڵەت لە كۆماری كۆریای میللی دیموكراتی یەكەمین كۆبوونەوەیەكی لوتكەی مێژوویان لە سەنگاپوورە لە 12ی یۆنیۆ/ حوەزیرانی 2018 ئەنجامدا. لە كۆبوونەوەكەدا سەرۆك ترەمپ و سەرۆك كیم جۆن ئون بە شێوەیەكی قوڵ و راستگۆیانە بیروڕایان ئاڵوگۆڕ كرد دەربارەی ئەو پرسانەی پەیوەستن بە بونیادنانی پەیوەنیی نوێ لە نێوان ویلایەتە یەكگرتووەكانی ئەمریكا و كۆرماری كۆریای میللیی دیموكراتیی و بونیادنانی سیستمێكی ئاشی هەمیشەیی و بەهێز لە نیمچە دوورگەی كۆریا، هەروەها سەرۆك ترەمپ پابەندی خۆی دەربڕی بۆئەوەی گەرەنتیی ئەمنیی پێكەشی كۆماری كۆریای میللی دیموكراتیی پێشكەش بكات و سەرۆك كیم جۆن ئونیش جەختیكردەوە لەسەر پابەندبوونی یەكلاكەرەوە بە داماڵینی چەكی ئەتۆمی بە تەواوەتی لە نیمچە دوورگەی كۆریا. سەرۆك ترەمپ و سەرۆك كیم جۆن ئون باوەڕی تەواویان هەیە بەوەی كە  بونیادنانی پەیوەندیی نوێ‌ لە نێوان ویلایەتە یەكگرتووەكان و كۆماری كۆریای میللی دیموكراتی رۆڵی دەبێت لە بەدیهێنانتی ئاشتی و خۆشگوزەرانی لە نیمچە دوورگەی كۆریا و جیهان و هەردووكیشیان دانبەوەدا دەنێن كە بونیادنانی متمانەی نێوان هەردوو لا دەكرێت پاڵپشتی لە داماڵینی چەكی ئەتۆمیی بكات لە نیچمە دوورگەی كۆریان و هەردوو كیشیان جەخت لەمانەی خوارەوە دەكەنەوە: 1- ویلایەتە یەكگرتووەكان و كۆماری كۆریای میللی دیموكراتی پابەند ئەوە دەبن كە پەیوەندییەكی نوێ لە نێوان هەردوو وڵاتدا بونیادبنێن كە لەهاوتا بێت لەگەڵ ویست و خواستی گەلی هەردوو وڵات بۆ ئاشتی و گەشەسەندن. 2- ویلایەتە یەكگرتووەكانی ئەمریكا و كۆماری كۆریای میللی دیموكراتی، هەوڵەكانیان یەكدەخەن بۆ بونیادنان و چەسپاندنی سیستمی ئاشتی هەمیشەیی لە نیمچە دوورگەی كۆریا. 3- وەك جەختكردنەوەیەك لەسەر راگەیەنراوی پانمونجۆمی 27ی ئەپریل/ نیسانی 2018، كۆماری كۆریای میللی دیموكراتی پابەنددەبێت كاربكات لە پێناوە داماڵینی چەكی ئەتۆمیی بە شێوەیەكی تەواوەتی لە نیمچە دوورگەی كۆریا. 4- ویلایەتە یەكگرتووەكان و كۆماری كۆریای میللی دیموكراتتی پابەندی گەڕاندەوە روفاتی دیلەكانی جەنگ و ونبوانی ئۆپەراسیۆنەكان دەبن،  دەستبەجێ‌ ئەو روفاتانەی ناسراونەتەوە رەوانەدەكرێنەوە. كۆبوونەوەی لوتكە كە ویلایەتە یەكگرتوەكان و كۆرماری كۆریای میللی دیموكراتی كۆكردەوە یەكەمین كۆبوونەوەی لەو شێوەیەیە لە مێژوودا، رووداێكی مێژووییە، بایەخی گەورەی هەیە سەردەكەوێت لەسەر چەندین ساڵ لە ئاڵۆزی و دوژمنایەتی نێوان هەردوو وڵات لە پێناوی كردنەوەی داهاتوویەكی نوێ، سەرۆك ترەمپ و سەرۆك كیم جۆن ئون پابەندی جێبەجێكردنی خاڵەكانی ئەم بەیاننامەیە  هاوبەشە دەبن بە تواوەتی و بە شێوەیەكی خێرا. ویلایەتە یەكگرتووەكان و كۆماری كۆریای میللی دیموكراتی، پابەندن بەوەی دانوستانی بەدوداچوون  بەڕێوەچێت بە سەرۆكایەتی وەزیری دەرەوەی ئەمریكا مایك پۆمپیۆ و بەرپرسێكی بڵای گونجاو لە كۆماری كۆریای میللی دیموكراتی لە نزیكترین كاتدا و ئەوەش بۆ جێبەجێكردنی ئەنجانەكانی كۆبوونەوەی لوتكەی نێوان ویلایەتە یەكگرتووەكان و كۆماری كۆریای میللی دیموكراتی. سەرۆك دۆناڵد جەی ترەمپ، سەرۆكی ویلایەتە یەكگرتووەكانی ئەمریكا و سەرۆك كیم جۆن ئون سەرۆكی لیژنەی كاروباری دەوڵەت لە كۆماری كۆریای میللی دیموكراتی پابەندن بە كاركردن بۆ پەرەپێدانی پەیوەندی نوێ لە نێوان ویلایەتە یەكگرتووەكان و كۆماری كۆریای میللی دیموكراتی و چەسپاندنی ئاشتی و ئاسایش و خۆگوزەرانی لە نیمچە دوورگەی كۆریای باكور و جیهاندا. 12ی یۆنیۆ/ حوەزیرانی 2018 دوورگەی سانتۆسا سەنگاپوورە    

(درەو میدیا): دۆناڵد ترەمپ سەرۆكی ئەمریكا رایگەیاند ئەو مانۆڕە سەربازییانە رادەگرێت كە ئەمریكا لەگەڵ كۆریای باشوور ئەنجامیاندەدات و ئەوەش پارەی زۆریان بۆ دەگەڕێنێتەوە. دوای كۆبوونەوەی لەگەڵ كیم جۆن ئون سەرۆكی كۆریای باكور، ترەمپ لە كۆنفرانسێكی رۆژنامەوانیدا لە سەنگاپورە رایگەیاند گفتوگۆكانی لەگەڵ كیم راستەوخۆ و پاك بووە واشنتۆن ئامادەیە مێژوویەكی نوێ لەگەڵ پیۆنگ یانگ دەستپێ بكات. ترەمپ سوپاسی سەرۆكی كۆریای باكوریشی كرد بۆ ئەو نانی هنگاوی یەكەمی بە ئاراستەی داهاتوویەكی پرشنگدار بۆ گەلەكەی و وتی :" گۆڕانكارییەكی راستەقینە دەكرێت بێتەدی." سەرۆكی ئەمریكا ئاشكراشیكرد لە كاتێكی گونجاودا كیم جۆن ئون بانگهێشتی كۆشكی سپی دەكات و خۆشی ئامادەیە سەردانی پیۆنگ یانگ بكات. سەرۆكی ئەمریكا لە بەشێكی تری كۆنفرانسە رۆژنامەوانییەكەدا جەختیكردەوە كە سزاكانی سەر كۆریای باكور ئێستا وەك خۆیان دەمێننەوە، بەڵام وتیشی:" هەركاتێك دڵنیابووینەوە كە چەكە ئەتۆمییەكانی نەماون هەڵیاندەگرین."  

(درەو میدیا): دۆناڵد ترەمپ سەرۆكی ئەمریكا و كیم جۆن ئون سەرۆكی كۆریای باكور لە سەنگاپورە لە هەنگاوێكی مێژوویدا كۆبوونەوە.. مێژوویی ئەم دیدارە بۆئەوە دەگەڕێتەوە كە یەكەمجارە لە مێژوودا سەرۆكێكی ئەمریكا كە لە دەسەڵاتدا بێت لەگەڵ سەرۆكی كۆریای باكور كۆدەبێتەوە. دوای كۆبوونەوەكە سەرۆكی كۆریای باكور وتی:" كۆبوونەوەیەكی مێژووییمان كرد و بڕیارماندا ئاوڕ بۆ دواوە نەدەینەوە". ترەمپ بۆچی كیمی بە كەسێكی زۆر بەهرەمەند ناوبرد؟ كاتێك لە كۆنگرە رۆژنامەوانییەكەدا پرسیار لە ترەمپ كرا لەبارەی ئەوەی بۆچی كیم جۆن ئونی بە كەسێكی زۆر بەهرەدار ناوبردووە، ترەمپ وتی" ئەو بەڕاستی بەهرەمەندە. تەمەنی 26 ساڵ بووە كە دەسەڵاتی گرتوەتەدەست، ئەو پیاوێكی سەنگینە، بەڵام لەوباوەڕەدانیم ئەوە شتێكی باش بێت". "زۆر زۆر خێرا" كیلی ئو دۆنێل پەیامنێری كەناڵی ئێن بی سی ئەمریكی لە كۆشكی سپی وتی: كاتێك رۆژنامەنوسان پرسیاریان لە ترەمپ كرد لەبارەی پابەندبونی كۆریای باكور بە داماڵینی تەواوەتی چەكی ئەتۆمی لە نیمچە دورگەی كۆریا، ترەمپ وەڵامی داوەتەوە و وتویەتی" زۆر زۆر خێرا دەست بەو پرۆسەیە دەكەین". ترەمپ: رایەڵەیەكی تایبەت لەنێوان من و كیم گەشەیكردووە دوای ئیمزاكردنی بەیاننامە هاوبەشەكە لەگەڵ كیم جۆن ئون، سەرۆكی ئەمریكا رایگەیاند، لەدوای یەكەم دیداری نێوانیان "رایەڵەیەكی تایبەت" لەنێوان ئەو و كیم گەشەی كردووە. كیم جۆن ئون سەرۆكی كۆریای باكوریش وتی: دیدارێكی مێژوییمان كرد و بڕیارماندا ئاوڕ بۆ دواوەوە نەدەینەوە. " گشتگیر و زۆر گرنگ" لە كۆبوونەوەكەیاندا كیم و ترەمپ راگەیەنراوێكی هاوبەشیان واژۆكرد كە ترەمپ بە " گشتگیر و زۆر گرنگ" وەسفیكرد و راگەیەنراوەكەش لە چوار خاڵی سەرەكی پێكدێت: •    هەردوو لایەن پابەند دەبن بە بونیادنیانی پەیوەندیی نوێ بە گوێرەی ویست و خواستی هەردوو گەل بۆ ئاشتی و گەشەسەندن. •    هەردوو لایەن كاردەكەن بۆ چەسپاندنی ئاشتی هەمیشەیی و سەقامگیری لە نیمچە دوورگەی كۆریا. •    كۆریای باكور پابەند دەبێت بە گرتنەبەری چەند رێوشوێنێك بۆ داماڵینی هەموو چەكە ئەتۆمییەكان لە نیمچە دوورگەی كۆریا. •    بونیادنانی پەیوەندیی نوێ لە نێوان هەردوو وڵاتدا.    

(درەو میدیا): دادگای ئیداری ڤیسبادنی ئەڵمانیا لێكۆڵینەوەی لەگەڵ عەلی بەشار كرد كە  تۆمەتبارە بە ئەنجامدانی دەستدرێژی سێكسی و  كوشتنی كچێكی ئەڵمانیی تەمەن 14 ساڵان. بە گوێرەی هەواڵی میدیاكانی ئەڵمانیا، عەلی بەشار دوای رەوانەكردنی لە هەرێمی كوردستانەوە بۆ ئەڵمانیا لە دادگا ئیداری ڤیسبادن بە ئامادەبوونی وەرگێڕێك لەبەردەم دادوەری لێكۆڵینەوە ئامادەبووە چەندین كاتژمێر لێكۆڵینەوەی لەگەڵد كراوە دواتر رەوانەی گرتوخانە كراوە. بە گوێرەی چەند سەرچاوەیەك عەلی بەشار لە بەردەم دادوەری لێكۆڵینەوەدا دانی بە كوشتنی سوزانای تەمەن 14 ساڵاندا ناوە بەڵام بە توندی تۆمەتی دەستدرێژی سێكسی رەتكردوەتەوە.    

( درەو میدیا): مرۆڤەكان لەم سەردەمەدا بەهۆی ریتمی خێرای ژیان و زۆریی كاروبار و سەرقاڵی پێوەیان، رووبەڕووی گوشاری دەرونیی دەبنەوە، بەڵام مرۆڤەكان دەتوانن بە چەند هەنگاوێكی سادە خۆیان لە گوشاری دەرونیی دووربخەنەوە و لە كاریگەرییەكانی لەسەریان كەمبكەنەوە. سایتی " گیزۆنهایت بۆنكێت دی ئەی " ئەڵمانی كە بایەخ بە تەندروستی جەستەیی و دەرونیی مرۆڤ دەدات 10 هەنگاوی دیاریكردووە كە هاوكاردەبن لە زاڵبوون بەسەر گوشارە دەرونییەكاندا و ئەو دە هەنگاوەش ئەمانەن: •    وەرزش: وەرزشكردن یەكەمین هەنگاوە بۆ كەمكردنەوەی گوشاری دەروونیی، بە تایبەتی وەرزی بەپێ رۆیشتن و مەلەكردن هاوكاری مرۆڤ دەكەن لە رزگاربوون لە گوشاری دەرونیی ، هەروەها رۆیشتن و پشوودان لە هەوای كراوەدا بەسن بۆئەوەی مرۆڤ لە كاریگەرییەكانی گوشاری دەرونیی رزگاری ببێت. •    خواردن و ئامادەكردنی: سایتە ئەڵمانییەكە دەڵێت پرۆسەی سەوزە پاككردن بۆ نمونە كاریگەری لەسەر هێوركردنەوەی جەستەی مرۆڤ دەبێت و هەروەها چەند خۆراكێك كە دەوڵەمەندن بە كالسیۆو و مەگنسیۆم و ڤیتامین بی وەك مۆز، برۆكلی، پێكهاتەكانی شیر، گەنم، گوێز كاریگەری ئەرێنییان لەسەر باری دەرونیی مرۆڤ دەبێت. •    پێكەنین: هەنگاوی سێیەم بۆ نەهێشتنی گوشاری دەرونیی پێكەنینە كە زۆر بە سودە بۆ جەستەی مرۆڤ و هاوكاردەبێت لە دەردانی مادەی سیرۆتۆنین كە رۆڵێكی گرنگ دەبینێت لە رێكخستنی مەزاجی مرۆڤ، هەروەها پێشی دەوترێت " هۆرمۆنی خۆشبەختی"، بەڵام ئەگەر نەشتوانیی پێبكەنیت، ئەوەندە بەسە هەردوو چاوت بنوقێنیت و پشووبدەیت و زەردەخەنە بكەیت بۆئەوەی هۆرمۆنی  خۆشبەختی دەربدرێت. •    كوپێك چایی لە توانایدا دەرونت ئارام بكاتەوە، و لەلایەن سایتە ئەڵمانییەكەوە بە هەنگاوی چوارەم دانراوە بۆ دووركەوتنەوە لە گوشاری دەرونی بەڵام مەرجی ئەوەشی داناوە كە پێویستە مرۆدد لەكاتی خواردنەوەی چاییەكەدا دانیشتوبێت نەك بەپێوە بۆئەوەی چێژ لەو ساتە وەربگرێت. •    هەنگاوی پێنجەم بریتیە لە تەماشاكردنی وێنەكانی كاتی پشوو، چونكە ئەو هەنگاوە هەستكردن بە پشوودان و ئارامیی و خۆشبەختیش پێدەبەخشێت. •    لە هەنگاوی شەشەمدا پسپۆرانی بواری دەرونناسی ئامۆژگاری مرۆڤ دەكەن بەوەی هەندێك لە كات بۆخۆی تەرخان بكات، وەك بیركردنەوە لەو كارەی كە ویستوە هەفتەی رابردوو بیكەیت و بۆت نەكراوە، یان كاتێك بۆ خوێندنەوە تەرخانبكەین  یان گەشتێك بكەیت. •    تەرخانكردنی كاتیی تەواوەتی بۆ نوستن هەنگاوی حەوتەمە بۆ كەمكردنەوەی گوشاری دەرونیی، كەمخەویی یەكێكە لە هۆكارەكانی گوشاری دەروونیی و تێكچوونی كارو فەرمانەكانی جەستە. •    هەنگاوی هەشتەم بریتیە لە دووركەوتنەوە لە هۆكارەكانی گوشاری دەرونییی وەك مۆبایل و پسپۆران ئامۆژگاری مرۆڤ دەكەن بۆ ماوەی 24 كاتژمێر دەستبەرداری ئامێرە ئەلیكترۆنییەكان بێت. •    هەنگاوی نۆیەم بریتیە لە هەڵپەڕكێ‌ و سەماكردن كە رێژەیەكی باش كالۆری لە جەستەی مرۆڤدا دەسوتێنن و رۆڵی دەبێت لە باشتركردنی دەرونیی مرۆڤ. •    هەنگاوی دەیەم و كۆتایی خۆی لە باش دركردن لە هەموو شتێكی چێژبەخش، ئەگەر پارچەیەك شوكۆلاتەت خوارد، بۆ نمونە پێویستە بە هێواشی بیخۆیت و لێبگەڕێت لە دەمدا بتوێتەوە، لەبەرئەوەی شوكولاتە هاوكاریی دەردەبێت بۆ دەردانی هۆرمۆنی خۆشبەختی" سیرۆتۆنین". سەرچاوە: دۆچە ڤێللە  

( درەو میدیا): عەلی بەشار تۆمەتبار بە ئەنجامدانی دەستدرێژی سێكسی و خنكاندنی كچێكی تەمەن 14 ساڵانی ئەڵمانیی ئێوارەی دوێنێ‌ شەممە لە فڕۆكەخانەی هەولێرەوە گەیەنرایە فڕۆكەخانەی فرانكفۆرتی ئەڵمانیا. هۆرست سیهۆڤەر وەزیری ناوخۆی ئەڵمانیا لە لێدوانێكیدا بۆ میدیاكانی وڵاتەكەی خۆشحاڵی خۆی بە دەستگیركردن و رەوانەكردنەوەی عەلی بەشار بۆ ئەڵمانیا دەربڕی و هیوای خواست بە زوویی دادگایی بكرێت. عەلی بەشار كە تشرینی یەكەمی 2015 لەگەڵ لێشاوی كۆچبەراندا گەیشتوەتە ئەڵمانیا،  بەوتەی پۆلیسی ئەو وڵاتە 22 و 23ی ئایاری رابردوو دەستدرێژی سێكسی كردووەتە سەر  سوزانا فیلدمانی 14 ساڵ و پاشان خنكاندویەتی. عەلی بەشار دوای بەجێهێشتنی ئەڵمانیا دوانیوەڕۆی هەینی لە قەزای زاخۆی هەرێمی كوردستان دەستگیركرا و سەرەڕای نەبوونی هیچ رێككەوتنێك لە نێوان عێراق و ئەڵمانیا بۆ رادەستكردنەوەی تۆمەتباران بە یەكتری ئێوارەی شەممە بە فڕۆكەیەكی كۆمپانیای لۆفتهانزا لە فڕۆكەخانەی هەولێرەوە گەیەنرایە فڕۆكەخانەی فرانكفۆرتی ئەڵمانیا.  

(درەو میدیا):  لیوا عومەر سولەیمان، پیاوە هەواڵگرییەكەی حوسنی موبارەكی سەرۆكی پێشووی میسر ، بە نەخۆشی نەمردووە، بەڵكو لە تەقینەوەیەكدا لە سوریا كوژراوە. لیوا عومەر سولەیمان لە ساڵی 1993 یوە سەرۆكی دەزگای هەواڵگری گشتی میسربوو، ساڵی 2011 ش وەك جێگری سەرۆكی میسر دەستنیشانكرا و هەر ئەویش لە كاتی خۆپیشاندانەكانی 2011ی بەهاری عەرەبیدا لە میسر بڕی دەستلەكاركێشانەوەی حوسنی موبارەكی لە تەلەفزیۆنی رەسمی میسرەوە بڵاوكردەوە. 19ی حوەزیرانی 2012 میدیاكانی میسر هەواڵی مردنی لیوا عومەر سولەیمانیان بڵاوكردەوە، هەرچەندە دەنگۆی ئەوە بڵاوبووەوە كە تیرۆركراوە، بەڵام سەرچاوە رەسمییەكان لە میدیاكانی ئەو وڵاتەدا رایانگەیاند لە كاتی ئەنجامدانی نەشتەرگەرییدا بۆ دڵی لە نەخۆشخانەی " كلیڤلاند" ی ئەمریكا گیانی لەدەستداوە. دوای زیاتر لە شەش ساڵ بەمەسەر مردنیدا،  لیوا مەحمود زاهر شارەزای بواری سەربازی و ستراتیژی میسری كە چەندین ساڵ لەگەڵ عومەر سولەیماندا كاریكردووە هۆكاری مردنەكەی ئاشكراكرد. لیوا مەحمود زاهر لە بەرنامەی " المیزان"ی كەناڵی " Itc" میسریدا رایگەیاند لیوا عومەر سولەیمان كوژراوە و بە نەخۆشی نەمردووە وەك بڵاوكراوەتەوە. ئەو شارەزا سەربازییەی میسر ئاشكراشیكرد لیوا عومەر سولەیمان لە بارەگانی ناوەندیی هەواڵگری سوریا لەگەڵ ژمارەیەكی زۆر لە كاربەدەستانی هەواڵگری ژمارەیەك وڵات لە تەقینەوەیەكدا كوژراوە و خیانەتێك لەناو ناوەندەكەدا روویداوە و تەقێندراوەتەوە و عومەر سولەیمان لەو تەقینەوەیەدا كوژراوە. زاهر روونیشیكردوەتەوە كە عومەر سولەیمان لەو كۆبوونەوەیدا سەرقاڵی دانانی چەند پلانێك بوون بۆ ناوچەكە و ئەگەر تەواوبكرایە ئەو دۆخەی ئێستا نەدەهاتە كایەوە كە ئێستا ناوچەكە بەخۆیەوە دەبینێت.  

(درەو میدیا): عەلی بەشار پەنابەرێكی عێراقی بوو داواكاری مافی پەنابەرێتی لەو وڵاتە رەتكرایەوە و خۆی و خێزانەكەی لە شاری دوسڵدۆرفی ئەڵمانیاوە بە فڕۆكە دێنە ئەستنبوڵ و دواتر لەوێشەوە دەگەنە فڕۆكەخانەی هەولێری پایتەختی هەرێمی كوردستان. دوای ئەوەی عەلی بەشار و خێزانەكەی ئەڵمانیایان بەجێهێشت، پۆلیسی ئەو وڵاتە رایگەیاند عەلی بەشار لە تاوانی دەستدرێژیكردن و كوشتنی  كچێكی جولەكەی تەمەن 14 ساڵان بەناوی  سوزانا ڤیڵدمان لە ڤیسبادنی خۆرئاوای ئەڵمانیا. دوای راگەیاندنی ئەم هەواڵە لە لایەن پۆلیسی ئەڵمانیاوە، هۆرست سیهۆڤەر وەزیری ناوخۆی ئەڵمانیا رایگەیاند عەلی بەشار لەلایەن هێزەكانی ئاسایشی هەرێمی كوردستانەوە دەستگیركراوە. تارق ئەحمەد فەرماندەی پۆلیسی دهۆك ئەمڕۆ شەممە رایگەیاند عەلی بەشار كە تۆمەتبارە بە كوشتنی كچە جولەكەكەی ئەڵمانیا دەستگیركراوە و دانی بە تاوانەكەیدا ناوە. پۆلیسی ئەڵمانیا دەڵێت 22 و 23ی ئایاری 2018 ، عەلی بەشار دەستدرێژی سێكسی كردووەتە سەر سوزانا ڤیڵدمان و پاشان كوشتوەیەتی، بەڵام عەلی بەشار گێڕانەوەیەكی تری بۆ رووداوەكە هەیە و دەڵێت:" سوزانا هاوڕێی بووە، بەڵام شەڕە قسە و دەمەقاڵی لە نێوانیاندا دروست بووە، دوای ئەوەی سوزانا هەڕەشەی پەیوەندیكردن بە پۆلیسی لێكردووە كوشتویەتی." روداوی كوشتنی سوزانا لە لایەن عەلی بەشاری پەنابەرەوە، لە نێوخۆی ئەڵمانیادا مشتومڕی زۆری لێكەوتوەتەوە و هەلێكی زۆری داوە بە راستڕەوە توندڕەوەكان بۆئەوەی جامی توڕەیی خۆیان بەسەر ئەنگێلا مێركڵی راوێژكاری ئەڵمانیادا بڕژێنن كە لە ساڵی 2015دا سیاسەتێكی نەرمی بەرامبەر بە هاتنی كۆچبەران پیادەكردووە و دەروازەی ئەڵمانیای بە رووی كۆچبەراندا كردەوە.    

( درەو میدیا): بە گوێرەی راپرسییەك  رەجەب تەیب ئەردۆغان كاندیدی ئاكەپە بۆ هەڵبژاردنی 24ی حوەزیران لە خولی یەكەمی هەڵبژاردنەكاندا سەركەوتن بەدەستناهێنێت و حزبەكەشی زۆرینەی پەرلەمانیی لەدەستدەدات. بە پێی ئەنجامی ئەو راپرسییە كە دامەزراوەی جیزیجی رۆژانی 25 و 26ی ئایار ئەنجامیداوە و 6811 كەس بەشداریان تێداكردووە، رەجەب  تەیب ئەردۆغان كاندیدی ئاكەپە لە خولی یەكەمی هەڵبژاردنی سەرۆكایەتیدا سەركەوتن بەدەستناهێنێت و 48.7%ی دەنگەكان بەدەستدەهێنێت، بەرامبەر بە 25.8% بۆ كاندیدی جەهەپە موحەڕەم ئینجە. هەروەها راپرسییەكە پێشبینیكردووە كە میراڵ ئاكشنەر سەرۆكی پارتی چاكە 14.4%ی دەنگەكان و سەلاحەدین دەمیرتاش كاندیدی هەدەپە 10.1%ی دەنگەكانی خولی یەكەمی هەڵبژاردنی سەرۆكایەتی بەدەستبهێنن. ئەردۆغان و پارتی داد و گەشەپێدان " ئاكەپە" ماوەی زیاتر لە 15 ساڵە دەسەڵاتداری توركیان و زۆرینەی پەرلەمانی هەیە، بەڵام بە گوێرەی راپرسییەكەی جیزجی هاوپەیمانی ئاكەپە و مەهەپە لە هەڵبژاردنی 24ی حوەزیراندا زۆرینەی پەرلەمانی بەدەستناهێنن و پێشبیندەكات 48.7%ی دەنگەكان بەدەستبهێنن. راپرسییەكە پێشبینشیكردووە كە هاوپەیمانی ركابەری پێكهاتوو لە جەهەپە و پارتی چاكە و حزبی سەعادەت 38.9%ی دەنگەكان  و پارتی دیموكراتی گەلان هەدەپە 11.5%ی دەنگەكان بەدەستبهێنن. سەرچاوە : رۆیتەرز

درەو میدیا:  لە بەیاننامەیەكدا فەرماندەیی هێزەكانی 70 كە شێخ جەعفەر شێخ مستەفا فەرمادەییان دەكات هۆشداری توند دەدات سەبارەت بە هەڵوەشاندنەوەی دەنگەكانیان،  رایگەیاندووە" هەر بڕیار و پیلانێك رەتدەكەینەوە كە دەنگی دیان هەزار رۆڵەی تیكۆشەر و نیشتیمانپەروەری ئەم كوردستانە بێ مروەتە پۆچەڵبكاتەوە و بكرێتە ئەجێندای قین لە دڵان و ناحەزانی هێزی پێشمەرگە و پۆلیسی كوردستانەوە، بێریزیكردن بەرامبەر بە خەبات و گیانبازی سەدان هەزار شەهید و هاوسەنگەرەكانیان"  بەیاننامەكەی فەرماندەیی هێزەكانی 70ی یەكێتی نیشتیمانی كوردستان هۆشداری دەدات لە سوتانی دەنگەكانیان ودەڵێن ئەم هەنگاوە یاریكردنە بە ئاگرێك كە لەئەنجامدا پیلان و بەختی ئاژاوەگێڕان و زۆڵە كوردانی تیا دەسووتێت، نە جەماوەری كوردستان لە خۆفرۆشان خۆشدەبێت و نە دوژمنانی گەلەكەمان پاداشتیان دەداتەوە". بەپێی مادەی سێیەمی هەمواری یاسای هەڵبژاردنی ئەنجومەنی نوێنەرانی عێراق كە لە دانیشتنی رۆژی 6/6/2018 پەسەندكرا، ئەنجامی هەڵبژاردنی  دەنگدانی تایبەت لە هەرێمی كوردستان هەڵوەشێنرایەوە دەقی بەیاننامەكەی فەرماندەیی هێزەكانی 70    

راپۆرت: نامیق رەسوڵ سوپای توركیا 25 كیلۆمەتر هاتوەتە ناو خاكی هەرێمی كوردستانەوە، بەوتەی چەند سەرچاوەیەكی نزیك لە حكومەتی توركیا، بەمزوانە و پێش بەڕێوەچوونی هەڵبژاردنی سەرۆكایەتیی و پەرلەمانیی، ئەنكەرە ئۆپەراسیۆنێكی گەورە و بەرفراوان  بۆ سەر بنكە و بارەگاكانی پارتی كرێكارانی كوردستان لە قەندیل دەستپێدەكات. ئۆپەراسیۆن بۆسەر قەندیل بەشێكە لەو ئۆپەراسیۆنە بەرفراوانەی كە لە مانگی ئازاری رابردووەوە سوپای توركیا دەستیپێكردووە و بڕیاری كۆتایش لەسەر ئەو ئۆپەراسیۆنە لە كۆبوونەوەی ئەنجومەنی ئاسایشی نەتەوەیی توركیادا دراوە كە مانگی كانونی یەكەمی رابردوو بەڕێوەچوو. میدیاكانی نزیك لە حكومەتی توركیا باسلەوەدەكەن، ئۆپەراسیۆنی سەر قەندیل" زۆر فراوانتر و گەورەتر دەبێت لە ئۆپەراسیۆنی چڵە زەیتون" كە سوپای توركیا كردیە سەر كانتۆنی عەفرین لە رۆژئاوای كوردستان. رۆژنامەی (حوڕییەت)ی توركی ئاشكرایكرد" ئیسماعیل مەتین تەمەل فەرماندەی دووەمی سوپای توركیا كە سەرپەرشتی ئۆپەراسیۆنی قەڵغانی فورات و چڵە زەیتونی كرد لە رۆژئاوای كوردستان، سەركردایەتی ئۆپەراسیۆنەكەی سەر قەندیلیش دەكات". عەبدولقادر سیڵڤی ستون نوسی رۆژنامەی (حوڕییەت) و نزیك لە بازنەكانی بڕیار لە توركیا لە وتارێكیدا لە رۆژنامەكە دەڵێت:" ئۆپەراسیۆنی قەندیل بە كردەوە دەستیپێكردووە و درێژكراوەی ئەو ئۆپەراسیۆنەیە كە مارسی رابردوو دەستیپێكردووە و سوپای توركیا گەیشتوەتە قوڵایی 25- 30 كیلۆمەتری خاكی عێراق". ئاماژە بەوەدەكات" سوپای توركیا 11 بنكەی نوێی سەربازی لەناوی خاكی عێراقدا بونیادناوە كە لە گەریلاكانی پەكەكە پاككراونەتەوە و پەیوەندیی بەردەوامیش لەگەڵ لایەنی ئەمریكی و ئێرانی و عێراقدا هەیە و گفتوگۆدەكرێت لەبارەی رێككەوتن لەسەر ئۆپەراسیۆنێكی گەورە". ئەو نوسەرەی رۆژنامەی حوڕییەت لە بەشێكی تری وتارەكەیدا ئاشكرایكردووە كە "بن عەلی یەڵدرم سەرۆك وەزیرانی توركیا لەدوا سەردانیدا بۆ بەغداد گفتوگۆی چڕ و قوڵی دەربارەی ئەو ئۆپەراسیۆنە لەگەڵ بەرپرسانی عێراق كردووە". 11 بنكەی سەربازی نوێ‌ هانا لۆسیندا سمیس لە وتارێكیدا لە رۆژنامەی تایمزی بەریتانیدا بە ناونیشانی " توركەكان ئامادەن بۆ دەستپێكردنی هێرش بۆسەر كورد لە 11 بنكەی سەربازی نوێوە" نوسیویەتی: توركیا ئامادەكاریی دەكات بۆ هێرشكردنە سەر چەكدارە كوردەكان لە باكوری عێراق، لە هەنگاوێكدا كە سەرۆكەی توركیا رەجەب تەیب ئەردۆغان بڕوای وایە پشتیوان دەبێت لە هەڵبژاردنی سەرۆكایەتیی و پەرلەمانی كە ئەم مانگە بەڕێوەدەچێت". باسلەوەشدەكات، سوپای توركیا 11 بنكەی سەربازی نوێی لە هەرێمی كوردستان دامەزراندووە كە زۆرینەیان لە نزیك سنوری ئێرانن و سەرچاوەیەكی نزیك لە یەكێتیش لە لێدوانێكیدا بۆ تایمز هۆشداریداوە لەوەی كە 700 گوند لەو ناوچانە لە ژێر دەسەڵاتی پارتی كرێكارانی كوردستاندان لەكاتی هێرشی توركیادا، قەیرانێكی نوێی ئاوارەبوون دەستپێدەكات. ماكس هۆڤمان چاودێری سیاسی بە رۆژنامەی تایمزی راگەیاندووە" ئەردۆغان مێژوویەكی لە ئەنجامدانی هێرشی سەربازی لە دەرەوە هەیە، كاتێك هەست بە هەڕەشەیەكی هەڵبژاردن دەكات". هەڵوێستی هەرێم حكومەتی هەرێمی كوردستان كە هەژموونی پارتی دیموكراتی كوردستان بەسەریدا زاڵە و پەیوەندیی ئابووری و بازرگانی و سیاسیی زۆری لەگەڵ توركیادا هەیە، داوا لە پارتی كرێكارانی كوردستان دەكات خاكی هەرێم بەجێبهێڵێت و پاساو نەداتە سوپای توركیا. سەفین دزەیی وتەبێژی حكومەتی هەرێم لە وتەیەكیدا بۆ رۆژنامەنووسان لە هەولێری پایتەخت وتی:" بوونی چەكدارەكانی پەكەكە لە ناوی خاكی هەرێمی كوردستاندا بووەتەهۆی ئەوەی هێزەكانی توركیا چەندینجار بێنە ناو خاكی هەرَم و چەندین شەڕ و پێكدادانی توندی لێكەوتوەتەوە". دزەیی كە ئێستا سوپای توركیا چەندین بنكە و بارەگای سەربازی لە ناوچەی ژێر دەسەڵاتی حزبەكەیدا هەیە داوای لە پارتی كرێكارانی كوردستان كرد ئەو ناوچانەی هەرێم كوردستان چۆڵ بكات و پاساو نەداتە توركیا بۆئەوەی بێتە ناو خاكی هەرێم و داواشی لە توركیا كرد رێز لە سەروەریی خاكی عێراق بگرێت".  

(درەو میدیا): سەڵاحەدین دەمیرتاش كاندیدی پارتی دیموكراتی گەلان " هەدەپە"  بۆ هەڵبژاردنی سەرۆكایەتی توركیا، لە زیندانی ئەدیرنەوە بە تەلەفۆن پەیامێكی ئاراستەی دەنگدەران كرد و وتی:" كۆمەڵگە بەهۆی ئاكەپەوە نیگەران و ڕەشبینە، ئێستا كاتی بێ هیوایی و ترس نییە. ئێمە بەیەكەوە دەبینە وڵاتێكی گەورەی خوشك و برایەتی". دەمیرتاش لە ڕێی پەیوەندییە تەلەفۆنییەكەی، بە ئامادەبوونی بنەماڵەكەی كۆبوونەوەیەكی هەڵبژاردنی سازكرد و پەیامە دەنگییەكەی ئاراستەی دەنگدەرانی باكوری كوردستان و توركیا كرد و داوای لێ كردن دەنگێك بدەنە هەدەپە و دەنگێكیش بدەنە دەمیرتاش. دەقی پەیامەكە بە كوردی‌: بەر لە هەر شتێك بە دڵ و گیان سڵاوی خۆم ئاراستەی هەموو ئەو كەسانە دەكەم كە دەنگی من دەبیستن. 20 مانگە بەشێوەیەكی نایاسایی و لە دەرەوەی مافەكان، وەك دیلێكی سیاسی ڕادەگیرێم. هەتا ئێستا نە من و نە هەڤاڵەكانم بەشێوەیەكی دادپەروەرانە دادگەیی نەكراوین. فشاری سیاسی لە هەموو دادگاكان كرا و پێوەری سەروەری  مافەكان بە ئاشكرا پێشێلكرا. هەرچەندە زیندانیم، بەڵام بەرپرسانی حكومەت هەموو ڕۆژێك لە تەلەفزیۆنەكان و‌ ڕۆژنامەكان بوختانم بۆ دەكەن. لەم بارودۆخەدا كە ناتوانم مافی وەڵامدانەوەش بەكاربێنم، بە فرتوفێڵی سیاسیی هەوڵدەدەن من بەخراپی پیشان بدەن. بەڵام ئێوە هەمووتان ئاگاتان لە ڕاستییەكان هەیە. من بەمە دەزانم و دەبینم. دۆخی ئێستا تەنیا نمونەیەكە. ئەمڕۆ تەواوی وڵات، تەواوی هاوڵاتیانی ئێمە بوونەتە ستەملێكراویی نادادپەروەری. نادادپەروەری نەك تەنیا لە كۆشكەكانی دادپەروەری ڕوو دەدەن. بەڵكو لە نەخۆشخانەكان، زانكۆكان، لەنێو زەوییەكان، كارگەكان، فەرمانگەكانی دەوڵەت و كۆڵانەكان هەموو ڕۆژێك لە هەموو شوێنێك هەموو كەس ستەملێكراو دەبن و مامەڵەی نادادپەروەرانەیان لەگەڵدا دەكرێت. " كۆمەڵگەی توركیا بەهۆی ئاكەپە ڕەشبین و بێ هیوا بوو" بەداخەوە توركیا بەتەواوی بووەتە زیندانێكی نیوەكراوە. بەم شێوەیە دەیانەوێت ترس بخەنە دڵی هەموو كەسێك، ترس بخەنە دڵی تەواوی كۆمەڵگە. بەڵام كاری دەوڵەت ترساندنی هاوڵاتییان نییە، كاری دەوڵەت خزمەتكردنە. بەڵام ئەو كردەوە دژە دیموكراتییانەی كە لە ساڵانی ڕابردوو ڕوویاندا، كۆمەڵگەی توركیایان كردووەتە نیگەرانترین و ڕەشبینترین گەل. وڵاتی ئێمە لەنێو خۆیدا لە یەكتر جیاكرایەوە و لە دەرەوەش بەتەنیا و بەبێ بەها هێڵدرایەوە. " ئێمە ناچار نین، بەڵكو دەتوانین توركیایەكی دیموكراتی بونیادبنێین" حەق نییە كە ئێمە بە حكومەتێكی وەها خراپ بژین. وەك ئەو هاوڵاتیانەی كە لەسەر جوانترین و دەوڵەمەندترین خاكی جیهان دەژین، حەق نییە كە ئێمە بێ هیوا و هەژار بین. ئەمە چارەنووسی ئێمە نییە، ئێمە ناچار و مەحكومی ئەمە نین، ئێمە دەتوانین دەستی یەكتر بگرین و پێكەوە توركیایەكی دیموكراتیی ئایندە، ژیانی نوێ، ژیانێكی شادمان و خۆش، ژیانێكی ئازاد بونیادبنێین. خوشك و برایانی هێژای من، كات كاتی ئەوە نییە كە بێ هیوا بین و بترسین. بە ڕێككەوتن، پشتیوانی و یەكێتی، ئێمە دەتوانین هەموو كێشەكانی وڵاتی خۆمان چارەسەربكەین. بەبێ ئەوەی هاوڵاتییەكی خۆمان وەك دوژمن ببینین و خۆی لێ دووربخەینەوە‌، دەتوانین پێكەوە بە دڵ ببینە وڵاتێكی گەورە و خوشك و برایەتی. ئێمە خەڵكی خۆمان بەگوێرەی پارتی، ناسنامە، مەزهەب و زایەند لە یەكتر جیاناكەینەوە. ئێمە سەروەری مافەكان و دیموكراتی بەسەر دەوڵەتدا دەسەپێنین. ئەگەر دەوڵەت دەوڵەتی هەموومانە، وڵات وڵاتی هەموومانە، كەواتە ئەو كاتە ئەرك و بەرپرسیارێتیی ئێمەیە كە بۆ هەموو كەس حكومەتێكی دادپەروەر و یەكسان بونیادبنێین. بۆئەوەی كەس خۆی وەك منداڵی باوەژن نەبینێت، بۆ ئەوەی كەس ناحەقی نەبینێت، ئێمە سیاسەتێكی نوێ كە ٨١ ملیۆن كەس لەخۆ بگرێت، دەخەینەگەڕ. " گەل لە وەڵاتێكی دەوڵەمەند بەهەژاری دەژی" ئێمە بەباشی سوود لە خاك، دەریا، مێژوو و میراتی كولتوریی خۆمان وەردەگرین. قورسایی ناخەینە سەر چیمەنتۆ و بیناسازی ناپەسەند، ئێمە گرینگی بە خاك، ڕەنج، بەرهەمهێنان و زانست دەدەین و بەدڵنیاییەوە كۆتایی بە هەژاری دێنین. لە وڵاتێكی دەوڵەمەندی وەك توركیا، مرۆڤ ناچاركراوە كە بەشێوەیەكی هەژار بژی. ئەمە شەرمەزارییە بۆ كاربەدەستانی ئەم وڵاتە. ئێمە وڵاتی خۆمان لەم شەرمەزارییە ڕزگار دەكەین. " ئێمە هیوادارین، بەجۆشین" ئێمە ئێستا زیاتر بەهیوا، بە تامەزرۆیی و بەجۆشەوە خۆمان بۆ هەڵبژاردن ئامادە دەكەین. من لێرە لەنێو چوار دیواردام. بەڵام پێدەزانم كە ئێستا هەزاران دەمیرتاش لەنێو زەوییەكان، لە كاری جووتكردن، لە زەوییەكانی فندكن‌. دەمیرتاش ئێستا لە مەیدانەكانە، لە كارگەكانە، لە وانەدایە، لە پۆلەكانی زانكۆیە، لە كرێكارییە، لە بەرخۆدانی مانگرتوانە. لە كار دەركراوە، بێكارە، هەژارە. گەنجە، ژنە، منداڵە. توركە، كوردە، چەركەسە، پۆماسە، بۆشناكە. عەلەوییە، سوونییە، بەڵام بەر لە هەر شتێك هیوادارە و بەجۆشە. گۆڤەند دەگرێت و لە هەڵپەڕكێكی هۆرۆن دایە. " سەربەرز بن، دەنگ بدەنە هەدەپە و دەمیرتاش" دەمیرتاش لە قاوشی زیندانی ئەدیرنە نییە، دەمیرتاش ئێوەن. باوەڕتان بەخۆتان هەبێت. سەربەرز بن. دەنگ بە خۆتان بدەن. بڵێن؛ دەنگێك بۆ هەدەپە، دەنگێك بۆ دەمیرتاش. لەبیرنەكەن، تەنیا یەك دەنگ دەتوانێت زۆر شت بگۆڕێت. تۆ دەتوانی ئەمە بكەی، خوشك و برایانی ئازیزی من. لەپێناو ڕۆژی خۆش و گەش، كات كاتی گۆڕینە. ئێمە پێكەوە ئەمە دەكەین، پێكەوە سەردەكەوین. بە دڵ و گیان سڵاو لە هەمووتان دەكەم. بەدڵنیاییەوە ئێمە سەردەكەوین و ڕۆژی ئازاد دەبینین. بمێنن لە خێر و خۆشیدا. سەرچاوە: ANF NEWS  

( دەرەو میدیا): سبەی پێنجشەممە پرۆسەی دەنگدان بۆ هەڵبژاردنی سەرۆكایەتیی و پەرلەمانیی توركیا لە دەرەوەی ئەو وڵاتە دەستپێدەكات و 24ی حوەزیرانیش پرۆسەكە لە ناوخۆی توركیا بەڕێوەدەچێت. لە دەنگدانی دەرەوە زیاتر لە سێ‌ ملیۆن كەس لە 60 وڵاتی جیهان و لە 123 بنكەی هەڵبژاردن مافی دەنگدانیان هەیە و پرۆسەكەش تا 19ی حوەزیران بەردەوام دەبێت. بە گوێرەی یاساكانی لیژنەی باڵای هەڵبژاردنەكانی توركیا، دەنگدەران لەو 60 وڵاتە دەتوانن لە كاتژمێر 09:00 تا كاتژمێر 21:00 بەكاتی ناوخۆی ئەو وڵاتانە بچنە بنكەكانی دەنگدان و دەنگ بدەن. دوای تەواوبوونی پرۆسەی دەنگدانی دەرەوە، كارتەكانی دەنگدان كۆدەكرێنەوە و تا كۆتاییهاتنی دەنگدانی ناوخۆ كە 24 حوەزیران دەستپێدەكات جیاناكرێنەوە. لە هەڵبژاردنی سەرۆكایەتی توركیادا پێنج كاندید ركابەری رەجەب تەیب ئەردۆغان سەرۆكی ئێستا و كاندیدی ئاكەپە دەكەن كە دیارترینیان سەلاحەدین دەمیرتاش كاندیدی هەدەپە و موحەڕەم ئینجە كاندیدی هەدەپە ومیراڵ ئاكشنەر كاندیدی پارتی چاكەیە. سەرچاوە: ئاژانسی ئەنادۆڵ  

(درەو میدیا): یەكینەكانی پاراستی گەل " یەپەگە" رایدەگەیەنێت راوێژكارە سەربازییەكانیان لە مەنبەج دەكشێننەوە، ئەوەش دوای رۆژێك دێت لە راگەیاندنی رێككەوتنی توركیا و ئەمریكا لەسەر نەخشەرێگایەك بۆ بەڕێوەبردنی شاری مەنبەجی باكوری سوریا. لە ڕاگەیەندراوێكدا فەرماندەیی گشتیی یەكینەكانی پاراستنی گەل “یەپەگە” ئاشكرایكرد: " لە چوارچێوەی ستراتژیی گشتیی یەپەگە بۆ شەڕی دژ بە تیرۆر و داعش، ئەنجومەنی سەربازیی مەنبەج داوای هاوكاری لێ كردین، تا پێكەوە شارەكە لە چەتەكانی داعش ڕزگار بكەین. ئەو داوا كارییە بەفەرمی لە سەرەتای ساڵی ٢٠١٦دا ئاڕاستەی ئێمە كرا. ئێمەش وەك یەپەگە، لە سەر بنەمای ئەو داخوازییە لەگەڵ هێزەكانی هاوپەیمانانی نێودەوڵەتی ڕێككەوتین و ئۆپەراسیۆنی ڕزگاركردنی مەنبەجمان لە ڕۆژی ١ی حوزەیرانی ساڵی ٢٠١٦دا دەست پێكرد، كە پاشان ماوەی  دوو مانگی خایەند و دەرەنجام سەركەوتنی بەدوادا هات و تیرۆریستانی داعش لە شارەكە وەدەرنران و بەشێكی زۆری گوندەكانی دەوروبەری مەنبەجیش پاككرانەوە. بە گشتی بەرخۆدان تا ڕۆژی ١٥ی ئابی ٢٠١٦ بەردەوام بوو و لەو ڕێككەوتەدا بە ڕاگەیەندراوێك جاڕی سەركەوتنی ئۆپەراسیۆنەكە درا". یەپەگە ڕاشیگەیاندووە: " پاش ئەوەی مەنبەج ڕزگار كرا، ئارامی و ئاسایش بۆ ناوچەكە گەڕێندرایەوە، لە ڕێككەوتی ١٦ی مانگی ١١ی ٢٠١٦دا، وەك ئیدارەی سەربازی و مەدەنی شارەكە و دەروبەریمان ڕادەستی هێزەكانی ئەنجومەنی سەربازیی مەنبەج كرد و هێزەكانمان كشاندەوە و بەفەرمیش ئەو كشانەوەیەمان ڕاگەیاند و بۆ ئەوەش مەراسیمی سەربازییمان ڕكخست و بەشێوەیەكی زیندوو لە تەلەفزیۆنەكانەوە بڵاوكرایەوە". یەپەگە ئاشكراشیكردوە: " لەسەر داوای ئەنجومەنی سەربازیی مەنبەج، چەندین گروپ لە فەرماندەكانی یەپەگە وەك ڕاوێژكار لە شارەكە و دەوروبەری مانەوە. ئەو گروپانە كاریان پەروەردە و ڕاوێژی سەربازی بوو بە هێزەكانی ئەنجومەنی سەربازی مەنبەج. هەڵبەتە ئەوەش لە ژێر چاودێریی هێزەكانی هاوپەیمانانی نێودەوڵەتی ئەنجام درا." فەرماندەیی گشتیی یەكینەكانی پاراستنی گەل - یەپەگە، ئەوەشی خستووەتە ڕوو: " ئێستاش پاش ۲ ساڵ ئەنجومەنی سەربازیی منبج گەیشتووەتە ئاستێك كە دەتوانێت خۆی بەرێوەبەرێت و پەروەردە بكات، بۆیە فەرماندەیی گشتیی یەپەگە ئیدی بە پێویستی نابینێت ڕاوێژكارەكانی لە منبج بمێنەوە و بڕیاری كشانەوەیانی داوە." لە كۆتایی ڕاگەیەندراوەكەیدا یەپەگە دەستنیشانی كردوە: " ئێمە وەك هێزەكانی یەپەگە بۆ ڕایگشتی مەنبەج دووپاتی دەكەینەوە، بۆ ڕزگاركردن و ئازادكردنی هاوڵاتیانمان و پاراستنیان لە چەتەكانی داعش، بە تێكۆشان و فیداكارییەوە ئەركی سەر شانمانە بەجێ دەهێنین و لەسەرییشی بەردەوام دەبێن تا ئەو كاتەی بە تەواوەتی كۆتایی بە تیرۆرستان دەهێنین و ئاسایش و ئارامی یەكجارەكی بۆ هەموو ناوچە ڕزگاركراوەكان دابین دەكەین".