.gif)
■ بەختیار نامیق ئەوەی گرنگە سەرەتا وەک پێوەر بیبینین ئەوەیە کە هیچ هێزێک ئەگەر بشتوانی (٥٦ ) یان زیاتری کورسی هەبێت هەر ناتوانێت بە پێ ی واقعی دەستەڵاتی هەبو حکومەت پێکبهێنێت ، چونکە پێشتر دو ئیدارەیی هەبوە کابینەی هەشتەمیش نەیتوانی یەک ئیدارەیی تەواو بچەسپێنێ و بە هۆی پاشکۆیەتی دو هێزی سەرەکیەوە بۆ وڵاتانی ناوچەیی بە تەواوی دۆسیەی یەک حکومەتی سەتاسەری بوە خەون ، وە کۆمەڵێک کێشەی تر وەک ئەنجامەکانی ڕیفراندۆم و ١٦ ی ئۆکتۆبەر و سەرۆکی کۆماری عێراق و کەرکوک ئەوەنەی تر ئەرکی ئەم پەرلەمانە و پێکهێنانی حکومەتی قورس تر کردوە ، بە ڕای من قورستیرین کابینە دەبێت ، کەواتە بە پێ ی بونی دەستەڵاتی حیزبەکان و واقع بۆ پێکهێنانی حکومەتێکی تا ڕادەیەک باش دەبێت شەراکەتی نیشتمانی پەیڕەو بکرێت ، وەئەگەر ئەنجامەکان دوای ڕاگەیاندنی کۆمیسۆن گۆڕانی تری بەسەردا نەیەت چونکە ئەگەری سوتاندنی دەنگێکی زۆر هەیە ، بە پێ ی ئەنجامە بەراییەکان دەکرێت خوێندنەوە و ئەگەرەکان دەستنیشان بکەین . بەپێی بڕگەی سێیەمی ماددەی ١٠ لە یاسای سەرۆکایەتیی هەرێم، لە ماوەی ١٠ ڕۆژدا دوای پەسەندکردنی ئەنجامەکانی کۆتایی هەڵبژاردن لەلایەن ئەنجومەنی دادوەرییەوە، سەرۆکی هەرێم بانگهێشتی پەرلەمان دەکات بۆ ئەنجامدانی یەکەمین کۆبوونەوەی خولی نوێ، بەڵام دوای دەستلەکارکێشانەوەی مەسعود بارزانی و نەمانی سەرۆکی هەرێم لە ڕۆژی ٢٩ی ئۆکتۆبەری ساڵی ڕابردوو، پەرلەمانی هەرێمی کوردستان دەسەڵاتەکانی سەرۆکی هەرێمی دابەشکرد بەسەر پەرلەمان و حکومەت و ئەنجومەنی دادوەریی، ئەرکی بانگهێشتکردنی دانیشتنی یەکەمی خولی نوێی پەرلەمان، سپێردراوەتە ئەنجومەنی دادوەریی هەرێمی کوردستان. هەر بەگوێرەی بڕگەی سێیەمی ماددەی ١٠، لە حاڵێکدا ئەگەر بانگهێشت بۆ یەکەمین دانیشتنی پەرلەمان نەکرا لەلایەن سەرۆکایەتیی هەرێم یان ئەنجومەنی دادوەریی، ئەوە پەرلەمان دەتوانێت بەبێ بانگهێشت لە ڕۆژی دوای ئەو وادەیەی، کە دیارییکراوە دانیشتنی خۆی پێکبهێنێت. لە یەکەمین دانیشتنی خولی نوێی پەرلەماندا، کە بەسەرۆکایەتیی بەتەمەنترین پەرلەمانتار بەڕێوەدەچێت، دەستەی سەرۆکایەتیی پەرلەمان هەڵدەبژێردرێت و لەلایەن سەرۆکی دانیشتنەکەوە داوا لە دەستەی سەرۆکایەتیی دەکرێت، کە بچنە شوێنی دیایکراوی خۆیان. دواتر لە دانیشتنێکی دیکەدا پەرلەمان ناوی کاندیدەکان بۆ پێکهێنانی کابینەی نوێی حکومەت وەردەگرێت، هەر کاندیدێکی متمانەی زۆرینەی پەرلەمانتارانی بەدەستهێنا، پەرلەمان بەگوێرەی بڕگەی سێیەمی ماددەی ٥٦ یاسای هەڵبژاردن، ناوی سەرۆک وەزیرانی لێدەنات و لەلایەن ئەنجومەنی دادوەرییەوە ڕادەسپێردرێت بۆ پێکهێنانی کابینەی حکومەت، مەرجیش نییە ئەو کەسە لە حزبێک بێت، کە زۆرترین کورسی پەرلەمانیی بەدەستهێنابێت، بەڵام دەبێت متمانەی لەسەدا ٥٠+١ی ئەندامانی پەرلەمان بەدەستبهێنێت. دوای ڕاسپاردنی کەسەکە، ئەنجومەنی دادوەریی، ماوەی ٣٠ی ڕۆژی بۆ دادەنێت تاوەکو کابینەی حکومەتەکەی دروستبکات. بۆ پێکهێنانی کابینەی نۆیەم کۆمەڵێک سیناریۆ هەیە ، کە دەکرێت مشت و مڕی کوتلەکان دەست پێ بکات ، کە دەکرێت : لە دەرەوەی پارتی و کەمایەتیەکان هەمو هێزەکان ناتوانن حکومەت پێکبهێنن ( یەکێتی ٢٢+گۆڕان١٢+نەوەی نوێ٩+کۆمەڵ٧+یەکگرتو٥=٥٥ کورسی) کە ئەگەر هاوپەیمانیەتیەکیش پێک بهێنن هێشتا ناتوانن حکومەت پێکبهێنن ، مەگەر لە کەمایەتیەکان یان (حسک ) وەک یەک کورسی بچێتە ناو ئەم هاوپەیمانیەوە ئەمەش زۆر زەحمەتە . 1. سیناریۆی یەکەم: پارتی و کەمایەتیەکان و هاوپەیمانی سەردەم(حسک و ئەوانی دیکە ) : لەم حاڵەتەدا کە دەکاتە ٥٦ کورسی (پارتی 45 ، کەمایەتیەکان ١١ ، حسک ١) کە ئەگەر شەراکەتی نیشتمانی نەبێت ئەوا دەتوانن حکومەت پێکبهێنن و سەرۆکی حکومەت و جێگر بۆ پارتی بێت و وەزارەتێکی سیادی بدرێت بە کەمایەتیەکان وەزارەتەکانی تریش دابەش بکەن ، بەڵام حکومەتێکی لاواز دەبێت و بگرە لە زۆنی سەوزدا هیچ دەستەڵاتێکی نابێت ، بۆیە ئەم ئەگەر و سیناریۆیە زۆر لاوازە . 2. سیناریوی دووەم : یەکێتی و پارتی : لەم حاڵەتەدا دەتوانن حکومەت پێکبهێنن (پارتی 45+یەکێتی ٢٢=67 کورسی ) لەم حاڵەتەدا سەرۆکی حکومەت بۆ پارتی و جێگرەکەی بۆ یەکێتی لە بەرامبەر سەرۆکی پەرلەمان بۆ یەکێتی و جێگرەکەی و وەزارەتەکان ( دارای و پێشمەرگە و ناوخۆ و داد و سامانە سروستیەکان ) سێ دانەیان بۆ پارتی و جێگرەکانیان بۆ یەکێتی ، لەم سیناریۆیەدا ئەگەری ئەوە هەیە پارتی بەس وەزارەتی داد بدات بە یەکێتی ، بۆ کوتلەکانی تریش وەک ئۆپۆزسیۆن دەمێننەوە ، ئەم سیناریویە وەک هەمان سیانریۆی یەکەم ئەگەری بونی تەواو لاوازە . 3. سیناریۆی سێیەم: حکومەتی شەراکەتی نیشتمانی : لەم حاڵەتەدا هەمو کوتلەکان بەشدار دەبن لە نێوان پەرلەمان و پێکهێنانی حکومەتدا ئەگەر خواستی کوتلەکانی لەسەر بێت ، کۆمەڵک ئەگەر هەیە، لەوانە : سەرۆکی پەلەرمان بۆ یەکێتی و جێگری سەرۆکی پەرلەمان بۆ گۆڕان و لە بەرامبەردا سەرۆکی حکومەت بۆ پارتی جێگرەکەی بۆ یەکێتی و وەزرەتەکانی پێشمەرگە و ناوخۆ و دارای بۆ پارتی و یەک جێگر بۆ گۆڕان ویەک جێگر بۆ یەکێتی یەک جێگر بۆ کۆمەڵ وسامانە سروشتیەکان بۆ پارتی و جێگرەکەی بۆ نەوەی نوێ دو وزراەت بۆ یەکگرتو ، بە پێ ی ڕازی بونیان لە وەزراتەکانی تردا (١٨ وەزارەت) پشکیان هەبێت ( کەمایەتیەکان و یەکگرتو حسک ) سەرۆکایەتی پەرلەمان بۆ یەکێتی و جێگرەکەی بۆ پارتی و سەرۆکی حکومەت بە پارتی و جێگرەکەی بۆ یەکێتی لەگەڵ دو وزارەتی سیادیدا (دارایی و سامانە سروشتیەکان ) وەزارەتی ناوخۆ و داد بۆ گۆڕان و جێگرێکی بۆ کۆمەڵ و جێگرێکی بۆ نەوەی نوێ و جێگرێکی بۆ یەکگرتو وەزارەتی پێسمەرگەش بۆ پارتی و جێگرەکەی لە کەمایەتیەکان بێت. دواین بۆچون بۆ سیناریۆ ، سەرۆکی حکومەت بۆ پارتی و جێگرەکەی لە گۆڕان سەرۆکی پەرلەمان بۆ پارتی و جێگرەکەی لە نەوەی نوێ و لە ٥ وەزارەتە گرنگەکان دو بۆ پارتی و یەک بۆ گۆڕان و یەک بۆ یەکێتی و جێگرەکانیان لە نەوەی نوێ و کۆمەڵ و یەکگرتو بێت لە ١٨ وەزارەتەکەی تر ( ١ وەزارەت بۆ کەمایەتیەکان و ٥بۆ پارتی و ٣ بۆ یەکێتی و ٣ بۆ گۆڕان و٢ بۆ نەوەی نوێ ٢ بۆ کۆمەڵ ٢ بۆ یەکگرتو ) دوا جار بە هۆی ناکۆکیەکانەوە دەکرێت زۆر ئالۆز بێت و دنیایەک سیناریۆی تر و ئەگەری تر هەبن و گفتوگۆدەست پێ دەکات و کوتلەکان سیناریۆی خۆیان دەخەنە ڕو تا لە خاڵیکدا هەمویان کۆک دەبن ، ئەمەش زۆر زەحمەتە ، هەندێ نوسەر و چاودێر پێیان وایە کە پێ دەچێت حکومەت بە هۆی کێشەکانی نێوان پارتی و یەکێتی کە زۆرینەن ، نەتوانرێت تا شەش مانگی تریش حکومەت پێکبهێنرێت ، حکومەتەکەی نێچرەڤان و کابینەی هەشتەم هەر بە کار بەڕێکەری بمێنێتەوە و پەرلەمانیش نەتوانێت پڕۆژەی حکومەتی ڕزگاری نیشتمانی بسەپێنێت .
.gif)
■ کاروان عەلی شامار دوای ڕاگه‌یاندنی ئه‌نجامی کۆتایی هه‌ڵبژاردنی په‌رله‌مانی کوردستان جگه له پارتی دیموکرات سه‌رجه‌م پارته سیاسیه‌کان ناڕازین له ڕێژه‌ی ده‌نگ و کورسیه‌کانیان. ئه‌نجامه‌کان ده‌رخه‌ری ئه‌وه‌ن پارتی ته‌زویرێکی بێشوماری کردووه‌و ده‌لاقه‌یه‌کی گه‌وره‌ی له‌سه‌ر ئه‌و پرۆسه دیموکراتیه دروستکردووه، له خوله‌کانی پێشووی په‌رله‌ماندا پارتی له تێپه‌ڕاندنی کۆمه‌ڵێک پرۆژه یاسادا دوچاری له‌مپه‌ر ببۆوه له‌وانه یاسای (سهرۆکایهتی هه‌رێم و ده‌ستوور)، ئه‌گه‌رچی ویستی پارتی ئه‌وه‌بوو به‌هاوبه‌ش له‌گه‌ڵ کۆتاو دوکانه سیاسیه‌کانیدا ئه‌و پرۆژه یاسایانه تێپه‌ڕێنێ لێ به‌هۆی ته‌واونه‌بونی نیصابی یاساییه‌وه بۆی نه‌ڕه‌خسا، به‌ڵام له خولی نوێی په‌رله‌ماندا به‌هۆی ئه‌و کورسیه زۆره‌ی که به‌ده‌ستی هێناوه بێ هیچ گرفت و له‌مپه‌رێک ده‌توانێ زۆرترین پرۆژه یاسا تێپه‌ڕێنێ که ئه‌مه‌ش مه‌ترسیه‌کی گه‌وره‌یه. به مێژوو پارتی نه‌یتوانیوه به‌و ره‌هاییه کۆنترۆڵی زۆرترین کورسییه‌کانی نێو په‌رله‌مان بکا! ئه‌و ڕێژه‌و جیاوازیه زۆره‌ی پارتی به‌راورد به هێزه ڕکابه‌ره‌که‌ی که به‌ده‌ستی هێناوه گه‌ر رێگری لێ نه‌کرێت و پارسه‌نگی هێز وه‌ک جارانی لێنه‌یه‌ته‌وه ئه‌وا مومکینه له ئاینده‌یه‌کی نزیکدا کوردستان به ئاقارێکی زۆر مه‌ترسیداردا تێپه‌ڕببێت و چوار ساڵی داهاتوو به‌هۆی سیاسه‌ته چه‌وته‌کانی پارتییه‌وه ده‌رگیری ده‌یان گرفتی ناوخۆی ده‌ره‌کی بێته‌وه. لێره‌یا به‌کورتی به‌شێک له‌و مه‌ترسیانه ده‌خه‌ینه‌ڕوو! (1) سیسته‌می سهرۆکایهتی یه‌کێک له‌و مژارانه‌ی که پارتی دیموکرات به هه‌ر کلۆجێک بێ ده‌یه‌وێ جارێکی تر به‌یاسایی کاته‌وه (پۆستی سه‌رۆکی هه‌رێمه) راسته بارزانی ئیقلیمیه‌ن خۆری ئاوا بووه لێ دور نییه خۆی یا که‌سێکی ماڵباته‌که‌ی به پرۆژه یاسایه‌ک له په‌رله‌مانه‌وه جارێکی تر شه‌رعیه‌تی بۆ بگه‌ڕێننه‌وه‌و(4 بۆ ساڵی تر حوکمڕانی هه‌رێم بکات. له خولی چواری په‌رله‌ماندا هه‌وڵێکی شێلگیرانه درا له لایه‌ن فراکسیۆنه‌کانی یه‌کێتی و گۆران و کۆمه‌ڵی ئیسلامیه‌وه بۆ ئه‌وه‌ی سیستیمی سهرۆکایهتی بکریت به په‌رله‌مانی و سه‌رۆکی هه‌رێم له ناو په‌رله‌ماندا هه‌ڵبژێردرێ لێ به داخه‌وه یه‌کگرتووی ئیسلامی شکستی به‌و هه‌وڵانه هێناو په‌رله‌مانتاره‌کانی دابه‌ش بوون بۆ دووبه‌ره‌و نه‌یانتوانی خۆیان یه‌کلا که‌نه‌وه، هه‌نوکه ئه‌و حیزبه باجی ئه‌و هه‌ڵه مێژوییه ده‌دا و ده‌نگه‌کانی بۆ زیاتر له نیوه که‌مبۆته‌وه. مه‌ترسی ئه‌م خوله‌ی په‌رله‌مان ئه‌وه‌یه ئه‌و مژاره له نێو هۆڵی په‌رله‌مان زیندوو که‌نه‌وه، گه‌ر سه‌رجه‌م پارته سیاسیه‌کانیش نارازی بن ناتوانن بارته‌قای ده‌نگی پارتی کاریگه‌ربن! (2) ده‌ستوور هه‌رێمی کوردستان تا ئێستا ده‌ستورێکی نیشتیمانی نییه ئه‌وه‌ی هه‌یه پارتی دیموکراتی کوردستان به میزاجی حزبی نوسیویه‌تییه‌وه هه‌ر له‌به‌ر ئه‌وه‌ش بوو له خوله‌کانی رابردوو ره‌تکرایه‌وه‌و ڕێگه‌نه‌درا تێپه‌رێنرێ. بۆ نموونه له ده‌ستوردا 11 کورسی بۆ کۆتاکان دانراوه هه‌وڵێک هه‌بوو له خولی پێشوودا ژماره‌ی کورسیه‌کانیان که‌مکرێته‌وه یاخود زیاتر نماینده‌ی که‌مایه‌تیه‌کان خۆیان بن نه‌ک پارتێکی سیاسی به‌ڵام هه‌وڵه‌کان شکستیان پێهێنرا. تێکڕای کورسی په‌رله‌مانی عێراق بریتییه له 329 کورسی له‌و ڕێژه‌یه‌ش ته‌نها 9 کورسی بۆ کۆتاکان له سه‌رجه‌م پارێزگاکانی دانراون لێ ته‌نها له سێ پارێزگاکه‌ی هه‌رێمدا 11 کورسی په‌رله‌مانیان بۆ دانراوه به‌شێک له په‌رله‌مانتاری ئه‌و که‌مایه‌تیانه که پرۆفایله‌کانیان ده‌که‌یته‌وه وه‌ک کادیری پارتی خۆیان ناساندووه! مه‌ترسیه‌که‌ش ئه‌وه‌یه پارتی له‌م خوله‌ی په‌رله‌ماندا ده‌ستور تێپه‌ڕێنێ و کورسی کۆتاکانیش وه‌ک خۆی بمێنێته‌وه‌و هیچ ته‌عدیلێک له یاساکه‌دا نه‌کرێت، یاخود ده‌ستور به‌جۆرێک دابرێژرێته‌وه که به ره‌هایی و به‌ویستی پارتی بێت! (3) یه‌ک بازنه‌یی ھیچ پارتێک بارتەقای پارتی سودمەند نەبووە لە سیستمی یەک بازنەیی، له‌به‌ر ئه‌وه‌ی له سنوری قه‌ڵه‌مڕه‌ویه‌که‌یدا ته‌زویرێکی ڕێکخراو ده‌کا هه‌میشه رێژه‌ی ده‌نگده‌ر له ئاستێکی به‌رزتردا ده‌بێ جیاواز به‌ناوچه‌کانی تر، ئه‌مه‌ش فاکته‌ری سه‌ره‌کیه بۆ ئه‌وه‌ی زۆرترین به‌ربژێری هه‌ولێر و دهۆک له‌سه‌ر حسابی پارێزگای سلێمانی بچنه په‌رله‌مان، پارێزگای دهۆک له هه‌ڵبژاردنه‌کانی په‌رله‌مانی عیراق ته‌نها (11) کورسی بۆ دانرابوو به‌ڵام له په‌رله‌مانی کوردستاندا زیاتر له (26) به‌ربژێری بادینی پارتی ده‌چنه نێو په‌رله‌مانی کوردستان! مه‌ترسیه‌که له‌و کاته‌یه ده‌ست پێده‌کات که له‌م خوله‌ی په‌رله‌ماندا گۆرینی سیستمی یه‌ک بازنه بۆ فره بازنه‌ی هاوشێوه‌ی په‌رله‌مانی عیراق سه‌رکه‌وتوو نه‌بێت و پارتی جارێکی ترو له‌مه‌شدا گۆڵی خۆی له لایه‌نه‌کان بکا! (4) لاوازی توانایی کاندیده‌کان چاودێران پێیان وایه ئه‌م خوله نوێیه‌ی پەرلەمان بەبەراورد بە ساڵانی رابردوو خولێکی پڕ له کێشه ده‌بێت، وه له‌به‌ر ئه‌وه‌ی که‌مترین که‌سانی ئه‌کادیمی و به‌‌تواناو گه‌شونه‌ته په‌رله‌مان دور نییە ھەڵەی گەورەیان بەسەردا تێپەرێت. ئه‌و یاسایانه‌ی که له پەرله‌مان داده‌نرێن و هه‌موار ده‌کرێنه‌وه چاره‌نوسی میلله‌تێکیان پێوه به‌نده، باشترین پارتی سیاسی ئه‌وه‌یه که که‌سانی پرۆفیشناڵ و شاره‌زا بنێرێته په‌رله‌مان که که‌مترین هه‌ڵه‌ی یاسایی و ده‌ستوریان به‌سه‌ردا تێپه‌رێت. به‌داخه‌وه به‌شێک له پارته سیاسیه‌کان ته‌نها بۆ کۆکردنه‌وه‌ی ده‌نگ خراپترین کاندیدیان به‌ربژێر کردووه به‌تایبه‌ت له‌خولی پێنجی په‌رله‌ماندا. مه‌ترسی ئه‌م خوله‌ش ئه‌وه‌یه پارتی بتوانێت به‌شێک له یاساکان بۆ سودی خۆی تێپه‌رێنێ و دواترهاونیشتیمانیان باجه‌که‌ی بده‌ن! (5) کۆتایی.. گه‌ر یه‌کێتی و گۆران به هاوبه‌ش له‌گه‌ڵ لایه‌نه‌کانی تر بتوانن له‌خولی نوێی په‌رله‌ماندا هه‌ماهه‌نگی و هاوده‌نگی نێوان فراکسیۆنه‌کانیان دروستکه‌ن ئه‌وا ئیجابیاتی باشی ده‌بێت، به پێچه‌وانه‌وه دورنییه پارتی به ئاره‌زووی خۆی و به‌و حه‌جمه‌ی ئێستایه‌وه سه‌رجه‌م یاساکانی په‌رله‌مان بۆ به‌رژه‌وه‌ندی خۆی به‌کاربخات. دوریش نییه کوردستان دوچاری ده‌یان گرفتی گه‌وره کاته‌وه که ره‌نگه نه‌وه‌کانی داهاتوش به‌سانایی نه‌توانن پارسه‌نگی ئه‌و دۆخه ناهه‌مواره که‌نه‌وه. هه‌ر حزب و په‌رله‌مانتارێک بیه‌وێ مێژوو بۆ خۆی تۆمار بکات و له داهاتودا ببێته جێ ئه‌رزش و متمانه‌ی هاونیشتیمانیان ده‌بێ به هه‌موو پێوده‌نگه‌کان ڕێگربن له ده‌رچواندنی هه‌ر یاسایه‌ک که له‌به‌رژه‌وه‌ندی پارتی بێ و مه‌ترسی بێت له‌سه‌ر ئاینده‌ی ناوچه‌که، ئه‌م خوله‌ی په‌رله‌مان به‌هۆی هه‌ژمونی پارتیه‌وه قورسای و ئه‌رکی زۆر ده‌که‌وێته سه‌ر شانی په‌رله‌مانتاره‌کان ده‌بێ جه‌سورانه به‌رگری که‌ن له‌تێپه‌ڕاندنی ئه‌و یاسایانه‌ی که هێڵی سورن و ره‌هه‌ندی نیشتیمانیان هه‌یه!
.gif)
■ مەحمود رەزا رۆژی ٢٠ی ئەم مانگە جڤاتی نیشتمانیی بزوتنەوەی گۆڕان بۆ ماوەی ٨ سەعات کۆبوەوە. لە کۆتاییا ئەندامێکی جڤات لێدوانی دا بۆ کەناڵی ئاسمانی‌ی knn و وتی: "سێ بژاردە لە بەردەم گۆڕانایە کە بریتین لە: بایکۆتکردنی پرۆسەی سیاسی؛ بەشداریکردن لە پەرلەمانا؛ بەشداریکردن لە پەرلەمان و حوکمەتا" . با یەکە یەکە ئەم بژاردانە لێک بدەینەوە: یەکەم: بایکۆتکردنی پرۆسێسی سیاسی: ئەگەر مەبەست لە بایکۆتکردنی پرۆسێسی سیاسی ئەوە بێ بەشداری حوکمەتی ئایندەی هەرێم و خولی پێنجەمی پەرلەمان نەکەین و تەواو، ئەوە هەنگاوێکی سیاسیی پاسیف و بێ بەرهەمی سیاسی‌یە و گۆڕان ئەبا بەرەو پوکانەوەی یەکجاری. دوەم: بەشداریکردن لە خولی پێنجەمی پەرلەمانا: بزوتنەوەی گۆڕان لە هەڵبژاردنەکانی ٣٠ی ئەیلولی ئەمساڵا شکستی گەورەی خوارد. هۆکان زۆرن، ئەم وتارە تەرخانە بۆ بابەتێکی کە نەک دیاریکردنی هۆکانی شکستەکە، بۆیە درێژەی نا دەمێ. ناشمەوێ پاساو بۆ شکستی ئەمجارەی گۆڕان بهێنمەوە. بەڵام تەزویری ئەمجارەی پارتی و یەکێتی، بە (نسبە و تەناسوب) لە چاو جارەکانی رابردوا، گەورەترین بو. رەنگە ژمارەی دەنگە تەزویرکراوەکان لە چاو جارانی رابردوا کەمتر بوبێ، بەڵام بە هۆی نزمی‌ی رێژەی دەنگدانەوە کاریگەرتر بو، ژمارەی کورسی‌ی تەزویرکراوی بەرز کردەوە. بەشداریکردن لە پەرلەمانێکی وایا کۆمەڵێ پرسیار روبەڕوی بزوتنەوەی گۆڕان ئەکاتەوە: ١. ئەگەر راستە تەزویر کراوە بۆچی ئەنجامەکەی قبوڵ ئەکەن و ئەبنە بەشێک لێ‌ی؟ ٢. ئەگەر لە خولەکانی پێشوا ٢٤- ٢٥% ئەندامانی پەرلەمان گۆڕان بوبن (لە بەشی کورد) و نەیان توانی بێ رێگە لە زوڵم و ستەم و دزی و تاڵانی و پێشێلکردنی قانون و ملهوڕی‌ی پدک و ینک بگرن، ئەمجارە بە رێژەی ١٢- ١٣% چیتان پێ ئەکرێ؟ ٣. ئەگەر جاران گۆڕان بە قورسایی خۆی و هێزی مەعنەوی‌ی زۆری رێکخەرەکەی و نیوملیۆن دەنگدەری پشتیوانەوە نەی توانی بێ سنورێ بۆ تاکڕەوی پدک و ینک دا بنێ، ئێستا لە غیابی وجودی مادی‌ی سیمبولەکەی و نیوەبونی ژمارەی کورسی‌یەکانی و سێچارەک بونی دەنگدەر و پشتیوانەکانیا چی پێ ئەکرێ؟ ٤. ئەگەر ئێستا هەم لەناو پەرلەمانا ژمارەتان زیاترە و هەم لەناو کۆمیسیۆنی "ناسەربەخۆ"ـی هەڵبژاردن و راپرسی‌ی هەرێما، بە خۆتان و هاوپەیمانەکانتانەوە نزیک بە نیوەن، نەتوانن تەزویرەکە پوچەڵ بکەنەوە و تەزویرچی‌یان بدەنە دادگا، دوای قبوڵکردنی ئەنجامەکان و چونە ناو پەرلەمان چیتان پێ ئەکرێ؟ ٥. ئەگەر لە خولی پێشوا ژمارەی کورسی‌یەکانی پدک و ینک و دەستوپێوەنەکانیان ٦٦ و گۆڕان و هاوپەیمانەکانی ٤٠ بوبن و شتێکی وا هەست پێ کراو بۆ بەرژەوەندی‌ی گشتی روی نە دابێ، لە خولی ئایندەیا ئەو دو ژمارەیە بە دوای یەکا بوبن بە ٧٧ و ٣١، چیتان پێ ئەکرێ؟ ٦. بەشداری کردنتان لە پەرلەمانێکا، کە خۆتان ئەڵێن هەزران بەڵگەمان لە بەردەستە بۆ سەلماندنی تەزویری سیستماتیک، بریتی نیە لە شەرعاندنی تەزویرەکە و نائومێدکردنی زیاتری خەڵک لە هەڵبژاردن و پرۆسێسی سیاسی، کە ئامانج و ئاواتی پدک و ینک ە؟ ٧. ئەگەر خولی پێنجەمی پەرلەمان کەوتە کار و پێشنۆرە (ئەولەویەت) درا بە دانانی ئەم قانونانە: • کاراکردنەوە یا هەموارکردنەوەی قانونی سەرۆکایەتی هەرێم و هێنانەوە مەیدانی سەرۆکی پارتی، کە هەمو هێز و ئاوەزی پارتی و بنەماڵەی بارزانی بەو ئاراستەیەیە؛ • دانانی دەستورێک، کاڵا بە قەد باڵای سەرۆکی پارتی و بنەماڵەی بەرزانی؛ • (خەسخەسە)کردنی کەرتی تەندروستی؛ • (خەسخەسە)کردنی کەرتی کارەبا؛ • (خەسخەسە)کردنی کەرتی نەوت؛ • (خەسخەسە)کردنی رێگەوبان؛ • (خەسخەسە)کردنی ژیان و گوزەرانی خەڵک بەگشتی؛ • هەموارکردنەوەی قانونی تیرۆر، بە شێوەیەک هەمو دەنگێکی ناڕازی لە زوڵم و ستەمی پدک و ینک بکا بە تیرۆرست، ئاخۆ گۆڕان و هاوپەیمانەکانی ئەتوانن لەناو پەرلەمانا رێگە لە هاتنەدی ئەو خەتەرانە بگرن؟ سێیەم: بەشداریکردن لە پەرلەمان و حوکمەتا: بە بۆچونم جێبەجێکردنی ئەم بژاردەیە کۆتایی بە ژیانی سیاسی نوخبەی بزوتنەوەی گۆڕان و تەنانەت کۆتایی بە رۆڵی ئیجابی بزوتنەوەی گۆڕان لە ژیانی سیاسیی خەڵکی کوردستان یشا ئەهێنێ و گۆڕان ئەبێ بە ژمارەیەک و ئەچێتە سەر ژمارەی حیزبە نەریتەوانەکانی هەرێم. پرۆژەکەی گۆڕان، پرۆژەیەکی زیندوە، نامرێ هەتا کۆتایی بە زوڵم و ستەمی هەردو بنەماڵەی بەرزانی و تاڵەبانی نەیە و دادی کۆمەڵایەتی و دەوڵەتی هاووڵاتی نەیەنە دی. بۆیە، ئەگەر ئەم نوخبەیەی گۆڕان و تەنانەت بزوتنەوەی گۆڕان یش شکست بهێنێ، حوکمی مێژوە کە ئەبێ هێزێکی کەی کۆمەڵایەتی و سیاسی بێتە مەیدان بۆ هەڵگرتنی ئاڵای پرۆژەکەی گۆڕان، بەرەو گۆڕینی ریشەیی لە هەمو بوارەکانی ژیانی سیاسی، ئابوری، کۆمەڵایەتی و کلتوری‌ی خەڵکی کوردستانا. پەندێکی کوردی ئەڵێ: "مارانگاز دوجار لەبەردەم کونێکا مار پێوەی نادا". ئەم پەندە زۆر بە چڕی باس لە کەڵکوەرگرتن لە شکست ئەکا. بزوتنەوەی گۆڕان لە ماوەی چەن ساڵی رابردوا، دوجار لەبەردەم هەمان کونا مار پێوەی داوە (بەشداری لە حوکمەت و بەشداری لە کۆمیسیۆنی هەڵبژاردن و راپرسی: رۆڵی ئەم کۆمیسیۆنە لە ریفراندۆم و هەڵبژاردنی ٣٠ی ٩یا لێبوکی‌ی سەلماند) . ئەگەر ئەمجارە بچێتەوە ناو پەرلەمان و حوکمەتە لێبوکەکەی هەردو بنەماڵە، ئەبێ بە سێ جار. پەندێکی کەی کوردی ئەڵێ: "ئەگەر جارێک خەڵەتانتم، خوا بت گرێ، ئەگەر بو بە دوجار، خوا خۆم بگرێ" کەواتە هەقمە بە سەرکردەکانی بزوتنەوەی گۆڕان بڵێم: "ئەگەر ئەمجارەش گۆڕان‌تان بردەوە ناو ئەو مەهزەلەی حوکمڕانی‌یە، لە باتی جارێ، خوا هەزارجارتان بگرێ" . ئەی چارە؟ چارە، یەکە نەک سیان: بە بڕوام تاکە بژاردەی گونجاو بۆ ئەم قۆناغە لەبەردەم بزوتنەوەی گۆڕانا بریتی‌یە لە: رەفزکردنی هەڵبژاردنی ٣٠ی ٩ و ئەنجامەکانی و راگەیاندنی شەرعی نە بونی حوکمەتە لێبوکەکەی پدک و ینک. بە دوایا گرتنەبەری ئەم هەنگاوانە: ١. کۆتایی پێهێنانی یەکجارەکی گفتوگۆ لەگەڵ پدک و ینک بە جیا یا پێکەوە لەسەر هیچ کەیس و بابەتێک پێوەندی‌یان بە ژیان و گوزەرانی خەڵک و سیستمی حوکمڕانی‌یەوە هەبێ چ لە هەرێم و چ لە بەغا. ٢. بەکارهێنانی هەمو توانای و هەمو کاتی بۆ پێکهێنانی هاوپەیمانی‌یەکی نیشتمانیی بەرفراوان، لەسەر بناغەی بەرنامەیەکی نیشتمانیی هاوبەش لەگەڵ: کۆمەڵ، یەکگرتو، نەوەی نوێ، هاوپەیمانی بۆ دیمۆکراسی و دادپەروەری، حیزبی شیوعی کوردستان، بزوتنەوەی ئیسلامی، تورکمانەکان و مەسیحی‌یەکانی هەرێم، رێکخراوەکانی کۆمەڵی مەدەنی، کەسایەتی سیاسی و کۆمەڵایەتی سەربەخۆ و هەر هێز و کەس و لایەنێکی سیاسیی تر بڕوای بە پرۆژەیەکی نیشتمانیی وەها بێ، ئەگەر لە سەرکردە و کادر و ئەندامی حیزبەکانی دوبنەماڵەکەیش بن. ٣. تەرحکردنی ئەو هاوپەیمانی‌یە وەکو ئەڵتەرناتیفی دەسەڵات لە هەرێمی کوردستان و خستنەگەڕی هەمو توانا دیپلۆماسی، سیاسی، مادی، میدیایی و جەماوەری‌یەکانی بۆ سەندنەوەی شەرعیەتی شۆڕشگێڕی یا "قانونی!" کە نیەتی، لەم دەسەڵاتە ملهوڕەی هەرێم و ئابڵوقەدانی و لە کارخستنی. ٤. هاوپەیمانی‌یەکە داوا لە عیراق و کۆمەڵی ناودەوڵەتی و رێکخراوی نەتەوە یەکگرتوەکان بکا، بێن بە هانای خەڵکی کوردستانەوە و خۆیان سەرپەرشتی هەڵبژاردنێکی گشتی بکەن، لە ئەلفەوە بۆ یاء و هەمو مەرجەکانی هەڵبژاردنێکی دیمۆکراتی تیا بێ: پاکژ، نهێنی، ئازاد و، یارمەتی یشمان بدەن بۆ خۆگرتن و هەستانەوە. ٥. ئەگەر حوکمڕانەکانی هەرێم داواکانی هاوپەیمانی‌یەکەیان رەفز کرد و کۆمەڵی ناودەوڵەتی یش نەهات بە هاناوە، هەنگاوی دواتر بریتی بێ لە: پەنابردن بۆ هەمو جۆرەکانی خەباتی مەدەنی: • خۆپیشاندانی گەورە و بەردەوام و نەپچڕاوە و سەرتاسەری، بە بەشداری سەرکردەکانی هەمو لایەنەکان؛ • یاخیبون (عصیان)ـی مەدەنی؛ • بڕینی رێگەی بەقاچاخبردنی سامانی نیشتمانی؛ • شانبەشانی ئەوانە، چڕکردنەوەی خەباتی دیپلۆماسی. ئەگەر وا نەکەین، ئەوا رۆژ لە دوای رۆژ ئاسۆی ژیان لە هەرێم تاریک و تاریک تر ئەبێ. کاتی خۆی ماوتسی تۆنگ ئەی وت: ئیمپریالیزم شێرینە بەفرینەیە، ئیرادەمان هەبێ ئەی توێنینەوە. مەبەستم نیە بڵێم ئەو قسەیەی ماو راست بو یا هەڵە، مەبەستمە بڵێم: حوکمڕانەکانی هەرێم نەک شێر، بەڵکو رێوی‌یە بەفرینەن، ئەگەر ئیرادەمان یەک خەین، زۆر ئاسان ئەیان توێنینەوە. بۆچی ئەوان لەسەر ناهەق، بۆ درێژەدان بە زوڵم و ستەم و تاڵان و بڕۆ و زامنکردنی بەرژەوەندی‌یە تایبەتەکان‌یان هەم ئیرادەیان هەیە، هەم پرۆژەی هاوبەش؟ بۆچی ئێمە لەسەر هەق و بەرگریکردن لە مافەکانی خەڵک ئیرادەمان نەبێ و نەتوانین پرۆژەی هاوبەشمان هەبێ؟ بێجگە لە بنەماڵە و سەرکردە دەسڕۆیشتوەکانی پدک و ینک هەمو هێزەکانی تر لەبەردەم تاقیکردنەوەی ویژدان و ئەخلاق و مێژو دان.
.gif)
■ سەرتیپ وەیسی كەریم ئه‌و زانیاری و نهێنیه‌ی كۆمسیۆن ده‌یه‌وێ بیشارێته‌وه دوای ئه‌وه‌ی شه‌وی 20ی تشرینی یه‌كه‌م، پارتی دیموكراستی كوردستان پێشنیاز بۆ یه‌كێتیی نیشتمانی كوردستان ده‌كات، تاوه‌كو له‌سه‌ر ئه‌نجامی هه‌ڵبژاردنی په‌رله‌مانی كوردستان ڕێكبكه‌ون، بۆ ئه‌مه‌ش مۆڵه‌تی چه‌ند كاتژمێرێكی كه‌م ده‌دات به‌و حزبه، یه‌كێتیش له پێناو كه‌منه‌بوونه‌وه‌ی كورسییه‌كانی به پێشنیازه‌كه‌ی پارتی ڕازی ده‌بێت و داوا له نوێنه‌ره‌كانی ده‌كات واژوو له‌سه‌ر ئه‌نجامی هه‌ڵبژاردن بكه‌ن و دواتریش ئه‌نجامه‌كان به په‌له په‌ل ڕاده‌گه‌یه‌نن. پارتی و یه‌كێتیی له‌سه‌ر ئه‌وه ڕێككه‌وتن ده‌نگی 96 بنكه‌ی ده‌نگدان، كه ده‌كاته 119 هه‌زار ده‌نگ به ته‌واوی پوچه‌ڵبكرێته‌وه به ده‌نگی سه‌رجه‌م لایه‌نه‌كان، پێشتریش كۆمسیۆن فۆڕمی ژماره 52، كه تایبه‌ته به ڕیزبه‌ندی كاندیده‌كان له‌سه‌ر بنه‌مایی ته‌واوی بنكه‌كان جیاكردبووه به‌و ده‌نگانه‌شه‌وه كه پوچه‌ڵكرانه‌وه. له كاتی پوچه‌ڵكردنه‌وه‌ی زیاتر له 119 هه‌زار ده‌نگ، ده‌بوایه دووباره جیاكردنه‌وه‌و وردبینی له ناوی كاندیده ده‌رچووه‌كان ئه‌نجامبدرابووایه، چونكه پوچه‌ڵكردنه‌وه‌ی ده‌نگه‌كان كاریگه‌ری ده‌بوو له‌سه‌ر ڕیزبه‌ندی كاندیده‌كان، ته‌نانه‌ت هه‌ندێ كاندید كه ئێستا ده‌رچوون دوای سوتاندنی ده‌نگه‌كان و بڕیاره‌كه‌ی كۆمسیۆن نه‌یانده‌توانی سه‌ركه‌ون بۆ په‌رله‌مان، به پێچه‌وانه‌شه‌وه ڕاسته بۆ هه‌ندێ كاندیدی كه سه‌رنه‌كه‌وتوون. هه‌رئه‌مه‌شه‌وه‌ی پارتی و یه‌كێتی ڕێككه‌وتنیان كرد، به‌هۆكاری ئه‌وه‌ی دووباره جیاكردنه‌وه‌ی ده‌نگی كاندیده‌كان پڕۆسه‌كه دواده‌كه‌وێت، پارتی و یه‌كێتیی ڕێككه‌وتن كه ڕیزبه‌ندی كاندیده‌كان وه‌ك خۆی بێت، له‌كاتێكدا له سنووری پارێزگای هه‌ولێرو سلێمانی و دهۆك، له نێو كاندیده‌كانی یه‌ك لیست ئه‌گه‌ر دووباره جیاكردنه‌وه بكرابووایه، گۆڕانكاری له ڕیزبه‌ندی كاندیده‌كان له‌سه‌رجه‌م حزبه‌كان ڕووی ده‌دا. به‌سه‌ره‌نجدان به ئه‌نجامی كۆتایی كۆمسیۆن له باره‌ی ژماره‌ی ده‌نگی كاندیده‌كان، ده‌رده‌كه‌وێ ده‌نگی زۆربه‌ی كاندیدی نێو یه‌ك لیستی لایه‌نه‌كان لێكنزیكن، بۆیه له حاڵه‌تی سوتاندنی ده‌نگی ئه‌و 96 بنكه گۆڕانكاری گه‌وره ڕوویده‌دا له ڕیزبه‌ندی كاندید، به‌ڵام كۆمسیۆن ئه‌وه‌ی نه‌كرد. نموونه كاندیدێكی یه‌كێتیی به ناوی ( عه‌باس فه‌تاح) به‌پێی ئه‌نجامی كۆتایی كۆمسیۆن 3 هه‌زار 97 ده‌نگی هێناوه، له كاتێكدا ئه‌و كه‌سه ته‌نها له سنووری بنكه‌ی یه‌كێك له قه‌زاكان 987 ده‌نگی هێناوه، به‌پێی بڕیاره‌كه‌ی كۆمسیۆن ده‌نگه ئه‌و بنكه‌یه پوچه‌ڵكراوه‌ته‌وه، ئه‌و كاته ژماره‌ی ده‌نگه‌كانی ئه‌و كه‌سه ده‌بێته 2 هه‌زار 92 ده‌نگ، به‌ڵام كۆمسیۆن ڕیژه‌ی ده‌نگه‌كانی هه‌روه‌ك خۆی هێشتۆته‌وه‌و كه‌مینه‌كردۆته‌وه، له كاتێكدا له نێو لیستی یه‌كێتیی ئه‌و كه‌سه‌ی سه‌ركه‌وتوو بۆ په‌رله‌مان وه‌ك دوا كاندیدی سه‌ركه‌وتوو له ڕه‌گه‌زی پیاو ژماره‌ی ده‌نگه‌كانی 2 هه‌زارو 216 ده‌نگه ( واته كه‌مترین ژماره‌ی ده‌نگی كورسیی پیاو له نێو لیستی یه‌كێتیی ئه‌وه‌نده‌یه)، به‌مه‌ش دوای ده‌ركردنی 987 ده‌نگ له ده‌نگه‌كانی عه‌باس فه‌تاح، ناوبراو ده‌نگی ده‌بێته 2 هه‌زارو 92 ده‌نگ ، به‌مه‌ش ناوبراو نابێته ئه‌ندامی په‌رله‌مان و یه‌كێكی دیكه دێته شوێنی. ئه‌گه‌ر به كرداره‌كی بڕیاره‌كه‌ی كۆمسیۆن له‌سه‌ر ده‌نگی كاندیده‌كانیش جێبه‌جێبكرابووایه، له نێو كاندیده‌كانی پارتیش گۆڕانكاری گه‌وره له ڕیزبه‌ندی كاندیده‌كان ڕوویده‌دا. بۆ نموونه له نێو لیستی پارتی جگه له‌وه‌ی سه‌رۆك لیست وه‌ك خۆی له ڕیزبه‌ندی یه‌كه‌م ده‌مایه‌وه، ئه‌گه‌ری هه‌بوو گۆڕانكاری له ڕیزبه‌ندی سه‌رجه‌م كاندیده سه‌ركه‌وتووه‌كان ڕووبدات، ئه‌گه‌رێكی دیكه‌ش ئه‌وه‌بوو دوو پیاوو ئافره‌تێك كه سه‌رنه‌كه‌وتن دوای دووباره جیاكردنه‌وه‌ی ده‌نگی كاندیده‌كان سه‌ركه‌وتنیان مسۆگه‌ر بكردبووایه. ئه‌و نموونانه‌ی سه‌ره‌وه بۆ كاندیدی سه‌رجه‌م لایه‌نه‌كان ڕاسته به تایبه‌ت لیستی كۆمه‌ڵ و نه‌وه‌ی نوێ و هه‌ندێ لایه‌نی بچووك، چونكه ئه‌و كه‌سانه‌ی سه‌رنه‌كه‌وتن له‌گه‌ڵ ئه‌و كه‌سانه‌ی سه‌ركه‌وتن له‌ڕیزبه‌نده‌كه‌دا، به چه‌ند ده‌نگێكی كه‌م جیاوازیان هه‌یه. سكانداڵ و فه‌زاحه‌ته گه‌وره‌كه‌ی كۆمسیۆن ئه‌وه‌یه، ئه‌و ئه‌نجامه‌ی له‌باره‌ی ڕیزبه‌ندی كاندیده‌كان وه‌ك ئه‌نجامی كۆمسیۆن بڵاویكردۆته‌وه سه‌رله‌به‌ری هه‌ڵه‌یه‌و، بێلایه‌نی و پڕۆفێشناڵی كۆمسیۆن خستۆته ژێر پرسیارو پێویسته لایه‌نه سیاسییه‌كان و په‌رله‌مان داوای متمانه‌و شه‌رعیه‌تیان لێبكه‌نه‌وه.
■ مەجید ساڵح رامانێک لە کاری پەرلەمانتارەکانی کوردستان... هەفتەیەک دوای هەڵبژاردن خەریکی چاکردنی ئۆتۆمبیلەکەم بووم، فیتەرێک کە دراوسێ دوکانی ئەوفیتەرە بوو کە کارەکەی منی راییدەکرد هاتەپێشەو وتی ئەرێ کاکە... دەنگەکانمان چی لێهات؟ من لەو ماوەیەدا راهاتبووم سەیری پەنجەی شایەتوئیمانی خەڵکم دەکرد بزانم ئاخۆ بەشداری هەڵبژاردنەکەی کردوە یان نا! کە کابرا ئەو پرسیارەی کرد، فیتەرەکەی لای منیش بەدەم کارکردنەوە پرسیارەکەی دووبارە کردەوە.. پرسیارێکی رەوایە، رۆژانە خەڵکی گۆڕانخواز ئەم پرسیارە لە هەڵوسوڕاوەکانی گۆڕانی دەکەن و لە راستیدا وڵامێکی دروستمان نییە پێیان بێژینەوە، لانی کەم من خۆم وڵامێکی قەناعەت پێکەرم نییە.. بەڵام ئەوەی جێگەی سەرنج بوو فیتەرەکەی من پەنجەی مۆر نەبوو، وتم ئەی تۆ بۆ؟ بەپەنجەتەوە دیارە بەشداری هەڵبژاردن نەکردوە.. یەکسەر وتی وەڵا خۆ راست دەکەی.. لەم قسانەدا بووین ئەوەی فیتەری دراوسێش دەستی خستە پشتیەوە و شاردیەوە.. وتم ئاساییە تۆش بەشداریت نەکردوە، کەواتە لە چی دەپرسنەوە، بە دڵنیایەوە دەنگەکانتان بە هەویەی مزەوەر چووە بۆ لایەنی تر.. کەواتە بچن پرسیاری دەنگەکانتان لەوان بکەن.. کابرا یەکسەر وتی کاکە دەنگ بۆ بدەم؟ بیدەم بە پەرلەمنتارێک بچێ مانگی ٦ ملیۆن بخاتە تەنکەی گیرفانیەوە و ئاگای لە من نەبێ!!؟ ئەوی تر بۆی سەندەوە: وەڵا من ئەگەر (.....) خۆی هەڵبژاردایەتەوە دەنگم پێی دەدا، چونکە دایم لە تەلەفزیۆنەکان دیفاع لە خەڵک دەکات..!!! بۆچوونی ئەو دوو هاوڵاتییە دەرخەری ئەوەن کە وێنەی پەرلەمانتار لە زیهنیەتی خەڵکی ئێمەدا دوو جۆرە: ١. پەرلەمانتار بۆ پارە وەرگرتن و دەوڵەمەند بوون دەچێ بۆ پەرلەمان. ئەمەش هەڵقوڵاوی حەقیقەتێکی سەلمێنراوە کە لە کوردستاندا حزبەکانی دەسەڵات (یەکێتی و پارتی) هەمیشە وەک کۆمپانیایەک دەڕواننە پەرلەمان، بۆ ئەوەی لە رێگەیەوە داهاتووی کۆمەڵیک کادیری خۆیان مسۆگەر بکەن..هەر لەبەر ئەوەشە بە دەگمەن پەرلەمانتارێک چەند خولێک لە پەرلەماندا دەمێنێتەوە و هەرچوار ساڵ جارێک کۆمەڵێ کادیر دەبن بە پەرلەمانتار و تا لە ئەرکی پەرلەمنتاری تێدەگەن، خولەکەیان تەواو دەبێ و کۆمەڵیکی دیکە دێنە جێگەیان.. ٢. پەرلەمانتار دەبێ دایم لە راگەیاندنەکانەوە دەرکەوی و عەرزی خۆی بکات و دیفاع لە خەڵک بکات... دیسانەوە ئەمەشیان حەقیقەتە، بەڵام حەقیقەتێکی ئاوەژوو.. پەرلەمانتار سێ ئەرکی لەسەر شانە: - دەرکردنی یاسا. - موناقشە و پەسەند کردنی بودجە. - چاودێری کردنی حکومەت. بەڵام لە دوای دروست بوونی ئۆپۆسزیۆنەوە، هەندێ پەرلەمانتار کە بەداخەوە زۆربەیان لە ئۆپۆزسیۆنن، شاشەی تەلەفزیۆنەکانیان گرتووە و هەر رۆژەی جۆرێک موزایەدە دەکەن.. لە لێکۆڵینەوەیەکدا کە کردوومە لەسەر ئەو پەرلەمانتارانەی زۆرترین جار لە میدیاکانەوە دەرکەوتوون، گەیشتوومەتە ئەو دەرئەنجامەی کە ئەو پەرلەمانتارانە خاوەنی کەمترین پرۆژە و پرسیار کردن لە حکومەت و تەنانەت ئامادەییان لە لیژەکانی پەرلەماندا هەبووە، بەڵام خەڵک پێیان وایە ئەمانە بەرگری کەری مافی خەڵکن..!! بە مانایەکی دیکە هەڵەی گەورەی حزبەکانی باشور ئەوەیە حزبەکانی دەسەڵات پەرلەمنیان کردوە بە سەرچاوەی ئیرتیزاق بۆ کادیرەکانیان و ئۆپۆزیسۆنیش پەرلەمانتاری کردوە بە کائینێکی پڕوپاگەندە کردن و عەوام فەریبی.. کێشەکە لەوەدایە ئەم دوو بۆچوونە بووەتە گرفت لەبەردەم پرۆسەی پێشکەوتنی دیموکراسی و دوورکەوتنەوەی خەڵک لە بەشداری سیاسی.. ئەزموونی ئەو گەلانەی کە لە پرۆسەی سیاسی و مومارەسەکردنی دیموکراسی لە پێشەوەی ئێمەن، پێمان دەڵێ ئەو دوو تێڕوانینە بۆ پەرلەمانتار هەڵەیە، چونکە ئەرکی پەرلەمانتار وەک وتمان تەنها: - دەرکردنی یاسا. - موناقشە و پەسەند کردنی بودجە. - چاودێری کردنی حکومەتە. بۆیە کاتی ئەوەیە هەموو حزبەکان پێکەوە ئەم چەوتییە بە تەواوەتی راست بکەنەوە، دۆخەکە رۆژ لە دوای رۆژ خراپتر دەبێ.. چونکە خەڵک دابەش بوون بە سەر دوو بەرەدا: بەشێک پێیان وایە پەرلەمان، بۆ خۆ دەوڵەمەند کردنە.. بەشەکی دیکەش پێیان وایە گرنگ ئەوەیە پەرلەمانتار لە کەناڵەکانی راگەیاندنەوە قسەبکات و توند بێ و هەڕەشە بکات ..
.gif)
زمناكۆ ئیسماعیل بەپێی ئەنجامی راگەیەنراوی هەڵبژاردنەکانی ٣٠ ئەیلولی ٢٠١٨ی هەرێمی کوردستان، هەریەکە لە پارتی دیموکراتی کوردستان و یەکێتی نیشتیمانی کوردستان، رێژەی کورسی بەدەستهاتویان زیادیکردوە، بەڵام ژمارەی دەنگەکانیان کەمیکردوە، لەهەمانکاتدا دووان لەهێزە نەیارەکانیان، (بزوتنەوەی گۆڕان و یەکگرتوی ئیسلامی)، کە براوەی دوهەم و چوارهەمی هەڵبژاردنەکانی ٢١ی ئەیلولی ٢٠١٣، هەم دەنگەکانیان و هەم کورسییەکانیان بەڕێژەیەکی بەرچاو کەمیکردوە، لەبەراوبەر ئەوەشدا، کۆمەڵی ئیسلامی، هاوتای ئەو دوو هێزە، دەنگەکانی کەمیکردوە، بەڵام کورسییەکی دیکەی لیستەکەی، بۆ پەڕڵەمانی هەرێم زیادیکردوە، بەدیوێکی دیکەشدا دەبینین، هێزو قەوارەی نوێ دروستبون، بەڵام هیچیان وەک نەوەی نوێ، نەیانتوانیوە ببن بەخاوەنی دەنگێکی بێشومارو ٨ کورسی پەڕڵەمانی. ئەگەر بەراورد بکەین لەنێوان هەڵبژاردنەکانی ٣٠ ئەیلولی ٢٠١٨ لەچاو هەڵبژاردنەکانی ٢١ی ئەیلولی ٢٠١٣، بێگومان گۆڕانکاری بەرچاوو دەبینین، لەژمارەی دەنگەکان و کورسی بەدەستهاتوی حیزب و قەوارەو لایەنەکان. پارتی دیموکراتی کوردستان، لە هەڵبژاردنەکانی ٢٠١٣دا، توانیبوی ٧٤٣ هەزارو ٩٨٤ دەنگ کۆ بکاتەوە، بەبەهای ٣٨ کورسی، بەڵام لەهەڵبژاردنەکانی ٢٠١٨دا توانیویەتی، ٦٨٦ هەزارو ٧٠ دەنگ کۆبکاتەوە، ئەوەش بەبەهای ٤٥ کورسی، لەوڕوانگەشەوە دەبینین، کە پارتی ٧ کورسی زیادیکردۆتە سەر بەهای کورسی فراکسیۆنەکەی، لەهەمانکاتدا ٥٧ هەزارو ٩١٤ دەنگ کەمیکردوە، هەرچی یەکێتی نیشتیمانی کوردستانە، بۆ هەڵبژاردنەکانی ٢٠١٨، توانیویەتی، ٣١٩ هەزارو ٩١٢ دەنگ کۆبکاتەوە، بەبەهای ٢١ کورسی، بەڵام لەهەڵبژاردنەکانی ساڵی ٢٠١٣دا توانیبوی ٣٥٠ هەزارو ٥٠٠ دەنگ بەدەستبهێنێت، بەبەهای ١٨ کورسی، لەو روانگەشەوە یەکێتی نیشتیمانی کوردستان، بۆ ئەم هەڵبژاردنە،٣٠ هەزارو ٥٨٨ دەنگ کەمیکردوە، بەڵام لەچاو هەڵبژاردنەکانی ٢٠١٣دا، یەکێتی نیشتیمانی، ٣ کورسی زیادیکردوە. لەبەراوبەر ئەوەشدا، دوان لەو سێ هێزەی، کە گوتاری گۆڕینی دەسەڵاتی ٢٧ ساڵەی یەکێتی و پارتییان بەرزکردبویەوە (یەکگرتووی ئیسلامی و بزوتنەوەی گۆڕان)، کورسییەکانیان کەمیکردوە، بەڵام کۆمەڵی ئیسلامی، بەبەدەستهێنانی ٧ کورسی بۆ ساڵی ٢٠١٨، توانیویەتی یەک کورسی زیاد بکات لەچاو هەڵبژاردنەکانی ٢٠١٣. بزوتنەوەی گۆڕان لەهەڵبژاردنەکانی ٢٠١٣دا خاوەنی ٤٧٦ هەزار و ٧٣٦ دەنگ بوو، بەبەهای ٢٤ کورسی، بەڵام لەم هەڵبژاردنەدا ١٨٦ هەزارو ٩٠٣ دەنگی بۆ هەژمارکراوە، بەبەهای ١٢ کورسی، لەوڕوانگەشەوە بزوتنەوەی گۆڕان، ٢٨٩ هەزارو ٨٣٣ دەنگی لەدەستداوە، کە دەکاتە بەهای ١٢ کورسی. یەکگرتوی ئیسلامیش، لەهەڵبژاردنەکانی ٢٠١٣دا، خاوەنی ١٨٦ هەزارو ٧٤١ دەنگبوو بەبەهای ١٠ کورسی، بەڵام لەم هەڵبژاردنەی دوایدا، لەگەڵ بزوتنەوەی ئیسلامی و بەیەک قەوارە لەژێر ناوی، هاوپەیمانی بەرەو ئیسڵاح، بەشدارییان لەهەڵبژاردنەکانداکرد، لەوڕوانگەشەوە بوون بەخاوەنی ٧٩ هەزار و ٤٣٤ دەنگ، کە ئەوەش دەکات بەبەهای ٥ کورسی. واتە لەهەڵبژاردنەکانی ٢٠١٣دا یەکگرتوی ئیسلامی و بزوتنەوەی ئیسلامی بەهەردوو لیست، ٢٠٨ هەزارو ٥٧٥ دەنگیان هێنابوو، چونکە لەو هەڵبژاردنەدا، یەکگرتوی ئیسلامی خاوەنی ١٨٦ هەزارو ٧٤١ دەنگبوو، بزوتنەوەی ئیسلامی ٢١ هەزارو ٨٤١ دەنگی هەبوو بەبەهای ١ کورسی، بەڵام بۆ ئەم هەڵبژاردنە کە لیستی (هاوپەیمانی و بەرەو ئیسڵاح) یان بەهاوبەشی پێکهێناوە، خاوەنی٧٩ هەزار و ٤٣٤ دەنگن، واتە بەهەردوو حیزب، ١٢٩ هەزارو ١٤١ دەنگیان کەمکردوە، لەگەڵ ٦ کورسی. هەرچی کۆمەڵی ئیسلامییە، لە هەڵبژادنەکانی ساڵی ٢٠١٣دا خاوەنی ١١٨ هەزار و ٥٧٤ دەنگبوو، بەبەهای ٦ کورسی، بەڵام لەم هەڵبژاردنەدا خاوەنی ١٠٩ هەزار و ٤٩٤ کورسییە بەبەهای ٧ کورسی، هەرچەندە کۆمەڵی ئیسلامی ٩ هەزارو ٨٠ دەنک کەمیکردوە، بەڵام بەهۆی دابەزینی بەهای کورسی لە ١٧ هەزار دەنگدەرەوە بۆ ١٥ هەزار، توانیویەتی یەک کورسی زیادە بخاتەسەر بەهای کورسی بەدەستهاتوی لیستەکەی. بەو پێیەی فکری گۆڕینی یەکێتی و پارتی وەک دوو حیزبی دەسەڵاتدار، لەهەڵبژاردنەکانی ٢٥-٧-٢٠٠٩ دەستیپێکرد، ئەگەر بەراوردێک بکەین، لەنێوان زیادکردن و کەمکردنی دەنگی هەر ٥ هێزە سەرەکییەکەی پێشوی، نێو گۆڕەپانی سیاسی هەرێم، لەدوو هەڵبژاردنی رابردوو بەراوبەر بەم هەڵبژاردنەی ئێستا. یەکێتی و پارتی لە ٢٥-٧ی ٢٠٠٩دا بەیەک لیست بەشداری هەڵبژاردنەکانیانکرد بەناوی لیستی کوردستانی، بەوەش بەهەردوکیان توانییان ببن بەخاوەنی، یەک ملیۆن و ٧٦ هەزار و ٣٧٠ دەنگ، بەبەهای ٥٩ کورسی، لەهەڵبژاردنەکانی ٢١ی ئەیلولی ٢٠١٣دا، هەریەکەیان بەجیا بەشداری هەڵبژاردنەکانیانکرد، بەڵام بەوپێیەی ئەم دوو پارتە، هاوبەشی دەسەڵاتداریبون لەهەرێم، لەوڕوانگەشەوە، ئەگەر رێژەی دەنگەکانیان بخەینە پەنا یەکتر، بەوپێیەی پارتی دیموکراتی کوردستان لەهەڵبژاردنەکانی ٢١ ئەیلولی ٢٠١٣دا، خاوەنی ٧٤٣ هەزارو ٩٨٤ دەنگبووە، بەبەهای ٣٨ کورسی، یەکێتی نیشتیمانیش خاوەنی ٣٥٠ هەزار دەنگبووە، بەبەهای ١٨ کورسی، واتە بە یەکێتی و بە پارتی، لەو هەڵبژاردنەدا، خاوەنی یەک ملیۆن و ٩٤ هەزار و ٤٨٤ دەنگبون، بەبەهای ٥٦ کورسی، ئەگەر ژمارەی دەنگە بەدەستهاتوەکانی ساڵی ٢٠٠٩ لە ساڵی ٢٠١٣دا دەربکەین، ئەوا یەکێتی و پارتی ١٨ هەزارو ١١٤ دەنگ بۆ هەڵبژاردنەکانی ساڵی ٢٠١٣ زیادیانکردوە، بەڵام بەو پێیەی لە ساڵی ٢٠٠٩دا هەردوو پارتەکە بەهاوبەشی ٥٩ کورسییان هەبووە، لەهەڵبژاردنەکانی ٢٠١٣دا ٥٦ کورسی، ئەوا لەو هەڵبژاردنەدا بەهەردوو پارتەکە ٣ کورسی کەمیانکردوە. جیاواز لەو دوو هەڵبژاردنە، بۆ هەڵبژاردنەکانی ئەمساڵ ٣٠ ئەیلولی ٢٠١٨ ، هەردوو هێزی دەسەڵاتداری هەرێم، یەکێتی و پارتی، خاوەنی یەک ملیۆن و ٥ هەزارو ٩٨٢ دەنگن، بەبەهای ٦٦ کورسی، بەو پێیەش بێت، هەردوو پارتی دەسەڵاتدار، لەچاو هەردوو هەڵبژاردنەکانی ٢٥-٧-٢٠٠٩دا ٧ کورسی زیادیانکردوە، ئەگەر کورسی بەدەستهاتوو، بەراوردی هەڵبژاردنەکانی ٢١ ئەیلولی ٢٠١٣ بکەین، دەبینین بۆ هەڵبژاردنەکانی ٣٠ ئەیلولی ٢٠١٨، بەهەردوو حیزب، ١٠ کورسی زیادیانکردوە، لەهەمانکاتدا ئەگەر دەنگی بەدەستهاتوو، بەراورد بکەین، ساڵی ٢٠٠٩ هەردوو پارتی دەسەڵاتدار کە بەلیستی کورستانی بەشداری هەڵبژاردنەکانیانکردوە، ژمارەی دەنگی بەدەستهاتویان، یەک ملیۆن و ٧٦ هەزارو ٣٧٠ دەنگبوو، بەڵام لەهەڵبژاردنەکانی ٣٠ ئەیلولی ٢٠١٨، هەردوو حیزبی دەسەڵاتدار، ژمارەی دەنگەکانیان کەخاوەنی یەک ملیۆن و ٥ هەزارو ٩٨٢ دەنگە، لەژمارەی دەنگە بەدەستهاتوەکانی ساڵی ٢٠٠٩ دەربکەین، دەبینین ٧٠ هەزارو ٣٨٨ دەنگ کەمیانکردوە. خۆ ئەگەر هەمان ژمارەی دەنگی بەدەستهاتوی هەردوو حیزبی دەسەڵاتدار، بەراورد بکەین بەژمارەی دەنگی بەدەستهاتوی ٢١ ئەیلولی ٢٠١٣، دەنگەکانی هەردوو لایان، یەک ملیۆن و ٩٤ هەزار و ٤٨٤ دەنگ، لەژمارەی دەنگەکانی ساڵی ٢٠١٨ ، کە ملیۆن و ٥ هەزارو ٩٨٢ دەنگە، دەبینین ٨٨ هەزارو ٥٠٢ دەنگ کەمیانکردوە. بەو پێیەی ساڵی ٢٠٠٩ چرکەساتی هاتنە پێشەوەی هێزی نوێ و هێزی گوتار جیاوازبوو، لەچاو هەڵبژاردنەکانی پێشوتری خۆی، لەوروانگەشەوە ئەگەر بەراورد بکەین لەنێوان دەنگە بەدەستهاتوەکانی هەرسێ حیزبی (بزوتنەوەی گۆڕان و یەکگرتوی ئیسلامی و کۆمەڵی ئیسلامی)، ئەوا گۆڕانکاری بەرچاو دەبینین، لەژمارەی دەنگ و کورسی ئەو سێ هێزە. لەهەڵبژاردنەکانی ساڵی ٢٠٠٩دا، بزوتنەوەی گۆڕان خاوەنی ٤٤٥ هەزارو ٢٤ دەنگبوو، بەبەهای ٢٥ کورسی پەڕڵەمان، لەهەمانکاتدا بۆ هەڵبژاردنەکانی ٢١ ئەیلولی ٢٠١٣، بزوتنەوەی گۆڕان بوە بەخاوەنی، ٤٧٦ هەزارو ٧٣٦ دەنگ، بەبەهای ٢٤ کورسی، بەڵام بۆ هەڵبژاردنەکانی ساڵی ٢٠١٨، بزوتنەوەی گۆڕان، دەبێت بەخاوەنی ١٨٦ هەزارو ٩٠٣ دەنگ بەبەهای ١٢ کورسی. بزوتنەوەی گۆڕان لەنێوان هەڵبژاردنەکانی ٢٥-٧ی ٢٠٠٩ لەگەڵ هەڵبژاردنەکانی ٢١ی ئەیلولی ٢٠١٣دا، ٣١ هەزارو ٧١٢ دەنگ زیادیکردوە. بەڵام ئەگەر ژمارەی دەنگی بەدەستهاتوی بزوتنەوەی گۆڕان، بۆ هەڵبژاردنەکانی٣٠ ئەیلولی ٢٠١٨، بەراورد بکەین بەدەنگی بەدەستهاتوی ٢٥-٧-٢٠٠٩، ئەوا دەبینین بزوتنەوەی گۆڕان، ٢٨٥ هەزارو ١٢١ دەنگ کەمیکردوە. ئەگەر هەمان ژمارەی بەدەستهاتوی دەنگەکانی ساڵی ٢٠١٨ ی گۆڕان، لەژمارەی دەنگەکانی ٢٠١٣ ی ئەو بزوتنەوەیە دەربکەین، ئەوا دەبینین، ٢٨٩هەزارو ٨٣٣ دەنگ کەمیکردوە. ئەگەر دەنگەکانی هەرسێ لایەنی ئۆپۆزسیۆنی پاش هەڵبژاردنەکانی ٢٠٠٩ کۆبکەینەوە، دەبینین بزوتنەوەی گۆڕان خاوەنی ٤٤٥ هەزارو ٢٤ دەنگە، لیستی خزمەتگوزاری و چاکسازی (یەکگرتوی ئیسلامی و کۆمەڵی ئیسلامی و حیزبی سۆسیالیست و زەحمەت کێشان)، خاوەنی ٢٤٠ هەزارو ٨٤٢ دەنگە، بەو پێیەی هەردوو حیزبی سۆسیالیست دیموکرات و زەحمەتکێشان لەو قەوارەیە بە سێ کورسی پەڕڵەمانی بەشی حیزبەکانیان دەرچوون، لەوڕوانگەشەوە بەهای سێ کورسی بۆ ئەو هەڵبژاردنە لەژمارەی دەنگەکانی ئەو قەوارەیە دەر دەکەین، بەو پێیەی لەهەڵبژاردنەکانی٢٥-٧-٢٠٠٩دا بەهای یەک کورسی ١٨ هەزارو ١٨٧ دەنگبووە، واتە بەو سێ کورسییە، زەحمەتکێشان و حیسک، خاوەنی ٥٤ هەزارو ٥٦١ دەنگبوون، لەوڕوانگەشەوە ئەگەر ئەو ژمارەیە لە ٢٤٠ هەزارو ٨٤٢ دەنگی بەدەستهاتوی لیستی خزمەتگوزاری و چاکسازی دەربکەین، ئەوا دەبینین، ١٨٦ هەزارو ٢٨١ دەنگ بۆ یەکگرتوو کۆمەڵی ئیسلامی دەمێنێتەوە، لەهەڵبژاردنەکانی ساڵی ٢٠٠٩. ئەگەر ئەو ژمارە دەنگە بەدەستهاتوەی یەکگرتووی ئیسلامی و کۆمەڵی ئیسلامی، لەگەڵ ژمارەی دەنگەکانی بزوتنەوەی گۆڕان کۆ بکەینەوە، ئەوکات ئەو ئۆپۆزسیۆن خاوەنی ٦٣١ هەزارو ٣٠٥ دەنگبووە، ئەمەش لەکاتێکدایە کە بزوتنەوەی گۆڕان ٤٤٥ هەزارو ٢٤ دەنگ و یەکگرتوو کۆمەڵ، ١٨٦ هەزارو ٢٨١ دەنگیان هەبووە. بۆ هەڵبژاردنەکانی ٢١ ئەیلولی ٢٠١٣، هەرسێ هێزی بزوتنەوەی گۆڕان و یەکگرتووی ئیسلامی و کۆمەڵی ئیسلامی، توانیویانە ببن بەخاوەنی ٧٨٢ هەزارو ٥١ دەنگ، ئەمەش لەکاتێکدایە کە لەوهەڵبژاردنەدا، یەکگرتوی ئیسلامی خاوەنی ١٨٦ هەزارو ٧٤١ دەنگبووە، کۆمەڵی ئیسلامی خاوەنی ١١٨ هەزارو ٥٧٤ دەنگبووە، بزوتنەوەی گۆڕان خاوەنی ٤٧٦ هەزارو ٧٣٦ دەنگبووە. بەهەمان شێوەش بۆ هەڵبژاردنەکانی ساڵی ٢٠١٨ ، هەرسێ هێزی بزوتنەوەی گۆڕان و یەکگرتوو، کۆمەڵ، خاوەنی ٣٧٥ هەزارو ٨٣١ دەنگن، ئەمەش لەکاتێکدایە کە بزوتنەوەی گۆڕان ١٨٦ هەزارو ٩٠٣ دەنگ و کۆمەڵی ئیسلامی ١٠٩ هەزارو ٤٩٤ دەنگ و هاوپەیمانی و بەرەو ئیسڵاح (یەکگرتوو بزوتنەوەیی ئیسلامی) ٧٩ هەزارو ٤٣٤ دەنگی بەدەستهێناوە. ئەگەر رێژەی بەدەستهاتوی دەنگی ئەو سێ هێزە یەکگرتوو کۆمەڵ و گۆڕان، بەراورد بکەین لەنێوان هەڵبژاردنەکانی ٢٠٠٩ و ٢٠١٣ و ٢٠١٨دا، جیاوازی بەرچاو دەبینین. بەوپێیەی ساڵی ٢٠٠٩ ، هەرسێ هێزی ئۆپۆزسیۆن، خاوەنی ٦٣١ هەزارو ٣٠٥ دەنگبوون، ئەگەر ئەو ژمارەیە، بەراورد بکەین بەدەنگی بەدەستهاتوی ٢١ ئەیلولی ٢٠١٣، کە پێکهاتوە لە ٧٨٢ هەزارو ٥١ دەنگ، ئەوا دەبینین لەساڵی ٢٠١٣دا هەرسێ هێزی یەکگرتوو کۆمەڵ و بزوتنەوەی گۆڕان، ١٥٠ هەزارو ٧٤٦ دەنگ زیادیانکردوە، ئەگەر ژمارەی دەنگە کۆکراوەکانی هەرسێ لایەنی یەکگرتوو کۆمەڵ و بزوتنەوەی گۆڕان، بۆ هەڵبژاردنەکانی ٣٠ ئەیلولی ٢٠١٨ بخەینەوە بەرچاو، ئەوا دەکاتە ٣٧٥ هەزارو ٨٣١ دەنگ، ئەگەر ئەو ژمارەیەش بەراورد بکەین بەدەنگە بەدەستهاتوەکانی هەڵبژاردنەکانی ٢١ ئەیلولی ٢٠١٣، کەدەکاتە، ٧٨٢ هەزارو ٥١ دەنگ، ئەوا دەبینین ئۆپۆزسیۆن، ٤٠٦ هەزارو ٢٢٠ دەنگ کەمیانکردوە. بەڵام دەبێت ئەوەش لەیادنەکەین، بەوپێیەی جوڵانەوەی نەوەی نوێ، لەهەڵبژاردنەکانی ٢٠١٨دا توانیویەتی ١٢٧ هەزارو ١١٥ دەنگ بەدەستبهێنێت، بەوپێیەی ئەو جوڵانەوەیەش، تائێستا بانگەشەی ئۆپۆزسیۆنبونی خۆی دەکات، ئەگەر ژمارەی دەنگەکانی بخەینە پەنای دەنگی بەدەستهاتوی هەرسێ لیستی (بزوتنەوەی گۆڕان و کۆمەڵی ئیسلامی و هاوپەیمانی و بەرەو ئیسڵاح)، واتە ٣٧٥ هەزارو ٨٣١ دەنگ، کۆ بکەینەوە لەگەڵ ١٢٧ هەزارو ١١٥ دەنگ، ئەوا کۆی دەنگە بەدەستهاتوەکانی هەر چوار لیستەکە دەکاتە ٥٠٢ هەزارو ٩٤٦ دەنگ. ئەگەر ئەو ژمارەیە بەهەند وەربگرین و بەراوردی بکەین، بەژمارەی دەنگی بەدەستهاتوی یەکێتی و پارتی، دەبێت ئەو راستییە بڵێین، کە گوتاری گۆڕینی دەسەڵاتی یەکێتی و پارتی چەقی بەستوە، بەڵام ئەگەر دەنگی دەنگی بایکۆتکاران، بخەینەوە بەردەم هەڵسەنگاندن و بەراوردی بکەین بەدەنگە بەدەستهاتوەکانی حیزب و لایەنەکان، ئەوکات گۆڕانکاری بەرچاو دەبینین و دەتوانین، قەبارەی راستەقینەی سەرجەم هێزەکان دیاری بکەین. بەوپێیەی رێژەی بەشداریکردنی هاوڵاتیانی هەرێمی کوردستان، بۆ هەڵبژاردنەکانی ٣٠ ئەیلولی ٢٠١٨ ، پێکهاتوە لە ٤٩.٨% (سەرچاوە KIE)، ئەوا دەتوانین بڵێێن، ٥٠.٢% ی هاوڵاتیان بەشدارنەبون لەم هەڵبژاردنە، ئەگەر رێژەی دەنگە بەدەستهاتوەکانی سەرجەم لایەنەکان، لەگەڵ رێژەی بەشدارنەبونی هاوڵاتیان هەڵبسەنگێنین، ئەوکات دەتوانین، هێزو قورسایی راستەقینەی سەرجەم لایەنەکان دەبینین. بەو پێیەی ژمارەی بەشداربونی هاوڵاتیان بۆ هەڵبژاردنەکانی ٣٠ ئەیلول، ٣ ملیۆن و ٨٨ هەزارو ٦٤٢ کەسبووە، لەوژمارەیەش بەتەنها، یەک ملیۆن و ٨٤٥ هەزارو ٩٧٩ کەس مافی دەنگدانی هەبووە، واتە یەک ملیۆن و ٢٤٢ هەزارو ٦٦٣ کەس بایکۆتی دەنگدانیانکردوە، خۆ ئەگەر رێژەی دەنگە بەشدارەکانی حیزب و لایەنەکان لەرێژەی هاوڵاتیانی رێپێدراو بۆ دەنگدان بەراورد بکەین، ئەوا قورسایی شەش هێزە سەرەکییەکەی هەرێم بەم جۆرە دەبێت. پارتی دیموکراتی کوردستان خاوەنی ٦٨٦ هەزارو ٧٠ دەنگە، ئەگەر ئەو ژمارەیە بەراورد بکەین بە ٣ ملیۆن و ٨٨ هەزارو ٦٤٢ هاوڵاتی دەنگدەر، ئەوا ٢ ملیۆن و ٤٠٢ هەزارو ٥٧٢ هاوڵاتی دەنگی بەپارتی نەداوە، واتە پارتی ٥.٢٢% ی هاوڵاتی دەنگدەری هەرێم پێکدەهێنێت. یەکێتی نیشتیمانی خاوەنی ٣١٩ هەزارو ٩١٢ دەنگە، ئەگەر ئەو ژمارەیە بەراورد بکەین بە ٣ ملیۆن و ٨٨ هەزارو ٦٤٢ هاوڵاتی دەنگدەر، ئەوا ٢ ملیۆن و ٧٦٨ هەزارو ٧٣٠ کەس دەنگی بەیەکێتی نیشتیمانی کوردستان نەداوە، واتە یەکێتی نیشتیمانی رێژەی ١٠.٥% ی هاوڵاتی دەنگدەری هەرێم پێکدەهێنێت. بزوتنەوەی گۆڕان ١٨٦ هەزارو ٩٠٣ دەنگی بەدەستهێناوە، ئەگەر ئەو ژمارەیەش بەراورد بکەین بە ٣ ملیۆن و ٨٨ هەزارو ٦٤٢ هاوڵاتی دەنگدەر، ئەوا ٢ ملیۆن و ٩٠١ هەزارو ٧٣٩ کەس دەنگی بەبزوتنەوەی گۆڕان نەداوە، واتە بزوتنەوەی گۆڕان ٦% ی هاوڵاتی دەنگدەری هەرێم پێکدەهێنێت. جوڵانەوەی نەوەی نوێ خاوەنی ١٢٧ هەزارو ١١٥ دەنگە، ئەگەر ئەو ژمارەیە بەراورد بکەین بە ٣ ملیۆن و ٨٨ هەزارو ٦٤٢ هاوڵاتی دەنگدەر، ئەوا ٢ ملیۆن و ٩٦١ هەزارو ٥٢٧ کەس دەنگی بە جوڵانەوەی نەوەی نوێ نەداوە، واتە نەوەی نوێ ٤ % ی هاوڵاتی دەنگدەری هەرێم پێکدەهێنێت. کۆمەڵی ئیسلامی خاوەنی ١٠٩ هەزارو ٤٩٤ دەنگە، ئەگەر ئەو ژمارەیە بەراورد بکەین بە ٣ ملیۆن و ٨٨ هەزارو ٦٤٢ هاوڵاتی دەنگدەر، ئەوا ٢ ملیۆن و ٩٧٩ هەزارو ١٤٨ کەس دەنگی بەکۆمەڵی ئیسلامی نەداوە، واتە رێژەی کۆمەڵی ئیسلامی ٣.٥% ی هاوڵاتی دەنگدەری هەرێم پێکدەهێنێت. هاوپەیمانی و بەرەو ئیسڵاح (بزوتنەوەی ئیسلامی و یەکگرتوو) خاوەنی ٧٩ هەزارو ٤٣٤ دەنگە، ئەگەر ئەو ژمارەیە بەراورد بکەین بە ٣ ملیۆن و ٨٨ هەزارو ٦٤٢ هاوڵاتی دەنگدەر، ئەوا دەبینین، ٣ ملیۆن و ٩ هەزارو ٢٠٨ هاوڵاتی دەنگیان بە هەردوو حیزبی بزوتنەوەی ئیسلامی و یەکگرتوو نەداوە، لەو ڕوانگەشەوە ئەو دوو هێزە ٢.٥ % ی هاوڵاتی دەنگدەری هەرێم پێکدەهێنێت. لەڕوانگەی بایکۆتکردنی هاوڵاتیانی هەرێم بۆ هەڵبژاردنەکانی ٣٠ ئەیلولی ٢٠١٨، دەبێت حیزب و لایەنە بەشداربوەکان، ددان بەو راستییەدا بنێن، کە ئەمجارە هاوڵاتیان بەدەنگیان ( نا ) ی ناڕەزایەتی، سەرجەم لایەنەکانیان پەرپەرچدایەوە، بەوەش دەبێت ئەو راستییە دەرک پێبکەین، هەم دوو حیزبی دەسەڵاتداری ٢٧ ساڵی رابردوی هەرێم (یەکێتی نیشتیمانی و پارتی دیموکرات) لەلێواری ئاوابوندان، هەم لایەنەکانی دەرەوەی ئەو دوو حیزبە، بەتایبەت گۆڕان و یەکگرتوو کۆمەڵ، لەبەردەم سزای سیاسی هاوڵاتیاندان، ئەگەر ئەو سێ لایەنە ئاراستەی کاری سیاسیان نەدۆزنەوەو گوتاری سیاسییان نەگۆڕان، ئەوکات ماشێنی سیاسییان چەق دەبەستێت دەبێت لەنێو قوڕولیتاوی سیاسی هەرێم دەچەقن و دەبێت فەرتەنناش بکەن. سەرچاوە: هەڵبژاردن لەکوردستان، نوسینی موحەمەد رەئوف پەیمانگای کوردی بۆ هەڵبژاردن KIE سایتی پەڕلەمانی کوردستان. www.kurdistan-parliament.org سایتی کۆمسیۆنی باڵای سەربەخۆی هەڵبژاردن و راپرسی. WWW.khec.krd موقع مفوچیە العلیا المستقـلە للانتخابات www.ihec.iq ئا: زمناکۆ ئیسماعیل
.gif)
■ ئاری محەمەد ھەرسین بۆ چەندەمین ھەزار جار دیسانەوە دوخوێنینەوە و دەبیستین کە ئەم برادەرانە ی کۆمەڵ و گۆڕان و یەکگرتوو «کە ڕۆژێک بە کەیف و سەفا بەشدارن لە حوکمڕانی ئەم ھەرێمە و ڕۆژێکیش تەسلیمی میزاجی نا جێگیری خۆیانن و ئۆپۆزسیۆنن». ئیجالەتەن و بە ڕێزەوە بۆ ئینسانەکان و، دوور لە و تەربیەتە تەشھیرە لاواز و موفلیسەی کە لە ئێستادا باوی گۆڕەپانی بێ باج و بێ ساحێبی تۆڕە کۆمەڵایەتیەکانە ئەم چەند دێڕە دەنوسینەوە. ئەم برادەرانە بە بەردەوام باسی حوکمڕانیە دوولایەنەکە دەکەن . مەبەستیشیان لە وە حوکمڕانی پارتی و یەکێتیە. وەک ئەوەی حوکمڕان بوون کوفر بێت و خۆیان و سەرکردایەتیەکانیان ھەرگیز بەشداری حوکمڕانی ئەم ھەرێمەیان نەکردبێت و خاوەن پلەو پۆست نەبوبێتن...! خۆیان جورئەتی مێرولەیەکیان نەبوو بە چەکەوە بێنە بەردەم بارەگاکانمان و ئازایانە شەڕی دەستەو یەخەمان لەگەڵ بکەن، لەبری ئەوە منداڵی بێ تاوانی خەڵکیان کردە قەڵغان بۆ جێبەجێکردنی سیاسەتی پۆپۆلیزمی خۆیان. کەچی لە ڕاڕەوەکانی پارلەمان و وەزارەتەکان و ئەنجومەنی وەزیران خۆیان بە ئاشتیخواز و دژی توندو تیژی دەنواند. جێ دەست و پەنجەی پارتی دیموکراتی کوردستان دیارە بەرھەممان چی بوە و کەم و کوڕیەکانیشمان کامانەن. بە ڵام گەورەترین کەم و کوڕی ئێمە وەکو پارتی لەوانەیە ئەوە بێت، ئێمە لێگەڕاین ئەم برادەرانە بەبەر چاوی خۆمانەوە کێچی ھەر کەم و کوڕیەکمان بۆ خەڵکی کوردستان بکەن بە گایەک. کەچی بۆ جارێکیش باسی ئەو پارچە زەویانەمان نەکرد کە لەلایەن حکومەتەوە دراوە بەم حیزبانە و سەرکردایەتی و کەس و کاریان. باسی دامەزراندنی کوڕو برا وتیتیکزا و میمیکزای سەرکردایەتی ئەم سەرکردانەمان نەکرد، کە ئێمەی گەندەڵ بۆمان دابین کردوون...! ئیتر واز لە ڤیزای تایبەت و ئۆتۆمبیلی درع و پاسەوان و ئیمتیازاتی تر بێنە... ھەتا کار گەیشتە ئەوەی ئەوان بونە شێخ و مشایەخ و، ئێمەش بوینە ئینسانە بەەدکارەکە. ئێستاش کە خەڵکی کوردستان، چ بە نەچوونی بۆ دەنگدان و چ بە وەلانانیان، ئەم حیزبانەیان ڕەتکردۆتەوە، دیسانەوە لە بەیاننامە و گوتارەکانیاندا دەستەواژەی « ھەردوو لایەنی دەسەڵات» بەکار دەھێنن. ھیوادارین ئەندام و لایەنگر و دەنگدەری ئەم حیزبانە لێیان بپرسن: مەبەستتان لە ھەردوو لایەنی دەسەڵات چیە؟... بۆ ئێوە خۆتان ھەرگیز لە دەسەڵاتدا نەبوون؟... وەزیر و بەڕێوەبەری گشتی و قایمقام و و بەڕێوەبەری ناحیە و چی و چیتان نەبوە؟... خۆ ھێشتا چلەیان لە کابینەی ھەشتەمدا نەچوە...! سیاسەت وا ناکرێت. پێویستە ئەوانەی سیاسەت دەکەن گەیشتبنە پلەیەکی کامڵ بوون. ئەگەر دە بنە ئۆپۆزسیۆن یان دێنە ناو حکومەت ئەوە بڕیاری خۆیانە، بەڵام مێژوو چەواشە ناکرێت. ھەرچی دەکەن بیکەن، بەڵام بە ڕاشکاوانە و ئازایانە بیکەن.
.gif)
■ مەریوان وریا قانع یەکێک لە ئاکارە ھەرە سەرەکییەکانی ئەو نوخبە حوکمڕانە سوڵتانییەی لە کوردستاندا دروستبووە لەدەستدانی ھەموو پەیوەندییەکی عەقڵانیی و واقیعییانەیە بە واقیعەوە. لەباتی ئەمە ھەڵگری ھۆشیارییەکی خورافیین کە ئیشە ھەرە سەرکییەکەی گۆڕینی واقیعە بۆ خورافەت و فرۆشتنی شکستە بە نرخی سەرکەوتن. ئەم عەقڵە خوارفییە جارێک پرۆژەی خورافیی و بەڵێنی خورافی بە کۆمەڵگا ئەدات، لەوانە بەڵێنی بەدوبەیکردنی کوردستان. جارێکی دیکە خورافەت و درۆ و ناڕاستیی دەگۆڕن بۆ ھەقیقەت و ئەم گۆڕانەش وەک ڕاستییەکی بێخەوش مامەڵەدەکەن. ئەم قسانەی نێچیرەوان بارزانی لێرەدا کردونی، نموونەیەکی بەرچاوی ئەو ھۆشیارییە خورافییە کە ھیچ پەیوەندییەکی واقیعیی و عەقڵانیی بە دونیاوە نەماوە و ھیچ توانایەکیشی بۆ تێگەیشتن لە ھیچ دیاردەیەک پێ نییە. ئەوەی زۆربەمان دەیزانین ئەوەیە کە بە پێی داتا سەرەتاییەکانی کۆمیسیۆن خۆی و بەر لە دواخستنی ڕاگەیاندنی ڕێژەی بەشداربووان بۆ درەنگانێک لە شەوی یەکەمی دەنگدانەکەدا، ڕێژەی ڕاستەقینەی بەشداربوون لە ھەڵبژاردنەکاندا لە دەوروبەری ٤٠% ی دانیشتوانی ھەرێم بوو. لەو ڕێژەیەش بڕێکی بەرچاویان ھەڵگری ڕەگەزنامەی تەزویرکراو بوون و بڕێکی تریشیان دەنگی چەندبارەیان ئەنجامدا. لەم ٤٠% ی بەشداربوانیش نزیکەی یەک لەسەر سێیان دەنگیان بە ھێزەکانی دەرەوەی پارتی و یەکێتی داوە. واتە ڕێژەی ئەوانەی دەنگیان بە پارتی و یەکێتی داوە بەسەریەکەوە لە نێوان ٢٥% بۆ ٣٠% خەڵکی کوردستانە. ئەم ڕێژەیەش بۆ یەکێک کە تەنھا ھێندەی خوێندکارێکی قۆناغی بنەڕەتیی سەر لە ژمارە دەربکات، پێمان دەڵێت ئەوانەی بەسەریەکەوە دەنگیان بە پارتی و یەکێتی داوە، زۆرینەی خەڵکی کوردستان نین. بەپێچەوانەوە ئەوەی کە ڕاستییەکی حاشا ھەلنەگرە ئەوەیە کە زۆرینەی خەڵکی کوردستان ھەر لە سەرەتاوە بەشدارنەبوون لە ھەڵبژاردندا و دەنگیان نەداوە، ئەو بڕە کەمەشی کە دەنگی داوە یەک لەسەر سێی دەنگەکانی بۆ ھێزەکانی دەرەوەی پارتی و یەکێتی بووە. ئەم فۆرمە لە بیرکردنەوەی خوارافیی، کە لە کوردستاندا سیاسەتکردن و شێوازی حوکمڕانیی ئاراستەدەکات، لە شوێنێکدا ھەر دەکەوێت، زۆر خراپیش دەکەوێت. ونکردنی ھەست بە واقیع و وێناکردنی درۆ وەک ھەقیقەت، نەخۆشیەکی سیاسیی و ئەخلاقیی و مەعریفیی ترسناکە، جگە لە کارەساتی ھەمەجۆر شتێکی تری لێ سەوزنابێت. پرسیارەکە ئەوەیە ئەم ھۆشیارییە خورافییە تا کەی و تا کوێ دەتوانێت بژیی.
.jpg)
■ عادل باخه‌وان هه‌ڵبژاردنه‌کانی مانگی پێنجی عێراق و مانگی نۆی کوردستان، کۆمه‌ڵێک بابه‌تی گرنگیان بۆ ڕامان و شیکردنه‌وه خسته به‌رده‌ست کۆی ئه‌و توێژه‌رانه‌ی که له‌سه‌ر ڕۆژهه‌ڵاتی ناوه‌ڕاست به گشتی و عێراق و کوردستان به‌تایبه‌تی کارده‌که‌ن. له‌وانه : کاڵبونه‌وه‌ی متمانه‌ی نێوان هاوڵاتیان و ده‌سته‌بژێره سیاسیه‌کان، گومان له‌سه‌ر کۆی پرۆسه‌ی سیاسی له عێراقدا، گومان له سیستمی هه‌ڵبژاردن و ده‌نگدان، به‌هێزکردنی په‌یوه‌ندی نێوان حیزب و میلیشیاگه‌رایی و ده‌یان بابه‌تی دیکه. ئه‌وه‌ی من ده‌مه‌وێت لێره‌دا به‌خێرایی ئاماژه‌ی پێبده‌م داهاتوی کۆی ئه‌و حیزبانه‌یه که له عێراقدا به‌گشتی و له کوردستاندا به‌تایبه‌تی، له‌سه‌ر ئایدیال_تیپی بزوتنه‌وه‌ی گۆڕان دامه‌زراون. ئایا هه‌لومه‌رجی بابه‌تیی ڕۆژهه‌ڵاتی ناوه‌ڕاست، عێراق، کوردستان ڕێگاده‌دات که ئه‌م جۆره له حیزب، له‌سه‌ر ئاستی دوره مه‌ودا، بمێنێته‌وه، گه‌شه‌بکات و خۆی فه‌رزبکات به‌سه‌ر خۆفه‌رزکاره‌کاندا و هه‌ژمونبکات به‌سه‌ر هه‌ژمونداره‌کاندا ؟ بزوتنه‌وه‌ی گۆڕان وه‌ک ئایدیال_تیپی حیزب، خه‌ونێکی جوانبوو، به‌ڵام ئایا له ڕۆژهه‌ڵاتی ناوه‌ڕاست و عێراق و کوردستاندا، واقیعی کۆمه‌ڵایه‌تی کۆنکرێتی، وه‌ک چۆن هه‌زاران خه‌ونی جوانی له‌باربرد، ئه‌م تایپه له خه‌ونیش له بارنابات ؟ بۆ وه‌ڵامدانه‌وه‌ی ئه‌م پرسیاره، گه‌ڕانه‌وه‌یه‌کی خێرا بۆ سۆسیۆلۆژیای فاکتی سیاسی بایه‌خی تایبه‌تی خۆی هه‌یه. له‌م سۆسیۆلۆژیایه‌دا و [به‌شێوه‌یه‌کی گشتی و به‌بێ ئه‌وه‌ی بڕۆمه نێو ورده‌کاریه‌کانه‌وه] ئێمه چوار ئایدیال_تیپ له حیزبی سیاسیمان له به‌رده‌ستدایه. یه‌که‌م : کۆی ئه‌و حیزبانه‌ی له سه‌ر "دێمۆکراسی" وه‌ک تیۆری و پراکتیک دامه‌زراون. ئه‌م جۆره له حیزب، به‌شێوه‌یه‌کی کۆنکرێتی، ئازادی ڕاده‌بڕین، ئازادی ناکۆکی، ئازادی ئۆپۆزیسیۆن و هه‌موو ئازادیه‌کانی دیکه، نه‌ک هه‌ر به‌شێکن له ئیمانه‌کانی، به‌ڵکو به‌شێکن له موماره‌سه‌ی ژیانی ڕۆژانه‌ی. ڕۆژئاوا به‌گشتی، یه‌کێکه له‌و روبه‌رانه‌ی که ئه‌م ئایدیال_تیپه له حیزب به‌رهه‌مده‌هێنێت. ئه‌مه مانای ئه‌وه‌نیه که جۆره‌کانی دیکه‌ی حیزب له ڕۆژئاوادا جێگایان نابێته‌وه. دوهه‌م : کۆی ئه‌و حیزبانه‌ی که ده‌کرێت بیانخه‌ینه چوارچێوه‌ی "تۆتالیتاریزم"ه‌وه. ئه‌م تایپه له حیزب که زۆر جار سه‌رۆکێکی باڵا گوزارشت له ڕۆحیده‌کات، ده‌یه‌وێت ده‌ست به‌سه‌ر ته‌واوی کۆمه‌ڵگادا بگرێت و هه‌موو فۆرمه‌کانی ناڕه‌زایی له مناڵداندا بکوژێت و کۆی جه‌ماوه‌ر له‌گه‌ڵ خۆیدا مۆبیلیزه‌بکات و ڕێگانه‌دات له‌ده‌ره‌وه‌ی خۆی هیچ جۆرێک له ژیان بوونی هه‌بێت. مۆدێلی ئه‌م حیزبانه له ئه‌ڵمانیای نازی و یه‌کێتی سۆڤێتی کۆمۆنیستی و عێراقی به‌عسی دا تێبینیکراوه. سێهه‌م : کۆی ئه‌و حیزبانه‌ی له‌سه‌ر "ئۆتۆریتاریزم" بیناکراون. ئامانجی ئه‌م حیزبانه بریتیه له کۆنترۆڵکردنی جومگه‌کانی ده‌سه‌ڵات و ئه‌وه‌ی به‌لایانه‌وه گرنگه ده‌سه‌ڵاته نه‌ک کۆمه‌ڵگا. له‌کاتێکدا که حیزبه تۆتالیتێره‌کان هه‌موو فۆرمه‌کانی ئازادیی بۆچوون له‌ناوده‌به‌ن، حیزبه ئۆتۆرێتێره‌کان هه‌وڵده‌ده‌ن کۆنترۆڵیان بکه‌ن. ئه‌م تایپه له حیزب له هه‌موو ڕوبه‌ره‌کاندا ئاماده‌ییان هه‌یه. چوارهه‌م : کۆی ئه‌و حیزبانه‌ی که له "پاتریمۆنیالیزم"ه‌وه شه‌رعیه‌ت وه‌رده‌گرن و قسه‌ی من لێره‌دا له‌سه‌ر ئه‌م تایپه له حیزبه. پاتریمۆنیالیزم واته وێناکردنی حیزب وه‌ک موڵکی خێزانێک که ده‌کرێت له باوکه‌وه بۆ مناڵه‌کانی وه‌ک میرات به‌جێبهێڵرێت و ده‌ستاوده‌ستی پێبکرێت. حیزب بریتیه له "پاتریموان" واته موڵکی خێزانێک و ده‌بێت بۆ هه‌میشه له‌نێو ئه‌و خێزانه‌دا بمێنێته‌وه و که له ده‌ستی خێزانه‌که ده‌رچوو، ئیدی سه‌ره‌تای هه‌ڵوه‌شانه‌وه‌ی ده‌ستپێده‌کات. ئه‌م تایپه له حیزب "چاکه‌ی گشتی " نیه، به‌ڵکو "چاکه‌ی تایبه‌ت"ه و هه‌ر بۆیه له چوارچێوه تایبه‌ته‌کانیشدا ده‌ستاوده‌ست ده‌کات. ئه‌فریقا و ڕۆژهه‌ڵاتی ناوه‌ڕاست، به عێراق و کوردستانیشه‌وه، سه‌رزه‌مینی به‌هێزی ئه‌م تایپه له حیزبه. بێگومان له چه‌ند دۆخێکی تایبه‌تدا، تایپه‌کانی دیکه‌ی حیزب ده‌کرێت سه‌رهه‌ڵبده‌ن، به‌ڵام ئه‌وه‌ی هه‌ژموونی ته‌واوی به‌سه‌ر کێڵگه‌ی سیاسی ئه‌فریقا و ڕۆژهه‌ڵاتی ناوه‌راستدا هه‌یه، تایپی چوارهه‌مه. کاتێک حیزبێکی وه‌ک بزوتنه‌وه‌ی گۆڕان، له کوردستانێکدا که زیاتر له نیو سه‌ده‌یه سه‌رزه‌مینی مۆدێلی چوارهه‌مه له حیزب، حیزب وه‌ک پاتریموان_موڵک، له‌سه‌ر ئایدیال_تیپی یه‌که‌م دروستده‌بێت، هه‌ر له هه‌نگاوی یه‌که‌مدا روبه‌ڕوی هه‌لومه‌رجێکی کۆمه‌ڵایه‌تی بابه‌تیی وا ده‌بێته‌وه که له‌نێو مێژویه‌کی په‌نجا ساڵیدا بیناکراوه و ده‌قی گرتوه و ئاماده‌نیه ده‌ستبه‌رداری به‌ڵگه‌نه‌ویست و ئیمان و ڕاهاتن و به‌رژه‌وه‌ندیه‌کانی ببێت. گۆڕان نه‌ک هه‌ر نه‌یتوانی ئه‌م هه‌لومه‌رجه بابه‌تیه کۆمه‌ڵایه‌تیه توند و سه‌خته بگۆڕێت، به‌ڵکو بوو به یه‌کێک له قوربانیه‌کانیشی. پاش ماڵئاوایی کاک نه‌وشیروان، بۆ ڕزگارکردنی گۆران له مردن و بۆ مانه‌وه‌ی گۆران له نێو کێڵگه‌ی سیاسی کوردستاندا، جۆرێک له هه‌وڵ له ئارادایه بۆئه‌وه‌ی گۆرانیش له تایپی یه‌که‌مه‌وه، که زۆر به ئه‌ستم له‌ڕۆژهه‌ڵاتی ناوه‌راست و عێراق و کوردستاندا جێگای ده‌بێته‌وه، بگوێزنه‌وه بۆ تایپی چوارهه‌م و بیکه‌ن به "موڵک، پاتریموان"ی بنه‌ماڵه‌ی کاک نه‌وشیروان و حیزبه‌که‌ش وه‌ک چاکه‌ی گشتی له‌سه‌ر کوڕه‌کانی تاپۆبکه‌ن. ڕه‌نگه له کۆتاییدا ئه‌م هه‌وڵه سه‌ربگرێت، هه‌ر وه‌ک چۆن بۆ یه‌کێتی نیشتمانیی کوردستانیش سه‌ری گرت، به‌بێ ئه‌وه‌ی هیچ گرفتێکی گه‌وره‌ی بۆ دروستببێت، به‌پێچه‌وانه‌وه، ده‌سته ده‌سته‌ی گروپه جیاوازه‌کانی کۆمه‌ڵگای کوردی، ڕۆژانه ڕێگای ده‌باشان ده‌گرنه به‌ر و گوزارشت له پیرۆزبایی و خۆشحاڵی خۆیان ده‌که‌ن. له هه‌لومه‌رجێکی کۆمه‌ڵایه‌تی کۆنکرێتی ئاوادا، گرنگه بۆ ئێمه جیاوازی بکه‌ین له نێوان خه‌ونێکی جوان و واقیعێکی زبر دا، له‌نێوان خه‌یاڵدانێکی شاعیرانه و کۆمه‌لگا وه‌ک فاکتێکی توندا. گرنگه ئێمه تێبگه‌ین له‌وه‌ی که ڕۆژهه‌ڵات ئه‌وروپا نیه، عێراق فه‌ره‌نسا نیه، کوردستان هه‌رێمی ئیل دوو فرانس نیه، سلێمانی پاریس نیه، سه‌هۆڵه‌که شانزه‌لیزێ نیه.
جەمال حسێن کوشتنی خاشقچی نەروداوێکی ریزپەڕو شازە، نەشتێکیشە مایەی شۆک بێت. چونکە زۆر بەسادەیی زۆرینەی رژێمەکانی ئەم ناوچەیە لەسەر بنەمای کوشتن و چەپاندنی رای جیاواز دروست بون، ھەتا ئەگەر وەکو خاشقچیش ئۆپۆزسیۆنی سیاسیش نەبن. بەبڕوای من ئەوەی کوشتنی ئەم جارە جیادەکاتەوە شێوازی کوشتنەکەیە، کەبەرۆژی ئاشکراو بەشێوەیەک کەلەلێکۆڵینەوەی تاوان پێی دەوترێت شێوازێکی گەمژانە. بکوژانی خاشقچی ھێند بێ پلان و ھەڵەداوان ئەم کارەیان کردوە، وەکو ئەوەی ئەمانە سەربەگروپێکی چەقوکێشی شەلاتی بوبن، نەک دەوڵەت و دەزگای گەورەی موخابەراتی یەکێک لەدەوڵەتە ھەرە گەورەکانی جیھانی ئیسلامی. تائەوەی ئێستا دورنیە تاوانبارانی پشتی ئەم کارە کاتێک سەیری ئاوێنەدەکەن، خۆیان وەکو گوێدرێژێک ببینن. بۆیە لەیەکەم چرکەساتی دەنگدانەوە ناوچەیی و جیھانیەکان، ئەوپاساوانەی گوایە وەکو پلانی ( ب) ئامادەکرابوون بۆ پەردەپۆشکردنی خودی تاوانەکە، بەرادەیەک سادەو مناڵانەبوون کەمایەی بەزەیی و پێکەنین بون بەو ئەقڵەی لەپشتی تاوانەکەوەبوە. لێرەدا ئەوەی بۆمن مایەی لەسەر وەستانە، نەتەکنیکی کوشتن و ھەوڵێ شاردنەوەکانە، نە خودی کەسایەتی خاشقچی و دواجار ھۆی کوشتنەکەشیەتی. ئەوەی بۆمن مایەی قسەلەسەرکردنە فۆڕمی مامەڵەکردنی راگەیاندنی لایەنگری سعودیا و نەیارەکانیەتی لەیەکەم چرکەساتی ئاشکرابونی ون بونی ئەم رۆژنامەنوسەوە تا درێژبونەوەی لێکۆڵینەوەکان. بەتایبەتی ھەردووک کەناڵی العربیەی سعودی و الجزیرەی قەتەڕی. ئەم دوو کەناڵە کەراستەوخۆ نوێنەرایەتی دوو ئەجندەی جیاوازی سیاسی دەکەن، لەچەندین ویستگەو روداوی گەورەو بچوکدا دژی یەک وەستاونەتەوە. بەپێی ئەو لۆژیکە سادەیەی کەراگەیاندن درێژکراوەی سیاسەتە، بگرە جاری وایە دڵی سیاسەتێکی دیاریکراوە. دۆسێی خاشقچیش بۆ ھەریەکێک لەم دووکەناڵە بابەتێکی گەرمی بەریەککەوتن و دواجار زاڵبونە بەسەر رای گشتیدا. جەزیرە لەرێی خوێنی رژاوی خاشقچیەوە بەئاشکرا دەیەوێ بیسەلمێنی کەھەموو ھەڵوێست و سیاسەتی سعودی لەسەر ستەم و پەلاماردان و بەزاندنی سەروەری دەوڵەت و مرۆڤ وەستاوە. بەپێچەوانەوە بەرەی ئەنتی سعودی بەرەی راست و دادپەروەریە. ئەم وێنەیە کەلەسەر حسابی خوێنی کەسێکی بەناھەق کوژراو دارژاوە، تەنھا نیوەی راستیەکەیە. نیوەکەی تری کەبریتیە لەنیشاندانی دەوڵەتی قەتەر وەکو بێ تاوانێک لەسیاسەتی دەرەوەیدا و لەناوچەکە بەگشتی، بەئەندازەی ھەوڵی سعودیەکان لەسەرەتادا بۆ شاردنەوەی تاوانی کوشتنەکە کۆمیدیە. بەتایبەت کاتێک لەم روداوەدا تورکیا دەیەوێ وەکو وڵاتێکی چاکەکارو دژ بەکوشتنی نەیاران خۆی بەدنیا نیشان بدات. چونکە بێ تاوانی لەم کوشتنە ھیچ لەوڕاستیە مێژووی وواقعیە ناگۆڕێ کە تورکیا و سعودیا و قەتەر سێ وڵاتن لەسەر یاری کردن بەخوێنی خەڵک و گەلانی خۆیان و ناوچەکە دامەزراون. تورکیایەک کەلانی کەم دوای چیرۆکی کودەتا گوماناویەکە بەیەکجاری بوە بەزیندانی رای جیاوازو نەیارانی دەسەڵاتی سوڵتانی ئەردۆگان، چۆن دەتوانێ بڕوا بەدنیابکات کەئەو بەراستی بۆ کوشتنی خاشقچی غەمبارە. تەنھا ئەوەنەبێ کەغەمباری ئەو و ھەوڵی جدی بۆ ئاشکراکردنی چارەنوسی خاشقچی راستەوخۆ پەیوەندی بەزیان گەیاندن ھەیە بەیەکێک لەوڵاتە گەورە نەیارەکانی کەسعودیایە. بەھەمان شێوە قەتەڕێک کەجگە لەوەی دەستی سورە بەیاریکردن بەگروپە تیرۆریستەکان لەھەموو ناوچەکە، وەلەڕابردودا ملی شاعیریان پەڕاندوە تەنھا لەبەرئەوەی لەشعرێکدا ھەجوی ئەمیری کردوە، چۆن دەشێ بڵێن ئەوشینەی بۆ خاشقچی دەکات بۆ خوێنەکەیەتی و بۆ ھەریسەکەی نیە. وەکو چۆن سعودیا دەوڵەتی نەوت و ئیرھابە، ئەمانیش دەوڵەتی ئاگرو پارەن. بۆیە چیرۆکی کوشتنی خاشقچی پێش ئەوەی بەڵاو کێشەبێ بۆ سعودیەکان، نیعمەت و دەرفەتە بۆ نەیارەکانی. ئەوەی رورەشی و بێ ئابڕویی تەواوی بۆ دەمێنێتەوە لەم یاریە ناشیرنەشدا بەخوێنی مرۆڤێکی کوژراو، راگەیاندنکارەکانی جەزیرەو عەرەبیەیە. چونکە چەند رۆژنامەنوسەکانی عەرەبیە شەوڕۆژ ھەوڵدەدەن درزێک بدۆزنەوە ھەرچەند بچوک و تەنگەبەریش بێت تا بەبینەرەکانیان بڵێن سعودیا بێ تاوانە لەم کوشتنە، لەوەش زیاتر نەیارانیان لەجەزیرە لەھەوڵی گەورەکردنی تاوانەکەو نیشاندانیدان وەکو دوایین گەورەترین تاوان لەم ناوچەیە. خۆ ئەگەر زومی قسەکردنمان دورتربکەینەوە، ئەوا ھەمان چیرۆک لەکوشتارەکانی سوریاشدا دەبینینەوە. کەپێنج ساڵە ھەمان ئەو وڵاتانە بەپارەو چەک ھاوکاری ئۆپۆزسیۆن و گروپەتیرۆریستیەکانیش دەکەن بۆ درێژەدان بەشەڕی ناوخۆی سوری. بەڵام دوای وێران بونی شارەکان و کوژرانی سەدان ھەزار کەس و ئاوارەبونی ملیۆنان مرۆڤ، ئەمانە دەستەوەستان دانیشتون لەڕێی راگەیاندنەوە باسی تاوانەکانی بەشار دەکەن. لەکاتێکدا خۆیان بەفعلی بەشێک بوون لەم تاوان و قەسابخانەی سوریەکان روبەڕوی بونەوە. شەڕی ئەوان ھیچ کات بۆ سوریەکان نەبوەو نیە، شەڕی ئەوان بەردەوام بۆ زاڵبون بوە بەسەریانداو ھیچی تر. بەھەمان شێوە شەڕی ئەوان ئێستا کەبەناوی خوێنی خاشقچیەوەیە، شەڕە لەسەر دەست بەسراگرتنی غازو نەوتی زیاتر.، شەرێکە نەک یەک خاشقچی ملیۆنان خاشقچی بۆ دەکەنە قوربانی. بۆیە لەکوشتن ناشیرنترو لەو تاوانە قێزەونتر، ئەو یاریەیە کەلەم ناوچەیە ئەودەسەڵاتانە بەخوێنی مرۆڤەوەدەیکەن. لەکاتێکدا خۆیان وەکو مارەکانی سەرشانی زوحاک وان، خوێنیان لێ ببڕێ کۆتاییان دێت. تورکیایەک کەھەربەڕاستی بوە بەزیندانێکی گەورەو دەزگا جاسوسیەکانی لەھەموو شوێنێکی دنیا کەبۆیان بگونجێ نەیارانی سوڵتان خەڵتانی خوێن دەکەن، دەیەوێ لەڕێی خوێنی خاشقچیەوە زۆرترین وەبەرھێنانی سیاسی بکات. بۆ ئەو ئەم کەیسە باشترین دەرفەت و چانسە تاجارێکی تر خۆی وەکو پارێزەری خوێنی موسڵمانان نیشانبدات. جەزیرەو قەتەریش خوێنی خاشقچی کردوە بەخوێنی عوسمان و نەبەئاسانی دەست بەرداری دەبێ، نەرێگاش دەدا ئەم دەرفەتە مێژوییەی لەدەست بچێ بۆ گەڕاندنەوەی ئەوکاریگەریەی لەدوای روداوەکانی بەھاری عەرەبی لەدەستی دا. ھەرچی سعودیەکانە بەھۆی پێگەی ئاینی وعەرەبی نەوتەوە دەتوانن بەبەخشینی برێک باج ئەو تەنگژەیە تێ پەڕێنن، بێ ئەوەی ھیچ شتێک لەوانە بتوانێ لەسیاسەتی دڕندانەی بگۆڕێ و ناچاری بکات لای بەھای خوێن زیاتربێت لەبەھای نەوت. ئەوەی لەم روداوانە دوای نیشتنەوەی تۆزی ناکۆکی سیاسی وەک خۆی دەمێنێتەوە، بێ نرخی ئینسان و کەرامەت و خوێنیەتی. سەیرێکی خێرای سوریاو یەمەن و دیاربکرو عەفرین و سەدان شوێنی تر لەم ناوچەیە پێت دەڵێ، لەم رژێمانە ھەموو شتێک زۆرە، بەنی ئادەم کەم.
.gif)
■ له‌تیف فاتیح فه‌ره‌ج جا كه یه‌كێتی له ڕێی وته بێژه‌كه‌یه‌وه بیه‌وێت برینی لایه‌نێكی تر ساڕێژكات هه‌ر ده‌بێت بچێته ژێر باری رێكه‌وتنه‌وه له ته‌كیدا له كاتێكا یه‌كێتی له 50به 50ی 1992ه‌وه بووه به 25به 75 بۆ پارتی ، قوربان تۆ به نیوه‌ی ده‌سه‌ڵاته‌وه هیچت بۆ نه‌كرا ، ئێستا به چاره‌كه‌وه چی ده‌كه‌یت ، دواتر به دینتان كێ برینه‌كه‌ی قوڵه پارتی یان یه‌كێتی ، ئه‌گه‌ر ئه‌وه‌نده شاره‌زای چاره‌سه‌ری برینن ، ئه‌دی بۆ ئه‌و هه‌موو برینه‌ی جه‌سته‌ی خۆتان ساڕێژناكه‌ن ،به 21كورسیه‌وه خۆی به براوه ده‌زانێت ، له كاتێكا پارتی به‌س له دهۆك 5كورسی له كۆی كورسیه‌كانی زیاتره ، ئاخر پارتی 26 كورسی بادینانی بردووه ، ئه‌وه‌ش په‌تای یه‌ك بازنه‌یی سلێمانی به قه‌ده‌ر دهۆك كورسی لێهاتووه ، له كاتێكا له فره‌بازنه‌یی عێراقدا دهۆك 11 كورسی و سلێمانی 18 كورسیه ، جا پارتی بادینانی نه‌بوایه چی بكردایه ، یان یه‌كێتی ئه‌گه‌ر ئه‌م وته بێژه‌ی نه‌بوایه كێ برینی ئه‌وانی تری بۆ ساڕێژكردبا . به قه‌د ئه‌وه‌ی یه‌كێتی به هه‌موو شتێك رازیه ، بزوتنه‌وه‌ی گۆڕانیش كه نیوه‌ی كورسیه‌كانی له ده‌ست داوه كه‌یفی به‌وه سازه پرسی به‌شداری كردن و نه‌كردنی حكومه‌تی خستوه‌ته دوای تانه‌و ته‌شه‌ری بێمانه‌وه هیچه‌وه ،له كاتێكا به دوو ده‌رزه‌ن كورسی و به كاره‌كته‌ری وریاتره‌وه هیچی بۆ نه‌كرا ئێستا به ده‌رزه‌نێكه‌وه هاتوه‌ته جۆش . یه‌كێتی و گۆڕان به‌رپرسیاری یه‌كه‌می ئه‌م بارو دۆخه‌ن كه باشتره ناوی مه‌هزه‌له‌ی دیموكراسی لێبنرێت نه‌ك پرۆسه‌ی هه‌ڵبژاردن ، هه‌رچه‌ند له هه‌مووته‌مه‌نی باشوری كوردستاندا خولێكی ئه‌رێنی و باش و چه‌ند كاره‌كته‌ری هاوشێوه‌ی په‌رله‌مانتارانی باكوری نمونه‌ی ده‌میرتاش و ئه‌حمه‌د تورك و له‌یلا زانا و میر فوڕات و هتدمان نه‌بووه ، یان نمونه‌ی به هادینی ئه‌ده‌بی رۆژهه‌ڵات له پارله‌مانی ئێران ، له گه‌ڵ ئه‌وه‌شدا ئه‌م خوله‌ی دادێ خراپترین خولی پارله‌مانده‌بێت واته خولی پێنجه‌م خولی كۆتاهاتنی نوێنه‌رایه‌تی گه‌له‌و له مه‌ڵبه‌ند و لق و باره‌گای حزبی ده‌چێت ، له‌مه‌شدا یه‌كێتی به‌رپرسه . برینی گه‌وره ئه‌وه‌یه پێت وابێت عێراقت بردوه‌ته‌وه له كاتێكا كورردستانت دۆڕاندوه ، یه‌كێتی جگه له بردنه‌وه‌ی نه‌وت و دۆلار له 2005ه‌وه كوردستانی دۆڕاندووه ،له‌و رۆژه‌وه كه ماڵباتی بارزانی باوك و كوڕو ئامۆزا هه‌موو كوردستانیان له ده‌ستدایه‌و یه‌كێتیش له جێگرێكی بێده‌نگ زیاتر هیچی تر نیه . به‌ڵام پارتیش براوه‌یه‌كی دۆڕاوه مادام هه‌ڵبژاردنه‌كه لیپه له ته‌زویرو ساخته‌و سوكایه‌تی به مرۆڤ ، مه‌سعود بارزانی ته‌نیا جێ شه‌قی ئاسایشه‌كانی هه‌ولێر به جه‌سته‌ی ئه‌و كوڕه‌وه ببینێ كه رۆژی هه‌ڵبژاردن مار هه‌نجنیان كردبوو ، پێویسته خۆی به دۆڕاو بزانێ ، هه‌ڵبژاردنی پاك و بێ ته‌زویر براوه‌و دۆڕاو ده‌ر ئه‌خات ، نه‌ك هه‌ڵبژاردنی هه‌ڕه‌شه‌و گوڕه‌شه‌و ساخته‌و پڕ درۆ .
.gif)
■ سەرتیپ وەیسی كەریم كاتژمێر 6ى دوێنێ شه‌و 20ى تشرینى یه‌كه‌م، پارتى دیموكراتى كوردستان پێشنیاز بۆ یه‌كێتیى نیشتمانى كوردستان ده‌كات، تاوه‌كو له‌سه‌ر ئه‌نجامى هه‌ڵبژاردنى په‌رله‌مانى كوردستان ڕێكبكه‌ون، بۆئه‌مه‌ش مۆڵه‌تى چه‌ند كاتژمێرێكى كه‌م ده‌دات به‌و حزبه، یه‌كێتیش له‌پێناو كه‌منه‌بوونه‌وه‌ى كورسییه‌كانى به‌پێشنیازه‌كه‌ى پارتى ڕازى ده‌بێت و داوا له نوێنه‌ره‌كانى ده‌كات واژوو له‌سه‌ر ئه‌نجامى هه‌ڵبژاردن بكه‌ن. پارتى و یه‌كێتیى له‌سه‌ر ئه‌وه ڕێككه‌وتن ده‌نگى 96 بنكه‌ى ده‌نگدان، كه ده‌كاته 119 هه‌زار ده‌نگ به ته‌واوى پوچه‌ڵبكرێته‌وه به‌ده‌نگى سه‌رجه‌م لایه‌نه‌كان، له‌كاتێكدا هه‌ریه‌ك له گۆڕان و كۆمه‌ڵ و یه‌كگرتوو له‌گه‌ڵ ئه‌وه‌دانه‌بوون به‌شێوه‌یه‌كى دادگه‌رانه ئه‌و ده‌نگانه پوچه‌ڵبكرێته‌وه كه ساخته‌ن واته ته‌نها ده‌نگه‌كانى پارتى و یه‌كێتیى. پارتى و یه‌كێتیى له‌سه‌ر ئاستى سه‌ركرده باڵاكانیان له‌ماوه‌ى كاتژمێر 6 بۆ 11 شه‌و له‌سه‌ر هێل بوون و به‌پرسانى پارتى به یه‌كێتیان ڕاگه‌یاند: ئه‌گه‌ر ئه‌مشه‌و ده‌ره‌نجامه‌كان ڕانه‌گه‌یه‌نرێ و نه‌یه‌نه ژێربار، ئه‌وا به‌یانى ئه‌مڕۆ له‌گه‌ڵ لایه‌نه‌كانى دیكه له‌نێوشیان بزوتنه‌وه‌ى گۆڕان ڕێكده‌كه‌ون له‌سه‌ر چاره‌نووسى 96 بنكه‌ى ده‌نگدان، چونكه به ڕازبوون له‌سه‌ر سوتاندنى ته‌نها ده‌نگه ساخته‌كان، لایه‌نه‌كانى دیكه‌ش واژوویان له‌سه‌ر ئه‌نجامى هه‌ڵبژاردن ده‌كردو، به‌مه‌ش پارتى به‌بێ یه‌كێتیى ده‌یتوانى ئه‌نجامه‌كان په‌سه‌ند بكات. به پوچه‌ڵكردنه‌وه‌و سوتاندنى ته‌واوى ده‌نگه‌كان پارتى كورسییه‌كى زیادكردو یه‌كێتیش ژماره‌ى كورسییه‌كانى به 21 كورسى مایه‌وه، ئه‌گه‌ر له حاڵتێكدا ته‌نها ده‌نگه ساخته‌كانى پارتى و یه‌كێتى هه‌ژمار نه‌كرابووایه، پارتى دوو كورسى له ده‌ستده‌داو یه‌كێتیش دوو كورسى، له‌به‌رامبه‌ردا هه‌ریه‌ك له گۆڕان و كۆمه‌ڵ و نه‌وه‌ى نوێ و یه‌كگرتوو ژماره‌ى كورسییه‌كانى زیادیده‌كرد، ئه‌گه‌ریشى هه‌بوو هاوپه‌یمانیش ببێته خاوه‌نى كورسییه‌ك، به‌وپێیه‌ى نرخى كورسى كه‌م ده‌بوویه‌وه‌و لایه‌نه‌كانى دیكه زۆرترین ماوه‌یان هه‌بوو. دواى ئه‌وه‌ى پارتى و یه‌كێتیى ڕێككه‌وتن، كۆمسیۆن خشته‌یه‌كى ئاماده‌كراوى خسته‌به‌رده‌م ئه‌ندامانى ئه‌نجومه‌نى كۆمسیۆن و دواجاریش به 5 ده‌نگ ئه‌نجامه‌كانیان په‌سه‌ندكرد. ڕێككه‌وتنه‌كه‌ى ئه‌مشه‌وى پارتى و یه‌كێتیى له‌سه‌ر پێكهێنانى حكومه‌ت و نه‌رمى نواندنى پارتى نه‌بوو به‌رامبه‌ر یه‌كێتیى، به‌ڵكو ته‌نها له‌سه‌ر ئه‌و بنه‌مایه بوو هه‌ردوولا كورسییه‌كانیان كه‌م نه‌كات و گۆڵى خۆیان له لایه‌نه‌كانى دیكه بكه‌ن. هه‌رچه‌نده هه‌رچوار ئه‌ندامه‌كه‌ى كۆمسیۆنى ده‌ره‌وه‌ى پارتى و یه‌كێتى به‌درێژایى دوێنێ شه‌ممه داواى كۆبوونه‌وه‌ى ئه‌نجومه‌نیان كردبوو، به‌ڵام تاوه‌كو هه‌ردوولا ڕێكنه‌كه‌وتن كۆمسیۆن ئاماده‌نه‌بوو ئه‌و كۆبوونه‌وه‌یه ئه‌نجامبدا. به‌شێكى زۆر سه‌ركردایه‌تى یه‌كێتیى له‌گه‌ڵ ئه‌و ئه‌نجامه‌دانه‌بوون و، 45 كورسیان بۆ پارتى به‌زۆر زانیوه‌و پێیانوابوو: پارتى ساخته‌كارییه‌كى گه‌وره‌ى ئه‌نجامداوه، به‌ڵام دواى ئه‌و ڕێككه‌وتنه به‌یانى ئه‌مڕۆ یه‌كێتیى به فه‌رمى ئه‌نجامه‌كانى قبوڵكرد.
.gif)
■ هۆشیار عەبدوڵا قسەی یەکەم: سەرانی پارتی و یەکێتی بە تەزویر جارێکی تر شەرعیەتیان دایەوە بە خۆیان، هەردولایان باش دەزانن، بەو هەمو پارەو ئیمکانیاتەوە خەڵک چەند دژی خۆشیان و هەڵبژاردنەکانیش بوو، پێشتر وتمان تەزویرو بایکۆت مەترسین و هەردوکیشیان کاریگەری و مەترسی گەورەی خۆیان تا چوار ساڵی تر جێکەوت دەکەن، ئەوانەی بایکۆتیان کرد خەڵاتێکی گەورەی سەرانی پارتی و یەکێتیان کردو حزبەکانی تریان سزادا، ئیدی تا چوار ساڵی تر ئەبێ چاوەرێی لوتفی ئەو دو حزبە بن بزانن بە دەنگی ساختەو بە نەچونیان بۆ دەنگدان چیان بۆ دەکەن و نەتیجەکەی چیی دەبێت ؟!. قسەی دوەم: جگە لە هۆکاری تەزویر هەڵە ستراتیژیەکانی گۆڕان کە هۆکاری دابەزینی دەنگەکانی بوە لە نەخۆشکەوتنی کاک نەوشیروانەوە تائێستا دیارن، لەهەموشیاندا دیارە کێن ئەوانەی ئەندازیاری ئەو هەڵانە بون و کێشن ئەوانەی قورگیان کەوت و گوێیان لێ نەگیرا هەموشی لە غیابی فکرێکدا کە ریشەییانە دژی فکری چەتەیی و بازرگانی قەومی یەکێتی و پارتی بوەستێتەوە (لە بەشداری لە حکومەتەوە تا درەنگ کشانەوە لە حکومەت و بەڵێ بۆ ریفراندۆم و سیاسەتی جۆلانێ لەنێوان یەکێتی و پارتی و سیاسەتی دەستەگەری و ئێسقانشکاندنی نێو تۆڕە کۆمەڵایەتیەکان و قبوڵنەکردن و گوێنەدان بەرەخنە)، لێرەوە ئەوە گۆڕان نیە کە دەبێت داوای لیبوردن بکات، داوای لێبوردن كردن بەناوی جڤاتەوە ونکردنی بەرپرسیارێتیەو پاککردنەوەی ئەوستۆی ئەوانەیە کە لە دو هەڵبژاردندا بونەتە هۆکاری دابەزینی دەنگەکان، دەبو زۆر بەرپرسیارانە بە پلەی یەکەم رێکخەری گشتی و پاشان ئەندامانی خانەی راپەراندن بەرپرسیارێتی شکستەکەیان هەڵبگرتایە. شکستی ئەوانیش لە نا دڵسۆزیانەوە نیە بۆ گۆڕان، لە باوەرنەبونیانە بە گەڵاڵەکردنی فکرو جیهانبینیەک کە نەچێتەوە سەر هەمان جۆگەلە داخراوەکەی فکرو تێگەیشتنی سەرانی یەکێتی و پارتی بۆ تاک، بۆ نەتەوە، بۆ کۆمەڵگە، بۆ دەوڵەت. کە وەک سەرانی یەکێتی و پارتی بیر بکەیتەوەو سیاسەت بکەیت، چاوەرێ مەبە خەڵک بە گۆڕانت بزانێ و ئومێدی پێت هەبێت!
.gif)
■ سەردار عەزیز دوا راپۆرتی فریدەم-هاوس پێمان دەڵێت کە دیموکراسی لە دونیادا لە قەیراندایە. دوا دەرئەنجامی هەڵبژاردنی هەرێم بە ڕوونی پێمان دەڵێت کە دیموکراسی لە هەرێم لە قەیراندایە. دەکرێت ئەم ڕوداوە بە چاوی چۆلەکە ببینین و هەروەها بە چاوی خوداش. هەردوکیان پێویستە بۆ ئەوەی تێگەیشتنێکی وورد و باشمان هەبێت. دیارە بێگومان دیموکراسی تەنها یەک قەیرانی نیە و تەنها لە یەک جێگای دونیادا لە قەیراندا نیە. هەندێک قەیرانی دیموکراسی بۆ دونیای ئێمە بە سودە و هەندێکی تری پەیوەندی ڕاستەوخۆی نیە. لە ئەمریکا دیموکراسی لە قەیراندایە بەڵام قەیرانەکە لە ئەنجامی پەیوەندەی نیوان بازاڕ و دەوڵەتدا دروست بوە، نەک بە هۆکاری ڕاستەوخۆ تایبەت بە دیموکراسی. هەرچەندە نوخبەی بڕیاردەر لە ئەمریکا تەنها ٠.٠٢٪ ە. ئەوەی هاوشێوەیەی هەیە لە گەڵ کوردستاندا ئەوروپای ڕۆژهەڵاتە. گەلانی ئەوروپای ڕۆژهەڵات بە گوڕ و تینەوە بەرەو ڕووی دیموکراسی ڕۆشتن، لە پرۆسەی شۆک-ثیرەپیدا لە پڕ لە شەو و ڕۆژێکدا باوەشیان بۆ دونیا کردەوە، نەک بە پرۆسەی هەنگاو بە هەنگاو. ئەم دوو پرۆسەیە قسەی زۆر هەڵدەگرێت، بەڵام لێرەدا نا. بڕەو پێدەرانی دیموکراسی، لە واشنتون و شوێنەکانی تر بە هەمانشێوە ئەوروپای ڕۆژهەڵات و ڕۆژهەڵاتی ناوەڕاستیان بە نزیک لەیەکەوە بینی. ئەمە لە هاتنی ئەمریکا بۆ عێراق بە باشی ڕەنگی دایەوە. بەڵام ئەو سەردەمە ئەوروپای ڕۆژهەڵات هێشتا دژە دیموکراسی هێندە تیایدا بەهێز نەبوو. لە کوردستان و عێراق و وڵاتانی وەک هەنگاریا، پۆڵۆنیا، دەبینین خەڵکی و هیزی سیاسی دێنە ئاراوە کە دژ بە دیموکراسین و شەعبیەتیان هەیە. دوو چەمک لێرەدا گرنگە، یەکەم، خێرایی، دووەم، هیوا. خەڵكی ئەوروپای ڕۆژهەڵات بڕوایان وەهابوو یان هیوایان وەهابوو کە بە خێرایی گۆڕانکاری ڕوودەدات و لە ئەنجامدا ئەوانیش وەک ئەوروپای ڕۆژئاوایان لێدێت. ئەمە لە ئەڵمانیای ڕۆژهەڵاتیش بە هەمانشێوەبوو بەڵام بە هەندێک خەسڵەتی جیاوازەوە. برەوپێدەرانی دیموکراسی لە دونیادا هانی ئەم خەڵک و کۆمەڵگایانەیان ئەدا کە وەها بیربکەنەوە، بە تایبەتی دیموکراسی لە بەرگی سەرمایەداریدا زۆر بە ڕەونەقە. بە جۆرێک زوو فریوت دەدات کە بەهەشتە. بە دڵنیایەوە ژیان لە هەموو ئاستێکدا لە رۆژئاوا باشتربوو لە ڕۆژهەڵات و ڕۆژئاوا براوەبوو لە یاریەکەدا، براوە خاوەن سەرکەوتن و دەسەڵاتە بۆیە قۆزیشە. بەڵام گۆڕانکارییەکان بەم خێراییە بەرەو پێش نەڕۆشتن لە جێگاکانی تری دەرەوەی ڕۆژئاوا. ئەگەر بە شێوازی لۆنگ دیورەی بیربکەینەوە ئەوا دیموکراسی لە ناوەوەی ئەوروپا، کات و بنەما و دەزگا و ئاگایی و ئابوری و بونیادی و کەلتوری هەبوو کە لە جێگای تر نەبوو. ئەمڕۆ خەڵکانی ڕۆژهەڵاتی ئەوروپا هەست دەکەن کە توشی نائومیدی بوون لەوەی بتوانن ئەوەی وێنایان دەکرد بە دەستی بهێنن یان بەو خێراییە بۆیان فەراهەم بێت. ئەمەش هەمان دۆخە لە کوردستان. بیرتان دێت کابرایەک هەبوو لە سەروبەری هاتنی ئەمریکاییەکاندا هاواری دەکرد وێنک دیموقراطیە؟ لە کوردستان چەند پرۆسەیەک روویدا لە میانەی دیموکراتیزەکردن: یەکەم، بە ئاگابونەوە، هەمیشە گەلان و وڵاتان کاتی زۆریان دەوێت هەتا بە ئاگابنەوە. وڵاتی ئایرلەندا پاش سەربەخۆیی،ئابوری خراپ بوو، بەڵام هەتا ساڵی پەنجاکان بە ئاگانەبوەوە کە خراپە، دیارە هۆکاری ئالۆزتر هەیەم ئەگەر بە چاوی چۆلەکە ببینین. کوردستان هەتا هاتنی بزوتنەوەی گۆرانی ویست بە ئاگابێتەوە لە قەیرانی نەبوونی دیموکراسی و بنەماکانی. هێزە ئیسلامیەکان کە هەبوون هێزی دیموکراسی نەبوون بەشێک بوون لە شەپۆلی سەحوەی ئیسلامی کە هۆکاری زۆرە. دووەم، هەنگاوی دیموکراتیزەکردن خەونی گۆرانکاری بوو. ئەم خەونە هێندە بە گوڕهات کە لە گەڵیدا خەونێکی زۆری هێنا کە گۆرانکاری دێت. بەڵام کوردستان جێگایەک نەبوو کە تۆ بێیت نوخبەی سیاسی بگۆڕیت و گۆڕانکاری بێتە ئاراوە، یان رەفتاری نوخبەی سیاسی بگۆڕیت و گۆرانکاری بێتە ئاراوە. بەڵکو پیویستی بە بونیادنانی هەموو بنەماکانی گۆڕانکارییە، وەک سوپا، ئابوری، پەرلەمان، حکومەت و دیپلۆماسی. کەواتە پرۆسەی گۆرانکاری هەر لە سەرەتاوە کێشەی ئەوەبوو کە ئامرازی گۆڕانکاری نیە، یەڵکو ئەوەی هەیە ناگونجێت بۆ گۆڕانکاری. بۆیە کار لە سەر خواستی گۆڕانکاری کرا بەبێ هیچ هەنگاوێک لە سەر بونیادی گۆڕانکاری. لە ئەنجامدا خواست رووبەروی بنەمابوەوە. ئەمە ئاسان نەبوو لە خەڵكی بگەیەنەیت، نە لە کوردستان و نە لە ئەروپای ڕۆژهەڵات. هەنگاوی سێیەم، خاوبونەوە. کاتێک خەڵک بۆیان دەرکەوت کە دیموکراسی بە ئاسانی نایەت، بنەماکان لە ئارادانین، ئەکتەرەکان لە ئاستیدانین، ئەوا خێرا نا ئومێدبوون. لە ئەوروپای ڕۆژهەڵات زۆرێک پەنایان بردە بەر گەڕانەوە بۆ دیکتاتۆریەت و شەخسی بەهێز. لە کوردستان پەرشو بڵاوبوو. بە گشتی کەس نایەوێت و ناتوانێت هەموو ئاڵۆزیەکان ببینێت. هەموو کەس دەیەوێت پێی بڵێی کە ئاسانە. ئەمە قەیرانێکی ئاگایی سەختە، بە تایبەت هێشتا لە کوردستان خەڵك بڕوای وەهایە کە کێشەکە ئەوەیە کە کەسەکان باش نین، ئەگەر بێتوو کەسەکان باش بن ئەوا دۆخەکە دەگۆڕێت. بەڵام کێشە لە کەسەکاندا نیە، هەرگیز هیچ سیستەمێک نایەتە ئاراوە تەنها لە سەر باش و خراپی کەسەکان، ئەوە بنەما و بونیادەکەیە. گەڕان بە دوای کوڕی باشدا، هێشتا خەونی ئەوانەیە کە دەخوازن گۆڕانکاری بێتە ئاراوە. ئەمە ڕەگی لە ئاگایی دینیدا هەیە کە رزگارکەرێک دێت و تاکە کەسی هەیە کە گۆڕانکاری دروست دەکات، دەبینین لە کوردستان زۆر باس لە گاندی و کەسانی وەها دەکرێت. دەرئەنجامی ئەمە براوە هیزە تەقلیدیەکانە، چونکە بنەمایان هەیە. هەروەها پەیوەندی ئەندامەکانیان لە سەر بنەمای نەگۆرانە نەک گۆڕانکاری. هەمیشە نەگۆڕان ئاسانترە لە گۆڕان. ئێستا زۆرینەی خەڵك لە دەرەوەی پرۆسەی دیموکراسیە. ئەم پشو کورتیە لە سودی نەیارانی گۆڕانکارییە، بەڵام چاوەڕوانکراوبوو. ئایا هەنگاوی داهاتوو چی دەبێت: هێشتا خەڵکێک هەن بڕوایان وەهایە کە میدیا و دەنگە دەنگ دەتوانێت گۆرانکاری بهێنێتە ئاراوە. یان ئەوەی لە پارە پەیداکردندا سەرکەوتوبێت ئەوا لە حوکمداریشدا سەرکەوتوو دەبێت. ئەمە دوا قۆناغی قەیرانی دیموکراسیە. ئیتالییەکان پێش هەموان ئەم هەنگاوەیان تاقیکردەوە لە کەسایەتی بیرلسکۆنیدا، بەڵام نەک گۆڕانکاری بەڵکو هێندەی تر خراپی کرد، ئەمرۆ ئەمریکا ئەم دۆخە تاقیدەکاتەوە ئەمریکا لە خراپترین و ئاڵۆزترین دۆخیدایە. هاتنی ئەهلی فلوس کۆتایی مەعریفە و ئەخلاق وبەتەنگەوەهاتن و تێگەیشتن و زانستە لە حوکمدارییدا. ئایا قەیرانی هەرێم دەبێتە هۆکاری کۆتایی دیموکراسی و باڵادەستی نادیموکراسی و دیماگۆجیەت یان دەبێتە هۆکاری تێرامان لە پرۆسەکە کە پیویستی بە بونیادنان و وەرچەرخان و دروستکردن هەیە و پڕ پڕە لە ئاڵۆزی و هەوراز.
.gif)
■ نەوزاد کەریم شەوی رابردوو دوای بیست ویەک رۆژ لە چاوەروانی کۆمسیونی باڵای هەڵبژاردن و راپرسی هەرێمی کوردستان بە دەنگی پێنج ئەندام ( نوێنەرانی پارتی و یەکێتی ) ئەنجامی کۆتایی هەلبژاردنەکانیان راگەیاند . بەپێی راگەیاندنی ئەنجامەکان یەکیتی نیشتمانی( ٣١٩٩٠٠) دەنگی بەدەست هێناوە ، بە بەراورد بە هەڵبژاردنی ساڵی ٢٠١٣ بۆ پەرلەمانی کوردستان کە ( ٣٥٠٥٠٠) دەنگی بەدەست هێنابوو، لەگەڵ بەرزبونەوەی رێژەی دەنگدەر لەهەرێمی کوردستان یەکێتی نیشتمانی نزیکەی ٣١ هەزار دەنگ کەمی کردوە ، لە کاتێکدا ئەم هێزە لە هەلبژاردنەکانی خولی پێشودا ئەو رێژە دەنگەی کە بەدەستیهێنابوو بە گەورەترین شکست زانی وبە شێوەیەک مامەڵەی لەگەڵ کرد کە زوربەی زۆری سەرکردەکانیان بۆ ماوەیەکی زۆر خۆیان ونکرد و پاش مانگێک لە دەرکەوتنەوەیان شکستی خۆیان راگەیاند و هەریەکەو شکستەکەیان ئەخستە ئەستۆی ئەوی تریان ، بەڵام ئەمجارە بە پێچەوانەی چوارساڵی رابردوەوە ئەم هێزە هەر لەسەرەتاوە بەم ئەنجامەشەوە وبەدەستهێنانی دەنگی کەمتر لە هەڵبژاردنی رابردوو ، سەرکەوتنی خۆی راگەیاند و ئەم ئەئجامەی وەک سەرکەوتنێکی گەورە بۆ حزبەکەی راگەیاند و لەزوربەی شارو شارۆچکەکانی هەرێمدا ئاهەنگی گەورەی بۆ گێرا ، بەڵام ئەمە ئەو راستیەمان بۆ دەسەلمێنیت کە یەکێتی نیشتمانی لە دوای دروستبوونی بزوتنەوەی گۆرانەوە سەرکەوتن و پاشەکشەی خۆی لە زیادبون و کەمی دەنگەکانی خۆیادا نابینیت ، بەڵکو سەرکەوتنی لە لە پاشەکشەو شکستی بزوتنەوەی گۆراندایە ، ئەوەی کە کردی ئاهەنگی سەرکەوتنی خۆی و بەرزبونەوەی رێژەی دەنگەکانی نەبوو ، بەڵکو ئاهەنگی پاشەکشەی و کەمی دەنگەکانی رکەبەرەکەی بوو کە بزوتنەوەی گۆرانە ، چونکە یەکێتی باکی نیە و بۆی گرنگ نیە کە سەنگ و قورسایی بەرامبەر بە پارتی دیموکرات چەندە ، بچوکی بۆ پارتی پێ قبولەو دەمێکە خۆی لەگەڵی را‌هێناوە ، ئەوەی کە پێی قبوڵ نەدەکرا و بە مەترسی ئەزانی سەنگ و قورسایی بزوتنەوەی گۆران بوو ، لەگەڵ ئەوەی کە رێژەی دەنگ و ژمارەی کورسیەکانی کەمترە لە نیوەی ژمارەو رێژەی کورسیەکانی پارتی ، بەڵام لەوە دڵنیایایە کە ئەم دوو هێزە هەرگیز نابنە مەترسی بۆسەر بەرژەوەندیە حزبی و کەسەیەکانی یەکتری، کە بەدرێژایی چارەکەسەدەیەک لە حوکمداریان لەکوێدا ئەم دووهێزە بەرژەوەندی حزبیان کەوتبێتە مەترسیەوە بونەتە فریادرەسی یەکتری ، هەر لەو روانگەیەشەوەیە کە دوێنی بەرپرسێکی پارتی بەراشکاوی و دوای ئەو هەموو مڵملانێیە لەسەر پۆست و ئیمتیازەکان لەبەغدا دەڵیت ، لەگەڵ یەکێتی نیشتمانی ئێمە یەک چارە نوسمان هەیە و هەمیشە وەک شەریکێکی سیاسی لێیاندەروانین ، تێپەراندی ئەنجامەکانی هەڵبژاردنیش بەم شێوەیە و قبوڵکردنی لەلایەن یەکێتیەوە لەگەڵ ئەوەی کە لەزمانی وتەبێژەکەیانەوە لەسەرەتاوە بە هەڵبژاردنێکی پر لەساختەکاری و ئەتکردنی دەنگی دەنگدەر ناوی هێنا و دڵخۆشبون و رازیبونیان لە ئیستادا و لەگەڵ ئەو سەنگە بچوکەشیان بەرامبەر بە پارتی ، دڵنیای کردینەوە لەوەی کە ئەو سەرکەوتنەکەی ئیدعای بۆ دەکرد و ئاهەنگی بۆ دەگێرا لە کوێــــدایە و لە چیدا دەبینێتەوە .
