پەیكار عوسمان      لە خراپترین دۆخیشدا، هێشتا هەموو شتەکان هەڵەنین، هێشتا بەشێکی شتەکان هەر ڕاستن، لەو تۆزە ڕاستەشەوە ئەکرێ دەستی یەك بگرین و شتەکان چاكبکەینەوەو هەستینەوە! بەڵام لە دۆخی یەکترقبوڵنەکردن و لە سەقافەتی یەکترسڕینەوەدا، ئیتر (هەموو شتەکان هەڵەن) ئیتر خاڵێکیش نیە لێوەی دەستی یەکبگرین و شتێک چاکبکەین، ئیتر قەتیش هەڵناسینەوە. ئیتر تۆ کۆبیتەوە هەڵەیە، کۆشنەبیتەوە هەر هەڵەیە. بەشداری بکەیت هەڵەیە، بایکۆتیش بکەیت هەر هەڵەیە. بەڵێ بکەیت هەڵەیە، نەخێریش بکەیت هەڵەیە. قسەبکەیت هەڵەیە، بێدەنگیشبیت هەڵەیە. بچی بۆ بەغدا هەڵەیە، نەشچی هەر هەڵەیە. بچیتە حکومەت هەڵەیە، نەشچی هەر هەڵەیە..  ئیتر تۆ هەرچی و هەرچۆن بکەیت بە نیسبەت منەوە هەر هەڵەیەت و هیچ لە مەسەلە ناگۆڕێ، چونکە من پێشوەخت و پێش چی و چۆنەکە، خۆتم ڕەتکردۆتەوە! نەوشیروان لە ڕێگەی پێشوازی بەردەوام لە وەفدەکانی یەکێتی و پارتی و سەردانەکانی بۆ سەری ڕەش و دەباشان، ئەیویست پێمانبڵێ، دوای ململانێ و هەموو شتێك دواجار کارەکان پێکەوە ئەکرێن، بەڵام ئێمە ئەومان وەکو گرندایزەر ئەویست! ئەومان بۆ ئەوە نەبوو بە ناتوندوتیژی و لەگەڵ ئەوانیتردا پێکەوە دنیاکە باشتر بکەن، ئەومان بۆئەوەبوو لە شوێنێکا توڕەبێ و دنیاکە ژێرەوژوورکاو شتەکە بە توندوتیژی یەکلابکاتەوە. بۆچی؟ ئێمە پارتیمان وا ئەوێت ئەوانیتر قووت بداو یەکێتیمان وا ئەوێت وەکو هەشتاکان گونی گوندار دەربێنێ و پەکەکەشمان وا ئەوێت لە هەر چوار پارچە تەواوی هێزەکانی تر مەحف بکاتەوە. بۆچی؟ سەیرکە جگە لە یەکگرتووەکان کەس موعجیب نیە بە سەڵاحەدین بەهادین، کەچی خەڵکێکی زۆر ئیسلامییش نین و موعجیبن بە مەلا کرێکار. بۆچی؟ یەکێتییەکان زیاتر کەیفیان بە پاڤێڵ دێ وەك لە قوباد، پارتییەکانیش زیاتر هیوایان بە مەسرورە تا نێچیر. بۆ؟ یان لاهور ڕەنگە بەکەڵکی ئەندام کۆمیتەییش نەیەت، کەچی ڕەقەمێکی گەورەیە. بۆ؟ عومری سەی عەلیش خۆ قەزیەکە هەر کێشەی ناوخۆی حیزب و پاشەکشێ گۆڕان نیە کە کابرا مەرغوب نیە، ئەوانەش نەبێ ئەو هەر مەرغوب نیە. بۆ؟ چونکە سەقافەتی باوی ئێمە، سەقافەتی یەکترسڕینەوەیەو یەکترسڕینەوەش عەنتەرو شەقاوەی ئەوێ، نەك نەرمونیانی و پشوودرێژیی. چونکە سەقافەتی باوی ئێمە سەقافەتی خێڵەو خێڵیش پاڵەوانی ئەوحەدی ئەوێ، نەك تیم و کاری پێکەوەیی. سەیرکە پارتی و گۆڕان کۆئەبنەوەو خاڵی هاوبەشیان هەیە، شتەکە بووە بە کێشە، لەکاتێکا ئەوە حاڵەتە نۆرماڵەکەیەو ئەگەر وانەبێ کێشەیە! یان یەکگرتوو موعارەزەیەو لەگەڵ بارزانیش کۆئەبێتەوە، ئەمە بووە بە عەیبە، لەکاتێکا ئەوە ئاڕاستە دروستەکەیەو ئێمە لە موعارەزەییشدا هەر تەواوکاری ئەوانیترین نەك دوژمن. گرنگە نەوەی نوێش تێبگات کە سیاسەت ڕەش و سپی و شەیتان و فریشتەو دابەشکردنی دنیا نیە، نە کۆبونەوەو بەشداری ئەوانیتر ئەکات بە شەیتان. نە کۆنەبوونەوەو موعارەزەییش نەوەی نوێ ئەکات بە فریشتە. هەموومان لە یەك دنیاداین و هەمووشمان لە باش و خراپدا پشکمان هەیەو کارێکیش بکرێ بە هەمووان ئەکرێ. پارتی و یەکێتی بەو هەموو فەسادو فەزاحەتەوە، هێشتا بڕێك لە ڕاستییان لایەو هیچیش بەبێ ئەوان ناکرێ!  ئەوانیتریش بەو هەموو بێدەسەڵاتییەوە، هێشتا بڕێك پۆخڵەوات و بەرپرسیارێتی دۆخەکەیان بەر ئەکەوێ. ئێمە ئەبێ پاساو بدۆزینەوە بۆ دانیشتن و کۆبونەوەو بە زەڕەبین بۆ هاوبەشی بگەڕێین، نەك ئەوەی دانەنیشتن و کۆنەبوونەوەو نەبوونی هاوبەشی بکەین بە ئینجازی سیاسیی! ئەگەر کارێك بکرێ بە هەمووان ئەکرێ و هەمووانیش لە هاوبەشییەکانەوە ئەتوانین دەستی یەك بگرین، نەك ئەوەی هەموو شت بە هاوبەشییەکانیشەوە ڕەتبکەینەوە کە ئیتر هیچ ناکرێ، ئەم هیچەش وەکو کردەیەکی سیاسی گەورە بفرۆشینەوە!! ئێوەی بە تەبیعەت موعارەزە، هاوشێوەی پشتیوانی پێشترتان بۆ گۆڕان، بۆ پشتیوانی نەوەی نوێ ناکەن، لەکاتێکا ئێستا نەوەی نوێ موعارەزەیە؟؟ ئەم پرسیارەم زیاد لە جارێك بۆ هاتووە، پێوابێ جوابدانەوەی لەگەڵ ئەم نوسینەدا دێتەوە! زۆر بە سادەیی، چونکە من پشتیوانی مۆدێلێکی تری موعارەزەم، مۆدێلی گۆڕان و حەڤدەی شوبات، بۆ کاتی خۆی گرنگبوو، بۆ ئێستا بابەتی تێپەڕاندنە. نەوەی نوێش لە مۆدێلی گۆڕاندا لە خودی گۆرانی بردۆتەوە، بەس کێشەکە ئەوەیە ئەو مۆدێلە بەسەرچووەو وەکو وایە ئەسپێکی دۆڕاوی بردبێتەوە! گۆڕان کە هات بە موزایەدەو پۆپۆلیزم و کۆنە گەندەڵ و داروبەردەوە قبوڵمانبوو، چونکە شتەکە تازەبوو، بەڵام سونەتی حەیات وایە، کە ئەمە بەس بۆ یەکەمجار وایەو بۆ جارەکانی تر ناشێ! چیتر ئێمەش بە مەرج و مواسەفات موعارەزەمان ئەوێ نەك بە گۆترە. نەوەی نوێش ئەبێ سەعییەکی باشتر بکاو بە هەمان جوابەکانی دە ساڵ لەمەو پێشی گۆڕانەوە لە ئیمتیحانی ئێستا دەرناچێ. وەکچۆن بەشداری گۆڕان و هەر حیزبێك، ئەبێ بۆ جێکردنەوەی بڕێك لە پاکیج و بەرنامەکانی بێت، نەك تەنیا بۆ پشك و پۆست..  بەشداری نەکردنی نەوەی نوێ و یەکگرتووش ئەبێ بۆ شێوازێکی ترو ئەخلاقێکی تری موعارەزەیی بێت، نەك بۆ زەڕبلێدانی هەموو شتێك و موزایەدەو پۆپۆلیزم، کە بە ئەندازەی هەموو خراپەکارییەکانی پارتی و یەکێتی خەڵکی ئێمەی نائومێدو ماندوکرد! بۆ تێپەڕاندنی ستەمکاریی، ئێمە پێویستمان بە سڕینەوەی پارتی و یەکێتی نیە کە ئەسڵەن ناشتوانین، چونکە ستەمکاری هەمووی لای پارتی و یەکێتی نیە، بەڵکو لای هەموو کۆمەڵگایە لە ڕێگەی کولتوری یەکترسڕینەوەوە!  (بۆ تێپەڕاندنی ستەمکاریی، ئێمە پێویستمان بەوەیە سەقافەتی یەکترقبوڵکردن بخەینە شوێن سەقافەتی یەکتر ڕەشکردن.) ئەمە قسە گەورەکەیەو ئیتر دەسەڵاتی یان موعارەزە، ئەوەیان قسە بچوکەکەیە.

جویس كەرەم      " نیشتمان خۆشەویستە، نیشتمان بەرز و بڵندە"  سەرۆكی كۆچكردووی سوریا, حافز ئەسەد هەمیشە ئەمەی دەوتەوە و " دامەزرێنەری سوریای نوێ" پێشبینی ئەوەی نەدەكرد كە دوای 19 ساڵ لە كۆچكردنی نیشتمان دەبێتە بنكەیەكی روسیا، پارچەیەكی دەبێتە كاڵای دانوستانی نێوان توركیا و ئەمریكا و پارچەیەكی تری دەبێتە گۆڕەپانی فڕۆكەوانی ئیسرائیل و میلیشیا مەزهەبی و ئیقلیمییەكان دێنە ناو وڵاتەكەوە خەریكە دەبن بە بەهێزترین فەرمانڕەوا. دۆناڵد ترەمپ سەرۆكی ئەمریكا دانوستان لەگەڵ توركیا دەكات دەربارەی ناوچەیەكی ئارام كە رووبەڕەكەی 32 كیلۆمەترە و ئەوەش پاشەكشێی واشنتۆن ئاسان دەكات و بەشێكی دۆسیەكە رادەستی رەجەب تەیب ئەردۆغان دەكات بە مەرجی پاراستنی كوردەكان، بەلای ئەمریكییەكانەوە، ناوچەی ئارام ، شریتێكی سنوریی سەقامگیر بۆ توركیا دابیندەكات و دووریدەخاتەوە لە هێرشی زەمینی بۆ سەر ناوچەی كوردەكان، لە بەرامبەر پاشەكشێ پێكردنی چەكدارەكانی پارتی كرێكارانی كوردستان بۆ ناوچە دوورەكان لە توركیاوە وەك دۆڵی قەندیل. لەبەرامبەردا ئەمریكا بە زیادتركردنی ئاڵوگۆڕی بازرگانی  سەرنجی توركیای راكێشاوە و كوردەكانیش بە گەرەنیتكردنی لامەركەزییەت و نیمچە ئۆتۆنۆمییەك و هەوڵدان بۆ رێوشوێوێنی ئەمنی بۆ پاراستنی ناوچەكانیان كە ئێستا لەژێر دەسەڵاتیاندایە و ئەوە داواكاری سەرەكی كۆنگرێسە. وردەكاری ناوچەی ئارام لە نێوان فەرماندەیی بەرگری و سەربازی توركیا و ئەمریكا تاوتوێدەكرێت، ئەوەش لەگەڵ سەردانەكەی جۆزێف دانفۆرد سوپاسالاری ئەمریكا بۆ ئەنكەرە و پێش ئەویش  سەردانی دوو وەفدی كۆشكی سپی و وەزارەتی دەرەوە، بەڵام ئەو پرسیارانەی هاتونەتە ئاراوە ئەوەن كە كێ‌ ناوچەكە دەپارێزێت؟ كێ‌ بودجەی بۆ دابیندەكات؟ چ رۆڵێكی دەبێت لە داڵدەدانی ئاوارەكان یان فشارخستنە سەر دیمەشق؟ وەڵامی كۆتایی دەربارەی ئەم پرسانە نیە، ترەمپ دەیەوێت رێككەوتنێك لەگەڵ توركیادا بكات و لە هەمان كاتیشدا دەیەوێت پارێزگاری لە بەرژەوەندیی كوردەكان بكات و تەنگ بە ئێران و روسیا هەڵچنێت. لە سایەی ئەم مەعمەعەیە و تەمومژەدا دەربارەی بژاردەی ناوچەی ئارام، ئەریك پرینس، عەرابی كۆمپانیا ئەمنییەكان خزمەتگوزارییەكانی بۆ سوریا دەخاتەڕوو. پرینس، بەڕێوەبەری پێشووی كۆمپانیای " بلاك وۆتەر" كە نەیتوانی وەزیری پێشووی بەرگری ئەمریكا جەیمس ماتیس قایل بكات كە خزمەتەكانی لە سوریا وەبەربهێنێت و جەنگی ئەفغانستان رادەستی كۆمپانیا بەرگرییە تایبەتەكان بكات، لە سوریا سەركەوتوو دەبێت، چونكە قورسە ئەو بۆشاییە ئەمنییە ی كە لایەنی ئەمریكی دروستیدەكات لەلایەن لایەنی توركییەوە پڕبكرێتەوە بەهۆی ناڕەزایەتی شەڕڤانە كوردەكان لە هێزەكانی توركیا و لایەنی عەرەبیش دوودڵە لە بەشداریكردن و سوپاكەی رووبەڕووی میلیشیاكانی ئێران ناكاتەوە، هەروەها ئەمریكاش نایەوێت روسیا سودی لێ وەربرێت و رەتیشیدەكاتەوە كە رژێمی سوریا ناوچەكان كۆنترۆڵ بكاتەوە، هەموو ئەمانە هەلێكی دەگمەن بۆ پرینس دەخوڵقێنن كە هەڵمەتی بانگەشی راگەیاندنی لە رێگەی " فۆكس نیوز"ەوە دەستپێكردووە بۆئەوەی دۆسیەی شەڕ لە سوریا وەربگرێت. لە هەمان كاتدا روسیا ئامادەگی سەربازی لە باشوری سوریا زیاتردەكات و ئیسرائیلیش هەوڵدەدات خۆی بگونجێنێت لەگەڵ گۆڕانكارییە مەیدانییەكان و وەك لە پێشینەی سەربازی تەركیزی خستوەتە سەر بوونی ئێران. ئەو دوو گورزە سەربازییەی كە تەلئەبیب دووجار وەشاندویەتی لە دوای راگەیاندنەكەی ترەمپ بۆ كشانەوە لە 19ی كانونی یەكەمەوە، كە دواهەمینیان ئەوەی هەینی رابردوو بوو، هەوڵێكە بۆ چەسپاندنی واقعێكی نوێ‌ دوای كشانەوەی ئەمریكییەكان لە ئەمساڵدا یان ساڵی داهاتوو. گرەوی چاودێران ئەوەیە كە گورزەكانی ئیسرائیا لەگەڵ پرۆسەی كشانەوەی ئەمریكا لە سوریا زیاتردەبن بۆ تەواوكردنی فشار لەسەر ئێران، هەروەها هەوڵی ئەمریكیش هەیە بۆ لێكنزیك كردنەوەی دیدو بۆچونی نێوان ئەنكەرە و تەلئەبیب لە سوریا و یەكخستنی هەوڵەكانیان بۆ جڵەوكردنی ئێران،  ئەوەش كارێكە دوورە توركیا ئەنجامیبدات. پرسی كردنەوەی باڵیۆزخانەكان لە دیمەشق وادەردەكەوێت كە كەمێك هێواش بوبێتەوە، بە تایبەتی دوای سەردانەكەی ماك پۆمپیۆ وەزیری دەرەوەی ئەمریكا بۆ ناوچەكە و رەتكردنەوەی سعودیە بۆ نیازی كردنەوەی باڵیۆزخانەكەی لە دیمەشق بەمزوانە، ئیدارەی ئەمریكا بەم ئاراستەیە فشاری كرد و نایەوێت باڵیۆزخانەكان بەبێ‌ بەرامبەر بكرێنەوە، بە تایبەتی چانسی ئەوە هەیە كە ئەو كارە بخرێتە دانوستانەكانی كە " گیێر پیدەرسۆن" سەرۆكایەتییان دەكات كە ئەم هەفتەیە سەردانی دیمەشقی كرد. قۆناغی دابەشكردنی كێكەكەی سوریا گەیشتووە و ئەوەش لەگەڵ پەیوەندییەكانی ترەمپ- ئەردۆغان و سەردانە بەردەوامەكان بۆ روسیا و ئەوەی گەورەترین غائیبە سورییەكان خۆیانن، كە دوای هەشت ساڵ لە شەڕ و كاولكاریی، هیچ سەركەوتوویەك لە سوریا نیە، بەڵكو پەرتبوون و توندەڕەوییی و جیاكاری ئەتنیكی و ئینتهازیەتی نێودەوڵەتی و هەڵپە بۆ دابەشكردنی خەڵاتەكان و چنینەوەی سودە مادیی و سیاسیی و مەعنەوییەكان هەیە.

کاردۆ بۆکانی     ئەنجامدانی مانگرتن چالاکیەکی نافەرمانی مەدەنیە لە دژی ناعەدالەتی، ستەم و زۆرداری. چالاکیەکی سادەیە. بۆ داواکانی پێویستی بە کەرەستە و سەفەربەری نیە. هەموو کەسێک دەتوانێ ئەنجامی بدات بێ ئەوەی کە پێویستی بە سەرچاوەیەکی ئەوتۆ هەبێت. لە هەمان کات دا کارێکی پڕمەترسیە کە پێویستی بە هێزی  ئیرادە، پێداگری و دۆزێکی ڕەوایە کە مرۆڤ ئامادەیە لە پێناوی دا بمرێت. وەک گروپێکی پێکهاتوو لە ١٥ کەس لە ئاکادیمیی، رۆژنامەوانو پەرلەمانتار لە ١٧ ی دیسەمبەری ٢٠١٨ ەوە لە ستراسبۆرگ دەستمان بە مانگرتن لە خواردن کردووە. ئامانجی ئەم چالاکیە بۆ هەڵگرتنی ئەو گۆشەگیریە نا مرۆییە بەردەوامەیە کە دەوڵەتی تورک بەسەر ڕێبەری گەلی کورد عەبدوڵا ئۆجالان دا سەپاندوویەتی. لە ساڵی ١٩٩٩ ەوە ئۆجالان لە زیندانێکی تاکەکەسی ئیمرالی زیندانی کراوە، ئەو زیندانییەکی سیاسی ئاسایی نیە. یەکەمو لە هەمووی گرنگتر ئەوئاکتۆرێکی سیاسیە کە لە لایەن ملیۆنان کوردەوە وەکڕێبەرێکیڕەوای خۆیانی دەبینن کە هەموو ژیانی تەرخان کردووە بۆڕزگاری گەلەکەی لە داگیرکەرانی دڕندەیڕژێمەکانی تورکیا، ئێران، سوریا و عێراق. دووەم ئەو تیۆریسیانێکی سیاسیە کە بەشداریەکی هەمەلایەنەی هەیە لە مەسەلە فەلسەفیەکان بۆ وەرچەرخانی دەوڵەت و گەیشتن بە کۆمەڵگەیەکی مەدەنی. فەلسەفەی سیاسی ئەو بوو کە شێوەی بەو پێشکەوتنانە داوە لەڕۆژئاڤا کە لەسەربنەمای کۆمەڵگەیەکی دیموکراتی، فرەکەلتوری و فێمینیستیەو بۆتە مایەی پەسەندی کۆمەڵگە پێشکەوتنخوازەکانی جیهان. سێیەمین، زیاترین دەنگی بیستراوە لە تورکیا لە پێناوی ئاشتی دا. لە ساڵی ١٩٩٣ ەوە مشتومڕی لەسەر ئاشتیو چارەسەری سیاسی پرسی کورد لە تورکیا کردووە. پەکەکە بە رێبەری ئەو، هەشت جار ئاگربەستییەکلایەنەیڕاگەیاندووەو دوو جار هێزەکانی گەریلای بۆ دەرەوەی سنوور کشاندووەتەوەبۆ باکوری عێراقلە پێناوی ئاشتیدا. بێدەنگکردنی کەسایەتیەکی سیاسی وەک ئۆجالان بێدەنگکردنی تاکە دەنگێکەلە تورکیا کە دەتوانێ ئاشتی بەرقەرار بکات.  لە ڕووی بابەتیەوە، ئەوڕێبازە سەربازییەی تورکیا بە بەردەوامی گرتوویەبەر لە دەیەکانیڕابردوو سەلماندوویەتی کە رێبازێکی بەفیڕۆچووە. ئەگەر تورکیا بیتوانیایە کە پرسی کورد بە رێی سەربازییەکلابکاتەوە دەکرا لە ساڵانی ٨٠ کان ئەو رێبازە سەرکەوتووبێت، تەنانەت بەر لەوەش نەک ئێستا. بەو ئیلهامەی کە فەلسەفەی ئۆجالان و ئەو رێکخراوەییەی کە لە چوارچێوەی رێبەرایەتیەکەی ئەودا، پەکەکە و گەلی کورد گەیشتۆتە هێز و کاریگەریەکی ئەوتۆ کە دەولەتی تورک بە هیچ شێوەیەک توانای لە ناوبردنی نیە. بزوتنەوەی کورد بەو فەلسەفە پێشکەوتنخوازو خۆخۆبەڕێوەبەرییە خۆی گەیاندۆتە گەلانێکی خاوەن پاشخان و بۆچوونی جیاواز و ئاستی هاوپەیمانیی لە هەرچوارلای جیهان. ئەنجامدانی ئەم مانگرتنە لە کوردستان و دەرەوەی وڵات، ئاستی ناوازەیئەو  بزوتنەوەیە نیشان دەدات لە نێو کۆمەڵگەی کورددا. یەکەمجار مانگرتنی ناکۆتا لە ٧ نۆڤەمبەری ٢٠١٨ ەوە لە لایەن پەرلەمانتاری کورد لەیلا گویڤەندەوە لە زیندانی تورکیا دەستی پێکرد. لە ماوەیەکی کورت دا بە زیندانەکانی تر و هەموو بەشەکانی کوردستان و ئەوروپادا بڵاوبوویەوە. داوای مانگران بەوانەی ئێمەوەشەوە لێرە لە ستراسبۆرگ هەمان شتە. زۆر سادە و کردەییە. لە ڕاستیدا مایەی شەرمەزارییە بۆ دونیای مۆدێرن کە دەست بدەیتە چالاکیەکی وەها ئەوپەڕگیری بۆ جێبەجێ بوونی سادەترین داخوازی. لە هەمان کات دا ئاماژەیە بە قەیرانی دیموکراسی و لەدەستچوونی بەهاکانی مرۆڤ لە دونیای ئەمرۆی ڕۆژئاوادا.  لەوانەیە یەکێک بپرسێت بۆ ژیانی خۆت دەخەیتە بەر مەترسیەوە بۆ داوایەکی ئەوەندە سادە؟  وەڵامەکە سادە و ڕاستەوخۆ لە ڕووە: بێده‌نگی و فەرامۆشی ئەوروپا لە ئاست پرسی کورد بە گشتی و دۆزی ئۆجالان بە تایبەتی چ ئەلتەرناتیڤێکی نەهێشتۆتەوە. ئەوە ڕاستەوخۆ پەیوەندی بە بێچارەیی  ئەوروپا هەیە، فەشەلی دەزگاکانی ئەوروپا، دەزگایەکی وەک سی پی تی و ئەنجومەنی ئەوروپایە، لە هەستان بە جێبەجێکردنی ئەرکەکانیان.  دەزگاکانی ئەوروپا لە قۆناغی ڕابردوودا رۆڵی زۆر بونیادنەریان بینیوە بۆ چارەسەرکردنی ململانێیە ئەتنیکیەکان لە هەموو دونیا. بۆ نمونە یەکێتی ئەوروپا کاری زۆری کرد بۆ چارەسەرکردنی پرسی ئێرلەندای باکور. بێ هاوکاری یەکێتی ئەوروپا ئەو پرسە مەحاڵ بوو چارەسەر بکرێت. جگە لەوە، ڕێکخراوی ئاسایش و  هاوکاری OSCEبەشداری کرد لە چارەسەرکردنی پرسی ناگۆرنۆ-قەرەباغ و ململانێیەکییەکانی بەڵكان. بەڵام کاتێ دێتە سەر پرسی کورد بە کراوەیی پشتگیری توندوتیژی تورکیا دەکەن لە کاتێکدا کە دەوڵەتی تورکیا نکوڵی لە ناسنامە و کەلتوری کورد دەکات و لەناوی دەبات.  باشترین نمونەی ئەو هاوڕاییە شومەی لەگەڵ تورکیا، تاوانبارنیشاندانی بزوتنەوەی ئازادی کوردستانە لە لایەن یەکێتی ئەوروپاوە. لەگەڵ ئەوەی کەلەلایەن دادگای باڵای بەلجیکا و دیوانی دادی ئەوروپاوە ڕەتکراوەیەوە،بەڵام یەکێتی ئەوروپا بەردەوامە لە هێشتنەوەی پەکەکە لە لیستی ڕێکخراوە تیرۆریستەکاندا. ئەوە بە ڕاشکاوی هانی دەوڵەتی تورکیای داوە کە بەردەوام بێت لە ڕێبازی سەربازییانە لەبەرامبەر بە کورد و رێبەرەکەی عەبدولا ئۆجالان.  لە دۆخێکی وادا، لەگەڵ ئەوەی کە داوامان لەیەکێتی ئەروپا نەکردووە کە رێز لە سەروەرییاسا و ئەوڕێسایانە بگرێت کە لە دەزگایاساییەکانی ئەوروپادا داڕژراوە، بۆ لابردنی پەکەکە لەولیستەیە،  کە یەکێتی ئەوروپا پێی وایە داوایەکی عەمەلی نیە و سەختە، داواکەی ئێمەسادەیە،ئەویش هەڵگرتنی گۆشەگیری سەر ئۆجالان و ڕێدان بە خێزان و پارێزەرانی کە بیبینن. تا گەیشتن بە ئامانجەکانمان بە دلنیاییەوە درێژە بە مانگرتنەکەمان دەدەین. تا دوایین سات داکۆکی لەوە دەکەین، مردن پاساوێک نیە کە لە داواکەمان دوورمان بخاتەوە. ئێمەلەدونیایەکدادەژینده‌رکبەوەدەکەینکە خۆبەرپرسیار ببینین. هێزی ئەوەمان هەیە بڕیار بدەین کە ئەم جیهانە چۆنە. پاشەکشە لە دیموکراسی بۆ ئێمە مایەی پەسەند نیە، ئێمە بە سادەیی هێلێک ناکێشین بەڵام بێدەنگیو فەرامۆشینامرۆییانەڕەتدەکەینەوە. بە پێویستی دەزانم بڵێم، هەر زیانێکی گیانی بەرپرسیارێتیەکەی لە ئەستۆی سی پی تیو ئەنجومەنی ئەوروپایە بەتایبەتی و دەزگاکانی ئەوروپایە بە شێوەیەکی گشتی... بە دلنیایەوە دەبێتە پەڵەیەکی ڕەش بە نێوچەوانی دیموکراسیەتی ڕۆژئاوایی و ئەنجامی مەترسیداری دەبێت لەسەر ئەوروپا لەکاتێکدا کە ژمارەیەکی زۆرکورد و تورک لەم وڵاتانە دەژین. بۆڕێگرتن لەوە هیوادارین کە دەزگاکانی ئەوروپا بەرپرسیارێتیەکانی بەجێبێنێت بۆ رزگارکردنی ئەو گیانانە لە سەر خاکەکەی و گوێ لە بانگەوازی هاوڵاتیانی بگرێت و ئەرکەکانی لە ئاست مافی مرۆڤ و هەڵگرتنی گۆشەگیری سەر ئۆجالان پێک بێنێت. ................................................ کاردۆ بۆکانی: خاوەن نامەی دکتۆرایە لە تیۆری سیاسی و پسپۆر لە پرسی کورد. مامۆستای فەلسەفە/تیۆری سیاسی بوو له‌ ساڵانی 2013-2016 لە زانکۆی دبلن. نوسەری کتیبی :Social Communication and Kurdish Political Mobilisation in Turkey

ئەنوەر حسێن (بازگر) تارماییەک لە (ناوچەکەدا) دێت و دەچێت، کە (تارمایی ئەمەریکا)یە... ئەمە یەکەم دێری مانفێستی حزبی کۆمۆنیستی مارکس و ئەنگڵسە.  بە دوای ڕووادوەکانی بەهاری عەرەبی 2011 کە چەند دەوڵەت و هێزگەلی سەرکوتگەری ڕاماڵی، پێدەچێت لە 2019شدا، چەند ڕووداوی چاوەڕوان نەکراو بێنەپێش، کە هەرێمی کوردستان و کوردستان بە گشتی چەقی ئەو ململانێی و گۆرانکارییانە بێت. سەردانی مایک پۆمپیۆ وەزیری دەرەوەی ئەمەریکا بۆ هەرێم و ناوچەکە مەسجی "کێ لەگەڵ ئەمەریکایە و کێ لەگەڵمان نییە؟!" دواین پەیامی بوو بۆ هەرێم، تورکیا، ئوردون و سعودیە... کە مانا و مەغزای زۆری لێ چاوەڕوان دەکرێت، ئەوەشی ڕاگەیاندبوو کە لوتکەی پۆڵەندا، چەند دۆسییەکی گرنگی تاوتوێکرد لە گرنگترنیان فایلی ئێران و پاشەکشەیە لە سوریا. کە ئەسڵی تارمایی ئەمەریکا لە ناوچەکە هەر ئەم دوو فایلەیە و پاشەکشەشی لە سوریا لەسەر حسابی ئێرانە و جێهێشتنییەتی بۆ ڕوسیا و تورکیا وەکو بەخشیش لە بەرامبەر بێ دەنگی ئەوان یان پشتیوانی لە دۆسیەکی بە بەها بۆ واشنتۆن.  داپۆشینی فایلی خاشقچی لەگەڵ سعودیە، ڕازیکردنی تورکیا بە پاشەکشەی لە سوریا وەکو ئیمتیاز و جێهێشتنی کوردەکان، گواستنەوەی باڵوێزخانە بۆ قودس لە ئیسرائیل، کۆتاییهاتنی بە قەیرانی چل ساڵە لەگەڵ کۆریای باکور، گەشتی خێرا و گەرمی ئەمەریکییەکان بۆ عێراق بۆ پێکهاتنی حکومەت، بەشداریکردن لە پشتەوەی مێزەکانی کۆبوونەوەی یەکێتی و پارتی لە چواردەی ژانوییە لە هەولێر، هەموویان یەک پاکێجن کە واشنتۆن بە پەلەیە لە ڕاپەڕاندنی کارێک کە ترامپ دەیەوێت ناوچەکە بشڵەقێنێت. پاش ماوەیەکی زۆر لە پەراوێزخستنی هەرێمی کوردستان  لە دوای پرۆسەی ڕیفراندۆم، هەولێر و سلێمانی و بارزانی چەند ڕۆژێکە بەردەوام فەرشی سوور بۆ گەمەکارانی ناوچەیی و نێودەوڵەتی ڕادەخەن، کە دیارە کاریان بە هەرێم هەیە و خەریکی پلانێکن کە بۆنی گەلەکۆمەکی یان هاوپەیمانی لێدێت.  سەردانی ژان لوردیان بۆ هەولێر، سەردانی جەواد زەریف بۆ سلێمانی و هەولێر بە ئاشکرا، چەندین بەرپرسی سەربازی و هەواڵگریش بە نهێنی، ئاماژەن کە دوو لایەنی کێشەکە، هەرێم بە شوێنی گرنگی ململانێکانیان دەزانن و ڕەنگە بەرژەوەندی و پێکدانانەکانیشیان پێویستی بە ڕۆڵی هەرێمی کوردستان هەبێت، ئەگەرنا هیچ ڕاستی نییە گەر وا بیر بکرێتەوە بۆ بەرژەوەندی حکومەتی هەرێم و خەڵکی کوردستانە، چونکە زۆر دوور نییە پار ساڵ خەریکبوو هەموو شتێک بگەینەوە خاڵی سفر و پشتیان تێکردین و هەرەشەیان لێکردین. سەرەڕای هاتنی هێزێکی زۆری سوپای ئەمەریکا بۆ کەرکوک و موسڵ، ئاماژەن بۆ ئارامکردنەوەی تەل ئەبیب کە لەسەر سەبرگرتنی بەردەوام بێت و کارێک نەکات دۆخەکە تێکبدات، ئاماژەکان وادیارن واشنتۆن بێ تەل ئەبیب لە خۆرهەڵاتی ناوەڕاست هیچ ناکات و مەبەستیشیەتی کە تاران سنورەکانی ڕابگرێت و هەڕەشە ناوچەییەکانیشی لێ دوور بخاتەوە بە تایبەتی لە سەردەمی ترامپدا. هەرچی تارانە لەسەر وجودی هەژموونی خۆی لە یەمەن، عێراق، سوریا و لوبنان بەردەوام دەکات و گوێ لەو بۆچوونانە ناگرێت کە داوای پاشەکشەیان لێکردوە، چونکە ئەوە قوڵایی سیاسی، ئەمنی و عەسکەری ستراتیژی تارانیشە و پێناچێت میانگیرییەکانی سوڵتان قابوس ئاکامێکی بوو بێت.  بۆیە واپێدەچێت هەردوولا گفتوگۆ و دانوستانەکانیان شکستی هێنابێت و بۆ ڕێگای تر بگەڕێن بۆ یەکلاکردنەوەی ململانێکانیان، کە ئەمەریکا پێناچێت تێیدا سەرکەوتوو بێت و ئێرانیش لەهەر حاڵدا لە سوریا و عێراق باشتر نابێت. ڕەنگە ئەوەش شازز بێت، كە هاوكات و لە یەك كاتدا دوو فڕۆكەی دوو وڵاتی نەیار و كێبڕکێكار، دوو فایل و ئەجێندای جیاواز لە فڕۆكەخانەی هەولیر دادەبەزن. (ژان لۆردیان-فەرەنسی) و (جەواد زەریفی- ئێرانی) كە هەردووكیان بۆ پشتیوانی هەرێمی كوردستان هاتوون. قسەكانی زەریفی كە وتی : "هەرێمی كوردستان خۆی بە دۆستی نزیكی ئێران دەزانێت" ئاماژەیە بۆ ئەوەی كە "ئەوەی لە لایەن واشنتۆن و پاریسەوە داواكراوە كە لەگەڵ ئێمەن یان ئێران" بە بۆچوونی زەریفی هەرێمی كوردستان دۆستی ئێرانە. هەرچەندە هێشتا بەرپرسانی هەرێم لەو بارەیەوە هیچ راگەیاندنێكیان نەداوە بەڵام مەرج نییە هەموو جار هەرێمی كوردستان لە ناو سایسەت و چوارچێوەی دۆسیە و بەرژەوەندییەكانی ئەمریكا و ئەوروپادا بخولێتەوە بەڵكو دەكرێت پێچەوانەكەی ڕاست بێت، چوونكە مەرج نییە هەموو جار هەرێم مل بۆ سیاسەتەكانی ئەوان بدات واتا مەرج نییە گەر ئەمریكا خواستی بێت پەلاماری ئێران بدات هەرێم بەشێك بێت لەو سیناریۆیە، هەرچەندە ئەوە بە مانای ئەوە نییە كە هەرێم پاڵپشتی ئێران دەكات، بەڵام دەكرێت جارێكیش هەرێمی كوردستان (نا) بەو زلهێزانە بڵێت. چوونكە لە خراپترین حاڵەتیشدا هەر بە قەدەر پشتتێكردنمان توڕە دەبن كە لە ڕاپەڕین و ڕیفراندۆم و ڕۆژئاواو و باكوری كوردستان بە جێیان هێشتووین. بە تایبەتی كە هەرێمی كوردستان نابێت لە هیچ سیناریۆیەكی ئەمریكا و ئەوروپا بەشدار بێت كە نەزانێت قازانج و داهاتوو و دەستكەوتەكانی كامەیە. هەرێمی کوردستان کە چەقی جوگرافی و جیوپۆڵەتیکی دۆسیەکەیە، نە دەتوانێت ڕۆڵی میانگیری بگێڕێت، نە دەتوانێت بێ لایەنیش بێت، بۆیە گرنگە نەبێتە قوربانی و لەو ململانێیانە باش بێتەدەر و بەرژەوەندی هەرێم و خەڵکی کوردستان و پارچەکانی تری کوردستانیش قازانجی تێدا بکات، دەبێت ئەوەش بزانین ئەمەریکا لەکاتی پێویستدا داوای هاوکاری لە کورد دەکات، بەڵام مەرج نییە لە سەرکەوتن و قازانجدا کورد بکاتە شەریک و هاوبەش و دوور نییە وەکو ڕابردوو گەر پێویستی کرد پشتی تێبکات، چونکە لای ئەمەریکا بەرژەوەندی لەسەروو هەموو شتێکەوەیە بە شەڕ و ئاشتیشەوە بۆ خۆی، بەڵام دەکرێت هەموو جار لانی کەم قوربانی نەبێت وەک ئەمجارە.

 بورهان حاجی سلێمان        لە گەرمەی پرسەكانی پێكهێنانی حكومەتی هەرێم و ناوەندو قوڵبوونەوەی كێشەكانی كەركوك و پەرەسەندنەكانی نێوان ئەمریكاو ئێران و مانۆڕەكانیان لەسەر خاكی هەرێم و عێراق و كوڵانی تەواوی ناوچەكە، رۆژی پێنجشەممەی رابردوو رێكەوتی (17/1/2019) یەكێتی بە سەرپەرشتی جێگری سكرتێری گشتی و ئامادەبوونی ئەقتاب و بنەماڵە جیاجیاكانی ئەو حیزبە كە پێكهاتبوو لە ژمارەیەك لە ئەندامانی مەكتەبی سیاسی و سەركردایەتی و سەركردە، لە چالاكییەكی نەوعیدا پرۆسەی سوڵحی نێوان هەردوو بنەماڵەی گوندێكی دەشتی كۆیەی بەسەركەوتوویی ئەنجامدا. كورد دەڵێت "ئەگەر كەچەڵ حەكیم بوایە عیلاجی سەری خۆی دەكرد"، من نازانم ئەو تیمەی یەكێتی چۆن باسی سوودەكانی تەبایی و گرنگی سوڵحییان بۆ دوو بنەماڵەكە كردووە، چونكە یەكێتی دۆخی ناوخۆیی خۆی زۆر لە حاڵی گوندی مەلا زیاد خراپترە كە هەموو قورسایی خۆی بۆ ئەنجامدانی داستانی سوڵحەكەی نێوان دوو بنەماڵەكەی خستەگەڕ، تەنانەت پێكهاتەی ئەندامانی تیمی سوڵحەكەی یەكێتی لە ناو خۆیاندا پێویستی بە خێرخوازێك هەیە سوڵحێكی باش لە نێوان باڵ و بنەماڵەكانیدا بكات، جگە لەوەی تەواوی ئەو حیزبە پێویستی بە كۆنگرەیەكی سوڵح ئاساو پەیڕەو و كتێبێكی نوێ هەیە بۆ روخاندنی دیوارە پتەوەكانی كوتلەو نوسینەوەی ئەلفو بێی سروشەكانی ئاشتەوایی و یەكڕیزی و تێكشكاندنی بتەكانی فرە ناوەندی بڕیارو ئاڕاستە. لە راستیدا یەكێتی تەنها پێویستی بە سوڵحكردن لەگەڵ خۆی نییە، بەڵكو پێویستی بەسوڵحێكی گشتگیرە لەگەڵ جەماوەرو مێژووی خۆی، سوڵحێك لەسەر گۆڕی مام داوای لێبوردن لە جەماوەرێكی بەئەمەك و مێژوویەكی پرشنگدار بكات و دەستی دایكی هەزاران شەهیدی ماچ بكات و سەر بۆ كەمئەندامانی سەنگەری دابنوێنێت، نەك هەر ئەوە بەڵكو پێویستە داوای لێبوردن لە تەواوی خەڵكی كوردستان بكات، چونكە لەم چەند ساڵەی دواییدا هەرچییەكیان بەسەردا هاتووەو بێت و لەسەر دەستی كێ بێت، هەر یەكێتی بەرپرسیارە، چونكە ئەوە خۆخۆری و پەرتەوازەیی ئەو حیزبەیە باڵانسی هێزی لە كوردستان گۆڕیوەو چارەنووسی قەوارەی هەرێم و تەواوی دەستكەوت و چارەنووسی گەلێكی داوە بە دەست تاكە حیزبێكەوە كە چەند ساڵێكە تەواوی ئیرادە و مافی بڕیاردانی گەلی كوردی زەوتكردووەو بە بڕیارە تاكلایەنەكانی هەرێمی كوردستانی بەرەو تونێلێكی تاریك بردووە... ئەگەر منداڵێكی كوردیش لەم هەرێمە و ناوچە دابڕاوەكان خوێن لە لووتی بێت بەر لە هەموو كەسێك یەكێتیەكی پەرتەوازەو دژ بە یەك بەرپرسیارە، بۆیە تا زووە سوڵحەكانتان بكەن واز لە خێڵ و بنەماڵەكان بێنن، چونكە ریش سپی زۆرە بچێتە نێوانیانەوە!

د. هەردی مێد     به‌ رای من تێگه‌شتن له‌ پانتایی كوڵبه‌ر، واته‌ تێگه‌شتن له‌ دونیابینی كۆڵبه‌ر، لۆژیكی چالاكی كۆڵبه‌ریی، ئامانج و ئومێدی كۆڵبه‌ر، تد، ده‌روازه‌یه‌كی زێده‌ گرنگه‌ بۆ تێگه‌شتن له‌ ده‌وڵه‌ت و لۆژیكی چونه‌ڕێوه‌ی ده‌وڵه‌ت. له‌م ماوه‌یه‌ی پێشوو زیاد له‌ هه‌ر كاتێكی دی زۆرترین هه‌واڵم سه‌باره‌ت به‌ كۆڵبه‌ره‌كانی سه‌ر سنوری عێراق و ئێران بینیووه‌ و بیستووه‌. زۆرێك له‌ سه‌رچاوه‌كان ئاماژه‌ به‌ كوشتنی ژماره‌یه‌كی زۆر له‌مان به‌ ده‌ست ده‌وڵه‌تی ئێرانه‌وه‌ ده‌كه‌ن. گه‌لۆ ده‌وڵه‌ت بۆ ئه‌وه‌نده‌ له‌ كۆڵبه‌ر قه‌ڵسه‌ له‌ كاتێكدا چالاكی كۆڵبه‌ری یه‌كێكه‌ له‌ سه‌رچاوه‌كانی بژێوی و بزوێنه‌ری ئابوری لۆكاڵ و ناوچه‌ سنوریه‌كان؟ خۆ گه‌ر داهاتی كۆڵبه‌ری به‌شێكه‌ له‌ <ئابوری نافه‌رمی> و به‌مه‌ش ملكه‌چی باج و زه‌ریبه‌ی ده‌وڵه‌ت نییه‌ و له‌ مۆنۆپۆڵی زه‌ریبه‌ی ده‌وڵه‌ت به‌ده‌ره‌، ئه‌وا به‌ شێوه‌یه‌كی دی ده‌چێته‌وه‌ گیرفانی ده‌وڵه‌ت چونكه‌ زۆرجار ئه‌و داهات و ده‌ستمایه‌یه‌ی له‌ ئابوری نافه‌رمی ده‌ستده‌كه‌وێت هه‌م جارێكی دی له‌ بازاڕدا خه‌رج ده‌كرێته‌وه‌، هه‌مش له‌ خستنه‌سه‌رپێ و بونیادنانی ئابوری فه‌رمیدا به‌كارده‌هێنرێت. به‌ مانایه‌كی دی، كۆڵبه‌رێك ده‌توانێت پاش ماوه‌یه‌ك له‌ كاری كۆڵبه‌ری، ببێته‌ خودان كارخانه‌یه‌كی بچوك و به‌مه‌ش له‌ ئه‌كته‌رێكی ئابوری نافه‌رمییه‌وه‌ بپه‌ڕێته‌وه‌ بۆ ئابوری فه‌رمی. له‌ راستیدا، دیارده‌ و دینامیكی كۆڵبه‌ری له‌‌ سێ ره‌هه‌ندیدا زه‌مینه‌ی تێگه‌شتن له‌ لۆژیكی ده‌وڵه‌ت سازده‌كات. له‌ یه‌كه‌م شوێندا ره‌هه‌ندێكی ئابوری‌ هه‌یه‌: له‌ بیرمان نه‌چێت ده‌وڵه‌ت به‌ دژایه‌تیكردنی كۆڵبه‌ر ته‌نها به‌ دوای به‌رته‌سككردنه‌وه‌ی پانتایی ئابوری نافه‌رمییه‌وه‌ نییه كه مل بۆ‌ باج و زه‌ریبه‌ی ده‌وڵه‌ت‌ نادات، به‌ڵكو كۆنترۆڵكردنی خودی ئه‌و ئه‌كته‌رانه‌یه‌ كه‌م له‌م گۆره‌پانه‌دا كار ده‌كه‌ن له‌ ترسی ئه‌وه‌ی ئه‌و داهاته‌ ئابوریه‌ی له‌م گۆڕه‌پانه‌دا وه‌ده‌ستدێت ببێته‌ بنه‌مای چالاكی سیاسی و دینامیكێكی كۆمه‌ڵایه‌تی یاخی له‌ ئاستی ناوچه‌ لۆكاڵیه‌كان. ده‌نا هیچ ده‌وڵه‌تێك توانای جڵه‌وكردنی ئابوری نافه‌رمی نییه‌، ئه‌وه‌تا له‌ وڵاتێكی وه‌ك میسر ئابوری نافه‌رمی له‌ ٦٠% ئابوری ده‌وڵه‌ت پێكده‌هێنێت. له‌ لایه‌كی دی، ره‌هه‌ندێكی سیاسی وابه‌سته‌ به‌ بونیادنانی ده‌وڵه‌ت٠نه‌ته‌وه‌ هه‌یه‌، به‌و پێیه‌ی رۆژانه‌ كۆڵبه‌ره‌كان سنوره‌كانی ده‌وڵه‌ت ده‌به‌زێنن و پێناسه‌ و لۆژیكی خۆیان به‌ سه‌ریدا ده‌سه‌پێنن. گه‌ر سنور بۆ ده‌وڵه‌ت ته‌قدیس و جێی بڕین و ده‌ستكاریكردن نییه‌، ئه‌وا بۆ كۆڵبه‌ر ته‌نها هێڵێكی ده‌ستكرده‌ و تێپه‌ڕبوون پێیدا نه‌ سه‌رپێچیه‌، نه‌ پێشێلكاری. گه‌ر بۆ ده‌وڵه‌ت پاراستنی سنور جێگه‌ی به‌رهه‌مهێنانه‌وه‌ی ده‌سه‌ڵات و جه‌بروتێتی، هاوتا سه‌لمێنه‌ری ده‌سه‌ڵاتشكاندنه‌وه‌یه‌تی به‌ سه‌ر كۆی كون و قوژبنه‌كانی وڵات، ئه‌وا بۆ كۆڵبه‌ر به‌زاندنی، ئیتر ئاگایانه‌ بێت یان نائاگایانه‌، به‌شێكه‌ له رووبه‌روونه‌وه‌ی ده‌وڵه‌ت و ره‌تكردنه‌وه‌ی هه‌یمه‌نه‌یه‌تی. هه‌ر له‌م گۆشه‌نیگایه‌وه‌، ده‌وڵه‌تی تورك له‌ دامه‌زراندنیه‌وه‌ قه‌ڵاچۆكردنی كاری كۆڵبه‌ری، كه‌ كورد و ئه‌رمه‌نه‌كان له‌ نێوان توركیا و سوریا و عێراق ئه‌نجامیان ده‌دا، ده‌كات به‌ یه‌كێك له‌ گره‌وه‌ هه‌ره‌ سه‌ره‌كیه‌كانی دروستبوون و به‌هێزبوونی. بۆ ئه‌م مه‌به‌سته‌، هه‌ر له‌ ساڵی ١٩٣١ه‌وه‌ كاتیگوری <قاچاغچی> له‌ هه‌مبه‌ر كۆڵبه‌ره‌ كورد و ئه‌رمه‌نه‌كان به‌كارده‌هێنێت، به‌ ئامانجی ته‌حریمكردن و سزادانیان. چونكه‌ كاتیگۆری قاچاغچی كاری كۆڵبه‌ری ده‌كات به‌ <یاساغ>، به‌ <ناشه‌رعی>، به‌ <نایاسایی>. وه‌لێ بۆ كورده‌كان كۆڵبه‌ری به‌ هیچ شێوه‌یه‌ك نه‌ده‌چووه‌ خانه‌ی كارێكی نایاسایی، چونكه‌ سنوره‌ نوێییه‌ ده‌ستكرده‌كانیان هێشتا پێقبوڵ نه‌ده‌كرا كه‌ كتوپڕ له‌ كه‌س و نزیكه‌كانیانی داده‌بڕاند و هاوكات چالاكیه‌ ئابوریه‌كانیانی له‌ پڕا ده‌كرد‌ به‌ چالاكی نافه‌رمی و ناشه‌رعی. بۆیه‌ گه‌ر بۆ كورد و ئه‌رمه‌نه‌كان كۆڵبه‌ری به‌ شێوه‌یه‌ك له‌ شێوه‌كان ره‌تكردنه‌وه‌ی سنوره‌ نوێییه‌ ده‌ستكرده‌كان بوو، ئه‌وا بۆ ده‌وڵه‌ت ته‌حه‌دا و یاخیبوون بوو. به‌ مانایه‌كی دی، قایمكردنی سنور و جڵه‌وكردنی ده‌بێته‌ به‌شێك له‌ پرۆسه‌ی بونیادنانی ده‌وله‌ت٠نه‌ته‌وه‌،. له‌ بیرمان نه‌چێت، دروستكردنی ده‌وڵه‌ت هه‌ر له‌ سه‌نته‌ره‌وه‌ ده‌ستپێناكات، به‌ڵكو له‌ قه‌راغه‌كانی (Periphery) وڵاتشه‌وه‌. ره‌هه‌ندی سێیه‌می كۆڵبه‌ر په‌یوه‌ندی به‌ ده‌وڵه‌ت و كورده‌وه‌ هه‌یه‌. له‌ راستیدا، به‌ توندوتوڵكردنی سنوره‌كانیان، ئه‌و ده‌وڵه‌تانه‌ی كوردیان تێدا ده‌ژێت ده‌یانه‌وێت رامی كورده‌كانی بكه‌ن و دابه‌شبوونیان بكه‌ن به‌ <ئه‌مری واقع>. ‌ئه‌مه‌ سه‌ڕه‌رای ئه‌وه‌ش ده‌وڵه‌ت ده‌یه‌وێت به‌ قایمكردنی سنوره‌كانی ڕێ له‌ سه‌رهه‌ڵدان و دروستبوونی ئه‌و شته‌ بگرێت كه‌ پرۆفیسۆر هه‌میت بۆزارسلان ناوی ده‌نێت <پانتایی سنور-بڕی كورد (Kurdish trans-border spac)>. واته‌ پانتاییه‌ك له‌ ده‌ره‌وه‌ی سنوره‌ كێشراوه‌كانی ده‌وڵه‌ته‌ هه‌رێمێیه‌كان خۆیدروست ده‌كات و ده‌بێته‌ گۆڕه‌پانی به‌یه‌كگه‌شتنی كورد، ره‌ده‌ڵو‌به‌ده‌ڵی بازرگانی، ئاڵوێری كولتوری و فه‌رهه‌نگی، ستراتیژی هاوسه‌رگیری نێوكوردان، تد. بێگومان، كۆڵبه‌ر یه‌كێكه‌ له‌و‌ توخمه‌ هه‌ره‌ سه‌ره‌كیانه‌ی رۆڵێكی جه‌وهه‌ری له‌ دروستكردنی ئه‌م پانتاییه‌ سنور-بڕه‌ ده‌بینێت و سحر و ئه‌فسانه‌ی سنور به‌تاڵ ده‌كاته‌وه‌ و چه‌نده‌ها رایه‌ڵ و په‌یوه‌ندی له‌ نێوان جڤاتی دابه‌شبووی كوردا دروست ده‌كات. بۆیه‌، كۆڵبه‌ر و ده‌وڵه‌ت هه‌میشه‌ دوو نه‌یاری یه‌كن. كۆڵبه‌ر‌ی بۆ كۆڵبه‌ر مه‌رجی مانه‌وه‌ و قوتێتی‌، وه‌لێ بۆ ده‌وڵه‌ت شكاندنی ئه‌فسانه‌ و هه‌ژمونێتی.

لاوك سەڵاح        کە جەنگی سارد کۆتای هات، کە دیواری بەرلین داڕما، کە نوقڵانەی دونیایەکی زۆر جیاواز وەک کڵپە و پریشکی ئاگر بە دونیادا بڵاوبۆوە، کە مەرگی هەموو ئایدۆلۆجییەکان راگەیەندرا، جیهان خۆی بۆ یەکەمجار لە مێژوودا لە یەک جەمسەریدا بینییەوە. بە درێژایی مێژوو، دۆخی دوو جەمسەری باڵی بەسەر دونیادا کێشابوو، هەمیشە ململانێکان بە پارسەنگی بەرژەوەندی دوو زلهێزی دونیا دەپێوراو چارەسەرەکان لەسەر بنەمای دابەشکردنی هێز بوو، ئەمە دۆخە کە بوو هەر لە سەردەمەی کۆلۆنیالیزمی پرتوگال و ئیسپانییەکان و بە تێپەربوون بە کۆلۆنیالیزمی ئینگلیزەکان و فەرەنسییەکان تا جەنگی ساردی نێوان سۆڤیەتی پێشوو و ئەمەریکا کە لە سەرەتایی ساڵانی نەودەکانی سەدەی رابردوو کۆتایی بەو پارسەنگە لە هێز هێنرا کە سیستمێکی نێودەوڵەتی دیاریکراوی دارشتبوو. لە جیهانی یەک جەمسەریدا کە لەلایەن ئەمەریکا و ئەورۆپای رۆژهەڵات وەک یەک بلۆک سەرکردایەتی دەکرا، پەیمانی سپۆنسەرکردنی سیستمێکی نێودەوڵەتی نوێ درا کە تیایدا دونیایەکی نوێ لە دیموکراسی و سیستمێکی لیبرالی نێودەوڵەتی هەتا هەتایی پەیرەو دەکەن و گفتی ئەوەیاندا ئەوەی روویدا لە جەنگ و نەهامەتی و کاولبوون دووبارە نابنەوە. هەموو سەرمەست بووین، شانازیمان بەو ساتە لە ژینمان دەکرد کە ئێمە دەبینە نەوەی رۆژگارێکی بێ گەرد لە ئاشووب. بەڵام بەداخەوە ئەم سیستمە نوێیە هەر زوو رووبەرووی چەندان قەیرانی سیاسیی نێودەوڵەتی بۆوە، لە سەرتا زۆر ئاسایی وەرگیران بەوەی کە قۆناغی گواستنەوەیە و ئەو قەیرانانە هەر روودەدەن، بەڵام لەگەڵ کاڵبوونەوەی بەهاکانی بانگەشەی جیهانگیری و شەرە سەربازییە نێودەوڵەتییە شەکەتە بەردەوامەکان و لێشاوی کۆچبەری و تەوژمە رەگەزپەرست و پۆلۆلیستەکان و دارمانی سیستمی وەبەرهێنانی بانکەکان کە هاوکات بوو لەگەڵ هەرەس و کارکرنەکردنی چەمکە فەلسەفییە سیاسییە نیولیبرالیزمییەکانی بازاڕ و هەلی کار و پارە بەگەرخستن و شێواندنی شیرازەی کۆمەڵگەکان لەسەر بنەما و ستراتیژیەتی تاقیکردنەوە سەرکێشەکان، بێ گوێدانە ئەو زیان و کاریگەر خراپانەی روودەدەن، روخساری سەرەکی دونیای پاش جەنگی سارد بەدەرکەوت، رۆخسارێک تێدەگەیەنێت کە ناجێگیری و شپرزەیی و پۆپۆلیستی و دڵەراوکێ و نیگەرانی لە سەر هەموو ئاستەکان شوناسی راستەقینەی ئەم سەردەمەیە، دیسانەوە جەنگە بەدەکان یادەوەری هەموو نەوەکانی داهاتووش داگیر دەکەن. بەداخەوە لە ئێستادا، دۆخی وڵاتەکان و کەسەکان و چیین و توێژە جیاجیاکانی کۆمەڵگەکان تا دێن گۆشەگیرتر دەبن و لە نێوانیاندا چەندان دیوار هەڵدەچنرێن و بەرژەوەندییە ئابووری و تەماعە سیاسیەکان بێ گوێدانە سەرەتاترین بەهای مرۆڤدۆستی هەڵپەی سەرکێشانەی بۆ دەکرێت و شەرانگێزیانە دوور لە هەر بنەمایەکی سیاسی رەوا و بە پاساو و بەهانەی قێزەوەن وهەندێ جار ساویلکانە ئیدعای رەوایەتی بۆ دەکەن. لە ئێستادا جیهان، سەرلەنوێ، لە قۆناغی گواستنەوەدایە لە یەک جەمسەرییەوە بۆ زیاتر لە یەک جەمسەر، دونیا لە بەردەم ئەرکی دارشتنەوەی سیسمێکی دیکەیە کە دەبێت رەچاوی دابەشکردنی هێز و ئابووری و ناوەندەکانی دەستەڵات و پەرەسەندە سیاسییەکان بدات. دونیا وردە وردە بەرەو ئەو راستییە خۆی پەلکێش دەکات کە بە چەندان دەوڵەتی گەورە بەرێوە ببرێت، ئێستا وڵاتی چیین و رووسیا و هەندێکی دیکە کاریگەرییەکی شاراوەیان لەسەر وزە و ئابووری و سەرماییەی جیهان هەیە. هیوادارم جەنگی دیکە روونەدات لە بەرئەوەی لە وەچەرخانە مێژوویەکاندا بۆ هێنانەدی سیستمێکی نوێی نێودەوڵەتی، جەنگ هەمیشە یاوەری وەچەرخانەکان و سیستمە نێودەوڵەتییەکە بووە تا سەپێنراوە! ئەوەی راستی بێت ئەو کاتەی جیهان لە سەردەمی جەنگی ساردا دوو جەمسەر بوو، ئەمەریکا و سۆڤیەتی جاران دونیایەک رێکەوتنامە و لەیەکتێگەیشتنیان بۆ راگرتنی پارسەنگی هێزی سەربازی و ئابووری هەبوو کە پاڵپشت بوو بەو هێزە ئەتۆمییەی کە هەردولا هەیانبوو. هەردوولا ناچاربوون رێز لەو رێکەوتننامانە بگرن، بەڵام تا چەند لە قۆناغی گواستنەوەی ئیستادا بۆ جیهانێک کە زیاتر لە جەمسەرێکی تێدا بێت گرێنتی ئەو پابەندبوونە سیاسی و یاسایی و ئەمنییە هەیە و تا چەند رێزگرتنی یاسایی دەخوات بە تایبەتی رێکەوتن لە نێوان چەند جەمسەرێکدا قورسترە لە نێوان دوو جەمسەردا ئەگەر بەرژەوەندی راستەوخۆی هەریەکەیان رەچاو نەکرێت. ئەوەی پەند و عیبرەتە بۆ ئەم سەردەمە ئەوەیە تا چەند تیۆری سیاسی کاریگەر بووە لە ئاراستەکردنی رووداوە سیاسییەکان بۆ هێنانەکایەی سیستمێکی نێودەوڵەتی میانرەو؟ ئایا شیکردنەوە و تیۆرە سیاسییەکان بەدوای رووداوەکاندا وەک سێبەر لە غارداندا نەبوون؟ کێ کێی دروست کرد، رووداوە سەرکێشەکان یان تیۆرە سیاسییە بەتاڵەکان؟ لەمەش گرنگتر، راستیییەکی دیکە، ئەوەیە کە بەداخەوە پێشبینی گۆرانکاری لە بنکە و هێزی سیاسی و ئابووری دونیادا نەدەکرا، وا مەزەنە دەکرا کە ئەوە ئیتر رۆژئاوایە بەسەرکەوتوویی لە جەنگەکان هاتۆتە دەرێ و سیاسەتە ئابووری و دەرەکییەکانی سەرکەتوو بوون و لە ئاییندەشدا پەرسەندی تەکنەلۆجیا زیاتر سەرکەوتنی بەرجەستە دەکات، ئیتر ئەوە دەوڵەتەکانی رۆژئاوایە سیاسەتی دونیا ئاراستە دەکەن و هەر بۆیە بۆ پاراستنی سیستمی نێودەوڵەتی هەموو مافێکییان هەیە. هەموو ئەم گۆرانکارییانەی لە پێگەی سیاسی و ئابووری دەوڵەتەکاندا دەبینرێن ئەو تێگەیشتنانەی سەرەوە پووچەڵ دەکەنەوە. دونیا لە بەردەم چەندان جەمسەردایە کە رەنگە پێویستی بە زیاد لە سیستمێکی نێودەوڵەتی هەبێت بۆ پاراستنی بەرژەوەندییە ئابوورییەکان و ئاسایشی نێودەوڵەتی و بە دوورگرتنی کۆمەڵگەکان لە تارماییەکانی جەنگ.

سەرتیپ وەیسی كەریم       له‌ دوو ڕۆژی داهاتوودا هه‌نگاوه‌كانی پێكهێنانی حكومه‌ت چڕترو خێراتر ده‌بن، له‌سه‌ر ئاستی لیژنه‌ باڵاكان و لیژنه‌ لاوه‌كییه‌كان كۆبوونه‌وه‌كان به‌رده‌وامی ده‌بێت. قۆناغی داهاتووی كۆبوونه‌وه‌كان، گفتووگۆكردن ده‌بێت له‌سه‌ر ڕێككه‌وتنی سیاسی و داڕشتنی به‌رنامه‌ی حكومه‌ت و دابه‌شكردنی پۆست و ناوی كاندیده‌كان. پارتی ئامانجیه‌تی له‌ماوه‌یه‌كی نزیكدا ده‌سته‌ی سه‌رۆكایه‌تی په‌رله‌مان هه‌ڵبژێردرێت، ئه‌وه‌ی تاوه‌كو ئێستا یه‌كلابۆته‌وه‌ سه‌رۆك بۆ یه‌كێتیی و جێگری یه‌كه‌م بۆ پارتی و جێگری دووه‌م بۆ پێكهاته‌كان ده‌بێت، پارتی جێگری دووه‌م نادات به‌ هیچ هێزێكی دیكه‌، چونكه‌ نایه‌وێ جارێكی دیكه‌ له‌ ده‌سته‌ی سه‌رۆكایه‌تی زۆرینه‌ نه‌بێت. سه‌باره‌ت به‌ پۆستی جێگری سه‌رۆكی حكومه‌ت ململانێكانی نێوان ماڵی مام جه‌لال و كۆسره‌ت ڕه‌سوڵ چووه‌ قۆناغێكی دیكه‌، دوای ئه‌وه‌ ده‌رباز كۆسره‌ت ڕه‌سوڵ بڕیاریدا خۆی بۆ پۆستی جێگری سه‌رۆكی حكومه‌ت هه‌ڵبژێرێت، ئه‌مه‌ش ده‌بێته‌ سه‌ر ئێشه‌یه‌كی دیكه‌ بۆ قوباد تاڵه‌بانی و ماڵی مام جه‌لال. هه‌رچه‌نده‌ گۆڕانیش داوای پۆستی جێگری سه‌رۆكی حكومه‌ت و جێگری سه‌رۆكی هه‌رێم و په‌رله‌مان ده‌كات، به‌ڵام ئاماژه‌كان بۆئه‌وه‌ده‌چن له‌ باشترین حاڵه‌تدا ئه‌و هێزه‌ جێگری سه‌رۆكی هه‌رێمی به‌رده‌كه‌وێت، ئه‌مه‌ش تاوه‌كو ئێستا یه‌كلانه‌بۆته‌وه‌، چونكه‌ یه‌كێك له‌ ئه‌گه‌ره‌گان ئه‌وه‌یه‌ سه‌رۆكی هه‌رێم یه‌ك جێگری هه‌بێت، ئه‌گه‌ر ئه‌مه‌ ڕووبدات گۆڕان له‌ بڕی ئه‌م پۆسته‌ وه‌زاره‌تی زیاتر وه‌رده‌گرێت. له‌ نێو بزوتنه‌وه‌ی گۆڕان زیاتر له‌ چوار هه‌زار سیڤی بۆ وه‌رگرتنی پۆست له‌كابینه‌ی داهاتوودا پێشكه‌شكراوه‌، به‌ڵام یه‌كلایكردنه‌وه‌ی كاندیده‌كان بێ كێشه‌ تێپه‌رنابێت، به‌تایبه‌ت چه‌ند كه‌سێك له‌ (خانه‌ی ڕاپه‌ڕاندن و جڤاتی نیشتمانی و كه‌سه‌ نزیكه‌كانی عومه‌ری سه‌ید علی وكوڕه‌كانی نه‌وشیِروان موسته‌فا)، نیازی خۆ كاندیدكردنیان هه‌یه‌و،كێبڕكێكان له‌ نێوانیان توند ده‌بێت. له‌ كۆبوونه‌وه‌كانی ڕۆژانی داهاتوو، پارتی داوای ئه‌و پۆست و وه‌زاره‌تانه‌ له‌ یه‌كێتیی و گۆڕان ده‌كات، كه‌ داوای ده‌كه‌ن، خۆشی لیستی ئه‌و وه‌زاره‌ت و پۆستانه‌ی دیاریكردوه‌، كه‌ نایه‌وێ بیدات به‌ لایه‌نه‌كانی دیكه‌و ڤیتۆی له‌سه‌رداناون. به‌پێی زانیارییه‌كان پارتی ئه‌مجاره‌ داوای هه‌ندێ وه‌زاره‌ت ده‌كات، كه‌ له‌ كابینه‌كانی دیكه‌دا لای ئه‌وان نه‌بووه‌، له‌به‌رامبه‌ردا ده‌ستبه‌رداری هه‌ندێكیان ده‌بێت، به‌ڵام له‌گه‌ڵ ئه‌وه‌شدا سامانه‌ سروشتییه‌كان و ناوخۆو هێلی سوورن، به‌ نسبه‌ت ئه‌وحزبه‌، ئاره‌زووی ئه‌وه‌شی هه‌یه‌ دارایی به‌ گۆڕان بدات و پێشمه‌رگه‌ش به‌ یه‌كێتیی. پارتی له‌ دیاریكردنی كاندیده‌كان زۆر كێشه‌ی نابێت، به‌ڵام ئه‌مجاره‌یان بوونه‌ وه‌زیرو وه‌رگرتنی پۆست له‌ نێو ئه‌و حزبه‌دا ئاسان نابێت، ده‌م چاوی نوێش دێنه‌ پێشه‌وه‌.  له‌ نێو یه‌كێتیشدا هێشتا شه‌ڕێكی گه‌وره‌ له‌سه‌ر وه‌رگرتنی پۆست ، له‌ نێو باڵه‌كانی ئه‌و حزبه‌ ماوه‌، كه‌ خۆی له‌ باڵی ماڵی مام جه‌لال و كۆسره‌ت ڕه‌سوڵ و لاهور تاڵه‌بانی و كه‌ركووكییه‌كانی ئه‌و حزبه‌ ده‌بینێته‌وه‌.

 لەتیف فاتیح فەرەج   سەلام عەبدوڵا لەوتارێكدا كەمن لە درەو میدیا خوێندمەوە ، قسە لەوە دەكات بۆ سلێمانی وەك شارەكانی تری هەرێم نیە ، مەبەستیشی هەولێرو دهۆكە ، ئەوەی كە چەند ساڵ لەمەوبەر بڕیاری بە دوبەی كردنیان دراو هێشتا لە چەقی شاری هەولێردا تەلار هەیە لە 2013ەوە بە نیوە چڵی ماوەتەوە و بەردێك لە سەر بەردێك دانەنراوە ، هەروەها بە دوبەی كردن هەر بەرزكردنەوەی تەلارو جادەو بان نیە ، بگرە گۆڕینی ئاستی گوزەرانی خەڵك و باشكردنی ژیانی خەڵكە ، ئاخۆ سەلام عەبدوڵا ئاگادارە رێژەی بێكاری لە هەولێرو دهۆك چەندە ، لە هەولێرو دهۆك چەند كرێ‌ نشین هەن ، رێژەی هەژاری لەوێ‌ چۆنە ، ئەی بواری تەندروستی لە چ ئاستێكدایە ، ئەمە هەر بۆ بیر خستنەوەیەو هیچی تر . ئەو دەڵێت زۆربەی رۆژنامەو میدیای سنوری سلێمانی بۆ دژایەتی پارتی دیموكراتی كوردستان تەرخان كراون ، بێئاگا لەوەی هەولێریش هەمان بەزمی هەیە ، ئەگەر ئەوانەی سلێمانی تازەن و تەمەنیان زۆر نیە ، ئەوانی هەولێر تەمەندرێژو توند تریشن ، ئەوەش بەرهەمی دوو زۆنی و دوو حزبی و شتی ترە ، ئاخر كاك سەلام زۆر باش دەزانێ‌ بە ناوی هەولێرەوە چی بەسنوری سلێمانی دەكرێت . من لە سلێمانی نیم ، بەڵام رەخنەی زۆرم دەرهەق بە كارو خزمەتگوزاری ئەم سنورە هەیە و لاشم وایە حكوەمت بەرپرسیارە ، ئەگەر حكومەت هەبێت ناكرێ‌ حزب بە ئارەزوی پارەی نیشتمان تەخشان و پەخشان بكات ، بە داخەوە لە هەردوو لا ئەو بەزمە هەیە ، ئاخر هەقە كاك سەلام ئەوە بزانێ‌ كە لە هەردوو زۆن مافیای نەوت هەیە ، نزیكەی 300 بیر نەوت نەوتی لێ‌ تاڵاندەكرێت ، دۆخی هەولێرو دهۆك لە تاڵانی شوێنەوارو نەوت و گردو بانەكان لە دۆخی سلێمانی باشتر نیە ، خراپتر نەبێت . بە باوەڕی من " عەوام فەریبی " ئەوەیە كە مرۆڤ یەك دیووی روداوەكان ، وێنەكە ، بابەتەكە ببینێ‌ و خۆی لەو دیوی نەبان كات ، عەوام فەریبی ئەوەیە كە مرۆڤ بۆ شاردنەوەی عەیب و عارەكانی خۆی قسە لە سەر عەیب و عاری ئەوی دی بكات ، راستیەكە ئەوەیە كە هەرێم بە گشتی داڕزاوە ، ستەمكاری و نادادی و گەندەڵی و دزینی نەوت بووە بە دیاردەو كەس نیە بەریپێبگرێت . باشتر بوو كاك سەلام بە زمانێكی تر قسە ی كردبا و تەواوی برینەكانی نیشانی دەسەڵات دابا ، نەك ئەوەی بە هەمان ئاوازی زۆنویستی قسە بكات كە كادیرە حزبیەكان قسەی پێدەكەن .  

پەیكار عوسمان          دەردی گەورەی ئێمە کەلەڕەقی و دەمارگیرییەو باشترین مەساجیش بۆ خاوکردنەوەی ئەم دەمارە، سەقافەتی داوای لێبوردنە! داوای لێبوردن یەکێکە لە کردە هەرە بەرزو باڵا ئینسانییەکان، کە سەری لە پێکەوەژیان و تۆلێرانسەوە دەرئەچێ و خاڵێکی باشە بۆ ئەوەی ئینسان زوو زوو لێوەی بگەڕێتەوە بۆ ئینسانبوون و نەڕوا بەرەو وەحشبوون. بەڵام داوای لێبوردن لە هەڵە ئەکرێ، داوای لێبوردن لە حەقیقەت ناکرێ! بەڵام داوای لێبوردن لە هەڵە فەزیلەتە، داوای لێبوردن لە حەقیقەت ڕەزالەتە! خروقات و تەزویری هەڵبژاردنیش لای هەموو عێراقیەکان حەقیقەتێکی حاشاهەڵنەگرەو ڕەنگە لە سەرانسەری عێراق، دوو کەس لە ڕووی ویژدانییەوە خیلافیان لەسەری نەبێ ئەگەرچی لە ڕووی سیاسییەوە هەیانە. یەعنی تەزویری هەڵبژاردن حەقیقەتەو حەقیقەتیش باجی هەیەو کابراش ئامادەنەبوو باجەکەی بدا، زۆر بەسادەیی چونکە باجی حەقیقەت بە پاڵەوانی ڕاستەقینە ئەدرێ نەك بە پاڵەوانی شاشە! گۆڕانکاری بە پاڵەوانی ڕاستەقینە ئەکرێ، بەڵام گۆڕان پاڵەوانی شاشەی بۆ دروستکردین و مۆدێلی پاڵەوانی شاشەی داهێنا، کە دواتر ئەوانیترو بەتایبەت نەوەی نوێ بە سەرا کەوتنە هەمان قوڕەوە، لێرەشەوە ئیتر هیچ نەگۆڕا. ئینسان تەنیا لە مەیدانەکەی خۆیدا ئەتوانێ کاری ڕاستەقینە بکاو پاڵەوانی ڕاستەقینەبێت، وەکچۆن ساحەی تۆپێن مەیدانی پاڵەوانێتی یاریزانەو مەیدانی پاڵەوانێتی مۆسیقارو دوکاندارو جوتیار نیە، ئاواش شاشە تەنیا مەیدانی پاڵەوانێتی میدیاکارەو مەیدانی پاڵەوانێتی سیاسی و پەرلەمانتارو حوکمدار نیە.. بۆ غەیری میدیاکار، شاشە تەنیا شوێنی موزایەدەو ڕیابازی و پۆپۆلیزمە. داوای لێبوردنی ڕاستەقینە لە ئیرادەی ئازادەوە دەرئەچێ، ئازاد لە زەخت و زۆرو ناچارکردنەکانی ئەوان، ئازاد لە حەزو وابەستەبوونەکانی خۆم.  شەڕێك کە لەسەر مافێکی گشتی دەسپێکرابێت، ناشێ بە داوای لێبوردنێك کۆتایی بێت لەپێناو پاراستنی پۆستێك!  لێرەدا ئیرادە بەزیوەو پاشەکشێیەکی ئابڕوبەرانەی کردوە، چونکە ئیرادەکە لە ئەساسەوە هی پاڵەوانێکی ڕاستەقینە نەبووە، هی پاڵەوانی شاشە بووە. قسەکەش لەسەر ئەو کاکەیە نیە وەکو شەخس، قسەکە لەسەر پاڵەوانی شاشەیە وەکو مۆدێل، کە یەکێکە لە خراپترین داهێنانەکانی گۆڕان و نەوشیروان مستەفای ڕەحمەتیی. هەموو پاڵەوانێکی شاشە پرۆژەی فەزاحەتێکە، چونکە هەموو پاڵەوانێتییەکی سەر شاشە، درۆیەکی ئیمڕۆیە کە سبەینێ کەشف ئەبێ.

هادی حەمەرەشید  ئەزانم ئەم لۆژیکەی کە ئێمە پێی ئەدوێین و تەنانەت بیری پێئەکەینەوە کڕیاری کەمە، بەڵام ناکرێت لەبەر بێ بازاڕیی و نەبوونی کڕیار، عەقڵیشمان بگوێزینەوە بۆ ناو گوزەرێکی پڕ حەشامات و دەست بکەین بە پاتاڵ فرۆشیی! ئەمشەو غەمگینانە سەیری دەیان پۆستی سەرئاوکەوتوو بە کەفوکوڵی کوردایەتییم ئەکرد، سەدان کۆمێنتی پڕ لە هەیەجانی بۆش و بێ بنەمام بینی(نایشارمەوە، شەیتان بە لەعنەت بێت خەریك بوو نیوەی ئەوانە ئەنفرێند بکەم، چونکە بەجدیی ناکرێت خۆت بەدەستی خۆت بچیتە ناو زوباڵەیەك لە نووسین و هەر هێڵنجت بێت بەو پۆست و کۆمێنتانە و هێشتاش هەر بەردەوام بیت لەگەڵیان!) ئەو خەڵکە بۆ وای لێهاتووە؟! لە ئەدەبیاتی ئاینییدا بە مناڵیی باسی ئاخر زەمانیان بۆ ئەکردین( گوایە لەکۆتایی دنیا و وەقتی بەدەل زایع)ـدا یەکێك لە فیگەر و جەمسەرەکانی ململانێ لەو کاتەدا (دجال) ئەبێت، ئەم کابرایە بەخۆی و گوێدرێژەکەیەوە زۆربەی موسڵمانان لە خشتە ئەبات، یەکێك لەو مەقولە زۆر شایعانەی کە لەو بارەیەوە ئەوترا و بیرم ناچێتەوە، ئەیانووت: خەڵکی زۆر ئیماندار و دژ بە دەجال، شەو بە ئیمانەوە ئەخەوێت، بۆ سبەی لەخەو ڕائەبێت ئەکەوێتە دوای ئەو و حاشا مین حوچور (کەر)ـەکەی؟! ئەمشەو وێنەیەکی مەسعود بارزانییان هێناوە سەدان پارتی و پارتی مەزهەب بە دەوریدا حاڵ گرتوونی و پرچ و ڕیشیان تێکەڵ کردووە و زیکر بۆ گەورەیی و بێ نەزیریی ئەو ئەکەن! چی بووە؟! حەزر و ئابڵوقەی لەسەر هەڵگیراوە و ئەوە چەند ڕۆژێکە کۆمەڵێك وەزیر و گزیر هاتوونەتە دیداری!! پارتی مافی خۆیەتی سەرسام بێت بەم بەزم و بازاڕە، بەڵام ئەوانیتر بۆ؟!! ئەوانەی کە شەو لەسەر مەبدەئێك ئەخەون و سبەی کە ڕادێن سەرسام و حەپەساون بەو دیمەنەی کە جاران بۆ خۆیان ڕەخنەئاژێنیان ئەکرد؟!! کاتی خۆی، کۆمەڵێك خەڵکی جدیی ئەچنە لای مام جەلال و ڕەخنەی توندی لێئەگرن، لەسەر ئەوەی بۆچی گرنگی بە فڵان سەرۆك هۆز ئەدات کە کۆنە بەعسییە و دەستی لە ئەنفالیشدا هەبووە! مام جەلالیش ئەڵێ: بۆچی گرنگیی پێنادەم، هەر لە هۆزەکەی خۆیدا ۲۵٠ پێشمەرگە و تێکۆشەری دێرین کەوتوونەتە شوێنی و وەك پاسەوانی ئەو خۆیان نمایش ئەکەن! کۆمەڵێك حیزبی بێ فیکر و بێ مۆراڵ لە هەوڵی تەمجیدکردنی ئەم بنەماڵە و ئەو بنەماڵەدان، ئیتر ئێران بۆچی حەز نەکات بەم حاڵە زۆر بێ تفاقیی و لۆژیکی دیوەخانەیەی ئێمە؟! ئەمریکا و ئێران لەململانێدان لەگەڵ یەکتردا لەسەر زەوی و ئاسمانی عێراق، ئەچنە بەغدا سەرۆك کۆمار و سەرۆك وەزیران و دامەزراوە حکومیی و فەرمییەکان پێشوازییان ئەکەن، ئێ لە هەولێر سەرۆکی حیزب پێشوازییان ئەکات، ئەمە شیاوی شەرم و سەرکۆنە کردنە یان مەدح و پیاهەڵدان؟! پاشان لە بەغدا لەسەردەمی مەجلیسی حوکمەوە تا قۆناغی جەعفەریی و عەللاویی و مالیکیی و عەبادیی و ئێستاش عەبدولمەهدیی، هەر کەسێك ئەبێت بە سەرۆك وەزیران دەسەڵاتی بەسەر کۆی ۱۵پارێزگادا وەك یەکە، نەك بەسرە کانتۆنێکی جیا و پاوانی هێزێك بێت و پارێزگاکانیتر قەڵەمڕەوی خەڵکیتر بێت! مالیکیی هەندێ خۆی مشەوەش کرد و ویستی لاسایی پارتی و یەکێتی بکاتەوە، خەڵکی باشور(کە بەداخەوە ئێمەی قەومچیی زۆر بە بەربەریی و شروگییان ئەزانین)شاباڵەکانیان هەڵکێشاوە و کردیان بەو تەیرەی کە ئێستا هەیە، لێ ئەمە بۆ کوردستان وا نیە، مەسعود بارزانیی لە هەولێر و دهۆکدا هەمە کارەیە، بەڵام لە سلێمانی و هەڵەبجەدا ئۆپۆزسیۆنە، لێرە دوو خێزان (بەقەولی ئاری هەرسین): ناتوانن برابن و لەماڵێکدا پێکەوە بژین، دوو دراوسێی خراپیشن پێکەوە. هەر وەفدێك ئەچێتە لای نێچیرڤان(ئەمە بۆ چەند ساڵی ئایندەش هەر وا ئەبێت!) ئەو سەرنجەکانی خۆی ئەخاتەڕوو، بەڵام ئامۆژگارییشیان ئەکات کە لازمە مامیشی ببینن، ئێرە قەڵەمڕەوی ئەوە نەك کەسیتر! بەڵام بارزانی لە هەرێمۆکەکەی ماڵی تاڵەبانیدا بەقەدەر ئەندامی کۆمیتەیەکی یەکێتی دەسەڵاتی نیە، هەر ئەوەیە کە ئاراسی شێخ جەنگی پێی ووت:((نەك خۆی، باوکیشی درۆزن بووە))! جا ئەم لۆژیکەم قەبوڵە یان نا، ئەوە بابەتێکیترە، بەهای دید و تێڕوانینی ئێمە هەر ئەوەندەی ئەو دیدە بایەخی هەیە کە کۆمەڵێك فرێندی سادەدڵمان یاداشتیان کردبوو (( پێتانخۆش بێت یان نا، بارزانیی هەموو شتێکە))!!! لە سەڵتەنەتنشینەکەی ئالی بارزاندا ئەو (وا براگەورەش)هێشتا سەرۆك و هەموو شتێکن، لێرەش کوڕ و کاڵەکانی ئالی تاڵەبانیی قسەی سەرەتا و کۆتایی ئەکەن، ئیتر لەدەرەوەی ئەم دوو قەڵەمڕەوییە چی ئەگوزەرێت و ئۆردۆگان و خامنەیی و زلهێزان چی ئەکەن، ئەوە ئەبێت شەوانە بخەوێت و بۆ سبەینێ خەوزانەکانی وەك هێمن هەورامیی و ئومێد خۆشناو و بەهمەن کاکە عەبدوڵڵا و ئەوانیتر بۆی لێك بدەنەوە کە چ باسە! هەر بۆ وێنە; بۆ کەرکوك پاش داستانی (قارەمانانە و بێ وێنەی) پردێ کە (هاوکێشەکانی گۆڕی!) هێشتاش ئەبێت شەوانە بە ئیختیفا بچنە ناویەوە!! ئەستەمە بینینی ئەم دیمەنە ناشیرینانە، چەند ماڵباتێکی سیاسیی پێنج ملیۆن مرۆڤیان بەدبەخت کردبێت و بۆ خۆیان شاهانە بژیین و کۆمەڵێك موتەمەلیقیش بەم چەند وێنەیە بکەونە وشکە مەلە و لەشکرێك سادەدڵیش سەرسام بن بەم تابلۆ شێواوە و تۆیش مەحکوم بیت بەخوێندنەوەی (تێز و شاکار)ەکانیان، باسی زمانی جەستە و خوێندنەوەی وێنەت بۆ بکەن تیاححححح!

سەلام عەبدوڵڵا        ئەمە پرسیارێكە‮ ‬رۆژنامەكانی‮ ‬سلێمانی‮ ‬كە زۆربەیان بۆ دژایەتی‮ ‬پارتی‮ ‬دیموكراتی‮ ‬كوردستان تەرخانكراون و هەمیشە دەیوروژێنن و ئەو دواكەوتنە بە هەموو شێوەیەك دەخەنە ئەستۆی‮ ‬حكوومەت كە گوایە ئەو بەرپرسیارە‮.‬  ئەمە بە‮ ‬روویەكدا ئەم پرسیارە‮ ‬راستە، چونكە ئەوە ئەركی‮ ‬حكوومەتە، بەڵام بە دیوەكەی‮ ‬تریدا ناڕاستە و چەواشەكارییە، چونكە ئەوە‮ ‬یەكلایەنە مەسەلەكە دەخاتەڕوو و باسی‮ ‬ئەوە ناكات كە كێ بەرپرسیاری‮ ‬سەرەكییە لەو دۆخە‮.‬  كاتێك شارێك هەموو داهاتەكانی‮ ‬لە حكوومەت قەدەغە دەكات و ناینێرێت بۆ حكوومەت ئیدی‮ ‬حكوومەت چی‮ ‬بكات‮.‬  حكومەت بەشێك لەو داهاتانەی‮ ‬لە شارەكانەوە دەستی‮ ‬دەكەوێت،‮ ‬میزانیەی‮ ‬شارەكان و پارە بۆ پرۆژەكان دیاری‮ ‬دەكات‮.‬  داتاكانی‮ ‬وەزارەتی‮ ‬دارایی‮ ‬ئەوە دەردەخات،‮ ‬هەر بۆ نموونە لە داهاتی‮ ‬ناوەخۆی‮ ‬پارێزگای‮ ‬سلێمانی‮ ‬هیچ مەبلەغێك‮ ‬رادەستی‮ ‬وەزارەتی‮ ‬دارایی‮ ‬حكومەتی‮ ‬هەرێم نەكراوە ئیدی‮ ‬حكومەت چی‮ ‬بكات‮.‬  ئایا دەكرێ شاری‮ ‬سلێمانی‮ ‬لەسەر داهاتی‮ ‬پارێزگاكانی‮ ‬تری‮ ‬هەرێم بودجەی‮ ‬بۆ دابین بكرێت؟  ئەم‮ ‬رۆژنامانە گەر پەرۆشی‮ ‬شاری‮ ‬سلێمانین، دەبوو تیری‮ ‬رەخنەیان بگرنە دەسەڵاتدارانی‮ ‬سلێمانی‮ ‬كە بۆ ئەو هەموو داهاتە زۆرەی‮ ‬كە لە خاڵە سنوورییەكانەوە چنگیان دەكەوێت بۆ شارەكەی‮ ‬سەرف ناكەن و كەس نازانێ چی‮ ‬لێدەكەن نەك پلار بگرنە حكومەت گوایە ئەو كەمتەرخەمە و تەنها گرنگی‮ ‬بە شاری‮ ‬هەولێر و دهۆك دەدات‮. ‬دەبوو ئەو پرسیارە لەوان بكەن نەك حكومەت،‮ ‬چونكە هۆكاری‮ ‬ئەوەی‮ ‬پرۆژەكانی‮ ‬هەولێر و دهۆك بەرێك و پێكی‮ ‬دەڕوات و لەكاتی‮ ‬دیاریكراوی‮ ‬خۆیدا تەواو دەكرێ بۆ ئەوەیە كە ئەم دوو شارە داهاتەكانیان بە بەردەوامی‮ ‬دەدەنە حكومەت و ئەویش بەپێی‮ ‬بەرنامەیەكی‮ ‬حساب بۆ كراو بە پێی‮ ‬پرۆژەكانیان پارەی‮ ‬پێویستیان بۆ دیاری‮ ‬دەكات‮.‬  جا ئەگەر ئەو‮ ‬رۆژنامانە جورئەت دەكەن با رەخنە لە دەسەڵاتدارانی‮ ‬ئەو دەڤەرە بگرن و بپرسن داهاتی‮ ‬ئەو سەدان تەنكەرە نەوتانەی‮ ‬روو لەمەرزەكان دەكەن دەچێتە گیرفانی‮ ‬كێوە،‮ ‬خۆ زۆر دەوترێ كە لەوێ ئازادی‮ ‬رەهایە‮ ‬یان ئازادی‮ ‬تەنیا بۆ‮ ‬رەخنە لە پارتی‮ ‬هەیە،‮ ‬چونكە ناكرێ ئەو‮ ‬راستیەی‮ ‬كە بە چاوی‮ ‬خۆیان‮ ‬رۆژانە دەیبینن ئاوا چەواشەكاریی‮ ‬پێوە بكەن‮ ‬یان ئەوەتا ناوێرن و نە ئازادن و نە‮ ‬راستگۆن‮.‬  لە‮ ‬راستیدا ئەم فریودانە تەنها زەرەرمەند لێی‮ ‬دانیشوانی‮ ‬شاری‮ ‬سلێمانی‮ ‬خۆشەویستە ئەو شارەی‮ ‬كە مەكۆی‮ ‬راپەرین و بەرخودن و تێكۆشانە‮.‬ ئیتر با بەس بێ‮ -‬فارس گوتەنی‮- ‬عەوام فەریبی‮..‬

دانا حەمەعەزیز         ڕوداوەکانی دوێنێ و پێرێی ناو پارلەمان،  ئەرکی تیریزا مەی قورستر کرد. ئەو بە جیاوازیەکی کەم، متمانەی پارلەمانی بەدەسهێنایەوە. بەڵام ڕەتکردنەوەی  ڕەشنوسی ڕێکەوتن نامەی جیابونەوە لە یەکێتی ئەوروپا، لەلایەن زۆرینەی رەهای پارلەمانتارانەوە، کە بەرهەمی دوو ساڵ و نیو وتوێژ بوو لەگەڵ برۆکسل، توانای حکومەتەکەی لە مامەڵەکردن لەگەڵ ئەو دۆسێ یە خستە ژێر پرسیارەوە. ئیستا  لای بریتانیەکان، ئەو ڕەشنوسە بایەخی نەماوە، ئەوروپیەکانیش ئامادەی سازش یان وتوێژی زیاتر نین.  تەنها ٧٠ ڕۆژ لەبەردەم بریتانیادا ماوە بۆ ماڵاویکردن لە یەکێتی ئەوروپا.  کەواتە حکومەتی کەمینە، ناچاری  چەند بژاردەیەکی خێرایە.   ١- جیابونەوە بەبێ هیچ ڕێکەوتنێك لەگەڵ یەکێتی ئەوروپا، ئەمەش کارەساتی گەورەی ئابوری لیئەکەوێتەوە و شانشینی بریتانیا گۆشەگیر ئەکا. ٢- گەڕانەوە بۆ لای خەڵك و، ئەنجامدانی ڕیفراندۆمی دووەم. ئەمەیان زۆر لە شارەزا و ئاقڵمەندەکانی بریتانیا پشتیوانی ئەکەن و رەنگە زۆرینەی پارلەمانیشی لەگەڵدابێ. ٣- گرتنەبەری ستایلی نەرویجیی لە مامەڵە کردن لەگەڵ یەکێتی ئەوروپا. ئەم ڕێگەیە لای پارلەمانتاران ناپەسند نیە. نەرویج، ئەندامی یەکێتی ئەوروپا نیە، بەڵام وەك ئەندام لە کۆمەڵەی بازرگانی ئازادی ئەوروپا (EFTA)، لە ناوچەی ئابوری ئەوروپا(EEA) دایە. نەرویج ئەکسێسی تەواوی  هەیە بۆ سینگڵ مارکێت و، ئازادیی ئالوگۆڕ و گواستنەوەی کەل و پەل و سیرڤزەکانی هەیە. هاوڵاتی نەرویجی ئازادە لە  ژیان و کارکردن لەهەر وڵاتێکی یەکێتی ئەوروپادا و، هاوڵاتیانی یەکێتی ئەوروپاش لە نەرویج. دوا ڕێگە لەبەردەم حکومەتی کەمینەدا، هەڵبژاردنی گشتی یە. ئەم بژاردەیە، ڕەنگە سەری مەیی و حزبەکەی بخوا، بەڵام چارەسەری تەواو نیە بۆ کێشەی جیابونەوە لەیەکێتی ئەوروپا کە لە ئێستادا بریتانیای توشی ناجێگیریی و  دابەشبوون کردوە.

ئارام قادر          ‎پرسی ئاكار لە سیاسەتدا یەكێكە لەو بابەتانەی كە گفتوگۆ و ناكۆكیی لەسەرە، ڕای جیاواز لەو بارەیەوە هەیە، بەشێك لایەنگری ئەوەن كە سیاسەت ئاكار (ئەخلاق)ی تێدا نییە، بەشەكەی تریش دووپاتی گرنگیی بوونی ئاكار لە سیاسەتدا دەكەنەوە. ‎هاوپەیمانیی نیشتمانی بە تەواوی قەناعەتەوە لایەنگری بۆچوونی دووەمە و پێی وایە سیاسەتكردن بێ ئاكار زیانی گەورە لە (گشت) دەدات، بەو مانایەی ئەگەر سیاسەت بۆ ڕێكخستنی كاروباری گشتی و بەدیهێنانی هیوا و جێبەجێكردنی داخوازی و پێداویستییەكانی خەڵك بێت و كار بۆ هێنانەدیی (چاكەی گشتی) بكات، ئەوكات هەر بێئاكاری و لادانێك لەو ئامانج و چاكە گشتییانە و پابەندنەبوون بە سیاسەتێكی بەئاكار، ئەوكات دەرەنجامی ئەو سیاسەتە بە زیان بۆ خەڵك و گشت دەشكێتەوە و دەرەنجامەكەی خزمەت نابێت بە ئامانج و چاكەی گشتی. ‎دەكرێت سیاسەتی بێئاكار و بەرژەوەندخوازانە ببێتە هۆی دەستكەوتی كاتی بۆ گروپ و كەسێك، بەڵام ئەو دەستكەوتە هەم كاتییە، هەم لەسەر حسابی ئەو (گشت)ە دێتە دی كە بڕیارە تۆ سیاسەت بۆ ئەوان بكەیت نەك خۆت، بۆیە هیچ سیاسەتێكی بێمۆڕاڵ و بەرژەوەندخواز سەركەوتوو نابێت لە ڕاكێشانی ڕایگشتی بۆ خۆی و دواجار هەر شكست بەشێتی. ‎كلیلی گۆڕانكارییە ئابوری، ئایینی، كۆمەڵایەتی، پەروەردەیی، كلتوری و فەرهەنگی و ...هتد، سیاسەتە، چونكە سیاسەت توانای ئاراستەكردنی هەموو ئەو بوارانەی هەیە، بۆیە سیاسەتێكی بەئاكار و بەرپرسیارانە دواجار بە خزمەت بۆ تەواوی بوارەكانی دیكە دەشكێتەوە. ‎لە كوردستان زۆرجار بانگەشە بۆ ئەو ڕایە دەكرێت كە سیاسەت ئاكاری تێدا نییە، بەڵام ئەو بانگەشەیە بۆ ناشرینكردنی سیاسەت و دوورخستنەوەی خەڵكە لە سیاسەت و بێئومێدكردنیانە لە هەر گۆڕانكارییەكی سیاسی، بۆ ئەوەیە خەڵك لە فشاركردن لەسەر حزب و لایەنەكان بخەن و درێژە بە مانەوەی خۆیان لەسەر دەسەڵات بدەن، واتە ئەو بانگەشەیەی لە هەرێمی كوردستان دەكرێت بۆ نەبوونی ئاكار لە سیاسەتدا، پاساوە بۆ مانەوەی كۆمەڵێك لایەن و گروپ لە دەسەڵاتدا و كوشتنی خەونی گۆڕانكارییە لای خەڵك. ‎بۆیە هاوپەیمانی بەوپەڕی باوەڕەوە دەستدەگرێت بەو ڕایەوە كە لە سیاسەتدا ئاكار پێویستییەكی بێ ئەملاو ئەولایە و پێی وایە سیاسەت و سیاسی و حزب ئامرازن، گشت و كۆمەڵگە بە ڕەنگە جیاوازەكانەوە ئامانجن، بۆیە هاوپەیمانی لەسەر بنەمای ئاكار و نەرێتی دوور لە خۆویستی و بەرژەوەندخوازی سیاسەت دەكات و سوورە لەسەر پەرەپێدانی ئەو كلتورە سیاسییە گشتخوازە لەكۆمەڵگەی كوردیدا. ‎دواجار سیاسەت زانستێكی مرۆییە و مرۆڤ خۆی ڕەنگی پێدەبەخشێت و بەرگی پێدەپۆشێت، بۆیە لەچارەی سیاسەت نەنوسراوە كە ئاكاری تێدا نەبێت و ئەوە مرۆڤەكانن ئاكاری لێدەسەننەوە، یان ئاكار دەكەن بە بەریدا.  

ئارام سەعید      "لەساڵی ٢٠١١ لە فیلیپین چەند بەرپرسێکی سیاسی بە بەکارهێنانی چەند پیاوکوژێکی بەکرێگیراو لەبەرامبەر تەنها ٢٥٠ دۆلار رۆژنامەنوسێکیان کوشت.لە سلۆڤاکیا بەهەمان شێوە رۆژنامەنوسی بەناوبانگ یان کۆچیاک و هاوسەرەکەی مارتینا کۆسنرۆڤا کوژران لەبەرامبەر ٨٠ هەزار دۆلار کە درابوو بە بەکرێگیراوەکان."  هەموو سالێک رۆژنامەنوسان بەهۆی کارەکەیانەوە دەکوژرێن، لەمبارەیەوە بەگوێرەی راپۆرتێکی کۆمیسیۆنی پاراستنی رۆژنامونوسان لە ساڵی ١٩٩٢ ەوە ١٣٢٤ رۆژنامەنوس لەکاتی ئەرکەکانیان کوژراون و ٨٤٩ یان بەهۆی راپۆرتەکانیانەوە لەسێدارە دراون. لە سەدا ٩٠ ی ئەنجامدەرانی ئەوکردەوانەش لە دادگا قوتاربوون.  بیرهێنانەوی ئەم ژمارانە بۆ ئەوە نیە هاوڕێانی رۆژنامەنوسم بترسن یان دودڵ و نیگەران بن لە ئەرکی ئێستایان کە لەمەترسیدایە، بەڵکو بۆ ئەوەیە کە بڵێین سەڕەرای ئازار و هەرەشە و کوشتار بە دەیان و سەدان مرۆڤی ئازا هەن کە بەرگری لە ئازادی ڕادەربرین دەکەن.  هەموو دەسەڵاتێکی ستەمکار بۆئەوەی کۆمەڵگە بێدەنگ بکات و کۆنترۆڵی بکات سەرەتا دەست دەبات بۆ دوو دامەزراوەی گرنگ کە ئەوانیش دادوەری و میدیای ئازادە، ئەو دوو دەزگایە کە کۆنترۆڵکران ئیتر زەمانەتی بێدەنگی دەکەن. ئەوەی لەکوردستان ئێستا دەبینرێت و بە ئاشکرا کاری بۆ دەکرێت کپ کردنی چەند دەنگێکی کەمە کە ماون، چونکە دەسەلاتی ستەمکار نەک تەنها میدیا بەڵکو لە بێدەنگکردنی ئۆپۆزیسیۆنیش سەرکەوتوو بوو، ئەویش بە بیدەنگکردنی رموزەکانی ئۆپۆزیسیۆن و رموزەکانی میدیای ئازاد، کە هەمویان خامۆش و بیدەنگن... دیارە ئەمەش بێبەرامبەرنیە، هیچ کام لەوانە بەبێ هۆ بێدەنگ نەبووە. بەڵام ئەوەیان لەبیرکرد کە کپکردنی دەنگی ئازاد لەبەرژەوەندی دەسەڵاتەو هیچ کۆمەڵگەیەک ناتوانێت دیموکراسی پەرپێ بدات بێ ئازادی ڕادەربرین.  ئەوەی مایەی نیگەرانیە لە جیهاندا ئەوشەڕە بەردەوامەو رۆژنامەنوسان ئازایانە بەرگری دەکەن، بەڵام ئەو کچ وکورە ئازایانەی لە میدیا ئەهلی و ئازادەوە هاتنە نێو مەیدان و سەرسەختانە بەرگریان لە ئازادی رادەربرین دەکرد ئێستا کپ و بێدەنگن. هەموومان دەزانین پێدانی بڕێک پارە لە دەسەڵاتەوە تێچونێکی زۆر نیە بۆیان کە ئەتوانن ملیۆنەها خەرج بکەن بۆئەوەی ئازادی ڕادەربڕین نەهێلن، لەبەرئەوەی لەبەرامبەردا ملیارەها دەبەن بۆخۆیان و خانەوادەیان.  ئەوەی مایەی خۆشحاڵیە تا ئێستا دەنگ ماوە بۆ بەرگری لەو ئازادیە و رەنگە رموزی گەورەی نوێ بێتە کایەوە بۆ بەرگری لە ئازادی رادەربرین و گرنگترینیشیان ئەوەیە کە سۆشیال میدیا بەشێک لەو بۆشاییەی پڕ کردۆتەوە کە ناتوانن بە تەواوەتی کۆنترۆلی بکەن.