د. كامەران مەنتك          یەكێك لە گۆڕانكارییە مەترسیدارەكانی كۆتاییەكانی ساڵی 2023 دایسانی شەڕی غەزە، یاخود وەك دەیانەوێت بانگەشەی بۆ بكەن شەڕی نێوان موسڵمان وجولەكەیە، لەراستیدا ئەو خوێندنەوە ساویلكانە پانتاییەكی فراوانی میدیاو تۆڕە كۆمەڵایەتییەكانی لە كوردستان گرتۆتەوەو هەندێك وەك غەزا سەیری دەكەن وپیاوانی ئاینی وهێزە ئیسلامییەكان وەك بەرگریكارێكی سەر سەخت لەغەزە، واتە ئیسلام نیشان خۆیان نمایش دەكەن وبەشێكی تریش بەناوی ناسیونالیستییەوە وەڵامیان دەدەنەوە، ئەو ململانێیە رادەی ساویلكەیی هێزە سیاسی ورۆشنبیرەكانی كۆمەڵگەی كوردی زۆر بەروونی دەخاتە بەرچاو، چونكە شەڕی غەزە نەشەڕی ئیسلام و جولەكەو نەشەڕی عەرەب وجولەكەیە، بەڵكو شەڕێكی جیۆستراتیژی جیهانییەو لایەنە شەڕكەرەكانی ئێستا وەك جەنگاوەری بەكرێگیراو بەكاردەهێنرێن وبە وەكالەت شەڕ بۆ هێزە جیهانییەكان، بەتایبەتیش بەرەی روسیاو ئەمریكا(رۆژئاوا) دەكەن         لەرووی جیۆپۆلەتیكییەوە شەڕی غەزە درێژكراوەی شەڕی عەفرینە، كە لەساڵی (2018) روویداو تیایدا عەفرین وتا رادەیەكی زۆریش مەسەلەی كورد لە رۆژئاوای كوردستان كرایە قوربانی، كە لەبنەڕەتدا ئەو شەڕە پاراستنی جێپێی روسەكان بوو لەسەر دەریای سپی ناوەڕاست، چونكە رۆژئاواییەكان دەیانویست كورد وەكو دیوارێك بەرامبەر بەرژەوەندییەكانی روسیا لە دەریای سپی بەكاربێنن، یاخود بەلایەنی كەم وەك هەڕەشەیەك ئەو سیناریۆیە یخەنە بەرچاو، لەبەرئەوەی گەیشتنی كورد بەدەریا، كە بەناو هاوپەیمانی ئەمریكابوو، ریسەكەی لەروسەكان دەكردەوە خوری وسەرلەبەری جیۆپۆلەتیكی ناوچەكەی هەڵدەوەشاندەوە وسەرلەنوێ دایدەڕشتنەوە، چونكە تا ئەو كاتە سوریا بنكەی سەرەكی سۆڤییەتی پێشوو وروسیای نوێ بوو لەسەر دەریای سپی ناوەڕاست، دروستكردنی دیوارێك لەسەر دەریا لەنێوان توركیاو سوریا، واتە دابڕینی روسیا بوو لەو دەریایە، كە ئەمە هاوكات بوو لەگەڵ گفتوگۆكانی ئۆكرانیا بۆ چوون بۆ ناو یەكێتی ئەوروپا، كە دیارە مەبەستی رۆژئاوا لەم هەنگاوە داخستنی دەروازەی دەریای رەش بوو لەبەردەم روسەكان، بەواتایەكی تر ئابڵووقەدانی روسیاو خنكاندنی بوو، ئەم رووداوانە لەنێوان ساڵانی (2014-2018) دا، رێك ئەو كاتەیە، كە مەسەلەی كورد تیایدا كەوتە پاشەكشەو تا ئێستاش لەو پاشەكشەو گەڕانەوە دواوەیە بەردەوامە!. لەبەرئەوەی لەو قۆناغەدا نزیكبوونەوەی كورد لە ئامانجەكانی گەیشتە لوتكە، بەواتایەكی تر هەڕەشەی كوردی بۆ سەر بەرژەوەندی روسیاو توركیا ودەوڵەتە هەرێمییەكانی تر گەیشتە لوتكە، ئەمە بووە هۆی ئەوەی. كە روسیا پاڵپشتی توركیا بكات وكلیلی عەفرینی تەسلیم بكات،  هەنگاوە پڕ سەرەڕۆییەكانی كورد لەو كاتە، بەرژەوەندییەكانی هەردوو وڵاتی بەیەكتر دەبەستەوە، گەیشتنی كورد بەدەریا، كردنەوەی دەروازەیەكی تری جێگرەوە بوو بۆ دەروازەكانی توركیا، ئەمەش دەتوانین بڵێین بایەخی جیۆستراتیژی توركەكانی رێك دەكرد بە دوولەتەوە، بۆیە بەهەردوولایان، ئاستی گرژیەكانیان بەشێوەیەكی مەترسیدار بەرزكردەوەو ئەو هێڵە سوورەیان بەزاند، كە ئەمریكییەكان دایاننابوو، بۆیە ناچار ئەمریكا هەوڵیدا دڵی توركیا بداتەوەو رێگە نەدات بەیەكجاری بكەوێتە باوەشی روسیا، لەمەشدا قوربانییەكە وەك ئاماژەی پێكرا، عەفرین وگەلی كورد بوو لە رۆژئاوای كوردستان. نەهێشتنی ئەو بەربەستەی كوردی رێگەی بۆ روسەكان خۆشكرد، كە بەرژەوەەندی ئەمریكاو رۆژئاواییەكان بەشێوەیەكی گشتی لەدەریای سپی بخاتە مەترسییەوە، دیارە بەهێزبوونەوەی روسیا لەسوریا، واتە خۆسەپاندنی بەسەر پانتاییەكی زۆر فروان لەدەریای سپی ناوەڕاست، كەنزیكەی تا ئیسرائیل درێژدەبێتەوە، بە دایساندنی شەڕی غەزە، هەوڵیاندا  لەدواوە ئابڵووەی گرنگترین پێگەی جیۆپۆلەتیكی هاوپەیمانی سەرەكی رۆژئاواییەكان بدەن لەسەر دەریای سپی، ئەمەیە وا دەكات شەڕی غەزە رەهەندێكی جیۆستراتیژی ترسناك وەربگرێت وبەشكستی ئیسرائیل، مەترسییەكانی سەر دەریای سپی تا لێوارەكانی باكوری ئەفریقا وتا ئۆقیانووسی ئەتڵەسی درێژ دەبێتەوە، ئەمە ئەو ئەگەر زۆر بەهێز دەكات، كە روسەكان زیاتر فشار بخەنە سەر ئەمریكا وهەوڵی فراوانكردنی ئەو شەڕە بدەن لە رۆژهەڵاتی ناوەڕاست، بۆئەوەی لەلایەك هەژموونی ئەمریكا لەم ناوچەیە لاواز بكەن، لەلایەكی تر بارگرانی لەسەر شەڕی ئۆكرانیا كەم بكەنەوە، بۆیە كاتێك ئیسرائیل بەشەڕی غەزەوە خەریك كراوە، ئێران گەرووی باب ولمەندەبی خستۆتە مەترسییەوەو لەرێگەی حوسیەكانەوە سەقامگیری گەرووی هورمز، ئەو دەروازە دەریاییە ستراتیژییەی خستۆتە مەترسییەوە، كە نزیكەی زیاتر لە 20% كۆی بازرگانی نەوتی جیهانی پیادا تێپەڕ دەبێت بۆ دەریای سورو لەوێشەوە بۆ كەناڵی سوێس ودەریای سپی ودواتریش زۆرینەی ئەو نەوتە بۆ ئەوروپا دەڕوات، كەواتە ئێمە ئەگەر وەك شەڕكردن لەسەر بلۆكێكی جیۆستراتیژی سەیری ئەو گۆڕانكارییانە نەكەین، ناتوانین لە بنەماكانی شەڕی غەزەو ئەگەرەكانی فراوانبوونی بەرەو ئێران تێبگەین.       دیارە روسەكان نەك وەك ئیمراتۆریایەك، بگرە وەك شارستانییەكی سەربەخۆ لەئێران دەڕوانن وپێگەی ئێران شوێنێكی ستراتیژی گرنگی لە پڕۆژەی ئۆراسیای روسەكان داگیركردووە، كە لە ئێستادا بەگەرمی كاری بۆ دەكەن، راكێشانی ئێران بۆ ناو ئەو شەڕە بەشێوەیەكی راستەوخۆ، بەرژەوەندیەكانی رۆژئاوا، لە كەنداو، كە پڕە لە سەرچاوەكانی وزەو ئاسیای ناوەڕاست دەخاتەوە مەترسییەكی گەورەوە، ئێرانیش ئەمەی قۆستۆتەوەو باش لەو دەرفەتە مێژووییە تێدەگات، بۆیە بەهەموو توانایەكی هەوڵدەدات وەبەریبهێنێت وبەرژەوەندییە شارستانی ئیمپراتۆریاكانی لەناوچەكە بێنێتە دی، لەبەرئەوەی ئیسرائیلییەكان تاكە بەربەستێكی گەورەن لەبەردەم گەشەسەندنی ئیمپراتۆریای ئێرانی لە بواری ژیاری (المجال الحیوی) خۆیدا، خەریك بوونی ئیسرائیل بەو شەڕەو بچووكبونەوەیان راستەوخۆ خزمەت بە خەونە ستراتیژیەكانی ئێران دەكات، لەلایەكی تر، ئێران بۆ روسیا بایەخێكی هێندە گەورەی هەیە، ئەگەری ئەوە هەیە هەر لێدانێك لە ئێران، راستەوخۆ روسیا بینێتە ناو شەڕەكەوە، ئەمە ئەو خاڵەیە، كە رۆژئاواییەكان لێی دەترسن وچاوەڕوانیشی دەكەن، كەواتە لەلایەك روسیا دەیەوێت ئێران وەك خۆراكێك بەكاربهێنێت بۆ لێدان لە هەژموونی ئەمریكا لەهەموو ناوچەكە، لەلایەكی تر دەیەوێت گۆڕەپانی شەڕەكە لەبەردەم ئەمریكا فراوانتر بكات وزیاتر تواناكانی بەهەدەر بدات، تا ئەو كاتەی ماندوو دەبێت وبەناچاری دەستبەرداری بەشێك لەبەرژەوەندییەكانی خۆی دەبێت لە رۆژهەڵاتی ناوەڕاست وئاسیای ناوەڕاست.      بەروونی ئەوە دەكەوێتە بەرچاو، كە ئەمریكا نە ئیرادەو نەتوانای ئەوەی هەیە بچێتە ناوشەڕێكی وا فراوان، رەنگ بێت ئابووری ئەمریكا توانای ئەركی هەڵگرتنی شەڕێكی لەوجۆرەی نەبێت، چونكە ئەمریكای ئێستا زۆر جیاوازە لەگەڵ ئەمریكای دوای نەوەدەكان، كە تاكلایەنە سیستەمی نوێی جیهانی راگەیاند، جێگرەوەی ئەو شەڕە بۆ ئەمریكا ئەوەیە، كە بەوێنەی شەڕی ساردی یەكەم(1945-1989) بۆ پاراستنی بەرژەوەندییەكانی خۆی پشت بە هاوپەیمانی لەگەڵ دەوڵەتانی ناوچەكە ببەستێت، یەكێك لەو دەوڵەتانەش توركیایە، كەرازی بوونی بە وەرگیرانی سوید لە هاوپەیمانی ناتۆ، ئاماژەیەكی روونە، كە لەم لایەنەوە هەنگاوی جدی چوونەتە پێشەوە، دیارە سازش كردنەكانی ئەمریكاش بۆ توركیا بەپلەی یەكەم لەسەر كوردو بەرژەوەندییە نیشتمانییەكانی كوردە، كە پێدەچێت لە پشت پەردەوە رێككەوتنی زۆر ترسناك كرابێت. هەرچۆنێك بێت، لەبەرئەو هۆكارانەی باس كرا، ئەگەری چوونە ناوەوەی ئێران لە ئێستادا ئەگەرێكی دوورە دەستە، بەڵام لەگەڵ ئەوەشدا، ئەمریكا ناچارە بۆ پاراستنی ئابڕووی خۆی، دوای كوژرانی سەربازەكانی لە شانشینی ئەردەن، دەستێكی سەربازی گەورە لەبەرژەوەندییەكانی ئێران لە ناوچەكە بوەشێنێت، بەشێوەیەك پەرچەكرداری نەرێنیانی روسیای مسۆگەر كردبێت!.  لەگەڵ ئەوەشدا گومانی تیانییە، كە شەڕی غەزە ناتوانێت لە شوێنی خۆی بۆ ماوەیەكی زۆر بووەستێت پڕوشكی ناوچە جیۆستراتیژییەكانی تری رۆژهەڵاتی ناوەڕاست نەگرێتەوە، هیچ ئاماژەیەك لە ئارادا نییە، كە ئەو شەڕە بە ماوەیەكی كەم بووەستێت، چونكە وەك بەرپرسانی ئیسرائیل راشكاوانە دانیان بەوە نا، كە ئەوان شەڕی هاوپەیمانییەك، كە مەبەستیان هاوپەیمانی روسەكان بوو، دەكەن!. بۆیە لە هەموو حالەتەكان، هەموو ئەگەرەكان كراوەن، بەڵام فراوانبوونی شەڕەكە بەو شێوەیەی ببێتە شەڕێكی جیهانی وزلهێزەكان راستەوخۆ بەشداری تیادا بكەن، گریمانەیەكە تاوەكو ئێستا بەلایەنی كەم بە نزیك نابینرێت.

رێبوار کەریم وەلی مەجموعەیەک ڤیدیۆچیی پڕۆفێشناڵ، بەو ناونیشانەی سەرەوە لە سۆشیال میدیا زنجیرە ڤیدیۆیەکیان بڵاوکردۆتەوە. هەندێک ئامارو داتای کەرتە جیاجیاکانی ژیانی کوردستانیان داناوە کە پێدەچێ هی کابینەی نۆیەمی حکومەتی سەنگافور یان هی کۆریای باشور بن نەک هی هەرێمی کوردستان! * یەکێک لە ڤیدیۆکانی باسی دروستکردنی رێگاوبان لە کوردستان دەکات کە گوایە لە سەردەمی کابینەی 9، بەدیاریکراوی، 48000 کیلۆمەتر رێگا دروست کراوەو قیرتاو کراوە! ئەمە نەک هەر درۆیە، بگرە شاخداریشە! روبەری تێکڕای هەرێمی کوردستان، نزیکەی 78736 کیلۆمەتری دوجایە! ئەو 48000 کیلۆمەترە لە کوێوە بۆ کوێ دروست کراوە؟ خۆشتر لەوەش ئەو پرۆژانەی پێی هەڵادادەدەن، هەمووی بێ ئیستیسنا لەسەردەمی کابینەکانی پێشوو، یان بەردی بناغەیان داندراوە، یانیش ئیفتیتاحەکانیان کەوتۆتە سەردەمی کابینەی نۆ. * بەراوردێکی دیکەش دەکەین. ئەردۆغان و حزبەکەی هەمیشە شانازی بە دروستکردنی رێگاوبان دەکەن لە سەردەمی خۆیاندا. ئەردۆغان دەڵێ لە ماوەی 20 ساڵی حوکمی ئەودا، 28550 کیلۆمەتر رێگاوبانیان دروست کردووە! کەواتا ئەوەی کابینەی نۆ بێ ئەوەی باسی سککەی قیتارەکەش بکەن، شاکارە! * ئینجا لە بەشەکانی دیکەدا، هەر بەگۆترە وەک ئەو نمونەیەی پێشوو پێیانداداوەو حەیای کابینەی نۆیان بردووە، تەنانەت پێوەری زیرەکی کارەبا کە لە 2010 لە کوردستان کاری پێدەکرێ کراوەتە دەستکەوتی کابینەی نۆ! ئینجا ئاستی تەندروستیی هەرێمی کوردستانیان گەیاندۆتە ئاستی سویسراو مەکدۆناڵدیش لە سرەدایە بۆ کڕینی پەتاتەی کوردی! * بەڵام ئەو ڤیدیۆ چییانە لە بیر یان چووە ئەو پرسیارانە بکەن: ئەگەر ئەو سی ساڵە ئەم کابینە پۆلیسییە حوکمی هەموو کوردستانی کردبایە ئێستا چ دەبوو؟ 1- دەبوایە شەو و رۆژ دانیشین سەیری ڤیدیۆکانی ئەو ڤیدیۆچییانە بکەین و ئەشهەدوبیللایان بۆ بکەین. 2- مەعلوم نەبوو تا نوسینی ئەم وتارە زیندوو دەبووین یان بە زیندانی هەتاهەتایی حوکم دەدراین. 3- شتێک بەناوی میدیا نەدەبوو، دەزگایەکی پروپاگەندەی گۆبلز ئاسا شەو و رۆژ خەریکی بڵاوکردنەوەی درۆو دەلەسە دەبوو. 4- شتێک بەناوی ئینتەرنێتی ئازاد نەدەبوو، مەجراکانی سۆشیال میدیا هەمووی فیلتەر دەکران و دەبوایە خەڵک بە ڤی پی ئێن داخیلیان بێ. 5- برا بەسەر براوە دەبووە جاسوس و هاووڵاتیان شەو و رۆژ خەریکی تەقیرنووسین بوون لەبارەی یەکترییەوە. 6- بچووکترین ناڕەزایەتیی بە توندترین شێوە سزا دەدرا. دادگاکانی شۆڕش بەرپا دەکراو نیوەی وڵات بۆ تۆمەتی خیانەت لە زینداندا دەبوون. 7- گەورەترین دەستکەوتەکانی حکومەت بریتی بوو لە دروستکردنی سەدان زیندانی مۆدێرن! 8- ئازوقەو خواردن بە کۆبۆن بەسەر هاووڵاتیاندا دابەش دەکراو هەموو کەرتەکانی ژیان دەخرایە ژێر دەستی حکومەت. 9- لە وڵات یەک حزب دەبوو، بۆنە رەسمییەکان و جەژنە نیشتمانییەکان بریتی دەبوون لە یادی لەدایکبوونی سەرۆکە هەتاهەتاییەکان و تەنها لەو رۆژانەدا هاووڵاتیان دەیانتوانی بۆ چەپڵە لێدان گردبوونەوە ئەنجام بدەن…

ڕێبوارکەریم وەلی هەڵبژاردنی ئەنجومەنی پارێزگاکان و بەتایبەتیش لە کەرکوک، یەکەم ئەزمونی جووتبرا بوو لە دوای کۆنگرەوە. دۆڕانیان مانای کۆتایی تەمەنی سیاسییان دەبوو. بۆیە نەشتەرگەرییەکی سیاسیی گەورە گەرەک بوو تا حزبی جووتبرا، لە نەخشەی سیاسیی ناوچەکەدا رۆڵ و پێگەیەکی بەهێزیان هەبێ و بە هەمانشێوەش لە رۆڵ و پێگەی پارتی بدرێ. * وەکچۆن لە 2005، ئەمریکا و UN مەبەستیان بوو کە دەستوری عێراق بە هەر نرخێک بێ تێپەڕێ، ئەمجارەش چوارچێوەی هەماهەنگی و ئێران هەمان مەتڵەبیان هەبوو کە لە بەرامبەر بایکۆتەکەی رەوتی سەدردا کەم نەهێنن و هەڵبژاردنەکان بکرێن. * ئەنجامەکان دیزاین کرابوون.بۆیە چاوپۆشی لە خروقات و تەزویر کرا. دەبوایە کوڕانی تاڵەبانی ئەنجامێکی وا بەدەست بێنن کە بەجۆرێک پاداشتیان درابێتەوە. * جارێ هەر ئەنجامی بەرایی دیارە، بەڵام لێرە بەدواوە پارتی لە کەرکوک قسەیەکی ئەوتۆی بۆ گوتن پێ نەماوە. لە رووی قوڵایی ستراتیژییەوە کەرکوک تەسلیمی کوڕانی تاڵەبانی کرا و دابەشکارییەکی وەک دوای ئۆکتۆبەری 1996 هاتە ئاراوە کە باری لەنگی جووتبرا لە هاوکێشەی سیاسیی ناوخۆی هەرێمیش راست دەکاتەوە. * نفوزی و تورکیا و پارتی لە کەرکوک، لە بەرامبەر هەژموونی ئێران و یەکێتی شکستی پێهێندرا. ئەو یەکێتییەی کە جاران لە پارتی دەپاڕایەوە بۆ پارێزگارێکی سەربەخۆی، ئەمڕۆ ئیتر بێمنەتە. * هەڵبژاردنی ئەنجومەنی پارێزگاکان، لە بنەڕەتدا بۆ حوکمڕانیی لۆکاڵییە و هێندە شتێکی ستراتیژی نییە، بەڵام ئەمە سەرەتای نەخشەڕێگایەکی درێژترە؛ یەکێتیی کوڕانی تاڵەبانی ئیتر داشیان سوارە و بۆ هەڵبژاردنی هەرێمی کوردستانیش ئامادەن، چونکە ئەنجامی کەرکوک تەنها پارتیی ناکئاوت نەکردووە، بەڵکو نەوەی نوێشی تەخت کردووە و لەو کەشکەلانی فەلەکە هێنایاننە خوارێ! * بردنی کۆتای کەمینە ئایینییەکان لە لایەن کەسانی نزیک یان سەر بە یەکێتیش لە کەرکوک پەیامێکی دیکەیە کە ئیتر کەمینەکان لە رەهنی پارتی دەرهاتوون و رێخۆشکەرە بۆ ئەوەی تەمسیلی کەمینەکان لە کوردستانیش بەشێکی رادەستی کوڕانی تاڵەبانی بکرێ. * پوختەی کەلام، کوڕانی تاڵەبانی براوەی ئەو هاوکێشە ئیقلیمی و ناوخۆییە بوون کە هەندێکی پاداشتی بەرزەفتکردنی پارتی بوو لە ساحەی سیاسیی عێراق و، هەندێکیشی وەکو عەسای سیحری، ئاییندەی سیاسەتی ناوخۆی هەرێمی پێ دیزاین کرایەوە. دیزاینێک کە لەمپەرەکانی بەردەم، ئەم دوو برایە بۆ ئەگەری سەرهەڵدانی هێزی دیکەش لە داهاتوودا، بەرتەسک دەکاتەوە و وێنەی پاڵەوانی نەتەوەییان پێدەبەخشێ. لە بەرامبەر پارتیشدا لە ناوخۆی هەرێم چیتر سەرکز و کۆڵەوار نین. * ئەم بردنەوەیە قازانجەکەی تەنها دەچێتە گیرفانی سیاسیی کوڕانی تاڵەبانی و بە مەترسیی هەژموونی کورد بەسەر داهاتووی کەرکوکەوە هەژمار ناکرێ؛ هەمواری دوو بڕگە لە قانونی ژمارە 12ی ساڵی 2018 دەڵێ: یەکەم ئەنجامی هەڵبژاردن ناتوانێ ببێ بە بنەمای بڕیاردان لە چارەنووسی کەرکوک و دووەمیش ئەنجام هەر چییەک بێ، دەبێ ئیدارەکەی 33بە 33 بە 33 بێ.

د. قه‌یس كاكل تۆفیق*   ئەوەى لێرەدا دەمەوێ باسى بکەم، جیاوازى تێڕوانینى کورد بەرانبەر تاکى جوو کە لە رابردوودا چۆن بوو؟ ئیستا چۆنە؟ کورد چۆن سەیرى جوولەکەى کردووە؟ بەها و پایەکۆمەڵایەتییەکەى جاران چۆن بوو، ئیستاش چى لێ هاتووە؟ وەکو زمانەوانێك هەوڵ دەدەم ئەو تێڕوانینە لە زماندا بەرجەستە بکەم. زمان سەرەڕاى ئەوەى کە گرنگترین هوکارى پەیوەندى کردنى مرۆڤە. ئەرشیفێکى گرنگه‌ كه‌ مێژوو و کولتور و تێڕوانین و چۆنیەتى بیرکردنەوەى کۆمەڵگا نمایش دەکا. پەیوەندى زۆر بەهێز لەنێوان زمان و رۆشەنبیرى، زمان و بیر، زمان و کولتور، زمان و نەتەوەدا هەیە. هیچ بۆچوون و تیۆرێک نییە کە نکوڵى لەو پەیوەندییە بکا. بەڵکو هەموویان دان بەو پەیوەندییە بەهێزەدا دەنێن و لەلاى هەندێکیان وەک دوو ڕووى دراوێک دەیبینن. کۆمەڵگاى کوردی وەک هەر کۆمەڵگایەکى تر چۆنیەتى بیرکردنەوە و مێنتاڵیەتەکەى لە زمانەکەیدا رەنگى داوەتەوە. ئیدیۆم، پەندى پێشینان، لێکچواندن و هەندێ دەربڕینى تر کە له‌ زماندا هەن نموونەى زەقى ئەو دیاردەیەن. بۆ نموونە، کورد سەگ بە گڵاو دادەنێت و مەر بە فەقیر و زەڕینى کەر بە شێوەیەکى خراپ... هتد. ئەوانەش بە زەقى لە زمانى کوردیدا ڕەنگیان داوەتەوە لەبەر ئەوەى پەیوەندییان بەو جیهانبینییە ئاینییەوە هەیە کە مێنتاڵیەتى کوردى ڕەنگڕێژکردووە. لێرەدا نامەوێ باس لەو پەیوەندییە بکەم کە چۆنە. باوەڕم وایە کەس نکۆڵى لەو پەیوەندییە ناکات کە زمان و تێڕوانینى کۆمەڵگا ئاوێنەى یەکترن. جوو(جوولەکە) هەر لە دێر زەمانەوە لە کوردستان ژیاون. تێڕوانینى تاکى کورد بۆ جوو و چۆنیەتیی هەڵسوکەوت کردن لەگەڵیان لە زمانەکەیدا ڕەنگى داوەتەوە. کۆمەڵێ ئیدیۆم و پەندى پێشینان و نوکتە و بەسەرهات لە ئەدەبیات و فۆلکلۆرى کوردیدا هەیە، کە وێنەى کەسایەتى جوو نیشان دەدا. هەرچەندە ئێستا ئەو ئیدیۆمانە بەکار نایەن بەڵام زۆربەمان لە باپیرانمان یان بە تەمەنەکانمان بیستووە، کە گوتویانە: وەکو جوو دەپاڕێتەوە، دەڵێى جووە دەترسێ، وەک جوو ڕەزیلە، یان بە منداڵ گوتراوە بۆ دەگریێی جوولەکە. تەنانەت هەندێجار وەکو جووێنیش بەکار هاتووە. بۆ شکاندن کەسێک بە تۆنێکى قوڕس پێان گوتووە جوولەکە. تێڕوانین بەرانبەر گروپى ئیتنى و عەشیرەت و نەتەوەى تر لە هەموو کۆمەڵگایەکدا هەیە و لە زمانەکەیدا ڕەنگى داوەتەوە، بۆ نموونە: کۆمەڵێ دەربڕین کە گوزارشت لە بێ دەسەڵاتى و ترسنۆکى و ڕەزیلى و نوزانەوە و گریان دەکەن بە جوو یان جوولەکە دەچوێنرێن. عەرەب یان یەزیدى بە پیسوپۆخڵى. لە شارى هەولێردا (کرمانجەکان) ، تورکمانیان کردبووە ڕەمزى ترسنۆکى و شەڕنەکردن (بێغیرەتى). بە پێچەوانەشەوە تورکمانەکان کرمانجەکانیان بە ئاست نزم بێ ئەتەکێت وەسف دەکرد. بوونى کۆمەڵێ نوکتەش لەسەر یەکترى ڕاستى ئەو تێڕوانینە دەسەلمێنێ، کە بەرانبەر یەکتر هەیان بووە. ئەوەى جێگاى سەرنجە ئەو دەربڕینانە لە ڕۆژگارى ئەمڕۆدا و ئەو تێروانینە نەماوە یان بەتەواوى کاڵ بۆتەوە. وەکو بەڵگەش بۆ نەمانى ئەو تێڕوانینە ئەوەیە کە ئیستا ئەو ئیدۆم و لێکچواندنانە لە زمانى رۆژانەى نه‌وه‌ی ئێستادا بەکارنایەت. تەنیا وەک ئەرشیفێك لە دەقى کتێبەکاندا ماوەتەوە. لێرەدا پرسیارێک بەرەو ڕوومان دەبێتەوە، کە بۆچى بێدەسەڵاتى و گریان و ترسنۆکى جوولەکە چۆتە ناو زمانى کوردى و بۆتە ئیدیۆم. ئەم دەربڕینانەى زمانى کوردى کە وەسفى جوولەکە دەکا ئەوەمان پێدەڵێ کە ستەمیان لێکراوە و ئەوانیش لەبەر ئەوەى کەمینە بووینە تواناى بەرگرى کردنیان نەبووە، ئیتر پەنایان بۆ گریان و پاڕانەوە بردووە. یەک ئیدیۆم یان پەند و دەستەواژە لە کوردیدا نابینرێ بەشێوەیەك وەسفى جوولەکە بکا،کە ستەمیان لە خەڵك کردبێ یان هێرشیان بردبێ و پەلاماریان دابێ، یان پیاوکوژ و زاڵم بووبن. بەڵکو هەموو ئەو دەستەواژانەى کە بەدى دەکرێ ئاماژەن بۆ مەزڵومیەتى جوو، یان ڕەزیلیى جوولەکە کردووە. ته‌نانه‌ت ئه‌و به‌سوك سه‌یركردنه‌ چۆته‌ ناو شیعرو ئه‌ده‌بیاتی كلاسیكه‌وه‌. بۆنموونه‌ شاعیری هه‌جوو شێخ ره‌زای تاله‌بانی له‌ زۆر شوێندا كه‌ هه‌جووی یه‌كیك ده‌كا ئه‌وا به‌ جوی ده‌چوێنێ. وه‌ك:       به‌چكه‌ یه‌هودیه‌كم گرت و ..... هاواری كرد یا موسا     گه‌ر سه‌روریشی پیاوانه‌یه‌ باوه‌ڕ مه‌كه‌ پێی              باتینی جوله‌كه‌ و  زاهیری زوههادی هه‌یه‌     ئاگر ئەگەر لە ماڵی چێ دەڵێن ئاگر نییە، نوورە نەنوورەیلێ، نەموورەیلێ شاپڵیتەیلێ، دەرقوونەیلێ قسەی جوولەکەی مەشهوورە  ئەوەى مایەى سەرنجە بە کەم تەمەشاکردنى جوو یان جوولەکە تەنیا لە کوردستان نەبووە، بەڵکو نموونەى شانۆگەرییەکانى شکسپیر و کارەکتەرى شایڵۆك لە بازرگانى ڤینیسیا ئەوەمان پێ دەڵێ کە لە ئەوروپاش ئەو شەپۆڵى دژە جوولەکەییە هەبووە. تا لە سەردەمى نازییەکاندا و لە هۆلۆکۆست گەیشتە لوتکە. کۆمەڵگاى کوردى لەبەر ئەوەى کۆمەڵگایەکى خێڵەکى بووە. خێڵ سەرچاوەى هێز و دەسەڵات بووە. ئیتر جووەکانیش لەبەر ئەوەى لە کوردستان پەرت بووینە و خێڵێکى بەهێز نەبووینە تا بتوانن وەک خیڵەکانى تر پەلامارى دەوروبەریان بدەن . یان شەڕ بکەن ئەوا بە ناچارى ئاڵاى سپى و ئاشتیخوازییان هەڵبژاردووە. ئیتر ئەو ئاشتى خوازییەش لە دیدى کۆمەڵێك، كه‌ شه‌ڕكردن له‌لای به‌های باڵا و شانازیكردن بێت، شه‌ڕنه‌كردن به‌ ئاشتی خوازی لێكنادرێته‌وه‌ به‌ڵكو به‌ ترسنۆكی (بێغیره‌تی) لێكدراوه‌ته‌وه‌. لەلایەکى تریشەوە، هەمیشە گروپە کەمینییە ئیتنییەکان بۆ مانەوە و سەلماندنى خۆیان، دەبێ پەنا بۆ هەندێ تایەتمەندى و هۆکارى تر ببەن. لەوانە بارى ئابوورى، جووەکان هەمیشە بە ڕەزیل یان دەوڵەمەند وەسفکراون. هۆکارى ئەوەش ئەوە بووە ئەوان بۆ پاراستنى خۆیان پەنایان بۆ پێکەوەنانى سامان بردووە. نەک تەنیا لە کوردستان بەڵکو لە سەرتاسەرى جیهاندا. ئەوەش دیاردەیەکى سروشتییە و هەموو کەمینەکان بەو ئاڕاستەیە کاردەکەن. تەنانەت ئەو کوردانەى کە کەمینەن لە وڵاتەکانى وەکو ئوردن و میسر و... هتد هەمان هەوڵى سەلماندنى خۆیان داوە، جا چ لە رێگاى ئابوورییەوە بێت یان رۆشەنبیرى و نزیکى و بەشدارى لە دەسەڵاتى بەڕێوەبردنى وڵاتدا.  تێڕوانینى کۆمەڵگاى کوردى بۆ جوو لە رۆژگارى ئەمڕۆدا پێچەوانە بۆتەوە. ئەو جووەى کە دوێنێ بە ترسنۆك وەسف دەکرا ئەوا ئەمڕۆ بۆتە سەرچاوەى هێز. جووەکان بەشێوەیەك کاریان کرد کە لە نێو کۆمەڵگاى جیهاندا ڕێز و پایە بۆخۆیان دروست بکەن. نەک هەر ڕێز دروست بکەن، بەڵکو داهێنان و دەسکەوتى زۆر گەورە پێشکەش بە جیهان و مرۆڤایەتى بکەن. سادەترین نموونە بۆ ئەو داهێنانەى کە ئەوان کردوویانە، ژمارەى خەڵاتەکانی نۆبڵە، لەکاتێکدا جووەکان ڕێژەی 0.2% ى ژمارەى دانیشتووان پێکدەهێنن بەڵام %23 ی خەڵاتی نۆبڵ بۆ ئەوان بووە. لە بوارى ئابوورى، بە رێژەى ٤٠% و لە پزیشکى ٣٠% و لە فیزیا ٢٥% و لە کیمیا ٢٠% و لە ئەدەب ١٥% پاداشتی نۆبڵ بۆ جوووەکان بووە. ئەوە جگە لەو داهێنانان و بەرهەمانەى وەک (گووگڵ، پێپسى، کۆلا، جينز.... و سەدانى تر کە ڕۆژانە بەکاریان دەهێنین و ناتوانین دەستبەرداریان ببین. هەروها لە داهێنانە پزیشکییەکان و كیمیا و فیزیا و هه‌موو بواره‌ جیاجاكاندا، داهێنانی زۆر گه‌وره‌یان كردووه‌ كه‌ مرۆڤایه‌تی سوودی لێ بینیوه‌ و دەیان زاناى وەك چۆمسکى و ئەنیشتاین و مارکس و فرۆیدى پێشکەش بە جیهان کردووە. ئەوان کەمینەیەکی په‌رته‌وازه‌ بوون و توانییان ئەو دەسکەوتە گەورانە پێشکەش مرۆڤایەتى بکەن. ئێمەش تا ئیستا هەر دەبێ بڵێین، ئەو نانە بەو دۆشاوەى. * زانكۆی سۆران

  سه‌ردار قادر ده‌مێكه‌ ئه‌م ڕسته‌یه‌ ئه‌بینیین، گۆڕان دواى دوا شكستى له‌ هه‌ڵبژاردنى په‌رله‌مانى عێراق و نه‌هێنانى هیچ كورسیه‌ك، ئه‌م ڕسته‌یه‌ ئه‌بیسترێت!! پێش وه‌خته‌ باس له‌ ئاشته‌وایى ئه‌كرا، هه‌وڵه‌كان له‌و بۆته‌یه‌دا بوو، لیژنه‌كان و كه‌سایه‌تیه‌كان له‌ هاتووچۆدا بوون ، هه‌موو وێردى سه‌ر زمانیان ئاشته‌وایى بوو، ئه‌م ئاشته‌وایى یه‌ هه‌ر زوو به‌رنامه‌ى جیاواز ، بیركردنه‌وه‌ى جیاواز، گوتارى جیاواز، داواكارى جیاواز، پرۆسه‌ى ئاشته‌وایى بێده‌نگ كرد... گۆڕان به‌چى هه‌ڵده‌ستێته‌وه‌؟؟ ئایا به‌ گۆڕینى ڕێكخه‌رى گشتى ئیتر گۆڕان ئه‌ بێته‌وه‌ گۆڕانى جاران و مه‌نزڵگاى ئۆپۆزسیۆن؟؟ گۆڕان دواى كۆچى دوایى نه‌وشیروان موسته‌فا به‌ كۆمه‌ڵێك ده‌ردى كوشنده‌دا ڕۆشتووه‌،ناكرێت ته‌نها گۆڕینى ڕێكخه‌رى گشتى به‌ كلیلى چاره‌سه‌رى كۆى گرفته‌كان بزانرێت، گۆڕان له‌ ئێستادا خولانه‌وه‌یه‌ له‌ناو بازنه‌ى داخراودا, گۆڕان له‌ ئێستادا له‌ناو ئه‌و بازنه‌یه‌دا په‌نجه‌كان یه‌كترى ئه‌شكێنن. گۆڕان بۆ بوونه‌وه‌ به‌ گۆڕانى جاران و به‌هێزتر له‌ جاران كۆمه‌ڵێ خاڵى كاركردنى سه‌ره‌كى هه‌یه‌ كه‌ پێویسته‌ هه‌نگاوى بۆ بنێ ئه‌وانیش: 1ـ گۆڕان له‌ ئیستادا به‌شێكه‌ له‌ ده‌سه‌ڵاتى سیاسى هه‌رێمى كوردستان و حكومه‌تى خۆجێى كه‌ هاوڵاتیانى هه‌رێم و تاكى كوردى و شه‌قامى كوردى  ناڕازیه‌ له‌ ده‌سه‌ڵات، تا گۆڕان نه‌كشێته‌وه‌  له‌ حكومەتى هه‌رێم و حكومه‌تى خۆجێى ناتوانرێت نزیك بێت له‌ ناڕەزایى خه‌ڵك و تاکی کوردی، گۆڕان لە ئێستادا مکیاجی ئەم دەسەڵاتەیە کە بە داخەوە مکیاجێکی جوانیش نییە. 2-گۆڕان لەسەرەتای دروستبوونیەوە شەفافیەتی دارایی نەبووە، نە دەنگدەر و نە زۆرینەیەکی هەڵسوراوانی ئاگاداری باری دارایی گۆڕان نیە، نە ئەزانرێت خەرجییەکانی چییە، نە داهاتی، نە قەرزاری نە سەڕجاوەکانی داهاتی، جا بزاوتێک شەفافییەت بۆ وڵات داوا بکات کەچی خۆی سەرەتای شەفافییەتی مومارەسە نەکردووە. 3- گۆڕان لە سنوری یەکێتی هاوپەیمانی کرد بۆ هەڵبژاردن و شکستی هێنا، لە سنوری پارتی چووە حکومەت و شکستی هێنا، تا گۆڕان واز لەم هاوپەیمانێتییانە نەهێنێت ئەستەمە بێتەوە جێ بڕوای دەنگدەرانی. 4-دەمێکە باس لە پەیوەندی کۆمپانیای وشەو بزاوتی گۆڕان ئەکرێت، تا ئێستا شەفافانە ئەم پەیوەندییە رێکنەخراوە، نە گۆڕان نە کۆمپنایای وشە ئەم کێشەیەی یەکلانەکردەوە، بۆتە وەهمێک، باسکردنی بۆتە یاساغی کە پێویستە شەفافانە ئەو پەیوەندییە رێکبخرێتەوە. 5-گۆڕان سەردەمی زێڕینی سەردەمی ئۆپۆزسیۆن بوونی بووە، بۆ پڕۆسەی هەڵسانەوەو ئاشتکردنەوەی هەڵسوڕاوان و دەنگدەرانی گەڕانەوەیە بۆ بەرەی شەقام، ئەو شەقامەی کە زۆرینەی دوورە لە هەڵبژاردن و بایکۆتی کردووە، شەقامێک کە لە گۆڕان زویرەو سزای داوە. لە ئێستادا رێکخەری گشتی نوێ گۆچانی سیحری پێ نابێت، کە زۆرینەی ناوەکانی لە میدیادا دێت هەموو ئامادە نین ئەو کارە بکەن. رێکخەری گشتی نوێ بەسەر کۆمەڵێک گرفتی گەورەدا دەکەوێت. هەڵبژاردنی خانەش هەمان گرفتی هەیە، هەر هاوڕێیەک بیەوێت ئەندامی خانە بێت ئەبێت هەوڵەکانی خەمی گشتی بێت. تا ئێستا تانوپۆی ئەو هەڵسانەوەیە گۆڕان و میدیاکەی بەشەفافانە باسی لێوە ناکات. گۆڕان پێویستە لە خودی خۆیدا زیاتر دەرگا لە ناڕازییەکانی بکاتەوە. گۆڕان ناڕەزایەتییەکان بە بەشێک لە خۆی بزانێ نەک وەک لادەر و دوژمن بیبینێ. گۆڕان گەر گوتاری نەگۆڕێت ئەبێت وەک مێژوو باسی گۆڕان بکەین.

عەدنان عوسمان  ( لە پەراوێزی لێدوانەکانی  وەزیری ناوخۆی هەرێم) کاک مەسعود بارزانی لە گێڕانەوەیەکیدا باس لەوە ئەکات کە جارێک بە هێزێکەوە لەگەڵ باوکی رێیان ئەکەوێتە ناوچەیەک کوێخایەکی لێئەبێت. بارزانی باوک بە کوێخا ئەڵێ تۆ کوێخای بێ رەعیەتیت و ئێمەش رەعیەتی بێ کوێخا، بۆیە ئەم ماوەیە لای تۆ ئەبینە رەعیەت وتۆش کوێخامان بە! دوالێدوانی کاک رێبەر ئەحمەدی وەزیری ناوخۆی هەرێم، رێک ئەوەمان بەبیردا ئەهێنێتەوە کە ئەم حکومەتە چیتر رەعیەتی نەماوە یا باشترە بڵێم لەخەمی رەعیەت نەماوە، رەعیەتیش ئیتر دەبێ ئەم دەسەڵاتە بە کوێخای خۆی نەزانێت! وەزیری ناوخۆی هەرێم لە لێدوانێکیدا لە ١٠/١٢/٢٠٢٣ دەڵێت: (هەر کەس گلەیی هەیە لە خانەقینەوە تا زاخۆ، با ئاراستەی بەغدای بکەن. خۆپیشاندان بکەن بۆ داوا رەواکانتان بەڵام رووی داواکانتان دەبێت لە بەغدا بێت). کەمترین قسەیەک لەسەر ئەم لێدوان یا فەتوایە ئەوەیە کە ئەمە ئیعلانی ئیفلاسی هەرێمە لە ئاست داخوازیەکانی خەڵک و ئاشبەتاڵبونێتی لە نوێنەرایەتی کردنی هاوڵاتیانی هەرێم. راستە ئەم پێشان دانی دەستەپاچەیی و بێئیرادەیی و لاوازیە، ماوەیەکە لە دەسەڵاتدارانی ئەم کابینەو حزبەکانیانەوە ئەیبیستین و ئەبینینکە گوایە ئەیانەوێت جەماوەری هەرێم روبەڕوی بەغداو دەسەڵاتدارانی عێراق بکەنەوە، بەڵام یەکەم جارە ئاوا بە زەقی ئەم حکومەتە ئیعلانی بێتوانایی و دەستەپاچەیی خۆی بکات. بە گوێرەی دەستوری عێراق، کە گوایە کوردێک شەونخونی جێبەجێکردنی ئەکات!، ئەم هەرێمە خاوەن دەسەڵاتی یاسادانان و جێبەجێکردن و دادوەری خۆیەتی. بە گوێرەی مادەکانی ١١٧،١٢٠،١٢١،١٤١ هەرێمی کوردستانخاوەنی پەرلەمان و حکومەتە کەهەم دەبێ نوێنەرایەتی خەڵکی هەرێمەکەبکات وهەم  دەبێ پاریزەری مافەکانیان بێت و سەرپەرشتی دامودەزگاکانی بکات. بەڵام بە گوێرەی ئەم لێدوانەو هاوچەشنەکانی بێت، ئەوا ئەم حکومەتی هەرێمە ئیتر توانای نوێنەرایەتی و ئیدارەدانی نەماوەو دەبێ بۆ هەمو پرسێک روی دەمی هاوڵاتیان لە بەغدا بێت. بەو مانایەی کە گەر بەغدا موچەو بودجەی نارد ئەوا کوێخایەکی باشەو گەر نەشی نارد ئەوا کوێخایەکی خراپە! لە هەردوحاڵەتدا هەرێم شانی خۆی خاڵی کردوەو بەرپرسیارێتیەکەی روبەروی بەغدا کردۆتەوە.  لێرەدا هەقە بپرسین ئەم حکومەتە کە خۆی نەتوانێت هاوڵاتیانی بژیەنێت و ئیدارە بدات، هەروەها نەتوانێت نوێنەرایەتیان بکات و مافیان بستێنێت، ئیتر حیکمەتی هەبون و مانەوەی چیە؟ ئەی ئەرکەکانی چین؟ بون و نەبونی چ مانایەکی بۆ هاوڵاتی هەرێم ئەبێت؟ کاتێک بەرپرسێکی باڵای کابینەکە شانخاڵی کردنی حکومەت رابگەیەنێت لە ئیدارەدان و نوێنەرایەتی کردنی دانیشتوانانی هەرێم، ئیتر ئەم وەفد و وەفد کاریە بە دۆسێی خاڵی و نەبونی هیچ پرۆژەیەکەوە، مانای چیە؟ ئەم وتارە بۆچوونی نوسەرەكەی خۆیەتی  

د. كامەران مەنتك  هەر سیستەمێك سیاسی بیەوێت رێز لەخۆی بگرێت، بەر لەهەموو شتێك رێز لە مامۆستا دەگرێت، لەبەرئەوەی مامۆستا داینەمۆی سەرەكی هەموو گۆڕانكاری وپێشكەوتنەكانی هەموو كۆمەڵگەیەكە، بە پێچەوانەوەش، هەر سیستەمێك بیەوێت خۆی چرووك بكات رێزی خۆی نەهێڵێت، ئەوا رێز لە مامۆستا ناگرێت، بێڕێزكردنی مامۆستا، یاخود لێدان لە شكۆو كەمكردنەوەی بەهای مامۆستا، دەبێتە هۆی بەرهەمهێنانی نەوەیەك، كە رێز لەهیچ بەهایەك ناگرێت وهەموو پیرۆزییەكان دەخاتە ژێر پێیەكانی خۆیەوە، ئەمە بنەمای ئەو خاڵە سەرەكییەیە، كە گەندەڵی وبێبەهاكردنی بەهاكان ونەمانی ئینتمای نیشتمانی لە هەرێمی كوردستان لێیەوە دەستیپێكرد، بە واتایەكی تر داهێزران وداڕمانی ئاكاری هەرێم لێیەوە دەستیپێكردو ئێستاش هەموو بەهاو گرنگییەكی ئەو كۆمەڵگەیە لەژێر هەڕەشەی ئەو مەترسییەدایە، ئەو چوارچێوەیەشی تێپەڕاندووە و خەریكە دیوارەكانی باشوور دەپەڕێنێتەوە دەچێتە بەشەكانی تری كوردستانیش، بەڵام خۆشبەختانە لەو بەشانە هێشتا كەلتوورو رەسەنەیایەتی كوردی، هێندە بەهێز ماوەتەوە، كە بتوانێت دیوارێك لەبەردەم ئەو شەپۆڵە بێبەهاییە دروست بكات، كە لەهەرێمەوە بەرەو بەشەكانی تری كوردستان دەردەچێت. كێشەی بنەڕەتی ئەو بێڕێزییە لەوەوە سەرچاوە وەردەگرێت، ئەوانەی نزیكەی حەفتا ساڵە بەناوی كوردایەتییەوە كاوێژیان لەسەر مەسەلەی كورد كردووە، كەسانێك بوون نەك خاوەنی هیچ پڕۆژەیەكی نیشتمانی نەبوون، بگرە شۆڕش وفەوزایان تێكەڵ یەكتركردو لەناو ئەو فەوزایەشدا، بەسیاسەتی دارستان، كەوتنە هێنانەدی خەونە قێزەونەكانی خۆیان وئەوەی ویستیان بۆ خۆیان حەڵاڵ كرد، قۆناغی راپەڕین رێك قۆناغی گواستنەوەی ئەو فەوزایە بۆ ناو شارەكان وكاركردن لەسەر ئەو فەوزایەو سەپاندنی بوو، بەشێوەیەك ئێستا خودی ئەو فەوزایە جێگەی سیستەم ویاسای گرتۆتەوە، وەك چۆن دزی ووڵات فرۆشتن وسیخوڕی وگەندەڵیش جێگەی دەستپاكی ووڵاتپارێزی ودڵسۆزی گرتەوە. ئەو سوپا سیخوڕییەی ئێستا لە باشووری كوردستان دروست بووەو لەپێناو هێنانەدی بەرژەوەندییەكی كەمی مادی، لەپێناو بەدەستهێنانی چەند دینارو لیرە وتمەن ودۆلارێكی رووڕەش، جی پی ئێس بە ئێخەی براكەی خۆیەوە دەكات، بۆ ئەوەی فڕۆكەكانی دوژمن تیرۆری بكەن، یەكێك لە بەرهەمەكانی ئەو بێ رێزییە، كە لەم وڵاتە بەمامۆستایان دەكرێت، بنەچەی ئەو بێڕێزییەی لە ئێستادا بە هەموو كۆمەڵگە دەكرێت، سەرچاوەكەی لەو بێڕێزییە وەردەگرێت، كە بە مامۆستا دەكرێت، چۆن دەكرێت، لەوڵاتێكدا باسی رێزو خۆشەویستی و وڵاتپارێزی ودەستپاكی بكرێت، لەكاتێكدا، كە ئەوانەی هەموو ئەو بنەما ئاكارییانە لە دەروونی تاكەكانی كۆمەڵگە دەچێنن، بێڕێز بكرێن!.  ئەو كاتە مامۆستا بێڕێزكرا، كە مووچەكەی بڕدراو ناچاركرا لەبەردەم قوتابخانەكەی خۆیدا، دەستگێڕی بكات ووردەواڵە بفرۆشێت، ئەوانەی مامۆستایان بەو رۆژە گەیاند، هەر ئەوانەن، ئێستا دزێوانە لەسەر شاشەی تیڤییەكان دەردەكەون وخۆیان بەسەركردەو بنكردە نیشانی خەڵك دەدەن، لەكاتێكدا ئەوان ڤایرۆس ومیكرۆبەكانی ئەو كۆمەڵگەیەی ئێمەن، ئەو چاوانەی دیمەنی هەزاران مامۆستا نەبینێت، كە بۆ سەرەتایترین مافەكانی خۆیان دوو مانگە لەسەر شەقامن، ئەو چاوە كوێر بووەو ناتوانێت، جوانییەكان وبنەمای جوانییەكانی نیشتمان ببینێت، ئەو چاوە دەبێت بنێردرێتەوە بۆ ئەشكەوتەكەی ئەفڵاتوون ولەكونجی زیندانەكاندا دادگایی بكرێت، لەسەر ئەو هەموو تاوانەی بەرامبەر ئەو گەلە ستەم دیدەیە كردوویانە.

   سەردار قادر لەم دۆخە ناهەموارە کە هەرێمی کوردستانی پێدا تێدەپەڕێت، تاکی کوردی قوربانی یەکەمی بارودۆخەکەیە، سەرەتای ململانێکان لە هەرێم و بە تایبەت لە سنوری سلێمانی و گەرمیان و راپەڕین بنەماکانی لە رەوتی دەرکەوتندایە، ئەم ململانێیانە لە ئێستادا لە بارودۆخی خۆ ئامادەکردن و سەرەتای دەرکەوتنی تان و پۆکانێتی، مەنزڵگای ململانێی هەڵبژاردنی داهاتووی پەرلەمانی کوردستان. ئەم نوسینە هەوڵدانە بۆ لێکدانەوەی پێش وەختی ململانێکان، لە دەڤەرەی سلێمانی و ئیدارە سەربەخۆکانی، چوار رەوت لە پرۆسەی خۆئامادەکردندایە بۆ ململانێیەکی سەختی هەڵبژاردنی داهاتوو: رەوتی یەکەم: رەوتی یەکێتی نیشتمانی کوردستان و سەرۆکەکەی دوای کۆنگرەی پێنجەمێتی، ئەم رەوتە لەهەڵبژاردنی داهاتوو لەبەردەم تاقیکردنەوەیەکی سەختدایە، بونیادی یەکێتی لە ئێستادا کۆمەڵێک گرفت و ململانێی هەنووکەیی هەیە، دوای کۆنگرە هەموو ململانێکان ئامادەیی هەیە. 1-  ململانێ لەگەڵ پارتی دیموکراتی کوردستان کە ململانێیەکی مێژوویی هەمیشەییە بە شەڕو ئاشتیدا تێپەڕیوە، جۆرێکە لە نەخۆشییە بێچارەکان، لە ناو کۆمەڵگەی کوردیدا ئەم ململانێیە نە کۆتایی دێت و نە رێککەوتنی ستراتیژی چارەسەرێتی، ئەوەی ئەم ململانێیە کەمێک بێدەنگ دەکات دوو ئیدارەییە، واتە تۆ لە سنوری دەسەڵاتی خۆت و منیش لە سنوری دەسەڵاتی خۆم، نە دەکرێت پێکەوە بن و نە دەکرێت دووری هەمیشەییان هەبێت بەتایبەت لەگەڵ بەغداو بەرژەوەندییەکان. 2-   ململانێ لەگەڵ ناڕەزایی ناو خودی یەکێتی دوای کۆنگرە، زۆرن ئەوانەی لە سیاسەتی  گشتی سەرۆک و گوتاری یەکێتی ناڕازین، زۆرن ئەوانەی پێگەو دەسەڵاتیان کەمکراوەتەوە، هەموویان پێدەچێت بۆ کاتی هەڵبژاردن هەڵوێستییان دەربکەوێت و ناڕەزایەتییان بگاتە لوتکە و ئەوکات مامەڵەو سەودا و گوتارییان دەردەکەوێت. 3-  ئەم رەوتە بەو بونیادەی کە ئێستا هەیەتی ئامانجەکەی زامنکردنی دەنگەکانی خۆیەتی واتە حەسمکردنی دەنگ بۆ خودی یەکێتی لە ناو خودی خۆیدا، مەودای کارکردنی بونیادی ئێستای خۆیەتی. رەوتی دووەم: هاوسەرۆکی پێشووی یەکێتی و ناڕازییەکان  لەدوای کۆنگرەی پێنجەمی یەکێتی مەنزڵگای ململانێ لای شێخ لاهور دەرەوەی یەکێتییە، ئیتر دەرگای یەکێتی داخراوە بە روویدا، تا ئێستا گوتاری هاوسەرۆکی پێشوو پیشاندانی خۆیەتی وەک قوربانی، قوربانی دەستی سەرۆکی یەکێتی. ئەوەی ئیتر دەبینرێت گوتاری داهاتووی هاوسەرۆکی پێشووە کە ئیتر مەنزڵگای خۆ تاقیکردنەوەی ناڕازییەکانی ناو یەکێتی دوای کۆنگرەیە، ئەم رەوتە بەدەر لە جەستەی یەکێتی وەک رەوتێکی سەربەخۆ نەبینراوە، نازانرێت کە شەقام چۆن مامەڵەی لەگەڵدا دەکات؟ وەک فریادڕەس!! تا ئێستا باوەڕبوونە کە فریادڕەسێک دەبێت بێت و هەوڵدانە بۆ زیندوکرنەوەی چەمکی کاریزما! رەوتی سێیەم: نەوەی نوێ و ئەزموونی تر نەوەی نوێ لە بۆشایی سیاسیدا بۆ شەقامی کوردی خۆی بە فریادڕەس دەزانێت، ئەو بۆ بەرامبەرەکانی ئۆپۆزسیۆن بوونی کردووەتە سەنگەر، نەوەی نوێ و سەرکردەکەی لەسەر خەم و ئازاری تاکی کوردی مامەڵەی سیاسی دەکات، گرفتی ئەم رەوتە لەبەریەک هەڵوەشانی خودی خۆیەتی، ئەمڕۆ یەک لیست و سبەی جیابوونەوەی کاندیدەکانی لە خودی بزاوتەکە کە ئەم ئەزمونەشیان دیوە، ئەم رەوتە لە نەبوونی ئومێد لای تاکی کوردی تاکە رەوتە کە هەوڵی کۆکردنەوەی ناڕەزایی خەڵک دەدات، واتە ئومێد دەباتە لای خۆی، ئەم رەوتە لەدەرەوەی سنوری سلێمانی جۆرێک یاری سیاسی دەکات بەتایبەت لەگەڵ پارتیدا،  ئەم رەوتە لەسەر مێژوو کارناکات و زیاتر خۆی بەستووەتەوە بە واقعی تاڵی شەقامەوە. رەوتی چوارەم: ناڕازییەکانی شەقام ئەم رەوتە زۆرێک لە جیابووەکانی گۆڕان و ئاڕاستە ئیسلامییەکانن، ئەم رەوتە گەنج و دەنگە ناڕازییەکانی ناو پەرلەمان و ئەنجومەنی پارێزگاکانی لە خۆگرتووە، ئەم رەوتە کەسانی وەک عەلی حەمەساڵح و هاورێکانی تێدا دەبینرێت، رەتی بونیادی پێشووی گۆڕان دەکەن و باوەڕیان بەوەیە کە جەستەی گۆڕان جەستەیەکی شەکەتەو جارێکی تر نابێتەوە گۆڕانی جاران. ئەم رەوتە لە پرۆسەی راوێژدان بۆ خۆئامادەکردن و دروستکردنی بونیادی خۆیان. ئەم رەوتە هەوڵ دەدات کە ئەمانن بە بەدیلی داهاتوو بەڵام بەدیلێکی خێرا نا! ئەمان رەوتی سێهەم بە بزنسی سیاسی ئەناسن و خۆیان بە ئومێد ئەبینن بۆ داهاتوو بەتایبەت بۆ گەنج و شەقام . ئەم رەوتە لای نەیارەکانیان بە پۆپۆلیست ناوزەند دەکەن. ململانێی رەوتەکان: رەوتی یەکەم (سەرۆکی یەکێتی) لەگەڵ رەوتی دووەم (هاوسەرۆکی پێشووی یەکێتی) تا سەر ئێسقان هەوڵی ئەوە دەدەن یەکتری تەحجیم بکەن، ململانێی ئەمان ململانێی دوای کۆنگرە لەجەستەی یەکێتی تێئەپەڕێت. رەوتی سێیەم (نەوەی نوێ) و رەوتی چوارەم (عەلی حەمەساڵح و هاورێکانی) ململانێی قورسی ناو شەقامە، ئەمان خاوەن چەمکی ئۆپۆزسیۆنن. لە داهاتوودا دەکرێت ئەم چوار رەوتە هەم ناکۆک بن وهەم دەرگای لە یەک نزیکبوونەوە لە ئارادا بێت، دەکرێت رەوتێکی دەسەڵات لەگەڵ رەوتێکی ئۆپۆسزیۆن تا ئاستی هاوپەیمانی بڕوات. ئەوەی گرفتە لای ئەم چوار رەوتە ئاستی بەشدارییە لە هەڵبژاردندا، ئایا بایکۆت کۆی بەرنامەکانیان لەم سنورە وێران ناکات.

سه‌ردار عه‌زیز ئەم ڕۆژانە ئەگەر لە دەوحەی پایتەختی قەتەر پیاسە بکەیت، ئەگەری زۆرە لوتت بە چەند سیخوڕێکی وڵاتانی جیاوازدا بتەقێت، کە بە دوای دانوستانەوەن بۆ ئازادکردنی گیراوەکانیان لەلایەن محەمەد زەیفەوە، سەرکردەی کەتیبەی قەسام و بەرپرسی هێرشی تۆفانی ئەقسا. زۆرێک بە لایانەوە مایەی سەرسوڕمانە چۆن قەتەر دەتوانێت ئەمە بکات؟ لەسەردەمی ئۆبامادا ئەمریکا وەهای پێ باش بوو ئیسماعیل هەنییە بارەگاکەی بگوازێتەوە بۆ دەوحە، لەبری ئێران. قەتەرییەکانیش ئەمەیان پێ باش بوو هەروەها بە هاوکاری ئیسرائیل مانگانە زیاتر لە چل ملیۆن دۆلار پارەو هاوکاری لە ڕێگای ئیسرائیلەوە بە حەماس بدەن لەگەڵ دابینکردنی سوتەمەنی لەلایەن ئیسرائیلەوە بۆ غەزە. ئەم ڕۆڵەی قەتەر بەشێکە لەو پرۆسە ئاڵۆزەی بەڕێوەبردنی دونیا لەلایەن ئەمریکاوە. لەم پرۆسەیەدا قەتەرو ئەمریکا ئامانجی جیاوازیان هەیە، ئەمریکا قەتەر بەکاردەبات بۆ پەیوەندیکردن بە ئەو وڵات و لایەنانەوە کە نایەوێت یان ناتوانێت پەیوەندی ڕاستەوخۆیان لەگەڵدا بکات، قەتەرییەکانیش ئەمە وەها دەبینین کە ڕۆڵێکی گرنگ و دەروازەیەکیان بۆ دەکاتەوە بۆ بوون لەنێو کایەی زلهێزانی جیهاندا، وەک شارە وڵاتێکی بچوک، هەروەها خۆ پاراستنیان لە قوتدانیان لەلایەن هێزە هەرێمییەکانەوە، بە تایبەتی سعودیەو ئێران. ئیسماعیل هەنییە تەنها کەسە لە دەرەوە، کە پەیوەندی لەگەڵ محه‌مه‌د زەیفدا هەیە. هەرچەندە هێندە بە ئاگا نییە لە دۆخی حەماس. لەڕاستیدا کاتێک هێرشەکە ڕوویدا لە سەفەرێکی خێزانی بوو لە ئیستەنبوڵ بۆ سەیرو سەفاو تەلەفۆنەکەی داخست بوو. ئەوەی جێگای سەرنج بوو ئەو ماڵپەرە ئێرانیانە بوو کە بانگەشەی ئەوەیان دەکرد پلانی سەردانی بەغدای هەبوو لەوکاتەدا. کەس گومان لە بێئاگابوونی ناکات، چونکە نەک تەنها ئەو بەڵکو شن بێت و موسادو سی ئای ئەو زۆری تریش بێئاگابوون. ئەگەری زۆرە پاش ئەم دۆخە هەنییە چ لەلایەن کۆمەڵگای نێودەوڵەتیی و چ لەلایەن حەماسەوە ڕۆڵی کۆتایی بێت. ئێستا بەرەی ناوەوەی حەماس و بەرەی قەتەرو بەرەی بەیرووت جیاوازن. ئایا ڕۆڵی قەتەر وەک کەناڵێک و ناوەندێکی خاوەن غازو پارە دەتوانێت بەردەوام بێت؟ لە گواستنەوەی دونیا بۆ فرە جەمسەریی، ئەگەری پشێوی و نە بوونی توانا بۆ مامەڵەی خێراو کاریگەر، ئەگەری زۆرە قەتەر بتوانێت ڕۆڵەکەی بپارێزێت لەوەی کە خزمەت بە ڕۆژئاوا بکات و کەناڵی پەیوەندی لەگەڵ نەیارەکانیشدا هەبێت. لە ئیسرائیل ڕۆنین بار سەرۆکی شین بێت، ئەو دەزگایەی کە بەرپرسە لە هەواڵگریی ناوخۆی ئیسرائیل، دوا ڕۆژەکانی بەسەر دەبات. هەرچەندە بەهۆی ناتەبایی و ڕقی زۆری لە نەتەنیاهو، چەند جارێک پێشتر داوای وازهێنانی کرد، بەڵام پاش هێرشەکەی حەوتی ئۆکتۆبەر وازهێنانی حەتمیە، هەروەها نەتەنیاهوش. کۆشکی سپی ئەوەی بەڕونی زەقکردوەتەوە کە دەبێت نەتەنیاهو بڕوات. نەتەنیاهوو، مایەی سەرئێشە بوو بۆ ئەمریکییەکان، بەتایبەتی دیموکراتەکان. ئێستا بەم پشتیوانییە زۆرەی ئەمریکا بۆ ئیسرائیل، ئەستەمە ئیسرائیلییەکان بتوانن لە کەللە ڕەقییان بەردەوام بن. ڕۆیشتنی نەتەنیاهۆ یانی ڕۆشتنی مۆدێلێک لە توندڕەویی و گەندەڵیی. ئایا ئیسرائیل ناچاردەکرێت دەست بە پرۆسەی ئاشتی بکات جارێکی تر. هەمیشە دوو جۆر چارەسەر هەبوو، یان دەوڵەتێک کە هەموان تیایدا هاوڵاتی بن، کە لە ئێستادا وەک مەحاڵ و نەخوازراو دەردەکەوێت، لەبەر زۆر پرسی جیاواز، یان دوو دەوڵەت. ئێستا چارەسەری دوو دەوڵەت زیاتر کردارییە بەمەرجێک دیندارە، ڕقدارە جولەکەکانە پەراوێز بخرێن. بەڵام هەموو ئەمانە ڕێگر نیە لە پرۆسەی ئاشتی نێوان کەنداو و ئیسرائیل. کەنداوییەکان، بە قەتەرییەکانیشەوە، ڕقیان لە حەماسە، پاش هێرشەکەی حەوتی مانگ ئەم ڕقە قوڵتر بووەوە، بەوەی وەها بینرا کە ئەگەری پەکخستنی پرۆژەکانیان و زاڵبوونی ئێران هەیە. هەرچی ئێرانە، هەوڵەکانی جێگای سەرسوڕمان نەبوون. ئێران کە خاوەنی بەرەی بەرگرییە، پرۆژەی جیاوازی هەیە. ئەوەی پێی دەگوترێت بەرەی بەرگریی لەوەڵامی بەرەی شەڕی جۆرج بۆشدا دروستبوو. ئامانجی ئێرانییەکان ڕێگرییکردن بوو لە ئەمریکا لەڕێگای سەرقاڵکردن و شکستهێنانی لە جێگاکانی تر بۆ ئەوەی نەتوانێت ڕاستەوخۆ هێرش بکاتەسەر ئێران. لەم ڕوانگەیەوە بەرەی بەرگریی ئامرازی پاراستنی بەرژەوەندییەکانی ئێرانن. زۆر گرنگە ئەوە بزانین کە دەوڵەت هەرگیز تێکەڵی ناکات لەنێوان ئامرازو بەرژەوەندیدا. ئامراز بەرژەوەندی نییە، بەڵکو بۆ بەدیهێنانی بەرژەوەندییە. ئایا ئەم ڕووداوە ڕاستی پرۆژەی موقاوەوە دەردەخات بۆ هەوادارەکانی. هەرچی ئەمریکایە لە دۆخێکی ئاڵۆزدایە. یەکەم لێکدانەوە ئەوەیە کە بایدن ئەمە دەکات لەبەر هەڵبژاردنەوە، چونکە نەک دەنگی جولەکەکان و کاریگەرییان گرنگە، بەڵکو دەنگی زۆری مەسیحییە زایۆنییەکان زۆر کاریگەرە. مەسیحیە زایونییەکان ئەو مەسیحییە توندڕەوانانە کە بڕوایان وەهایە مەسیح لە قودسەوە دەگەڕێتەوە، بۆیە دەبێت بەرگری لە قودس و جولەکە بکرێت لەم پێناوەدا. ئاینیی بوونی ئەمریکاو ئیسرائیل و حەماس و ئێران، دۆخێکی میتافیزیکی ئاڵۆزی دروستکردووە. ئەوەی لە پەیوەست بە ئەمریکاوە گرنگە، ئایا ئەمریکا پاش ئەم ڕووداوە چۆن هەڵوێستی دەگۆڕێت؟ ئایا ناچاردەبێت جارێکی تر بێتەوە بۆ ڕۆژهەڵاتی ناوەڕاست، یان هەڵکشانی چین و دۆخی ناوخۆیی ڕێگەی پێنادات بەو هەنگاوە هەستێت؟ دیارە هاتنەوەی ئەمریکا، دژ بە بەرژەوەندی بەرەی بەرگرییە، کە ئامانجیان ئەوەیە ئەمریکا لەناوچەکە تێپەڕینن و خۆیان تیایدا باڵادەست بن. ئەمە ڕەنگە هۆکارێک بێت بەوەی تەنها لە ئاستێکی ڕوکەشدا مامەڵە لەگەڵ پرسەکەدا دەکەن. هەرچی عێراقە لە دۆخێکی ناڕوندایە، چونکە ئەکتەرە عێراقییەکان بەکرێگیراوی هێزی دەرەکین و خۆیان خاوەن سەروەری نین. نوکتەکە ئەوەیە کە زۆربەی بەناو سیاسییە عێراقییەکان باس لە سەروەریی دەکەن کەچی خۆیان بڕیاریان لە شوێنێکی ترەوە بۆ دەدرێت. بابێینەوە سەر کوردستان. دەکرێت مەترسیی و لە هەمانکاتدا دەلاقەیەک لە دەرفەت هەبێت، ئەگەر هێزە کوردییەکان توانای تێگەیشتن و خۆ ئامادادەکردنیان هەبێت بۆ دۆخەکە. بەڵام هەموو ئاماژەکان ئەوە دەردەخەن کە کورد لە باشور بە دەست کۆمەڵێک قەیرانەوە دەناڵێنێت کە نە دەیەوێت و نە دەتوانێت چارەسەری بکات. بە گشتی دۆخێک هەیە لە عێراق و کوردستان و لوبنان و یەمەن و ئەو شوێنانە کە بێتواناییە لە چارەسەر یان نەبوونی خواستە بۆ چارەسەر. بۆ نمونە لە قازانجی هیچ ئەکتەرێکی سیاسی نیە باشور کە کێشەکان چارەسەر ببێت، چونکە ئەوان سودمەندی سەرەکی کێشەکانن. خەڵکیش خاوەنی تواناو ئاگایی ئەوەی نیە کە بەدیل پێشنیاز بکات. ئه‌م بابه‌ته‌ له‌ رۆژنامه‌ی (هاوڵاتی) وه‌رگیراوه‌  

پەیڕەو ئەنوەر -لەبری بەرایی: خۆرهەڵاتی ناوەڕاست واناسێنراوە کە سەرزەمینی ئاین و بیروباوەڕەکانە. ئەم فرەچەشنیی و کێڵگەی بیروباوەڕە بۆتە ماتۆڕی بەگەڕخستنی ململانێ و جەنگ. لەدوای دیزانکردنەوەی خۆرهەڵاتی ناوەڕاست لە ١٠٠ ساڵی رابردوودا، سنور، ئیتنیک، ئاین و مەزهەب دەبن بە چوار تەوەری بنەڕەتی بۆ بەردەوامبوون، دامەزراندنەوە و تازەکردنەوەی ئەو جەنگە! وەک چۆن كڵاوس ویتز پێی وایە:<جەنگ درێژەدانە بەسیاسەت بەڕێگەی تر> دەکرێت ئێمەش ئەم جەنگە بە سیاسەتێکی تازە وێنابکەین بە ئامراز و شێوەی تر. -جەنگی ئەکتەرەکان: ئەمڕۆ بزووتنەوەی حەماس-باڵی سەربازی هێرش دەکاتەسەر چەند پانتاییەکی ئیسڕائیلی. هێرشەکە لەدوای جەنگی ٦ رۆژەی عەرەب-ئیسڕائیل ساتەوەختێکی تازە و بێ پێشێنەیە! لەڕووی تەکتیکی جەنگ، جیۆپۆلەتیک، گڕووپی بەئامانجگیراو، دەرگای چوونەژوورەوە، مەیدانی رووبەڕووبوونەوە و زۆر رەهەندی تر! لەڕاستیدا جەنگ لەسەردەمی ئێستادا بەزۆر شێوە گۆڕانی بەسەرداهاتووە! حەماس وەک ئەکتەرێکی نا-دەوڵەتی Non-State Actor لە سێ گۆشەوە<ئاو، وشكانی و ئاسمانی> هێرش دەکاتە نێو پانتایی ئیسڕائیلی وەک ئەکتەرێکی دەوڵەتی State Actor کە پێدەچوو لە خەودا مابێتەوە و چاوەڕوانی ئاکتێکی وای نەکردبێت. هەرچەند لە ئەدەبیاتی جەنگدا دەبێت هەمیشە ئامادەبیت. سەرباز دەبێت زەوی بکات بە دۆشەک و ئاسمانیش بە بەتانی بۆ ئەوەی ئاگایی و ئامادەبوون لەدەست نەدات. ئەمڕۆ ئیسڕائیل ئەو ئاگاییەی لەدەستدا بەڵام ئەو لەدەستدانە سەرەتا و زەنگە بۆ بێداربوونەوە و کاردانەوە! وەک چۆن دوای ١١ی سێپتێمبەر زۆر شت گۆڕا لەدنیادا. -ئیسڕائیل لەناوەوە، ئیسڕائیل لە دەرەوە هێرشەکەی ئەمڕۆ وایکرد ئیسڕائیل وەک دەزگا، سەرباز و جیۆپۆلەتیک لەناوەوە بمێنێتەوە، لە ماڵ<پێچەوانەی زنجیرە درامای فەوزا Fauda کە هەمیشە ئیسڕائیل لەنێو ماڵی دوژمندا ئامادەیە*>. لەڕاستیدا ئەم مانەوەیە پاڵنەری بنەڕتییە بۆ هاتنەدەرەوەی بەخێرایی بەتایبەت کاتێک ئەم جەنگە رەهەندیکی یەکجار قوڵ و ئاڵۆزی هەرێمی هەیە و دووبارە جەمسەرەکان لەشێوەی ناوەند-پەراوێز دەچنە نێو خولێکی تری جەنگان و رووبەڕووبوونەوە. حەماس ئەمجارە لە قوڵایی ستڕاتیژی دنیای ئیسڕائیلی ئامادەبوو، جوڵەی کرد و رێسای جەنگەکانی پێشووی دەستکاریکرد! بەڵام نابێت ئەوەمان بیربچێت کە ئیسڕائیل ئەمجارە دەتوانێت لە قوڵایی ستڕاتیژی خۆرهەڵاتی ناوەڕاستدا ئامادەبێت و کارا بێت<لێدان لە سوریا و ئێران و بەشێکی لوبنان> و داخستنی دەرگای جیۆپۆلەتیک و جیۆسیاسی بەسەریاندا. -ئاسایش و هێزی ناوچەیی پێشتر وادەبینرا کە ئاسایش و سەرچاوەکانی ئاسایش بەتەنها دەوڵەت و هێزی رەقن! روانگەی ریاڵیزمەکان بۆ ئەو جۆرە تێگەیشتنە بۆ ئاسایش باڵادەست و هەمیشە براوەیە. بەڵام روانگەی نوێ بەتایبەت قوتابخانەی کۆپنهاگن بۆ ئاسایش کۆمەڵگە و هێزی نەرم دەکات بەسەرچاوەی ئاسایش و لەناویشیدا سیاسەتی ناسنامە و ئاسایشی کۆمەڵگەیی. ئیسڕائیل لەڕوانگەی دەوڵەتەوە لە ئاسایش دەڕوانێت و بەڕێوەی دەبات. بەتایبەت لەپرسی بەها و ناسنامەدا. دیارە وڵاتانی تری ناوچەکەش هەمانە تێگەیشتنیان بۆ ئاسایش هەیە بەتایبەت تورکیا و ئێران و سوریا و تەنانەت عیراقیش. پێدەچێت ئەم دۆخە ئاسایشییە بەربەستی گەورەبێت بۆ ئیسڕائیل بۆ گەیشتن بە دۆخی ئاشتی یان هاوسنەگی هێز لەگەڵ رکابەرەکانیدا. بۆشاییەکانی ئەمڕۆی نێو دامەزراوەی سەربازی نموونەی ئەو ئاڕگیۆمێنتەن. رەهەندێکی تری رووداوەکە، دامەزراندن و بوون بەهێزێکی ناوچەییە لەڕێگەی ئیسڕائیلەوە بەڵام بە دوو شێوەی جیاواز. دیارە <سعودیە و ئێران> لە هەوڵدان، یەکەمیان لە رێگەی سازان و خۆگونجاندن، ئەویتریش بە رووبەڕووبوونەوە و بەکارهێنانی ئایدۆلۆژیا و پانتایی و جیۆپۆلەتیکی ئەوانیتر. -دووماهی: ئیسڕائیل و فەلەستین<حەماس و فەتح و رێکخراوی رزگاریخوازی فەڵەستینی> زیاتر لە نیو سەدەیە لەجەنگدان. جەنگی کلاسیک، جەنگ لە ئاسمان، جەنگی کۆڵان بە کۆڵان و فۆڕمەکانی تر. ئەمجارە حەماس چۆتەنێو بۆشایی و کەلێنەکانی جەستەی ئیسڕائیلەوە بەڵام زۆر سەختە بتوانێت بمێنێتەوە و درێژە بەم شێوە تازەیەی هێرشبردن و مانەوەیەدا بدات بەتایبەت حەماس هێزێکە هێشتا وەک پەراوێز دەردەکەوێت و ناوەندەکەشی توانای جەنگی لەناو پانتایی ئیسڕائیلی لاواز و زۆر سنوردارە. ئیسڕائیل بێتەدەرەوە و بچێتە قۆناغی هێرشکردنەوە، گۆڕانی خێرا دێتەکایەوە. گۆڕان لە سیستم، هاوسەنگی هێز، بەهاکان، مەیدانی جەنگ، فراوانخوازی و مانەوە، هەژموون و جیۆپۆلەتیک و دابەشکردنەوەی رۆڵەکان وەک چۆن دوای ١١ی سێپتێمبەر هاتنەدەرەوەی ئەمەریکا دەستکاری چەند رژێم و رێسایەکی کرد لەناوچەکەدا.  پێدەچێت بگەڕێینەوە بۆ چیڕۆکی <لەچاوەڕوانی خۆرهەڵاتی ناوەڕاستێکی تازەداین> بەتایبەت کاتێک دەگوترێت: لەجەنگداین و براوەین! جەنگ وەک سیاسەت بەڵام بەڕێگەی تر. *فەوزا، زنجیرە درامایەکی هەواڵگری ئیسڕائیلییە و لەچوار وەرز پێکدێت. باس لە ململانێی نێوان مۆساد و حەماس دەکات کە هەمیشە ئیسڕائیل تێیدا براوە و زاڵە.

د. سەنگەر حاجی سەت ساڵ بەسەر بڕیاری بە فەرمی لکاندنی باشووری کوردستان بە عێراق و شەش ساڵ بەسەر ڕیفراندۆم بۆ سەربەخۆیی کوردستانیان تێدەپەڕێ و هێشتا هەندێک خەڵک کە ڕیفراندۆم سەلماندی کەمینەیەکی کەمن، لەسەر ئاوازی خۆ تۆمەتبارکردن و ئەوی دیکە بە فریشتە زانین بەردەوامن و بەوە خۆیان و خەڵکیش لەخشتە دەبەن کە هەموو ئەوەی بەسەرمان هاتووە و دێ، لێکەوتەی ڕیفراندۆمە، لە کاتێکدا ئەمە ڕێک پێچەوانەکەی دروستە و ئەگەر کورد لەماوەی ئەو سەت ساڵەی تێپەڕیوە چەند جارێک ڕیفراندۆمی بکردبا، ئەوا بەردەوام بە ''ئەوانی دیکە'' کە داگیرکەرانی کوردستانن، دەیگوت من هەم و ئێوە هەر هەوڵێک بدەن، ناتوانن ئیرادەی ژیان و بڕیاردان لەبارەی چارەنووسی خۆمم لێوەرگرنەوە. زۆرن ئەوانەی بە ژێردەستە و پاشکۆ و پەراوێز و خەڵکی جیهانی دووەم و سێیەم و چوارەم ناویان دێ. ئەم زۆرانە دەکرێ ئافرەت بن و بچەوسێنرێنەوە، دەکرێ بەندە بن و خاوەنەکەیان، بەهۆی هەژاری و ڕەنگی پێستیان، بووبێتە خاوەنیان و چۆنی بوێ وا مامەڵەیان لەگەڵدا بکا و دەشکرێ یاریزانێکی تۆپی پێ یان باسکە بێ و لە دونیای پۆستمۆدێرن و پۆست- پۆستمۆدێرندا خوێنی کڕدرابێ و مامەڵەی ژێردەستەیەکی لەگەڵ بکەن، ڕەنگیشە تاکێک بێ، بەدیار شاشەی تەلەفزیۆنێک یان مۆبایلێک دانیشتبێ و کۆنترۆڵێکی لەدەست گرتبێ، یان پەنجە ببزێوێ و وردە ورەدە کەناڵەکانی تەلەفزیۆن یان پەڕە ئەلیکترۆنییەکان هەڵداتەوە و ئومێدی ئەوەبێ کە ئەم، ئەو ئامرازانە و لە ڕێی ئەوانیشەوە جیهانی کۆنترۆڵکردووە، بێ ئاگا لەوەی بووەتە ژێردەستەی تەکنەلۆجیا و تەکنەلۆجیا کۆنترۆڵی کردووە. مرۆڤ بە هەموو ئەوانەی سەرەوە و بە زۆر ڕێگا و شێوازی دیکەش دەبێتە ژێردەستە و پاشکۆ و لە پەراوێزدا دەبێ، بەڵام جۆرێکی ژێردەستەیی و پاشکۆبوون و پەراوێزبوون هەیە کە لە هەموو ئەمانە سەختتر و بەرفراوانتر و درێژخایەنتر و کارەساتبارترە، ئەویش نەبوونی دەوڵەتە، چونکە کە نەتەوە دەوڵەتی نەبوو، هەموو ئەو جۆرە بەندایەتی و ژێردەستەییانە و بگرە زیاتریشی بەسەردا دەسەپێن. ئەو نەتەوانەی دەوڵەتییان هەیە، ئەگەر ژێردەستەش بن، ژێردەستەییەکەیان لە ژێردەستەیی نەتەوە بێ دەوڵەتەکان جیاوازە، ئەگەر داگیرکراویش بن، داگیرکرانەکەیان لە داگیرکرانی خاکی نەتەوەی بێ دەوڵەت ناچێ و ئەگەر تاکێکی نەتەوەی خاوەن دەوڵەت لە ئۆلۆمپیاتێک میدالیایەکی زێڕ یان زیو بباتەوە، دووبارە سەرکەوتنەکەشی لەسەرکەوتنی تاکی نەتەوەی بێ دەوڵەت ناچێ. دوا ڕستە لە کۆپلەی سەرەوە وەردەگرم و لەگەڵ ڕوانینێکی ''هیگڵ'' لێکیان دەدەم کە دەڵێ ''ئەو نەتەوەیەی دەوڵەتی نەبێ، دەکەوێتە دەرەوەی مێژوو''. کوردێک (عێراقی، سووری، ئێرانی، تورکیایی) میدالیاییەکی زێڕی لە ئۆلۆمپیاتێک وەدەستهێناوە، ئەگەر کورد بێ و ڕەگەزنامەی عێراقیی هەبێ، ئەوا بە فەرمی و لەسەر ئاستی دامەزراوە نێودەوڵەتییەکاندا سەرکەوتنەکە بۆ عێراق تۆمار دەکرێ و ناوی کورد لە هیچ کوێ ناییێ، ئەوەی تۆمار دەکرێ مێژووە و کوردیش لە مێژوو، چونکە دەوڵەتی نییە، بەدەرکراوە، کەواتە ئێمە لەدەرەوەی مێژووین. ئەمە نموونەیەکی سادەیە، بەڵام دەکرێ لەسەر هەرچی ڕووداو و دیاردە هەیە کە پەیوەندیی بە نەتەوەی بێ دەوڵەتەوە هەیە، تاقیبکرێتەوە و لەسەر هەموویان ڕاست دەردەچێ. ڕزگاربوون لە پەراوێزبوون و ژێردەستەیی تەنیا کاتێک ڕوودەدا کە نەتەوە بوو بە خاوەنی دەوڵەتی خۆی، چونکە ''دەوڵەت قۆناغێکی ڕاگوزەر نییە لە ژیانی مرۆڤدا و تێیبپەڕێنێ، بەڵکو ئامانجی کۆتاییە''، ئەمەش قسەی ''هیگڵ''ە و واتاکەی ئەمەیە، مرۆڤ کە بوو بە خاوەنی دەوڵەت، ئیدی دەبێ بە خاوەنی زۆر شت و زۆر شتیش چاوەڕێیەتی تا ببێ بە خاوەنی، چونکە بوون بە خاوەنی دەوڵەت، واتا کۆتایی مێژوو، واتا ئیدی لە پشت ئەم خاڵەوە خاڵێکی دیکە نییە، تا تێیپەڕێنێ، بۆیە هەموو ئەوەی ڕوودەدا لە چوارچێوەی بازنەی دەوڵەتدا دەبێ و لەوێ بڕیاری لێدەدرێ. هەر ئەو دەڵێ ''مەبەستی مێژوو دەوڵەتە و مەبەستی دەوڵەت ئازادییە و ئازادیش بەبێ دەوڵەت نییە''، ئەمەش وەڵامێکە بۆ ئەوانەی لە کاتی ئەنجامدانی ڕیفراندۆم بۆ سەربەخۆیی کوردستان، لێرەولەوێ پاساوی ئەوەیان دەهێنایەوە کە ئازادی نییە، بۆیە دەنگ بە ''بەڵێ'' نادەن. ئەوەی ئازادیی دەوێ، دەبێ یەکەمجار دەوڵەتی هەبێ، هەر ئازادییەک لە بێ دەوڵەتیدا، ئازادییەکی لەخشتەبەرە و لە وەهمێک زیاتر نییە و خۆ خەڵەتاندنە. کورد نەتەوەیەکی ژێردەستە و پاشکۆ و پەراوێزخراوە، ئێمە ژێردەستەین و هێشتا ئازاد نین و ئازادیش نابین، تا دەوڵەتمان نەبێ و بە تەواویش نابینە بەشێکی کاریگەر یان لایەنی کەم زیندووی ئەم جیهانە، چونکە ئەو جیهانەی لە سەدەی بیستەمدا داڕێژراوەتەوە، ئێمەی تێدا پەراوێزخراوین. بۆ ئەمە با لە ناوی بەرفراوانترین دامەزراوەی سەر ئەم گۆزەویە ڕابمێنین کە ''نەتەوە یەکگرتووەکان''ە، ئەگەر تێبینی بکەین دەبینین هەردوو زاراوەی ''نەتەوە'' و ''دەوڵەت'' وەک هاوواتای یەکتر بەکارهاتوون، ئەمە دانپێدانانێکە کە ئەوەی دەوڵەتی نییە، نەتەوەش نییە، ئەمەش دووبارە سەلمێنەری ئەوەیە، ئەوەی دەوڵەتی نەبێ، لەدەرەوەی چاکی و خراپی ئەم جیهانەیە. ڕیفراندۆم بۆ ئەوەبوو ئێمەش ببین بە بەشێک لەو چاکی و خراپیانە و بڕیارمان هەبێ، نەک هەمیشە بڕیارمان لەسەر یان لەبارەوە بدرێ. ئێمەی کورد گەورەترین نەتەوەین کە زۆرترین کارەساتمان بەدەست کۆلۆنیالیزم و ئیستیعمار چەشتووە و زۆرترین باجیشمان داوە و دەیدەین، چونکە کۆلۆنیالی نێودەوڵەتین و داگیرکراوی هەرێمین، بۆیە دەبێ بەشێکی کار و بیرکردنەوەمان بۆ قۆناغی پاش-ئیمپریالیزم تەرخان بکەین. ڕیفڕاندۆم ڕەتکردنەوەی پلانی سەت ساڵەی ئیستیعمار و ئەو ڕۆژهەڵاتەبوو کە ڕۆژئاوایی ویستوویانە و دەیانەوێ. ئێمە(زۆرینەمان) لەوێدا گوتمان ''بەڵێ''، بەڵێیەک کە ڕێک تامی ''نا''کەی کامۆی دەدا لە کتێبی ''یاخی''. کامۆ پێیوایە مرۆڤ کاتێک ئازاد دەبێ کە فێربێ بڵێ ''نا''، ئێمەش لە ڕیفراندۆمدا ئەوەمان گوت و لە ساتێکی مێژووییدا گوتمان ئێمە هەین و چەند ڕۆژێکیش بە ڕێگاوە بووین، تا بچینە ناو مێژوو و چیدیکە لە دەرەوەی مێژوو نەمێنینەوە و بۆمان هەبێ قسەبکەین، بەڵام نەیانهێشت... بەشێک لە سیاسیی و ڕۆشنبیرانی کورد لە سەروبەندی ڕیفراندۆمدا ڕۆڵیان زۆر نەرێنی بوو و تاکە شتی سەرزاریان ئەوەبوو کە ڕیفراندۆم نەکرێ، بەبێ ئەوەی هیچ پرۆژەیەکی دیکەیان هەبێ لە بەرانبەر نەکردنی ڕیفراندۆمدا. سپیڤاک کە فەیلەسوفێکی هیندییە بەمشێوەیە لەبارەی ئەو جۆرە ڕۆشنبیرانە دەنووسێ: ''لە باشترین حاڵەتدا، هەواڵهێنی ناوخۆیین، ئەوەمان بۆ دەگوازنەوە کە ڕۆشنبیرانی جیهانی یەکەم، ئەوانەی بایەخ بە ''دەنگی ئەوی دیکە'' دەدەن، دەیڵێن.'' ئەو باسی دەستەبژێر و ڕۆشنبیرانی هیند دەکا، بەڵام بەشێک لە ڕۆشنبیرانی کورد ئەمەش ناکەن و ئەوەی دەیڵێن دووبارە دەبێتەوە پەراوێز بۆ ئەوەی لە ڕۆژئاواوە گوتراوە، چونکە ڕێک چی گوتراوە نایگوازنەوە، بەڵکو بەشێوەیەک لە شێوەکان دەستکاری دەکەن، یان لەگەڵ گوراحی سیاسی و ڕۆشنبیری خۆیان دەیگونجێنن و لەگەڵ ویستی داگیرکەرە هەرێمییەکان موتربەی دەکەن، ئینجا دەیگوازنەوە. هەروەها سپیڤاک کاری قووڵتر بۆ ڕۆشنبیران دیاردەکا و پێیوایە کاری ئەوان ئەوەیە ''پێویستە ڕۆشنبیران هەوڵبدەن گوتاری کۆمەڵگاکانی دیکە بدۆزنەوە و بناسن.''، ئەم دۆزینەوەیە دەبێ بۆ خزمەتی وڵاتی خۆیان بێ، نەک ببنە گێڕەرەوەی ئەوانی دیکە و لە پەراوێزی ڕۆشنبیرانی جیهانی یەکەم و دووەمدا خۆیان مەڵاس بدەن و خۆیان لە ئاوازێک بخوێنن و نەتەوەکەشیان لە ئاوازێکی دیکەدا. سپیڤاک ئاوازی نەتەوە و جەماوەری پێ دروستترە لە ئاوازی ڕۆشنبیر و ئەمە دەڵێ:  ((جەماوەر بە ڕوونی دەزانێ چی دەوێ))، ئێمە جارێکی دیکە بەرەوڕووی ''بابەتی لەخشتەنەبران''- دەبینەوە، جەماوەر زۆر باشتر لە (ڕۆشنبیران) لە بابەتەکە تێدەگەن و ئەمەش بە ڕوونی دەڵێن))، مەبەستی سپیڤاک لێرەدا ئەمەیە کە جەماوەر باشتر دەزانن کۆمەڵگا لە چ کاتێک پێویستیی بە چ جۆرە دەسەڵات و نەریت و کەلتور..هتد هەیە و لەو ڕووەوە ئەوان لە ڕۆشنبیران حاڵیترن. ئەمەی سەرەوە پێمان دەڵێ زیاتر لە سەتا نەوەت و دووی خەڵکی کوردستان لە ڕۆژی ڕیفراندۆمدا بەوپەڕی هۆشیاری و ئاگاییەوە گوتیان سەربەخۆییمان دەوێ و نەچوونە ژێر باری بیرکردنەوەی ئەو سیاسی و ڕۆشنبیرانەی خۆیان لە جیهانی چوارەم دەژیێن و بیرکردنەوە ستۆکەکانی جیهانی سێمان بۆ دەگوازنەوە. هەروەها خەڵکی هۆشیاری کوردستان کە دەڕوانێتە کار و کردارەکانی دوایین حکومەتی عێراق، دەزانێ ئەنجامدانی ڕیفراندۆم چەند زەروور بوو و چەند پێویستە هەمیشە ئامادە بین بۆ ئەنجامدانی ڕیفراندۆمی دیکە.  

  فوئاد سدیق                                                                  ئەركی سەرەكی هەموو جۆرە ئابوورییەك ئەوەیە مرۆڤ بتوانێت پێداویستییەكانی خۆی دابین بكات. بە واتایەكی دیكە ئابووری لە بنەڕەتدا بریتییە لە تێركردنی برسێتی نەك دروستكردنی برسێتی، بۆ نەهێشتنی تێنوێتی، نەك تێنووكردن. یاساو نۆرم و رێكخستنەكانی كۆمەڵایەتیش نابێت بشێوێنرێت یان جێگۆڕكێیان پێبكرێت، بەڵكو ئەمە یاسای كۆمەڵایەتییەو دەبێت هەر یەكەو لەشوێنی خۆیدا جێبەجێبكرێن، چونكە ئەم نۆرمانە سیمایەكی یاسایی و ئەخلاقی و ئایینی و سیاسی .....هتد یان وەرگرتووە. هەر یەكێكیان دەبێت لەگەڵ پێداویستییەكانی مرۆڤدا ئامادەییبوونیان هەبێت و ئەركی خۆیان وەكوو خۆی جێبەجێ بكەن.     راستە هێندێك پێداویستی مرۆڤ هەن، تا رادەیەكی زۆر لە رووی كولتوورییەوە هاوشێوەو گشتگیرن یان ئەو پێداویستییانەی تایبەت بە كولتوورن وەك خواردن و جل وبەرگ  یان شتە ناهەستیارەكانی وەك هونەر  لە جۆری مۆسیقاو سەماكردن و سەفەركردن ، ئەمانە كە دەتوانین بڵێین تا رادەیەكی زۆر سروشتێكی ئەنترۆپۆلۆژییان هەیە،  ئابووریش لە بنەڕەتدا رەنگدانەوەی ئەو نۆرمە كۆمەڵایەتیانەیە.     كولتوور لە بنەڕەتدا كۆمەڵێك بابەتی ئاڵۆزی وەك بیروباوەڕ، هونەر، ئەخلاق، یاسا، بەكورتی كولتوور  بریتییە لە هەردوو لایەنی مادی و مەعنەوی، هەموو ئەو بەرهەمانە دەگرێتەوە كە كۆمەڵگای مرۆڤایەتی لە سەرەتای دروستبوونییەوە تا ئەمڕۆ وەدەستیهێناوە، بەڵام ئەمەش لە كۆمەڵگایەكەوە بۆ كۆمەڵگایەكی دیكە دەگۆڕێت و تایبەتمەندی و خەسلەتی هەر كۆمەڵگایەك كولتوورێكی تایبەت بە خۆی بەرهەمهێناوە. وەك تایلۆر باسیكردووەو نووسیویەتی: كولتوور سیفاتی كۆمەڵگاكانە. كە ئاماژەیە بۆ شێوازەكانی رەفتاری بەشداربووان، واتا نەریتی باوی هەر كۆمەڵگایەكە، كە رۆژانە پێڕەوی دەكات .   دۆركایم كە یەكێك لە دامەزرێنەرانی كۆمەڵناسییە، جەختی لەسەر جیاوازییەكانی نێوان كۆمەڵناسی و ئەنترۆپۆلۆژیا كردۆتەوە. بەتایبەت بۆ ئەوانەی ناوی كەسییان لە چەمكە كاڵەكان  پێباشترە. دۆركایم  بەراوردكردنی روونی تیۆری و تیۆریستەكانی ئەنترۆپۆلۆژی ئاماژە بە بابەتێكی دووبارەبووەوە دەكات: ئایا ئەنترۆپۆلۆژیا وەك زانستێكی كۆمەڵایەتی كە پێوەندی بە كولتوورەكانەوە هەیە، هەوڵی دۆزینەوەی مۆدێل و یاساو پێكهاتەی سروشتی ئەو كولتوورانە دەدات بۆئەوەی بیانناسێتەوەو شوناسەكانیان روونبكاتەوە، یان ئەنترۆپۆلۆژی مامەڵەی ئاشكرا یان شاراوە بە شێوەیەكی سروشتی یان بەشێوەیەكی دیكەی نا سروشتی لەگەڵ دیاردە چاودێریكراوەكان دەكات، كە پێش هەموو شتێك سەرپێچی لە مۆدێل و یاساو پێكهاتەكان دەكەن ؟   ئێمە كە باسی سیستەم دەكەین، دەبێت ئەو راستییە مێژووییەش باس بكرێ، سیستەم داهێنانێك بووە لە ئەقڵی یۆنانی كۆن، واتا داهێنانی سیستەم بەرهەمی ئەقڵی مرۆڤایەتی یۆنانییەكانە، لەبەرئەوەیە برتراند راسل دەڵێت، هەموو مرۆڤایەتی قەرداری یۆنانە. هایدگەریش دەڵێت، هەموو فەیلەسووفەكانی رۆژئاوا لە دامێنی ئەفڵاتونەوە لەدایكبوون. هیرۆدۆتس پرسیاری ئەوەی كرد بۆچی فارسەكان ، میسرییەكان ئەو سیستەمەیان (لە بنەڕەتدا رێكخستنی شتەكانە) دانەهێنا؟ ئا لێرەوە ئەو پرسیارە واتایەكی دیكە دەبەخشێ  ئەویش ئەوەیە ئەقڵی یۆنانی جیاوازبووە لە ئەقڵی میسری و فارسی. لە ئەنترۆپۆلۆژیای كولتووریشدا ئەوە روونە كە سیستەم سیفەتێكی تایبەت بە كولتوورە.كولتووری نەریتی كە لە ناوەرۆكدا ئەفسانەگەراییە، ناتوانێت ئەقلی نوێ بەكاربهێنێت.     كورد چونكە خاوەنی مێز رازاندنەوەی ژەمی خواردنی سبەینێ نییە ، یان پارەی ئەوەندەشمان نییە كە پێداویستییەكانی ئەو خواردنانەی سبەینان بۆ خۆشمان نا بۆ رۆڵەكانمان بكڕین و دابینیان بكەین، ئەمە مانای ئەوەی سەرەوە دەگەیەنێت كە نووسیبووم كەمیی . كەمیی دەبێتە هۆی پرسەكانی برسێتیكردن و تێرنەكردن و تێنووكردن و...هتد. هەموو قەیرانەكان سەرچاوەكەی لە كەمییەوەیە وەرگرتووە.  ئەم بابەتە هەستیارە  لەلایەن یەكەم ئابووریناسی لیبڕالی (بێرنارد ماندێڤیل) لە كتێبی ئەفسانەی هەنگەكان ساڵی 1705  هەروەها ئادەم سیمس لە كتێبی تیۆری هەستە ئەخلاقییەكان بە وردی باسكراون.    دۆزینەوەی دەستی نەبینراو وەك یاسایەكی ئابووری هی ئادەم سیمیسە، بەڵام ئەوەش راستە كە رەوایەتی ئەم یاسایە بە كۆمەڵێك مەرج بەستراوەتەوە  كە لە نامەی هەستە ئەخلاقییەكاندا ریزكراون و باسكراون. بۆیەش پێیدەوترێ یاسا. یاساش لەناو سیستەمدا جێگیركراوە، ئەگەر یەكێك لە مەرجەكان  ون بێت ، ئەوا دەستی نەبینراو كارناكات و ئەنجامە لیبڕال – ئابوورییەكەی شكستدەهێنێت. ئازادی ئابووری چ وەك ئەنجامێكی وەسفكەر، چ وەك ئامانجێكی سیاسەتی ئابووری پەیوەندی بە پێشمەرجەكانەوە هەیە، پێشمەرجەكانیش (پێشبینیكراو، خوازراو، رەوابوون)ئەمانە پێشمەرجی دوور مەودان.  چونكە ئازادی لە بنەڕەتدا بەرهەمی سروشت نییە، بەڵكو بەرهەمی ئەخلاق و یاساو ئاگاداركردنەوەی بەرانبەرەكان و ئەوانی دیكەیە، لە ئەنجامدا ئەم مەرجانەی كە باسمكردن پێچەوانەی ئازادی نین، بەڵكو بەتەواوی لەگەڵیدا كۆكن. كەواتە ئازادی بەرهەمی هەندێك بڕگەی یاساییە. ئا لێرەدایە ئادەم سیمیس  باسی هەندێك مەرجی پێشوەختەی كاركردنی دەستی نەبینراو دەكات، وەك: یاسا، پێوەندی ئازاد، ئەخلاق، بەكارهێنان، نەبوونی سنوورداركردنی كێبڕكێ بەتایبەتی سەبارەت بە حكومەت و بانكەكان، جگە لە پێشمەرجەكان، سیمیس باس لە رێوشوێنی پاراستن لە دژی هەژاری  دەكات  بە جۆرێك كە ئەمڕۆ  لە ژێر چەمكی تۆڕی كۆمەڵایەتیدا دەخرێتە ژێر كاریگەرییەوە.    لە راستیدا بنەمای دادپەروەری بە هیچ هێزێك لە بازاڕە داراییەكاندا جێبەجێ ناكرێت. ئەمەش بەشێكی  بۆ چوارچێوەی تا رادەیەك نەریتی یاساكانی دادپەروەری دەگەڕێتەوە، بەڵام زەبرێكی چاكسازیشی هەیە. كۆمپانیاكان ئارەزووی بەهێزكردنی  دەزگاكانی جێبەجێكردنی گشتی دەكەن نەك روو لە جێبەجێكردنی یاسای تایبەت بكەن. ئەوان بنەمای دادپەروەری هەرگیز بەهێز ناكەن. ئەمەش جێگای سەرنجە چونكە پێدەچێت بە زەحمەت بتوانرێت بازاڕە داراییەكان بە دەزگاكانی چاودێری كە پێشوەختە كاردەكەن، رام بكرێت.   ئەوەندەی سەیری كولتووری كوردیی دەكەم، ئەو بڕوایەم بەهێزتر دەبێت كە كولتووری كوردی لە پەراوێزی مێژوودا ماوەتەوە. راستە هەموو كولتوورەكان رەگ و ریشەیان لە نەریتەكانیاندایە، بەڵام كولتووری كوردیی نەیتوانیوە لەگەڵ سیماو جەوهەری مۆدێرنێتە خۆی بگونجێنێت، بەڵكو  بەردەوام تووشی پێكدادان بووەو دەبێت. هۆكارەكەش ئەوەیە ئەقڵی كوردی گەشەی پێویستی نەكردووە، كە ئەقڵ گەشە نەكات، كولتووریش بەرهەمی ئەقڵەكانەو ناتوانێت لەگەڵ سیستەمی كۆمەڵایەتی و مەعریفی نوێدا خۆی بگونجێنێت، وەك ئەوەی ئێستا لە ئەفغانستان، ئێران، توركیا،عێراق، سعودیە...هتد  زۆرجار ناكۆكییەكان لە قووڵبوونەوەدان.      ئێمە لە پەراوێزیشدا لەدایكبووین، بۆیە كولتوورەكەشمان هەروا بەردەوام لە پەراوێزدایە. بەڵام بە توندی كەوتووینەتە نێو بلۆكە جیاوازەكانی مەعریفەو لەنێو ئەو ململانێیەدا ژیان دەبەینە سەر. بێگومان ململانێكانیش نەیانتوانیوە ئەو بلۆكانە تەنانەت بە ئاراستەی كەوتن بجوولێنن، چونكە ئێمە لەنێو هەڵەیەكدا گیرمان خواردووە، ئەویش بریتییە لە جیهانێك كە بەرپەرچدانەوەی یەكتری و شێواندنی یەكترییە. خەڵكێكی زۆر لەم نێوانەدا باجی گەورەی داوە.  هەر هیواو ئومێدێكیش بۆ داهاتوو تا رادەیەكی زۆر بەندە بە دەرئەنجامی ئەم هەموو ناكۆكییە قووڵ و ئەم رووبەڕووبوونەوانەی كە تا ئێستاش هەر بە چڕی بەردەوامن.    تۆ سەیركە ئەورپا كاتێك دابڕانێك لەگەڵ رابردوویدا دەكات، خاوەنی یاساكانی خۆی و لۆژیكی باڵادەستی خۆیەتی، هێزی مادی خۆیان بۆ دەستبەسەرداگرتنی بەكاردەهێنن. بەڵام ئێمەی كورد تا بناغەكانمان دەهەژێنین بۆ ئەوەی بیڕووخێنین، ئەخلاقمان لەگەڵیدا دەڕووخێت. گەندەڵی و دووڕوویی، هێواش هێواش دەمانگوازنەوە نێو دۆخی كۆیلایەتی سیاسی و كولتوورێكی شێواو.     جاك بێرك كاتێك ئاماژەی بۆ زمانی عەرەبی كردووە، تێبینی ئەوەیكردووە، زمانی عەرەبی هەموو وشەیەكی بۆ   چوون بەرەو خودایە. واتا بۆ شاردنەوەی واقیع داڕێژراوە  نەك بۆ ئەوە بێت لە واقیع بكۆڵێتەوە. گرژی نێوان پەردەلادان لەسەر ناوچە نوێیەكانی واقیع و ناچاری نوێبوونەوەو گۆڕان لە بواری مەعریفیدا، بێگومان درز دەخاتە نێو هۆشیاری ئەگەر ئەو هۆشیارییە لە بنەڕەتدا هەشبێت. هەرچەندە شتەكان لە دەرەوەی دەسەڵات دەگۆڕێن ، بەڵام ئەوەی گرنگە ئەوەیە مرۆڤ چۆن لەگەڵ ئەو بۆشاییە ناوخۆییەی كە بەردەوام فراوانتر دەبێت دەتوانێت  بژیت و نەگۆڕێت !!.    ئێمە پێمان خۆشبێت یان ناخۆشبێت دروستبوونی ئەم بۆشاییە واتای چارەسەرنەكردنی كێشەكانمانە، كە بنەمای هەموو شێواندنە ئەقڵی و دەروونییەكانمانە، كە جیهانەكەمانیان وێران كردووە. وەك چۆن هیچ كەسێك ناتوانێت یان نایكات لەجیاتی مردنی كەسێكی دیكە خۆی بمرێنێت، ئاوەهاش تاكە كەسێك ناتوانێت بەتەنیا رووبەڕووی هەموو كێشە شارستانییەتەكان ببێتەوە، بەڵكو پرۆسەیەكی كۆمەڵی و دەستە جەمعییە. لەولایشەوە تاكە كەسێك ناتوانێ پێڕەوی تەواوی پرۆسە شارستانییەتەكە بكات، لەكاتێكدا لە نێو كولتوورێكی نەریتی و ژینگەیەكی كۆمەڵایەتی ئاڵۆزدا هەناسە دەدات و رۆژانە لەناو رۆحیدا ئەزموونیان دەكات.   لە رۆژئاوادا، شۆڕشەكان بەهۆی هەڵچوونە زانستی و تەكنیكییەكانەوە دروستبوون، لێرە لەم هەرێمەدا، بیرۆكەی نوێ جار جار دەمانلەرزێنن و موچڕكەیەكی هۆشیاربوونەوەمان بە سەرتاپای جەستەماندا(مێشك و دڵ)دەهێنن، شوێنەواری خۆشیان بەسەر تاك تاكەماندا جێدەهێڵن، بەڵام ئاسان نییە ناوەرۆكی یادەوەرییەكانمان، بگۆڕین، هەر یەك لە ئێمە ئاماژە بۆ رەچەڵەكناسی خۆی دەكات و دەگەڕێتەوە سەر رابردوو ، دەچێتەوە ناو پەراوێزی مێژوو. لەكاتێكدا بیری دەچێتەوە كە جیهان گۆڕاوە، زۆر گۆڕاوەو مێژوو تەنیا لای ئێمەیە وەستاوە، دەنا مێژوو لە سەرتاسەری ئەم جیهانە بۆ پێشەوە لە جوولەدایەو نەوەستاوە. ئەم نوێبوونەوەی كۆمەڵگای مرۆڤایەتییە لە جیهاندا، شێوازی نوێی بەرهەمهێناوە، بە جۆرێك پێوەندییە كۆمەڵایەتییەكانیشی لەقاڵب داوە. بەڵام ئەوەتا لەناو ئێمە تازە بە تازە خێڵ و عەشیرەت و بەرەباب و ....هتد دەبووژێنەوەو گەشە دەكەن و گرنگییان پێدەدرێ. كورد راستی گوتووە، گوتوویەتی: تازە بە تازە سمتی خوارەو مەیخوازە!!.      ئێستا ئێمە كەسمان ناتوانین ئەو پنتە دیاریبكەین كە بڵێین لەنێو ئەو پێشكەوتنەی جیهاندا ئێمە ئا لێرەین. لە كوێین؟ كەس ناتوانێ دەستنیشانی بكات كە ئێمە لە كوێی ئەو پێشكەوتنەی جیهانین .. ئەو پێشكەوتنەی رۆژئاوا، یان باشووری رۆژهەڵاتی ئاسیا، كە لە راستیدا پێشكەوتنێكی زۆر گەورەیە، بۆ ئێمەی كورد هیچ گرنگییەكی نەبووەو نییە، چونكە ئێمە بەردەوام لە هەوڵی ئەوەداین رابردووی خۆمان زیندوو بكەینەوە، بێئەوەی یەك زەڕە ئایندەی خۆمان بدۆزینەوە، یان بتوانین تۆزقاڵێك ئایندەمان تێكەڵ بە ئەمڕۆمان بكەین.    تا ئێستاش ئەو بیرۆكە ئەفسووناوییە باوی هەیە كە باپیرانمان دەیانوت  زوحاك دوو ماری لەسەر شان روابوو، دەبوو رۆژانە لە مێشكی كوردان دەرخواردی ئەو دوو مارە بدرێت  تا برسی نەكرێن، ئاخر برسی بكرێن ناچار دەبن پەلاماری سەرو كەللەی زوحاك دەدەن و دەیخۆن. ئەو بیركردنەوە ئەفسانەییە، تا ئەمڕۆش لای زۆرێك لە خەڵكی جێگای راستییە، وەك چۆن پێیان وابوو تەگە جۆرە شیرێكی زۆر تایبەتی هەیەو نا بینا چاكدەكاتەوە، شیری تەگە ببوو بە ئەفسانەیەكی زۆر سەیر. یان ئەو كچەی فڕی بۆ ئاسمان و دوایی هاتەوە نێو ماڵی خۆی و نیشتەوە!! ...هتد. ئەمجۆرە نموونانە پێكهاتەی ئەفسانەیی واقیعێكی نەگۆڕن، دەبێت بە تێپەڕبوونی كات بگۆڕدرێن، بەڵام هەمیشە دەبینرێن، بەمەش هەمان رۆڵی مانەوەیان دەگێڕن. كاتێك لە كولتووری كوردی دەڕوانی، گۆڕانكارییەكی ئەوتۆ بە ئاراستەیەكی ئەرێنی نادۆزیتەوە، لە راستیدا هیچ لادانێك یان وەرچەرخانێك لە بنەما رێنماییە سەرەكییەكانی كۆمەڵگاكەدا نادۆزیتەوە، چونكە لە بنەمادا كۆمەڵگاكە هێشتا كۆمەڵگایەكی نەریتییەو، لە گۆڕانكارییەكاندا دوورەپەرێزە.   راستە كورد بە رێژەیەكی باش لە قوتابخانەكاندا دەخوێنن، فێری بیركاری و زانست و ئەدەب و جوگرافیاو مێژوو دەبن، بەڵام سەرچاوەكانی ئەم هەموو زانیارییە جیاوازانە لە كوێوە دێت و مامۆستاكان كێن كە بۆ قوتابیانی دەگوازنەوە؟. سەرەڕای ئەوەش با ئەوە بپرسین ئایا ئەو كەرەستە مەعریفییەی  قوتابی لە قوتابخانەكاندا فێری دەبێت، دەتوانێت جانتایەك لە فیكری مرۆڤی مۆدێرن دروستبكات؟!. ئایا زانیارییەكان پچڕ پچڕ و پارچە پارچە نین؟ كوان ئەو بابەتە زانستی و مەعریفییانەی كە شانازی پێیانەوە بكەین؟ هەر لە بنەڕەتدا ئەو سیستەمی خوێندنە، دوای دەیان ساڵ، كە ئەنجامێكی جوانی بەدەست نەهێناوە، بۆچی چارەسەر نەكراوە، هەر گۆڕانكارییەك لە دوای گۆڕانكارییەك ، كۆمەڵێك كێشەی نوێی بۆ خۆی دروستكردۆتەوەو ، قوتابی بۆ خاڵی سفر گەڕاندۆتەوە. بۆچی پلانێكی تۆكمە بە ئاراستەی چارەسەركردنی دانەنراوە؟! ئەمەیە مانای كۆمەڵگای نەریتی و كولتووری پەراوێزی مێژوو، ئەقڵیەتی چەقبەستوو، دەروونێكی ئاڵۆز.   ئەو  سی و چەند ساڵەی دوایی كە بە حیساب هەناسەیەكی ئازادیمان هەڵمژیوە، راستە بە رواڵەت سەردەمێكی نوێ بووە،بەڵام لە كرۆكدا سەردەمێكی ژەنگاوی بووە. ژەنگ هەموو مێشكمانی گرتووەو تێكەڵ بە خوێنمان بووە، ژەنگ رێگەی لێ گرتووین بیربكەینەوە ، بۆیە پێش ئەوەی بیر لە سیاسەت بكەینەوە پێویستمان بە شۆڕشە، شۆڕشی مەعریفی و كۆمەڵایەتی.  

  د. نیاز نەحمەدین دەوڵەتی هەژار ئاسانتر دەتوانێت دەوڵەمەند ببێت وەک لەوەی دەوڵەمەند دەوڵەمەندتر بێت. ئەگەر ئەم گریمانەیە لەسەر ئاستی وڵاتان راست بێت، ئەوا لەسەر ئاستی دامەزراوەکانیش راستە، تەنانەت بۆ تاکەکانیش. بەڵام مەرجی خۆی هەیە.   نهێنیی گەشەی ئابووریی هیچی تر نییە جگە لە گەشەدان بە توانای بەرهەمهێنان (productivity)، یان بڵێم بەرهەمداریی. زۆر بە کورتیی، کرێکارێک یان جوتیارێکی کورد دەکرا کێبڕکێی کرێکار یان جوتیارێکی تورک یان فارس بکات ئەگەر تراکتۆر و تراکتۆری باشتر، کۆمپیوتەر و کۆمپیوتەری باشتری بەردەست بوایە، ئاو و ئاوەڕۆ و رێگای هەبوایە. کرێکار یان جوتیارێکی کورد پێویستی بەوەش بوو خوێندەوار بێت و فێریش بێت مامەڵەی دروست بە تراکتۆر و شۆفڵ و کۆمپیوتەرەوە بکات، ئەوەی پێی دەڵێن سەرمایەی مرۆیی کەڵەکە بکردایە، لە بری ئەوەی بە دیار ئازاری رابردووەوە گیانبکێشێت و هەر لە چاوەڕوانیی شتە لە کیسچووەکاندا بژی. سی ساڵ بەس بوو بۆ ئەوەی زۆر لە کێشە سەرەتاییەکانمان چارەسەر ببن و لە زۆر شتدا بە تورکیا و ئێران بگەینەوە. لە ١٩٦٠دا هێشتا بە پێوەری داهاتی ڕاستەقینەی تاک کوریای باشور هەژارتر بوو لە هیندی ئەمڕۆ. بە درێژایی سی ساڵی دواتر، ئابوورییەکەی بە تێکڕا بە رێژەی ٧٪ گەشەی کرد. گەشەکە هێندە خێرا و بەردەوام بوو، بە موعجزە ناسێنرا. بەچی؟ بە پاشەکەوتکردن (قوربانییدان بە بەشێکی ئێستا)، کە ئاراستەی وەبەرهێنان کرا و لەمیشەوە سەرمایەی مادیی زیاتر کەڵەکە بوو (واتە تراکتۆری زیاتر، دەڕاسەی زیاتر، رێگا، هتد). هاوشانی ئەمەش بە پێگەیاندنی خەڵکەکەی. بەوەش کە سودی لە دەرفەتی سەردەمەکەی بینی، کە پێشتر نەبوو (بۆ نمونە گەشەی تەکنۆلۆجیی). دەکرێت بڵێم: بەوەی بە دیار رابردووەوە دۆشداماو و چاوبەفرمێسک نەبوو، سەرکردەکانیشی بەو شێوەیەی لای ئێمە خەریکی گیرفانپڕکردن نەبوون. ئەمە بۆ ئێمە خەفەتێکی گەورەترە. دەرفەتەکانی سەدەی نوێ زیاتریش بوو لەوەی لە ساڵانی شەستەکاندا بەردەست بوون، بەڵام ئاگری ئەو شەڕەی شەش ساڵ دوای دەستپێکی گەشەی کوریای باشور رویدا (واتە ١٩٦٦) بەشێوەی کاتیی نەبێت هەرگیز نەکوژایەوە. ئاخر تۆیەکی نەگبەت کە هەمیشە هاوارتە "شاخەکان نەبێت کەس هاوڕێمان نییە"، با دە هەزار کادری بەتوانات لە بوارە جیاوازەکاندا دروست بکردایە، سەد کۆمپانیای بەهێزت دروست بکردایە، بزانە لە بازاڕدا چیت بە نەیارەکانت دەکرد؟ ئێ ئەچیت لە بارەگاکاندا باسی پیرۆزیی سەرکردەی خۆت و ناشیرینی سەرکردەی نەیارەکانتی بۆ دەکەیت و بە شەڕیان دەدەیت، ئەوەمان بەسەر دێت ئێستا بەسەرمان هاتووە.   نەچووە بچێ، تۆ ئەگەر دەزگایەکت هەیە، یان وەک تاک، تا دەتوانیت مۆدێلی ئەم دەسەڵاتدارە مایەپوچانە دووبارەمەکەرەوە. ئەوەی خلیسکاوە، دەیەوێت وەک خۆی بخلیسکێیت. زۆر لە ئێمە بە شێوەی تر وەک ئەوانمان کرد، چونکە هیچ نمونەیەکی سەرکەتوومان لەبەردەستدا نەبوو. ئێمەش بە دیار رابردووەوە گریاین و هیچمان بۆ ئەمڕۆ هەڵنەگرت و نەخستەگەڕ. پاشەکەوت بکە، سەرمایەی مادییت کەڵەکە بکە، بە رێگەیەکی دروست بیخەرەوە وەبەرهێنان، هێزی کارەکەشت لەگەڵیدا گەشە پێ بدە، وزەی خۆت مەخە شەڕی قورسەوە، دەتوانیت بگەیتەوە بەو دەزگایانەی لە پێشتەوەن.  گەیشتنەوە مانای ئەوەی ئاستی داهاتی دەزگاکەت و کارمەندانی دەزگاکەت بەرز دەبنەوە و دەگەنەوە ئاستی ئەوان. ئەمە باشە. خۆ گەر توێژینەوەی قوڵ بکەیت، رەنگە بەختی ئەوەت هەبێت گەشەکەت زۆر درێژخایەن بێت. ژیانی زۆر لە جیلەکانی ئێمە بە شێوەی ئەرجەنتین و ئەفریقا رۆی. بە پێوەری داهاتی راستەقینەی تاک، ئەرجەنتین لە ١٩٠٠دا لە پێش ئەمریکاوە بووە، ئەوروپییەکان بەرەو ئەرجەنتین کۆچیان دەکرد. بەڵام دواکەوتنێک دواکەوت هەرگیز نەگەیشتەوە بە وڵاتە پێشکەوتووەکان. نزیکەی هەشتا دانە ساڵ (لە ١٩٢٠ەوە بۆ ٢٠٠٠)، ئەرجەنتین خۆی پێ نەگیرایەوە و تیاچوو. خلیسکان دەشێت کەوتنی سەرجێگای درێژخایەنی بەدوادا بێت. ترسی من لە دواکەوتن نییە، بەڵکو لە کەوتن و نغرۆبوونی درێژخایەنە. گەشەی ئابووریی بیاباننشینی ئەفریقا بۆ ماوەی ١٤ ساڵ (لە ١٩٨٠ بۆ ١٩٩٤) بە رێژەی ١٣٪ دابەزی. ئەگەر بە کەیسی ئەرجەنتین ئەڵێن "نائومێدبوون"، ئەوا بە کەیسی بیاباننشینی ئەفریقا ئەڵێن "شکستخواردوو". ئێستای ئێمە لەوەی دووەمەوە زۆر نزیکە، واتە لە نائومێدیی دەرچووە. با جارێکی تریش بیڵێمەوە: وەک لای خۆمان، شەڕ، شەڕی ناوخۆ و ناسەقامگیریی و هەڵپەی دەستگەیشتن بە سامانی سروشتیی (بۆ نمونە لە نایجیریا) ماڵی ئەفریقییەکانی وێران کرد، وایکرد کەس بە لای کەڵەکەکردنی سەرمایەی مادیی و مرۆییدا نەچێت.    نمونەی وەک ئەفریقا، عێراق، سوریا، هەرێمی کوردستان وایکرد ئابوورییناسان بڵێن: بەداخەوە، مەرج نییە وڵاتان لە داهاتدا یەکبگرنەوە، بەڵکو دەکرێت زۆر لە یەکتر دووربکەونەوە. ئەم قسەیە چەند بۆ وڵاتێک راستە، هێندەش بۆ تاک و دەزگاکان راستە. دەرفەت هەیە تۆ وانەکەیت، تۆ ئەم بازنەیە بشکێنیت و نەچەقیت، تۆ وەک تاک یان بزنز بە رێگەیەکی تردا بڕۆیت. دەرفەت هەیە چەند ساڵێکی تر سوپاسی خۆت بکەیت کە لە شوێنێکی بەرزتریت، بەتایبەت لە شوێنێکدا کە خاکەکەمان لە رووی جیۆگرافییەوە قفڵکراوە. دەرفەت هەیە تۆ هاوار نەکەیت و نەڵێیتەوە: کەس هاوڕێم نەبوو جگە لە چیاکان!

سه‌ردار عه‌زیز- تایبەت بۆ ڕۆژنامەی هاوڵاتی نوسراوە تورکیا لە هەوڵێکی چڕدایە بۆ ئاساییکردنەوەی پەیوەندییەکانی لەگەڵ عێراقدا. هەندێک وەهای دەبینین بەشێکە لە هەوڵی وەرچەرخانی تورکیا بەرەو کەنداو، لەپێناو بوژانەوەیەکی خێرای ئابوری وڵاتەکەیدا. لە پاش هەڵبژاردنەوەی بە سەرۆک کۆمار ئەردۆگان هەرزوو وەزیری داراییەکەی نارد بۆ کەنداو و پاشان خۆیشی بە دوایدا ڕۆشت. وەرچەرخان بەرەو کەنداو کۆمەڵێک هۆکاری زۆری لەپشتە، لێرەدا ناچینە تان و پۆیانەوە، بەڵام هەوڵدان بۆ ئاساییکردنەوە لەگەڵ دەوروبەردا یەکێکە لە ستراتیژەکان، لەنێویاندا عێراقیش. بەڵام عێراق وەک وڵاتانی کەنداو نیە. لەنێوان وڵاتانی کەنداو و تورکیا سنورو کێشەی زۆری ئاڵۆزبوونی نیە، بەڵکو ئەوەی هەبوو چەند پرسێکی بچوک و دەرەکی بوو. بۆ نمونە لەنێوان تورکیاو سعودیەدا، پرسی جه‌مال خاشقچی هەبوو، هەر زوو وەلانرا. هەروەها لەنێوان ئیمارات و تورکیا پرسی بەکاربردنی ئیخوان هەبوو، ئەویش وەلانرا. بەڵام لەگەڵ عێراقدا پرسەکان دێرین و ئاڵۆزن. لەدوا توێژینەوەم بۆ خانەی بیری ئیماراتی، جەختم لەسەر ئەو دیدە کردەوە کە بەهۆی ئاڵۆزی پەیوەندییەکانیانەوە، عێراق و تورکیا هەرگیز ناتوانن پەیوەندییەکانیان بگەنە ئاستی ستراتیژیی، بەڵکو هەمیشە بە نیمچەیی دەمێنێتەوە. سەردانی وەزیری دەرەوەی تورکیا، بەمەبەستی ئامادەسازیی بوو بۆ هاتنی ئەردۆگان، کە پلان وەهایە مانگی داهاتوو سەردانی عێراق بکات. ئەردۆگان هەتا ئێستا دووجار سەفەرەکەی دواخستوە، بەڵام ئایا لە سێیەم جاردا سەفەر دەکات؟ بەڕای ئێمە ئەگەری لاوازە، چونکە وەها دەردەکەوێت کە وەزیری دەرەوەی تورکیا نەگەشتبێتە هیچ ڕێکكەوتنێک لەگەڵ عێراقییەکاندا. گەورەترین هەنگاو لە هەموو بوارەکاندا دروستکردنی لیژنەیە، کە لە ئەدەبیاتی سیاسی عێراقیدا، یانی دێزە بە دەرخۆنە. لەکاتێکدا چەند پرسێکی گەورەو ئاڵۆز لەنێوان عێراق و تورکیادا هەیە، بەڵام جۆرو پەیوەندی ئەم پرسانە گرنگن. هەندێک پێیان وەهایە کە پرسەکان وەک پاکێجێک وەهان و ناتوانرێت لە یەکتر جودابکرێنەوە. جوداکردنەوەی پرسەکان و مامەڵەکردن لەگەڵ ئەو پرسەی کە چارەسەر دەبێت و دواخستنی ئەوەی لە ئێستا چاره‌سەر نابێت، ڕێسایەکی باوی نێو سیاسەتی نێودەوڵەتییە. لە هەمانکاتدا هەردوو وڵات ئەولەویەتیان جودایە. بۆ عێراق ئاو لە سەرووی هەموو پرسەکانەوەیە، بۆ تورکیا پرسی پارتی کرێکاران. بەڵام پرسەکانی تری وەک هەناردەی نەوت، یان قەرەبووکردنەوەی ئەو برە پارەیەی کە دادگای پاریس بە سەر تورکیادا سەپاندی، هەروەها ڕێگریی لە بەردەوامی دادگاکەو درێژەدان بە بەشی دووەمی دادوەرییەکە کە دەربارەی ساڵانی ٢٠١٨ هەتا ٢٠٢٣یە. بەڕای من پرسەکان بۆ عێراق جگە لە ئاو، هەرێمی کوردستانە. لە کاتێکدا لۆجیک وەهایە کە عێراق دەستبەرداری پرسی دادگای پاریس ببێت هەتا تورکیا ئاوی زیاتری بۆ بەرداتەوە، چونکە پرسی ئاو لە عێراقدا پرسی مان و نەمانی جۆری ژیان و ژیاری ملیونان خەڵک و زەوی و زارو زیندەوەرە. بەڵام عێراق ئەوە ناکات، چونکە وەها دەبینێ کە پرسی نەوت گرنگ نیە، بە تایبەتی لە ئێستادا، کە نرخی نەوت بەرزەو عێراق، تەنها بە بڕی نزیکەی ٢٠٠ هەزار بەرمیل رێگریی لێکراوە. بەڵام گرنگی پرسی نەوت بۆ عێراق لە ئەوەدایە کە ڕاستەوخۆ پەیوەستە بە پێگەی هەرێمی کوردستانەوە. پلانی ئەم حکومەتەی ئێستای عێراق ئەوەیە کە هەموو پەیوەندییە دەرەکییەکانی هەرێمی کوردستان کۆتایی پێبهێنێت و بیکات بە یەکەیەکی ناوخۆیی دابڕاو لە دەرەوە. لەم پێودانگەوە، عێراق پرسی هەناردەی نەوتی هەرێم وەک پرسێکی جیوپۆلەتیکی دەبینێت لەنێوان هەردوولاداو نایەوێت هەرێم و تورکیا پەیوەندییان باش بێت، چونکە بە دیدی ئەوان تورکیا سەرچاوەی بەهێزبوونی هەرێم بوو لە ڕابردوودا. ئەم پلانە هەروەها ڕەهەندی ئیقلیمیشی هەیە. بۆیە بەغدا لە ئێستادا نایەوێت و هەروەها ناشتوانێت لە قەرەبووەکان خۆش بێت و لە کەیس دادگای پاریس بکشێتەوە. دیارە تورکەکان پرسی پارتی کرێکاران زۆر دەهێننە بەرباس. بەڵام بەڕای من پرسی پارتی کرێکاران پرسێکی جیدیی نیە بۆ ئێستای تورکیا. ئێستا پارتی کرێکاران لە دەرەوەی تورکیایە. تورکیا ئەم پرسە بەکاردەبات وەک ئامرازی فشار بۆسەر عێراق هەتا ناچاری بکات بە سازش لەبواری تردا. دیارە لە ڕوانگەی جیوپۆله‌تیکی فراوانەوە، تورکیا ئامانجێک و دوو خەمی هەیە، ئامانجی تورکیا ئەوەیە بگاتە قوڵایی جیهانی عەرەبی سوننە. دوو بەربەرست لەبەردەم ئەم گەیشتنەدا هەیە، یەکەم، ئەگەری دروستبوونی پشتێنەیەکی کوردی بوو لە سنوری ئێرانەوە هەتا عەفرین، دووەم دروستبوونی پشتێنەیەکی شیعەیە لە تارانەوە بۆ بەیروت. تورکیا ئەم پشتێنانە وەها دەبینێت کە بەربەست دروستدەکەن لەبەرامبەر تورکیادا بۆ گەیشتن بە پارەو بازاڕو سامانی وڵاتانی کەنداو. هەر لەم ڕوانگەیەوەیە کە تورکیا پرۆژەی ڕێگای گەشە بە بایەخێکی زۆرە مامەڵە دەکات، چونکە ئەو پرۆژەیە، ئەو دوو پشتێنەیە کون دەکات و تورکیا ڕاستەوخۆ دەگەیەنێتە کەنداو. دیارە لە ئێستادا تورکیا، عێراق خۆی وەک چەشەیەکی گەورە دەبینێت کە خاوەنی داهاتی زۆرە بەهۆی بەرزی نرخی نەوتەوە و هەروەها پێویستی بە بونیادنانەوەو کاڵاو ئاو و خۆراک و شمەکی زۆرە. وەک بینیمان کاتێک وەزیری نەوتی عێراقی لە تورکیا بوو، یەکەم شت وەزیری تورکی هاوتا کردی لێخوڕینی ماشینی کارەبایی تورکی بوو، وەک جۆرێک لە ڕێکلام بۆ کاڵای تورکی لە عێراق. بەڵام عێراق ناتوانێت سازش بکات چونکە حکومەتی چوارچێوەی هەماهەنگی لاوازەو چاوی موقتەدا سەدری بەسەرەوەیە بۆ هەر سازشێک لەگەڵ وڵاتانی تردا، وەک لە کەیسی کوێتدا بینیمان، دەبێتە مایەی ڕەخنەو هێرشی زۆر، بە تاتیبەتی لە سەروبەری هەڵبژاردندا. هەروەها هەبوونی هەڵبژاردنی ناوخۆیی عێراق و تورکیا وەها دەکات کە هەردوولا، نەتوانن واقییعیانە مامەڵە بکەن. بۆ تورکیا، بەتایبەتی لە ڕوانگەی هەڵبژاردنەوەی پرسی شەڕی کورد گرنگە. بۆ عێراق سازش نەکردن. لێرەدا پرسیارەکە ئەوەیە کە ئەگەر هەردوولا خۆیان نەگەنە ڕێکكەوتن چی دەبێت؟ یەکەم، زۆرجار لە ڕۆژهەڵاتی ناوەڕاست کاتێک پرسی وەها دێتە ئاراوە، لایەنێکی نێودەوڵەتی دێتە ناو پرسەکەوە. ئایا ئەمریکا ڕاستەوخۆ دێتە ناو ئەم پرسەوە؟ هەرچەندە ئەمریکا نایشارێتەوە کە پشتیوانی هەناردەی نەوتی کوردستانە، بەڵام لەوە زیاتر هیچ هەنگاوێکی نەناوە. هەمیشە هەوڵ هەیە وەک لۆبی بۆ ئاشتبونەوەی تورکیاو ئەمریکاو پشتبەستنی ئەمریکا بە تورکیا. دوا نوسین لە ڕۆژنامەی هیڵ، کە تایبەتە بە کۆنگریس بەو ئاڕاستەیە بوو. دووەم، گرەو لە سەر مەترسی ڕۆخانی هەرێمە. وەک ئەو نوسینەی لە گۆڤاری فۆرین پۆلسەی کە لەلایەن پارێزەرێکی تورکەوە نوسرابوو، دیار بوو دیسانەوە جۆرێک بوو لە کاری لۆبیی. بەپێی ئەم دیدە، ئەگەر عێراق و تورکیا نەگەنە ڕێکكەوتن و مامەڵەی بەغدا لەگەڵ هەرێمدا باش نەبێت ئەوا مەترسی لەسەر هەرێم هەیە. بە کەوتنی هەرێم دۆخێکی ناسەقامگیریی بەرفراوان لە ناوچەکە دروست دەبێت، بۆیە وڵاتان دەبێت لەم پرسەدا دەستوەردان بکەن. وەها دیارە پارتی قومار لەسەر ڕێکنەکەوتنی تورکیاو عێراق دەکات، کە لە ئەنجامدا وەها دەکات تورکیا جارێکی تر پەیوەندییەکانی لەگەڵ هەرێمدا وەک جاران لێ بکاتەوە. من ئەم ئەگەره‌ بە دوور دەبینم. تورکیا بەهۆی سیاسه‌تە بەرفراوانەکەی دەیەوێت دەستی بگاتە عێراق و کەنداو نەک تەنها هەرێم. لە ڕابردوودا کە ئابوری باش بوو، پەیوەندی لەگەڵ هەرێمدا بەس بوو، بەڵام ئێستا دۆخی ئابوری پرسەکەی گۆڕیوە. بەڵام بەهۆی پشتێنەی شیعەوە، هەروەها بونی ڕکەبەری ئیقلیمی لەگەڵ ئێراندا، تورکیا ناتوانێت بە ئاسانی بەم ئامانجەی بگات.

بەهائەدین محەمەد دەكرێت گرێی ستۆكهۆڵمStockholm Syndrome)  ( بە: سایەی ستۆكهۆڵم،  زادەی ستۆكهۆڵم، شێوازی ستۆكهۆڵم، لێكەوتەی ستۆكهۆڵم و گرێی ستۆكهۆڵم، ئاماژەی پێ بدرێت. ڕووداوێك كە لەستۆكهۆڵمی پایتەختی سوید لەساڵی 1973دا ڕوویداوە، كە دواتر بەگرێی ستۆكهۆڵم ناودێربوو. ڕووداوەكە:    لەستۆكهۆڵم كەسێك  بەناوی (جان ئۆڵسۆن)، چووە سەر بانكێك بۆ دزینی پارە، بۆ ئەنجامدانی كارەكەی دەبوو یا هەڕەشە بكات و ئەوانەی لەبانكەكەدایە بترسێنێت یا بەزۆر دەستبەسەریان بكات. كارەكەی سەری نەگرت و بۆخۆپاراستن (4) كارمەندی بانكەكەی بۆ ماوەی (6) رۆژ بەبارمتە گرت تا بەوهۆیەوە خۆی دەربازی ببێت. كاتێك پۆلیس هات، (جان) بارمتەكانی وەك قەڵغانێك بۆ پاراستنی خۆی بەكارهێنا، سەرئەنجام پۆلیس چووە ناو بانكەكەوە، تا (جان) دەستگیر بكات و بارمتەكانیش لەژێر دەستی دەربهێنێت، بەڵام هەڵوێستێكی نامۆو چاوەڕوان نەكراو ڕووبەڕووی پۆلیسەكان بوەوە، (4) بارمتەكان ڕووبەڕووی پۆلیسەكان بوونەوە، تا نەهێڵن (جان) دەستگیر بكرێت. كاتێك (جان)یش دەستگیركرا (4) بارمتەكە كەوتنە كۆكردنەوەی باربوو، بۆ بەكرێگرتنی (پارێزەر)ێك، تا لەدادگا بەرگری لە(جان) بكات و ئازادبكرێت.كاتێك ئەو هەڵوێستەی كە بارمتەكان نواندیان، لەڕاگەیاندنەكانەوە بڵاوكراوەیە، هاوڵاتیانی سوید بەو هەڵوێست وەرگرتنەی بەبارمتە گیراوەكان تاسان و بەدیاردەیەكی نامۆ بەكۆمەڵگاكەی خۆیان دایە قەڵەم. پۆلیس بارمتەكانیان ناردە نەخۆشخانە بۆچارەسەری دەروونی تا لەڕێگایەوە هەوڵبدرێت، پاڵنەرەكانی ئەو هەڵوێستە نامۆیە بەكۆمەڵگای سویدی، بەرامبەر كەسێك كە بۆتە هەڕەشە بۆ سەر ژیانیان بدۆزنەوە. چۆن گرێی ستۆكهۆڵم سەرهەڵدەدات؟ پزیشكی دەروونی ئەمریكی (فرانك ئۆشبێرگ)، كەوتە هەوڵدان و بەدواداچوون بۆ شیكردنەوەی لۆژیكی و زانستی بۆ ئەو هەڵوێستە دەروونییە كە (4) بارمتەكە تێیكەوتوون و ئەوەشی لەسەر بنەمای چەند پرسیارێك داڕشت: 1-    ئایا بۆچی بارمتەكان، بەرگریان لەتاوانبارێك كردووەو هاوسۆزیان بۆ نیشانداوە، لەكاتێكدا هەم ویستیویەتی دزیبكات و هەم ژیانی ئەوانیشی خستۆتە مەترسیەوە؟ 2-    بۆچی بەرگری لەكەسێك دەكەن، كەویستویەتی دزی بكات و ڕووبەڕووی پۆلیس بۆتەوە؟ 3-    بۆچی بارمتەگیراوەكان، كاتێك پۆلیس تاوانبارەكەی گرتووە، كۆمەكی بۆ كۆدەكەنەوە بۆ ئازادكردن و پاڵنەرەكانی ئەو هەڵوێستەیان چیە؟ پاش بەدواداچوون و توێژینەوە دەربارەی، بابەتەكە (فرانك) وەڵامی پرسیارەكانی بەم شێوەیە ڕوونكردۆتەوە:       هەر قوربانییەك كە دەكەوێتە بەر زووڵم و زۆرو هەڕەشە، لەڕووی دەروونیەوە دووچاری (تاسان) دەبێت و بیركردنەوەی وادەبێت كە ئەگەر مل بەو زووڵم و گوشارانەی ئەوان نەدات لەلایەن ئەوانەوە ڕووبەڕووی مەرگ دەبێتەوە، ئەو ترس و تاسانەش، هۆكارە بۆ تێكچوونی باری دەروونی قوربانیەكان و قوربانی لەو ساتەدا توانای بڕیارێكی لۆژیكیانەی نابێت و مل بەزۆرو هەڕەشەكان دەدات و ئەوان چۆن ئاڕاستەیان بكەن، ڕەفتاریان وادەبێت و تەنانەت دژ بەبەرژەوەندی خۆیان و دژ بەوانەش دەوستنەوە، كە دەیانەوێت هەوڵی پاراستنی گیان و بەرژەوەندیەكانی ئەوان بدەن. حزبی كوردی و گرێی ستۆكهۆڵم بەدرێژایی مێژوو، تا ئەوكاتەی حزبی كوردی لەئارادا نەبووە، ئامانجی بەگژداچوونەوەو خەباتی كورد بۆ بەدەستهێنانی (سەربەخۆیی كوردستان) بووە، كاتێك حزبی كوردی هاتنە ئاراوە ئیتر درووشمەكانیان گۆڕدرا بۆ : (لامەركەزی، حوكمی زاتی، حوكمی زاتی راستەقینە، مافی چارەی خۆنووسین، فیدرالیزم و دواجاریش گەڕانەوە بۆ لامەركەزی)، وەك ئەوەی ئێستا بانگەشەی بۆ دەكەن و دەرخواردی جەماوەرەكەی خۆیانی دەدەن.  ئەوەش ئاماژەیە بۆ ئەو پاشەكشەیەی كە حزبی كوردی لەدروشم و كاریدا پیادەی دەكات، هۆكارە سەرەكیەكەش ئەوەیە كە حزبی كوردی ستراتیژو ململانێی نەتەوەیی لەگەڵ داگیركەراندا گواستۆتەوە بۆ ململانێی ناوخۆیی خۆی. لەجیاتی خەبات و بیری نەتەوەیی، لەهەوڵی بەدەستهێنانی بەرژەوەندی حزبی و بەهێزكردنی پێگە حیزبیەكەی خۆیدایە، هەر حزبێك كە لەمەیدانەكەدایە، لەهەوڵی بەهێزكردنی خۆی و بێهێزكردنی حیزبەكانی تردایەو بەهێزكردنی خۆی لەوەدا دەبینێت، كە دەبێت ئەویتر بێهێز بكات و بەوەش دەلاقەی بۆ پاڵدانە بێگانەو پشت بەستن بەوان وەك جێگرەوەی حیزبەكانی تر كردۆتە ستراتیژی خۆی، ئەو هەڵە ستراتیژیەش هەموو حیزبەكانی ناچاری گەڕانەوە بۆ ناوەند كردووە، ئێستا حیزبی كوردی دووچاری (گرێی دەروونی گەڕانەوە بۆ ناوەند) بووە، بەبێ ئەوەی سەرنجی ئەوە بدات كە لەناوەند: جاران دەوڵەت و حكومەت، زاڵبونی كەمینە مەزهەبێك بووە بەسەر زۆرینەدا، بەڵام ئێستا: - زۆرینەیەكی مەزهەبی دەسەڵاتی گرتۆتە دەست و ئەو زۆرینەیەش گەمەی سیاسی والێك دەداتەوەو كاری لەسەر دەكات كە: - دیموكراسی تەنها بۆ هەڵبژاردن دەوێت (چونكە خۆی زۆرینەیە)، دەنا نایەوێت دیموكراسی  بكاتە كلتورێك بۆ دامەزراندنی، دەوڵەت و حكومەتێك، كە تێیدا پێكەوەژیانی دیموكراسی، بۆ هەمووان وەك یەك بێت. لەبەرئەوەی زۆرینەی بێبەش لەدەسەڵات، تامەزرۆی دەسەڵاتێكی هەتاهەتاییەو بەئاسانی دەستەبەرداری دەسەڵاتی نابێت بۆ ئەوانیترو ئامادەیە شەڕیشی لەسەر بكات. لەعێراقدا بۆچوونی حیزبەكان واكەوتۆتەوە كە : -    عەرەبی عیراق، هیچكات باوەڕی بەدامەزراندنی دەوڵەتی مۆدێرنە نیەو قبوڵیشی ناكات ئەو جۆرە دەوڵەت و حكومەتە بێتە ئاراوە، لەبەر ئەوەی بەمەترسی بۆ سەر دەسەڵاتەكەی خۆی دەزانێت. -    عەرەبی عیراق، هیچ كات باوەڕی بەجیایی ئایین لەدەوڵەت نیە، ئەوە لەكاتێكدایە كە چەندین ئایین و ئاینزایی تر لەو عیراقەدا بوونیان هەیە. -    ئەوەی ئێستا دەبینرێت لەعیراقدا، هەمان بەرنامەو تێڕوانینی دەوڵەتی عەرەبی ئیسلامیە، هەر ئەوەشی لەدەستووردا جێگیركردووە. -    هەروەك چۆن جاران كەمینەی مەزهەبی ئامانجی یەكپارچەیی و هێشتنەوەی ناوەندێكی بەهێز بووە، ئێستاش زۆرینەی مەزهەبی عیراق و حزبە سیاسیەكانی تریش هەر ناوەندێكی بەهێزو سڕینەوەی بۆچوونی چەند هەرێمی لەعیراقدا پیادە دەكەن هەرچەندە دۆخێكی داسەپاو، عەرەبی عیراقی ناچاركرد فیدراڵی هەرێمی كوردستان قبوڵ بكات، بەڵام ئێستا رۆژانە كار لەسەر سڕینەوەی ئەو هەرێمە دەكات، تا ناوەندو دەسەڵاتەكەی خۆی بەهێزو بەهێزتر بكات. لەهەموو بۆنەو یادو ڕووداوێكدا، عەرەب، عیراق وەك (بەشێك لەنیشتمانی عەرەب)، ناودەبات. لە (الوقائع العراقیە 1958 العدد 2، الجمهوریە العراقیە-مگبعە الحكومە)و: لەدەستووری كاتی و لە(بابی 2)دا هاتووە: (عیراق بەشێكە لەنەتەوەی عەرەب). لەمادەی (3)دا هاتووە كە عەرەب و كورد هاوبەشن لەم نیشتمانەدا (بەڵام لەبیریان نەچووە ئەو هاوبەشیەی لێبسێننەوە بەوەی كە بنووسن: (لەچوارچێوەی یەكپارچەیی خاكی عیراقدا). وە لەمادەی (4)ی هەمان دەستووردا هاتووە: ئیسلام ئایینی دەوڵەتە، بەبێ ئەوەی ڕەچاوی ئایین و ئایینزا نائیسلامیەكان بكەن لەو دەستووردا. لەدەستووری 1958دا، عەرەبی عیراق ئەوەی بەدەستی راست داوێتی بەكورد، بەدەستی چەپ لێی سەندۆتەوە بێ ئەوەی حیزبەكان و سیاسیەكانی كورد پێبزانن و ئەوەشی جێگای تێڕامانە كورد بەسیاسی و ناسیاسیەكانیەوە، ئەو قۆناغە بەقۆناغی زێڕین بۆ كورد دەدەنە قەڵەم. تاكی كوردو گرێی ستۆكهۆڵم هەموو گرێیەكی دەروونی، پاڵنەرو هۆكارێكی هەیە بۆ دروستبوون و سەرهەڵدانی، لێرە ئەو هاوڵاتیانەی دووچاری ئەو گرێیە دەبنەوە، بەهۆی دەسەڵات و خۆسەپێنی و ترس و هەڕەشەكانیەوە دروست دەبێت. تاك لێرە بەردەوام سێبەری ترس لەناخیدا بوونی هەیە، لەدەربڕینی هەر وشەیەك ناڕەزاییەك و رەفتارو هەڵسوكەوتیدا، ترسی لەوە هەیە بەدڵی دەسەڵات نەبێت و بەوهۆیەوە دەسەڵات لێی بپێچێتەوە، تەنانەت ئەگەر ئەو رەفتارو هەڵوێستانەش بۆخۆی سەرشۆڕانەو خۆتواندنەوە بێت، لەناو خواستەكانی ستەمكاراندا. لەئاستە توندەكەی (گرێی ستۆكهۆڵم)دا، لەبواری كۆمەڵایەتیدا قوربانی وابیردەكاتەوە كە بۆپاراستنی خۆی و دەوروبەرەكەی، نابێت بەهیچ جۆرێك لەڕووی دەسەڵات و سیاسەتەكەیدا بوەستێتەوە، گەرنا خۆی و ئەوانیش ژیانیان لێ دەشێوێندرێت. هەر وەك ئەو ژنەی بەردەوام مێردەكەی لێیدەدات و ئەمیش ناچارە بەرگەبگرێت، لەبەرئەوەی منداڵەكانی بێ دایك نەبن و لێدانیان بەرنەكەوێت. تاكی قوربانی دواجار دەبێتە دەنگی حیزبەكان و دەسەڵات و چارەنوسی خۆیشی بەحیزبەوە دەبەستێتەوەو وابیردەكاتەوە كە ئەوە حیزبە دەتوانێت لەجیاتی كۆی نەتەوەو نیشتمانەكەی بڕیار بدات، ئەوەی لای ئەو باشبێت، لای گشت هاوڵاتیانی كورد دەبێت باشبێت. ئەوی قوربانی وابیرناكاتەوە كە هیچ حیزبێك لەكوردستاندا ئەندام و لایەنگرانی لەچەند سەد هەزارێك تێپەڕناكات، بەڵام كێشەی نەتەوەو نیشتمانی كوردو كێشەی گەلێكی چەند میلیۆنی و نیشتمانێكی بەرفراوانە. قوربانی هەمیشە حیزب چی دەڵێت ئەویش باوەڕی پێدەكات و دەیڵێتەوە، یەكێك لەوانە چاندنی خۆبەعیراقی زانیە، تا ئەوپەڕی عیراقچێتی، نموونە: هەڵگرتنی درووشمی (دیموكراسی بۆ عیراق)ە، كە دووجار هەڵەیە: یەكەم: ئەو درووشمە دەستوەردانە لەكاروباری ناوخۆی نەتەوەیەكیتر كە خۆی بەباڵا دەست دەزانێت و وابیردەكاتەوە كە ئەو درووشمە دژ بەنەتەوەپەرستیەكەی ئەوەو لەدەسەڵاتی كەمدەكاتەوە. دووەم: ئەو درووشمە دەبێتە باڵا دەستی ئەوانیتریش لەحوكمڕانیداو دیسان بەزیانی ئەوی نەتەوە باڵا دەست دەكەوێتەوە. قوربانی بۆخۆدەربازكردنی لەوگرێ دەروونیە، دەبێت لەبری حیزبایەتی بەرتەسك و كوردتبین، هەنگاو بەرەو سیاسیكردنی كێشەی نەتەوەو نیشتمانەكەی هەڵبێنێت. تاكی قوربانی دەبێت بگاتە ئەو ئەنجامەی كە دۆزو كێشەكەی تەنها كێشەو دۆزێكی مرۆیی نیە، بەڵكو دۆزو كێشەیەكی (نەتەوەیی-سیاسیە)، نەتەوەییە: بەومانایەی كێشەكە هی نەتەوەیەكە نەك چەند حزب و جوڵاندنەوەیەك و داخوازییەكانی بۆ رزگاری و سەربەخۆییە. هەروەها كێشەیەكی سیاسیە: بەومانایەی پایەماڵكردنی مافەكانی نەتەوەو نیشتمانێكەو دەبێت چارەسەرێكی سیاسیانەو دوورمەوداو بەبەرنامەی بۆ دابڕێژرێت و دواجار ببێتە خاوەنی قەوارەیەكی مێژوویی و جوگرافی و كلتوری و سەربەخۆیی خۆی لەچوارچێوەی نیشتمانێكدا رایبگەیەنێت. نەك بەكێشەی حیزبێك و ئایدۆلۆژیایەكی دیاریكراوەوە بیبەستێتەوە. بۆ گەیشتن بەوەش كورد ئەوەندەی ئەگەری ڕەوای بەدەستەوەیە تابتوانێت، دۆزو كێشەكەی لەناوخۆوە پێبگوازێتەوە بۆ دەرەوەی خۆی و داواڕەواكانی پشتیوانی تەواوی لەجیهاندا بۆ پەیدا ببێت. هەنگاوی یەكەم و گرنگیش یەكێتی و یەكڕیزی ناوخۆییە، قوربانی دەبێت بەگوشاری بەردەوام بۆ سەردەسەڵات ناچاریان بكات بێنەسەر ڕێگای كوردبوون و نیشتمانویستی، تا ئەو گرێیەی لەملدەبێتەوە كە هەمیشە ئازاری دەدات.